21
चढ़ेब आन कली अरेशो लोव़
मिनु परमप्रभु यावेमी मोसा कली “हारून आ तौ, चढ़ेब आन कली ‘इन मुर बेक्‍तेक्‍म हना, गेपुकी मेको बेक्‍शो मुर कली थिशा आंम कली ग्रांग्रा दिशो मसेलीन। इजीकीएल ४४:२५-२७ तन्‍न इन आम आफ, तमी तौ नु लोक्‍ब, कन्‍ने दिदी बहिनी आन पर्बम ला आंम इन कली ग्रांग्रा दिशो सेल्‍ने चाप्‍नीनी। मिनु गेपुकीमी ग्‍युंबे पा नक नाता ङा मुर आन पर्बम आंम कली ग्रांग्रा दिशो सेल्‍चा मदुम्‍ब।
गे चढ़ेबपुकीमी रोंका पा, इन चां प्रेक्‍चा, इन गाल शोक्रे आ सुर ख्रोइक्‍चा नु इन रां क्‍योरशा गार सेल्‍चा मदुम्‍नीनी। लेवी १९:२७-२८ इन परमप्रभु कली ला गेय पाइब दुमीन। इन परमप्रभु आ नें ग्रांग्रा दिशो सेल्‍ब मदुम्‍नीम। मारदे हना गेपुकीमी परमप्रभु यावे कली मीम चोशा चढ़ेतीके चढ़ेनीनी। मोपतीके गेपुकी परमप्रभु कली ला गेय पाइब बाक्‍नीनी।
गे चढ़ेबपुकीमी तेल्‍लेम मीश मुर, ग्रांग्रा दिशो मीश मुर नु आ वोंइशेमी प्रोंइशो मीश मुर चाक्‍चा मदुम्‍ब। मारदे हना गेपुकी परमप्रभु आ मुर बाक्‍नीनी। मिनु गे इस्राएलीपुकीमी चढ़ेब आन कली परमप्रभु आ गेय पाइब मिम्‍तीन। मारदे हना मेकोपुकी इन परमप्रभु आ जचा चढ़ेनीम। मेकोपुकी इन पर्बम परमप्रभु आ गेय पाइब दुम्‍शो बाक्‍नीम, दे मिम्‍तीन। मारदे हना इन कली ग्रांग्रा रे ङोन बाक्‍ब सेल्‍ब, गो ग्रांग्रा रे ङोन बाक्‍ब परमप्रभु यावेमी इन कली आं खोदेंशो सेल्‍नुङ।
मिनु चढ़ेब आ तमीमी तेल्‍लेम पा आंम कली ग्रांग्रा दिशो सेल्‍तु हना, मेकोमी आ आफ कली ग्रांग्रा दिशो सेल्‍ब। मेको कली मीम चोशा साइक्‍चा माल्‍ब।
10 मिनु सु आंम लोक्‍ब आन दातेम ठेयब चढ़ेब दुम्‍शो बाक्‍मे, मिनु आ पियाम तेल लुक्‍शो बाक्‍मे नु ठेयब चढ़ेब आ वा फेक्‍चा कली तिल्‍शो बाक्‍मे, मेकोमी रोंका पशा, आ पिया ङा चां प्रेक्‍चा मदुम्‍ब नु आ वा खाक्‍चा मदुम्‍ब। लेवी ८:१२; प्रस्‍थान २८:४१; प्रस्‍थान २९:७; लेवी १०:६; लेवी २१:२ 11 मेकोमी बेक्‍शो मुर बाक्‍तीके लशा, आंम कली ग्रांग्रा दिशो सेल्‍चा मदुम्‍ब। मेको आ आम आफ आ बेक्‍शो रां यो कोव़थ लचा मदुम्‍ब। 12 मेको परमप्रभु यावे आ बाक्‍तीके ताम्‍बु रे ग्रूचा मदुम्‍ब। मोदेंशो पाप्‍तु हना, मेकोमी आंम परमप्रभु आ बाक्‍तीके ग्रांग्रा दिशो सेल्‍ब। मारदे हना मेको परमप्रभु आ तेल लुक्‍शो मुर बाक्‍ब। गो परमप्रभु यावे नङ।
13 मेकोमी कन्‍ने मीश आल कली ला ग्‍युंबे पने चाप्‍ब। 14 आ वोंइश बेक्‍शो मीश मुर, आ वोंइश प्रोंइशो मीश मुर, ग्रांग्रा दिशो कि तेल्‍लेम मीश मुर चाक्‍ने मचाप्‍ब। मिनु मेकोमी आ जात ङा कन्‍ने मीश आल ग्‍युंबे पचा माल्‍ब। 15 मगारचा ङा मीश मुर नु ग्‍युंबे पा, आंम जात नु आंम तमी तौ आन कली ग्रांग्रा दिशो सेल्‍चा मदुम्‍ब। मारदे हना गो परमप्रभु यावे नङ। गो मेको कली आंम मुर सेल्‍ता’ दे शेंदो” दे परमप्रभु यावेमी मोसा कली देंत।
16 मिनु परमप्रभु यावेमी मोसा कली 17 “गे हारून कली ‘इ तमी तौ, चच युइ आन दातेमी गुइ खोइल कुंजे नु दूली मुर आंम परमप्रभु कली चढ़ेब दुम्‍ने मचाप्‍ब। 18 मारदे हना सुइ दूली मुर, मिक्‍च मताइब, खोइल मदुक्‍ब, आ कुल कि रां बिग्रेशो कि खोइल का लाइश्‍शो मुर परमप्रभु आ ङोंइती जाक्‍चा मदुम्‍ब। 19 गुइ जिक्‍शो, खोइल जिक्‍शो, 20 कुप्रे, बामन्‍ने, मिक्‍च रोइ पशो, रक सुतीक रोइ पशो, लुतो पशो कि आ गेडा ठीक मदुम्‍शो मुर आं परमप्रभु आ ङोंइती जाक्‍ने मचाप्‍ब। 21 चढ़ेब हारून आ तमी तौ चच युइ सु दूली दुम्‍शो बाक्‍मे, मेको परमप्रभु यावे कली चोशो चढ़ेतीक चढ़ेने मचाप्‍ब। मारदे हना मेको दूली बाक्‍ब। मेकोम आंम परमप्रभु कली जचा थोव़क चढ़ेचा मदुम्‍ब। 22 मेकोमी आंम परमप्रभु कली चढ़ेशो नु चोव़खो नु थम चोव़खो जचा थोव़क चहिं जने ब्‍वने चाप्‍ब। 23 तन्‍न मेको फारशो वा नु चढ़ेतीक आ नेक्‍था जाक्‍चा मदुम्‍ब। मारदे हना मेको दूली मुर जाक्‍शा, आं बाक्‍तीक ताम्‍बु ग्रांग्रा दिशो मसेलल। गो परमप्रभु यावे नङ। गो मेको आन कली मेको आं के सेल्‍नुङ’ दे शेंदो” दे परमप्रभु यावेमी मोसा कली देंत।
24 मिनु मोसामी हारून, मेको आ तौपुकी नु इस्राएली नेल्‍ल आन कली एको लोव़ नेंपाइक्‍तीमी।