3
ठेयब मुर आन कली हुइश्शो
1 मिनु गो “गे, याकूब आ ठेयब मुरपुकी नु इस्राएली आन खिं ङा हुकुम पाइबपुकी, इन नोफा दाइश्शा नेनीन। गे ठीक निसाफ तुइक्चा ममाल्नीनी ङा? येरमीया ५:५
2 गेपुकी रिम्शो पचा काइ मदाक्नीनी। मिनु मरिम्शो पतीक दाक्नीनी। गेपुकीमी आं मुर आन कुशुल उक्नीनी। मिनु मेको आन रुश रे आन श्ये रिक्नीनी।
3 गेपुकीमी आं मुर आन श्ये ब्वाइतीनी। मेको आन कुशुल उक्तीनी। मिनु रुश टुक्रा टुक्रा पा जिक्तीनी। मिनु बोसुम क्येतीक श्ये खोदेंशो पा मेको आन कली टुक्रा टुक्रा पा चेक्तीनी” देंती। भजन संग्रह १४:४
4 मिनु मेकोपुकीमी परमप्रभु यावे कली पुंइनीम। तन्न मेकोमी मेको आन पुंइशो लोव़ मलेप्ब। आ अरेशो मटितीके मेकोमी मेको आन क्येङा आ कुल ख्रुइक्ब। हितोपदेस १:२८; इजीकीएल ८:१८
5 मिनु परमप्रभु यावेमी आ लोव़ पाइब आन पर्बम मार देंत देंशा हना “सुम आं मुर आन कली दूली लांम गाक्पाइक्बा? आं लोव़ पाइबपुकीमी, सुमी मेको आन कली जचा गेमेनु ‘रिम्शो दुम्ब’ देंनीम। तन्न मेको आन कली जचा मगेमेनु, मेको आन कली लडाइ तोचा कली ठीक दुम्नीम।
6 मोपतीके इन कली मारेइ मततीक नाक्दो दुम्ब। परमप्रभु रे मारेइ मतुइक्चा ङा पा छिङछिङ दुम्नीनी। आं लोव़ पाइब आन कली नां रिक्ब। मिनु नाक्त मेको आन कली छिङछिङ दुम्ब।
7 कोंइतीक ताइबपुकी शिशी मताइनीम। टुना मुना पाइबपुकी मुने दोक्नीम। मेको आन शोव़ सुम्सीचा माल्नीम। मारदे हना परमप्रभुमी मेको आन कली लोव़ मलेप्ब। आमोस ८:१२
8 तन्न गो सक्ति पाइश्शो बाक्नुङ। गो परमप्रभु यावे आ सोक्ती, ठीक निसाफ पतीके नु आ सक्तिम ब्रीशो बाक्नुङ। गो याकूब आ हेंथे पशो नु इस्राएल ङा मुर आन पाप शेंचा कली मोदेंशो दुम्शो बाक्नुङ। यसैया ५८:१
9 याकूब आ खिं ङा ठेयब मुरपुकी नु इस्राएल ङा खिं खिं ङा हुकुम पाइबपुकी एको लोव़ नेनीन। गेपुकीमी ठीक निसाफ पतीक कली ग्रांग्रा दीनीनी। मिनु ठीक लोव़ नेल्ल दूली सेल्नीनी।
10 गेपुकीमी हुश शाइक्पाइश्शा सियोन कली सेल्नीनी। मिनु यरूसलेम कली मरिम्शो पतीकेम सेल्नीनी। हबकुक २:१२
11 मेकेर ङा ठेयब मुरपुकीमी घूस जशा निसाफ पाइनीम। मेकेर ङा चढ़ेबपुकीम शेंशो ङा क्येट ताक्नीम। परमप्रभु यावे आ लोव़ पाइबपुकी क्येट तचा कली नोले दुम्ब लोव़ पाइनीम। मो हना यो मेकोपुकीमी ‘परमप्रभु यावे आंइ दातेमी बाक्ब। गो श्येत मजाइनीकी’ देंनीम। येरमीया ७:४
12 मोपा इन पतीके सियोन वाक्शो रू दुम्ब। यरूसलेम ब्रेश्शो खिं ङा फुल्लु देल्तीके दुम्ब। परमप्रभु यावे आ खिं ङा डांडा ब्वाकी दुम्शो बाक्ब” देंत। भजन संग्रह ७९:१; येरमीया ९:१०; येरमीया २६:१८