4
येसु थाम्चा पुंइसीशो
मर्कूस १:१२-१३; लूका ४:१-१३
1 मिनु नोले सैतान रे पा थुं थाम्चा पुंइसीचा कली परमप्रभु यावे आ सोक्तीमी येसु कली गोरशो रागीमी चाक्दीदा बाक्त। हिब्रू ४:१५;
2 मिनु येसु ४० नाक्दो नाक्त मजथु बाक्माक्त। मिनु ४० नाक्त जाक्दीम्मेनु, शोव़लु बेक्माक्त। प्रस्थान ३४:२८; १राजा १९:८
3 मिनु सैतानमी येसु कली “मार, गे परमप्रभु यावे आ तौ नवे हना, एको फुल्लु आन कली शोब्ले दुमीन देंशा शोब्ले सेलो” देंमाक्त। उत्पत्ती ३:१-७
4 मिनु येसुमी “परमप्रभु यावे आ लोव़मी ‘मुर जशा ला मब्रोंइनीम, परमप्रभु यावे आ देंशो लोव़मी यो ब्रोंइनीम’ दे ब्रेक्शो बाक्त” दे लोव़ लेत्ता बाक्त। ब्यवस्था ८:३
5 मिनु नोले सैतानमी येसु कली यरूसलेम सहर लाइश्शा, परमप्रभु यावे आ खिं ङा नेल्ल क्येङा तारी लदा बाक्त।
6 मेकेर बाक्सानु, सैतानमी “मार, गे परमप्रभु यावे आ तौ नवे हना, एकेर रे प्रेक्को। मारदे हना परमप्रभु यावे आ ब्रेक्पाइश्शो लोव़मी ‘परमप्रभु यावेमी आ स्वर्ग ङा गेय पाइब आन कली सोइश्शा, इ कली आन गुइम ताक्शा खपीम नाइक्पाइक्ब। इ खोइल फुल्लु कामी यो मथोक्ब’ ब्रेक्शो बाक्ब” देंमाक्त। भजन संग्रह ९१:११,१२
7 मिनु येसुमी “परमप्रभु यावेमी ब्रेक्पाइश्शो लोव़मी ‘परमप्रभु यावे कली थुं मथाम्चा’ दे यो ब्रेक्शो” देंमाक्त। ब्यवस्था ६:१६
8 मिनु नोले सैतानमी येसु कली ठेयब लाइश्शो डांडा तारी लदा बाक्त। मेकेर चाक्दीश्शा, रागी ङा नेल्ल राज्यपुकी नु आन दारस कोंइदा बाक्त।
9 मिनु “गे पोक्च थेक्शा, आं कली सेउ पाप्तीवी हना, एको नेल्ल गेनन” देंमाक्त। मत्ती १६:२६
10 मिनु येसुमी “लावो, सैतान। मारदे हना ‘परमप्रभु यावे कली ला सेउ पावो। मिनु ठेयब सेलो’ देंशा ब्रेक्शो बाक्ब” देंमाक्त। ब्यवस्था ६:१३
11 मिनु सैतानमी येसु कली प्रोंइशा लमाक्त। मिनु मार दुम्माक्त देंशा हना, परमप्रभु यावे आ स्वर्ग ङा गेय पाइबपुकी जाक्शा, येसु कली गेय पामे बाक्त। यूहन्ना १:५१; हिब्रू १:६,१४
येसुमी शेंचा गोशो
मर्कूस १:१४-१५; लूका ४:१४-१५
12 मिनु नोले येसुमी “यूहन्ना कली ग्याइश्शा चोक्तेक्म” देंशो लोव़ नेंशा, यहूदीया रागी रे लशा, गालील रागी जाक्दीम्माक्त। मत्ती १४:३
13 मिनु नासरथ रे लशा ङा मिन, जबूलून नु नाप्ताली रागी ङा समुन्द्र आ नेक्था ङा कापेरनाउम सहरम जाक्दीश्शा बाक्माक्त।
14 मोदेंशो पा साइ नेसी परमप्रभु यावे आ लोव़ पाइब यसैया आ लोव़ थमा दुम्माक्त। यसैयामी
15 “जबूलून, नाप्ताली रागी, समुन्द्र आ एर ओंथ रागी, यर्दन खोला आइक्ची हांबु नु अर्को जात ङा गालील रागीमी बाक्बपुकी,
16 ङोंइती छिङछिङम बाक्बपुकीमी मुल ठेयब छेङछेङ ताम्तेक्म। बेक्चा ङा रागी नु हिंशा बेक्चा ङा रागीम बाक्ब आन कली छेङछेङ दुम्त” दे ब्रेक्शो बाक्त। यसैया ८:२३; यसैया ९:१; यूहन्ना ८:१२
17 येसुमी मुर आन कली “इन थुं परमप्रभु यावे गे लेत्तीन। मारदे हना स्वर्ग ङा राज्य जाक्चशो बाक्ब” दे शेंचा गोवा बाक्त। मत्ती ३:२
येसुम शेंसीबपुकी योव़शो
मर्कूस १:१६-२०; लूका ५:१-११; यूहन्ना १:३५-५१
18 मिनु काबु गालील ङा समुन्द्र आ नेक्था गाक्मेनु, माझी वोबु निक्शीम एर ओंथ ग्याइल आप्शा, ङांइ रेन्ना रेन्न बाक्शो ताम्सी बाक्त। मेको निक्शी आस नें का पत्रुस माइश्शो सिमोन बाक्माक्त, का अन्द्रीयास बाक्माक्त।
19 मिनु येसुमी “आं नोले खोइय्यीसी। मिनु मुर आन कली रेप्ब सेल्नन्सी” दे ब्रेत्तीम्सी बाक्त। मत्ती २८:१९-२०
20 मिनु ग्याइल थु था प्रोंइशा, येसु आ नोले खोदसे बाक्त। मत्ती १९:२७
21 मिनु मेकेर रे लशा हिरसमानु, येसुमी जब्दी नु आ तौ याकूब नु यूहन्ना पोबु आन कली तामी बाक्त। मेको सांफा डोंगाम बाक्शा गाक्शो, ग्याइल प्रोव़ना प्रोव़न बाक्मा बाक्त। मिनु येसुमी वोबु आस कली ब्रेत्तीम्सी बाक्त।
22 मिनु आस गेय प्रोंइशा, येसु आ नोले खोदसे बाक्त।
येसुम रोइ पाइब सापाइश्शो
मर्कूस १:३९; मर्कूस ३:७-१२; लूका ४:४४; लूका ६:१७-१९
23 मिनु गालील रागी तेइ तेइ हिरना हिरन लमानु, येसुमी ग्रुम्तीक खिंमी स्वर्ग ङा राज्य ङा ग्येरपाइक्ब लोव़ शेंना शेंन नु रोइ पशो नु रोइमी गुरशो मुर नेल्ल आन कली सापाइक्ना पाइक्न गाक्बाक्माक्त।
24 मिनु सिरीया रागी नेल्ल मेको आ पर्बम लोव़ ब्रम्माक्त। मिनु रोइ पशो मुर नेल्ल आन कली येसु आ बाक्तीकेमी चाक्स ङा चाक्स पाइबाक्मा बाक्त। वोलमी तशो, वोलमी सुम्शो नु गुइ खोइल मदुक्ब मुर चाक्गमे बाक्त। मिनु येसुमी मेको नेल्ल आन कली सापाइक्मी बाक्त। मर्कूस ६:५५
25 मिनु गालील, डेकापोलीस, यरूसलेम, यहूदीया रागी नु यर्दन खोला आइक्ची हांबु ङा शुश मुरुमी येसु आ नोले खोदमे बाक्त।