2
नेहेम्याह आ पुंइशो तशो
1 आरता-सास्त पिप दुम्शो २० बर्स जाक्दीश्शो बाक्त। मिनु काबु निसान महिनामी पिप आ अङगुर शांबु ठीक पा लाइश्शा, पिप कली ख्रेत्ताक्ङ। गो सुर्ता पशो नङ। पिपमी मेको क्येङा ङोंइती आं कली सुर्ता पशो गेनायो मतशो बाक्त।
2 मिनु पिपमी “मारदे इ कुल राव किक्पदी? गे रोइ पशो मबाक्नेवे, इ थुं दोक्शो तांइसीब” देंत। मो देंमेनु, गो शुश हिंती।
3 मिनु “हजुर, गेना हना यो ब्रोंइशा बाक्कीन। आं किकी पिपी आन कली थिम्शो सहर, खतम दुम्शो बाक्ब। मिनु गारो ङा ठेयब लाप्चो मीम दुप्शो बाक्नीम। मिनु गो दोपा सुर्ता मपाइनुङा ङा?” देंती।
4 मिनु पिपमी “गे मार माल्नेवे?” दे हिल्लो पती। मिनु गो आं थुंमी स्वर्गम बाक्ब परमप्रभु कली लोव़ पाता।
5 मिनु गो पिप कली “गे दाक्नीनी नु इन शिशी ताता हना, आं किकी पिपी थिम्शो, यहूदा रागी ङा सहर कली लेंशा सेल्थ सोइक्तीनी” देंती।
6 मेना पिपीम पिप नु निश्शो बाक्त। मिनु पिपमी “मो पचा कली गिश नाक्त माल्नेवे? मिनु गेना लेश्शा जाक्नेवे?” दे हिल्लो पती। मिनु गो आं माल्शो नाक्त देंती। मिनु पिपम आं देंशो बिश्शा लचा गेती।
7 मिनु गोमी पिप कली “गे रिम्शो लाक्नीनी हना, युफ्रेटीस ठेयब खोला आ आइक्ची हांबुमी सासन पाइब मुर आन कली, आं कली यहूदा रागी सम्म ग्रीशा लचा गेचा कली ब्रेक्स का ब्रेक्शा गेयीनी।
8 मिनु परमप्रभु यावे आ खिं आ नेक्था ङा बोल्यो खिं कली लाप्चो कली, सहर ङा गारो ङा ठेयब लाप्चो आन कली, नु आं बाक्तीक खिं कली शी माल्नुङ। इन ब्वाकी कोव़ब आसाफ कली आं माल्शो शी गेचा, दे यो ब्रेक्स का ब्रेक्शा गेयीनी” दे पुंइता। मिनु पिपमी आं पुंइशो नेल्ल गेती। मारदे हना आं परमप्रभु आ शिशी आं तारी बाक्त। एज्रा ७:६
9 पिपमी आं कली वारच पाइक्चा कली सिपाइ आन ठेयब मुरपुकी नु शारा ङोइक्बपुकी यो गो नु काथा सोइक्ताक्व। मिनु युफ्रेटीस, ठेयब खोला आ आइक्ची हांबु ङा ठेयब मुर आन बाक्तीक जाक्दीश्शा, पिप आ ब्रेक्सपुकी गेतामी।
10 मिनु होरोनी सान्बल्लत नु आ गेय पाइब अम्मोनी तोबीयाह, निम्फा “इस्राएली आन कली रिम्शो पाइब का जाक्शो बाक्ब” देंशो नेंशा, थाम्पा चुरताक्स।
नेहेम्याह यरूसलेम जाक्शो
11 मिनु गो यरूसलेम जाक्शा, नाक्त सां सम्म मेकेर बाक्ती।
12 मिनु नोले गो नाक्दो बोक्शा, का निक्शी मुर नु गारो कोव़थ लती। तन्न आं परमप्रभुमी आं थुंमी यरूसलेम आ पर्बम वोइश्शो लोव़ सुइ आन कली मशेंदुमी। मिनु गो आं ङोइश्शो शारा ङा लाक्शा, अरु शारा मलदु।
13 मेको नाक्दो गो बेंसी लाप्चो रे ठेयब बुस्स माइश्शो ब्वाक्कु बुक्तीके नु मोव़ल लाप्चो गे लती। मिनु यरूसलेम ङा ब्रेश्शो गारो नु मीम दुप्शो ठेयब लाप्चोपुकी कोव़तामी।
14 मेकेर रे पा ब्वाक्कु बुक्तीक लाप्चो नु पिप दोम्ली गे लती। तन्न आं शारा कली गाक्तीक लां मबा। नेहेम्याह ३:१५
15 मिनु गो मेको नाक्दो बेंसी रे ग्येत्थ ङोइश्शा, गारो कोव़तामी। मिनु लेश्शा, लेंशा बेंसी लाप्चो रे सहर जाक्ती।
16 मिनु सहर ङा ठेयब मुरपुकीम गो ते लङा नु मार पङा, मारेइ मतुइक्तेम। मारदे हना गो मेना सम्म यहूदी, चढ़ेब, मान ताइब, ठेयब मुर नु अरु आन कली मारेइ मशेंदुमी।
नेहेम्याहमी मुर आन थुं बारपाइश्शो
17 मिनु मेको नोले गो सहर ङा मुर नेल्ल आन कली “गे गो आंइ खतम दुम्शो नेल्ल तुइक्नीनी। यरूसलेम यो खतम दुम्शो बाक्ब। मिनु गारो ङा ठेयब लाप्चोपुकी मीम दुप्शो बाक्नीम। लो, गो नेल्ल गारशा, यरूसलेम ङा गारो सेल्शा, आंइ मुने साम्य” दे माइक्तामी।
18 मिनु आं परमप्रभु आ शिशी आं तारी बाक्तीके नु पिपमी आं कली देंशो लोव़ यो मेको आन कली शेंताक्ङमी। मिनु मेकोपुकीमी “लो, गो एको गेय पय” दे ग्येरशा, आन थुं बारपाइक्तेक्म।
19 मिनु होरोनी सान्बल्लत, आ गेय पाइब अम्मोनी तोबीयाह नु अराबी गेशेममी चहिं एको लोव़ नेंशा, आंइ कली शुक्शी पा ठेयब लेश्शा “गे मार पाइनीनी, हां? पिप आ सासन प्रोंइचा माल्नी?” दे हुइक्ताक्की।
20 मिनु गो मेको आन कली “स्वर्गम बाक्ब परमप्रभुमी आंइ कली गारो सेल्चा गेब। मिनु गो परमप्रभु आ वाइलपुकीमी गारो प्रोव़नीकी। यरूसलेममी इन खिं मबाक्ब, एकेर मारेइ यो पशो मबाक्नीनी। मिनु इन कली ते खाइक्नी?” दे मेको आन कली माइक्तामी।