3
निनवे कली सजाइ
1 मिनु निनवे, गे हुश ख्राक्श पोक्ब सहर बाक्नेवे। इ दातेम शुश जोल पतीके बाक्ब। गे रोइश्शो थोव़कीम ब्रीशो बाक्नेवे। इ दातेमी रोइक्तीक गेनायो मनुप्ब। इजीकीएल ६:२,९
2 मेकेर युक्शो रेयके, गुगील आन रेयके, शारा आन प्रेक्शो रेयके नु बग्गी आन दोरशो रेयके नेंसीशो बाक्ब।
3 शारा ङोइक्ब दोरोर पा गाक्नीम। आन टल्केशो तरवार शेशा, आन तूतीक झिल्झील पा कोंइनीम। बेक्शो मुर शुश बाक्नीम। हिक्ने मचाप्चा ङा पा साइश्शो मुर बाक्नीम। मुर शोल्मो पा साइश्शो बाक्नीम। मुरपुकी बेक्शो मुर तार दाइल पांइसीन सीन गाक्नीम।
4 मेको तेल्लेम खोदेंशो सहरम हिक्ने मचाप्चा ङा पा मरिम्शो पतीकेमी रागी रागी ङा मुर आन कली आ खोदेंशो पपाइक्तीमी। रिम्शो मीश मुर नङ, देंखु पा, आ टुना मुना पतीकेमी जात जात ङा मुर आन कली दूली लां खोइक्पाइक्तीमी।
5 मिनु मुर नेल्ल आन परमप्रभु यावेमी “गो इ कली काइ मदाक्थु, इ पर्बम बोक्ती। गो इ गुने इ कुल सम्म क्युक्नुङ। मिनु रागी रागी ङा मुर आन कली इ भेत्रे रां कोंइनुङमी। राज्य राज्य ङा मुर आन कली इ मुने दोक्तीक कोंइनुङमी। यसैया ४७:३
6 गो ग्रांग्रा दिशो थोव़क इ तारी ताइश्शा, इ कली थम मरिम्शो पाइनुङ। मिनु इ कली तशा मुर हिंतीक सेल्नुङ।
7 मिनु इ कली ताइब नेल्ल इ क्येङा हिंशा, नोले शोंइसीनीम। मिनु मेकोपुकीम ‘निनवे खतम दुम्त। मेको आ पर्बम सु रोंका पाइबा ङा? गो इ कली लेम्ब मुर ते थिन्ने चाप्नया ङा?’ देंनीम।
निनवे आ खतम दुम्तीके
8 मार, गे थेबेस सहर क्येङा यो रिम्शो बाक्नेवे? मेको सहर नील खोला आ नेक्था बाक्शो बाक्ब। आ एर ओंथ नेल्ल ब्वाक्कु बाक्ब। मिनु मेको ब्वाक्कुमी मेको कली खाल पशो बाक्ब। मेको ब्वाक्कु गारो खोदेंशो बाक्ब। येरमीया ४६:२५
9 एथीयोपीया रागी मेको आ सक्ति बाक्त। इजीप्त गेना हना यो आ सक्ति बाक्त। पूत नु लिबीया ङा मुर मेको कली वारच पाइब बाक्तेक्म।
10 मो हना यो मेको ग्याइश्शा ग्रुंइचा पुंइसाक्व। मेको आ आलपुकी लांम ताइश्शा साइक्चा पुंइसाक्म। आ ठेयब मुर आन कली बाजी आप्शा लाइक्तेक्म। मिनु मेको आन नेल्ल क्येङा ठेयब मुर नेल्ल साङलोमी फ्रेंचा पुंइसाक्म। योएल ४:३
11 गे यो दुक्शो दुम्नेवे। मिनु ख्रुइक्थ लाइनेवे। मिनु इ जोरी सत्रु रे पा ब्रोंइचा कली ख्रुंइसीतीक माल्नेवे। येरमीया २५:१५
12 इ बोल्यो दरवार नेल्ल फोव़शी रवा आ ङोंइती मीशो गेडा खोदेंशो बाक्नीम। मेको रवा हिम्शोनु, मेको ब्वाइब आन शोव़मी दोक्नीम।
13 इ लडाइ पाइब आन कली कोव़ङो। मेको मीश मुर खोदेंशो बाक्नीम। इ रागी ङा ठेयब लाप्चो इ जोरी सत्रु आन कली रोक्सीशो बाक्नीम। लाप्चो आन आग्लो नेल्ल मीम नेक्शो बाक्नीम।
14 गे पुम्चा पुंइसीनेवे। मेको नाक्ती कली ब्वाक्कु प्रिंशा वोतो। इ गारो बोल्यो सेलो। हिलो निशा, इंटा सेलो।
15 मेकेर इ कली मीम दाक्ब। तरवारमी इ कली साइक्ब। मिनु मालेपुकीम मार मार नेक्शो खोदेंशो पा इ कली नेक्ब। गे माले खोदेंशो पा सोशो बोशो दुमीन। मिनु घांस ब्वाइब माले खोदेंशो पा सोशा बोशा शुश दुमीन। योएल १:४
16 गे सरीङ ङा सोरुल क्येङा इ ग्याप्ब लेयब मुर शुश सेल्तीवी। मेको माले खोदेंशो पा आन कुशुल ताइश्शा बेरनीम।
17 इ कली खाल पाइब घांस ब्वाइब माले खोदेंशो बाक्नीम। मिनु इ सरकार ङा ठेयब मुर माले आन हुल खोदेंशो बाक्नीम। मेको ग्यू दुम्मेनु, गारो तार बाक्नीम। मिनु नां पवानु, मेको नेल्ल बेरशा लाइनीम। मेको ते लाइनीमी, सुइमी मतुइक्नीम।
18 अस्सुर ङा पिप, इ गोठलापुकी इप्शो बाक्नीम। इ ठेयब मुरपुकी नाइश्शा गोल्शा बाक्शो बाक्नीम। इ मुर नेल्ल डांडाम ब्रशो बाक्नीम। मिनु मेको आन कली खुप्ब सुइ मबाक्नीम।
19 इ गार कली मारेइम यो सापाइक्ने मजाप्ब। इ गार बेक्चा ङा बाक्ब। मिनु इ पर्बम लोव़ नेंब मुर नेल्ल शुश हिंनीमी। मारदे हना इ गेनायो मनुप्ब मरिम्शो पतीकेमी सुइ ब्रोंइने मचाप्शो बाक्तेक्म” देंत।