फिलेमोन
ब्रेक्ब मुर: एको चिठी पावलमी फिलेमोन कली ब्रेक्शो बाक्ब।
गेना ब्रेक्शो: पावल रोम सहर ङा जेल्खानम बाक्शा ६२ ए. डी. नुप्ची ना कि ६३ ए. डी. गोची ना ब्रेक्शो बाक्ब।
मारदे ब्रेक्शो: एको चिठीमी ठेयब शेंतीके मबाक्ब। फिलेमोन आ वाइल ओनेसीमस प्रोक्शो बाक्त। मेकोमी पावल कली रोम सहरम ग्रुम्शा, थमा सुइक्ब दुम्शा, मुल आ होव़प आ खिं लेत्चा चिक्शो बाक्त। एफिसी नु कलस्सी कली चिठी कुरबपुकीम एको चिठी यो चाक्शो बाक्तेक्म। फिलेमोन आ खिं यो कलस्से सहरम बाक्त।
1
ङोंइती ङा लोव़
1 ख्रीस्त येसु आ नेंमी जेल्खानम चोक्चा पुंइसीशो पावल नु इं लोक्ब तिमोथी गो निक्शीमी एको चिठी ब्रेक्ताक्स्कु। एको चिठी सु सु इन कली ब्रेक्ताक्स्कु देंशा हना, गो नु गारशा गेय पाइब इं दाक्शो फिलेमोन, एफिसी ३:१
2 इं समी आप्पीया, पल्टन कामी बाक्शा गाक्शो खोदेंशो दुम्शो अरकीप्पस नु फिलेमोन आ खिंमी देल्ब थमा सुइक्ब नेल्ल इन कली ब्रेक्ताक्स्कु। कलस्सी ४:१७
3 इं आफ, परमप्रभु यावे नु प्रभु येसु ख्रीस्तमी इन कली शिशी पा इन थुं नाइश्शा बाक्चा गेम्सेक्ल।
प्रार्थना पशो
4 आं दाक्शो लोक्ब फिलेमोन, गो इ पर्बम प्रार्थना पङानु “फिलेमोन कली रिम्शो पपाइक्तीनी” दे परमप्रभु यावे कली ठेयब सेल्नुङ।
5 मारदे हना गे थमा सुइक्ब नेल्ल आन कली शुश दाक्शो नु इ येसु ख्रीस्त कली थमा सुइश्शो आ पर्बम नेंता।
6 इ थमा सुइश्शोमी रिम्शो गेय शुश पाइनेवे। मिनु दोपा रिम्शो गेय पवी, मोपान परमप्रभु यावेमी ख्रीस्त कली तुइक्तीके बारना बारन लपदल, दे प्रार्थना पाइनुङ। फिलिप्पी १:९
7 आं लोक्ब, इ पशोमी थमा सुइक्ब शुश आन थुं नाइक्चा ताम्तेक्म। शुश आन थुं बारना बारन लत। इ कली मोदेंशो रिम्शो पशो तशा, गो यो आं थुं नाइश्शा ग्येरसाक्यी। २कोरिन्थी ७:४
इम्चीली लोव़ देंशो
8 गो ख्रीस्त आ नें आ पर्बम इ कली मारेइ अरेतीक अधिकार तशो नङ।
9 तन्न गे मुर आन कली दाक्शा शिशी पाइनेवे, आं देंशो यो टीनेवे, दे तुइश्शा, अधिकार कोंइचा ममाल्दी। गो ख्रीस्त येसु आ पर्बम जेल्खानम चोक्चा पुंइसीशो खाल्पा पावलमी इ कली इम्चीली लोव़ का माइक्नन।
10 जेल्खानम बाक्ङानु, ओनेसीमस कली ग्रुम्ता। मेकोमी थमा सुदा रे आं दाक्शो तौ दुम्त। गो थमा पोबु दुम्तस्कु। कलस्सी ४:९; १कोरिन्थी ४:१५; गलाती ४:१९
11 साइ इ खिंमी बाक्मेनु, आ गेय रिम्शो मपथु, शोर गाक्शो बाक्माक्त। मुल आं कली शुश वारच पाइक्ती। मुल ङा मेरे इ थुं नुपाइक्चा ङा गेय पाइब, दे तुइश्शा, इ खिं लेश्शा सोइक्ताक्ङ।
12 मेको कली सोइश्शो ला ममाइ, पावलन जाक्शो मिम्तो।
13 ख्रीस्त आ लोव़ शेंशो आ पर्बम जेल्खानम चोक्सीशा बाक्ङानु, ओनेसीमस इ पा ङा आं वारच सेल्चा थुं पाता। फिलिप्पी २:३०
14 गेमी गेय पपाइश्शा वोतो, दे मदेंने सम्म मवोदु देंशा, सोइक्ताक्ङ। वारच पाइय्यीनी मदेंथु, वारच पाइतीनी हना, गो ग्येरसीनुङ। २कोरिन्थी ९:७
15 ओनेसीमस इ खिं रे प्रोक्शा, नाक्त का निक्शी गाक्शो रिम्शोन दुम्त। मारदे हना येसु ख्रीस्त आ लोव़ रुप्शा, गेना हना यो इ खिंम बाक्ब दुम्त।
16 मुल ङा मेरे मेको कली वाइल ममिम्थु, आंम क्यी का ङा लोक्ब मिम्तो। प्रभु आ नेंमी यो लोक्ब मिम्तो। मिनु मोदेंशो लोक्ब दुम्शोनु, गेनायो मब्रासीब। १तिमोथी ६:२
17 मोपतीके वारच मिम्ताक्यी हना, आं कली ब्रशो खोदेंशो पा ओनेसीमस कली ब्रावो।
18 साइ इ कली मरिम्शो पशो बाक्त हना यो, इ कली मेकोमी मारेइ थाप्चा माल्शो बाक्त हना यो, मेको नेल्ल गो गारपाइक्नुङ।
19 एको लोव़ गो पावलमी आंम आं गुइमी ब्रेक्ताक्ङ। लोव़ थोक्शा, मार थाप्चा माल्शो बाक्मे, मेको नेल्ल थाप्नुङ। तन्न गोमी साइ इ कली वारच पशो यो मिम्चा माल्नेवे, दे इन कली देंनुङ।
20 आं दाक्शो लोक्ब, प्रभु आ नेंमी गो निक्शी वोबु दुम्शा बाक्स। ख्रीस्त आ दाक्शो पा आं थुं बारपा ग्येरपाइय्यी।
21 गे आं लोव़ नेंशा टिशा, आं देंशो क्येङा यो शुश रिम्शो पाइनेवे, दे तुइश्शा, एको लोव़ ब्रेक्ताक्न।
नोले ङा लोव़
22 इ खिंमी इप्तीक बाक्तीक बास फिक्शा वोतो, मारदे हना गेपुकीमी “पावल जेल्खान रे ग्रूचा तवल” दे प्रार्थना पाइनीनी, दे तुइश्शा, ग्रूचा ताइनुङ, दे आस पा बाक्ती। फिलिप्पी १:२५; फिलिप्पी २:२४
23 ख्रीस्त येसु आ नेंमी जेल्खानमी काथा बाक्ब इपाफ्रासमी इन कली “रिम्शो बाक्कीन” देंत। कलस्सी १:७; कलस्सी ४:१०-१४
24 गो नु काथा गाक्ब येसु आ लोव़ शेंब मर्कूस, अरीस्तारकस, डेमास नु लूकामी यो इन कली “रिम्शो बाक्कीन” देंतेक्म।
25 प्रभु येसु ख्रीस्त आ शिशी इन थुंमी लील।