2
1 Na eau egu aipate adidiri bena tabu ma nuaporohegu ea uiowa arimiu eai.
2 Paana ena ea henuadubumiu, eai abo tauhekodegu na ia ea henuadubu wa?
3 Riba esega ta ea uri arimiu eai, ata egu huia laoma eai isi bena se hekodegu wa, abo nuadubu mo ea lobai aridi eai, paana egu nuatu adidiri bena egu kode abo i hemala gamagarimiu emi kode.
4 Paana amamna lailai eo nuakalapi eai enamiu ea uuri wa, ma‐matasulugu, nige bena nuamiu ea heamamnadi, na bena egu gadosisi lailai‐aririna arimiu eai au ita.
5 Ena esau i henuadubuda, nige eaubom na ita gamagarida i henuadubuda ede — ea riba ina doha, nige ea henua ea heporoheaririemiu.
6 Tatao maudoidi ena tau ta se hemaisa, meta gonoana ede;
7 abotai i lolo ena baaea au nuatugabaei, ia au taubigai, ata ena nuadubu lailai abo i oitawai.
8 Arinai ea aibodaimiu ta emi gadosisi bena au hemasarahauioi ia arinai.
9 Hinage egu uriuri wa matapaana esau, bena ea lauitamiu, ginauri gamagaridi eai au awaabi, e nige’e?
10 Eai ena baaea omi au ribagigiri, eau hinage ea ribagigiri. Ena saha eau ea ribagigiriyao, omi debamiu eai meta, eo Keriso matana eai,
11 ata diabolo ena sorasora i lobai abo i saepoida; ena sanapu wa ita nige ta hekaudi.
12 Huia ne ea laoma Toroasi eai wa, Keriso ena evanelia bena ea guguiai, Guiau egu dobila i soeauri matagu eai;
13 na nuagu nige i taru, paana egu tau Tito ea eooasa‐eai. Arinai ea lauaioniedi ea torohaigabaedi ea lau Makedonia.
14 Na Eaubada ta aitoiei, ia huia gamagari i woeawoeaida ta adidiri‐daoi Keriso boeana eai, eo ita debada eai italobaina i tadada eo i masaraha tupo gamagari eai.
15 Paana ita doha Keriso panena lolona ede, Eaubada arinai, eo mauri taulobaina boeadi eai, eo isi ma‐matematedi boeadi eai hinage;
16 esau arinai doha mate panena, i lau e mate; esau arinai doha mauri panena, i lau e mauri. Ina ginauri ta, eai abo gonoana?
17 Paana ai nige doha headi, Eaubada ena riba se abi doha edi uneune; ai nuatu mamohoi tataomai, Eaubada i tauribaemai, eo Eaubada matana eai ai ribariba, Keriso boeana eai.