7
1 Egu nuanuai e, ribahesunuma ta ta abidio, besi bulumada eo earuada aba‐hebiidi maudoidi aridi eai ta heaauioida, ta hetabuuioida, eda lolo ta abiheohi, Eaubada matausina eai.
Paulo nuana mamohoi ta ita.
2 Nuamiu au soedima arimai eai; ai nige tau esau ai hebaaea, nige esau ai heata‐ponori, nige esau arinai ai helolouioimai.
3 Egu riba eai ta nige bena ea hegirumiu paana doha ea ribaeyao, ai abimiu nuaboeamai eai, ta mate esega e ta mauri esega.
4 Ea sunuma‐aririemiu, egu ribapasipasi lailai omi; henuabiga eai ea monau. Ema amamna gamagaridi boeadi eai ea kode ariariri.
5 Huia ne aie lage Makedonia wa, taumai nige edi abaaiyawasi, tupo gamagari eai amamna ai hearodi — murimuri eai haiabi eo boea eai matausi.
6 Taiede, Eaubada taunuadobidobi i henuabigadi, ia i henuabigamai hinage Tito ena laoma arinai.
7 Nige ena laoma mo, na nuabiga arinai omi au henuabigaei wa, wasana i heribamai emi gadosisi, emi dou, emi nuagigibori eau arigu eai, meta egu kode i helai ariri.
8 Mamohoi egu leta eai ea heporohemiu, ia mo nige ribana ea bui (nuagu eai mo ea bui), ea nuatui leta wa i heamamnamiu, na huia kuukuuna eai mo.
9 Abotai ea kode, nige paana ea heamamnamiu, na paana emi nuaamamna i hemala nuabui; nuaamamna tabuna meta, bena tabu ginauri esau au hedeha ai debamai eai.
10 Nuadubu Eaubada nimana eai i hemala nuabui, i woeaida e ta mauri; nuabui ta arinai taba nige ta uio. Tanoubu nuadubuna mate mo i hepaisoaei.
11 Au ita wau nuadubu Eaubada i leawa wa, debana eai au aipate ariri, au mode ariri bena au heduduraiuioimiu, au riba adidiri, au tagugu, au laukapore, nuamiu tai se gigibori, au hemaisauioimiu! Ginauri gamagaridi aridi eai emi nima‐aa, baaea wa arinai, au hemasaraha‐auri.
12 Enamiu ea uri wa, nige tau wa baaea i hetubu debana eai mo, eo nige baaea wa tauhearona debana eai, na bena omi emi nuagigibori arigu eai i masaraha, Eaubada matana eai.
13 Arinai ede nuamai se taruo.
Hinage ema kode ie lai, paana Tito ena kode aie ita, omi gamagarimiu earuana au heharihariu.
14 Egu ribapasipasi debamiu eai ia ea heribayao, na nige au hetaumaeamaeagu; doha riba gamagaridi ai lediwa isi ede mamohoi, ema ribapasipasiemiu hinage Tito i lobai, mamohoina.
15 Ena gadosisi arimiu eai i lai ariri, paana emi awaabi ena riba arinai i henuhenuaisini doha ma‐matausimiu, ma‐tabutabubumiu, ia au oiyami.
16 Eau ea kode, paana ginauri gamagaridi aridi eai ea sunumaaririemiu.