PETERO ENA URIURI BAGUBAGUNANA
1
Tauataiena ena amamna eo ena laulau, ena mauri i abiheohi.
1 Petero, Iesu Keriso ena aposotolo, tau miamiasuara se tatagorigori tupo gamagari eai, enadi ina: Pontasi, Galatia, Kapodokia, Asia eo Bitinia eai,
2 Eaubada Tamada i hinerimiuo, emi dobila i nuatuiyao, ia Earuana eai i hetabuemiu bena Iesu Keriso au awaabiei, eo ia osinana potamiu eai se hetaru: Ainauiana enamiu, eo loni se helaiyawa.
3 Eaubada ta hedebasaei, eda Guiau Iesu Keriso Tamana! Ena nuatoatoa saesae‐aririna se laba‐heharihariuda sunuma maumaurina eai ta, Iesu Keriso mate eai se hetorouioi wa debana eai,
4 eo eda gogo taba nige i posa, taba nige abahebiina, taba nige i tauyamui, galewa eai se gorai enamiu;
5 omi wa, Eaubada ena gigibori i abididinimiu, emi sunuma debana eai, i lau e mauri au abi, enamiu se torenonohai wa, huia murimuritana eai abo se hemasaraha.
6 Arinai ede au kode lailai, abo‐ina ata bena nuamiu se porohe, paana huia kuukuuna noho gamagaridi se hesabaemiu ina;
7 emi sunuma lauitana, ginauri maisa lailaina, gold oeagi alaalasi eai se gabu taiede abo i tauyamui, maisana nige i lai doha, emi sunuma wa Iesu Keriso aba‐hedebasaena ede, abaaihelahuina, namanamarina, ena huia taumasaraha eai.
8 Ia nige aue ita, na au gadosisiei; abo‐ina nige au itaitai, ia mo au sunumaei to au kode, emi kode lailaina taba nige ta ribaei, namanamarina i monau.
9 Emi sunuma uauana aue abi, iaede earuamiu se mauri.
10 Mauri ta peroveta se hetala, se eoo adidiri, ainauia abo i laowa arimiu eai ta isi se riba‐perovetaiyao.
11 Se eooeoo, edohana eo aitea huiana Keriso Earuana boeadi eai wa i ribaei, huia ne Keriso ena amamna i hemasaraha‐nonohaidi, eo hedebasaena, bena abo i tubu murita wa.
12 Aridi eai se hemasaraha, nige isi enadi, wau ginauri wa omi enamiu ede, evanelia wa taulaulauguguiaina awadi eai aue abi, Earua Tabuna galewa eai se hetamariama debana eai. Teina ginauri ta aneru se henua ariri taba se itasipoidi.
13 Arinai nuamiu au taididinidi, au mia‐komakomani, ainauia abo au abi wa, Iesu Keriso ena tau‐masarahauioina eai, au sunumaei i lau e ana siga.
14 Doha merumeru awaawaabi emi gadolelehi beabeadi tabu au patuwataidi, doha bagubaguna ma‐supusupumiu eai,
15 na doha tau‐eogaimiu ia tabuna ede, bena omi hinage tabuna, emi miamia maudoidi eai;
16 doha se uriyao, “Omi abo tabuna, paana eau tabuna ede.” (Lev. 11.44-45.)
17 Na ena Tamana esana au ataatai, ia tatao nige i heasisiedi, gamagaridi edi paipaisoa abo i nonoi‐itadi, besi emi huia miasuara eai ta ma‐matausimiu au miamia.
18 Doha ede au nuatuiyao, nige ginauri posaposadi doha gold e silver aridi eai se une‐hemaurimiu, nabada emi miamia gaibu wa tamamiuyao edi kamani au miamiawataidi,
19 na Keriso osinana maisa‐lailaiaririna eai, doha mamoe nige baaeana begana, nige gaina.
20 Mamohoi tanoubu sora nige ie tubu, ia ena dobila se tore‐nonohaiyao, abotai, huia murimuritana eai ta, omi debamiu eai se hemasaraha.
21 Ia debana eai Eaubada au awamamohoiei, mate eai i hetorouioi wa eo i hedebasaei iabom namanamarina eai; bena emi sunuma eo emi laubagibagi Eaubada arinai abo se otahai.
22-23 Paana omi earuamiu au heaadio, mamohoina wa au awaabiei, Earua debana eai, i lau e i hemala emi gadosisi mamohoi eda tataoyao aridi eai. Arinai besi au haigadosisiuioimiu, ma‐nuaaamiu, ma‐nuagigiborimiu. Se labaheharihariumiu, nige tuma posaposana eai se hetubumiu, na tumana taba nige i posa, Eaubada ena riba eai, maumaurina ede i laulau, eo i miatahitahi i lau e nige nosina;
24 na
“Buluma gamagamagari iaede doha lagau
eo tau ena lolo maudoina doha lagau liasina.
Lagauna abo i wowoea, liasina abo se uru,
25 na Guiau ena riba mo abo i otahai, ana huia, ana tasi.” (Is. 40.6-9.)
Riba ta ede wasa lolona, arimiu eai se guguiai wa.