4
Arinai doha Keriso, ia bulumana eai amamna i hearo wa ita debada eai, omi bena nuamiu doha, au henuapaipaiuiomiu, paana ena esau bulumana eai mamohoi amamnana i hearoyao, ia baaea arinai i lautomo, ena mauri asubenadi eai taba nige buluma i miawatai, tatao lelehidi eai, na Eaubada ena nuatu mo abo i miawatai. Huiadi se lauo arinai gonoada Murimuri‐tataodi edi henuhenu ta ginauriwataidi, huia ne matamatae’o eo buluma lelehidi eai ta laulau, eo wine nomnom‐daoina eai, eo laulau gaibu miamiana, eo mataasi aiaina, eo oitau tabaohuna abiabidi biibiidi. Huia ta se heunaboisaha, si ene paana saha nige maediyao au aitautau esega, laulau eai ta au gabauioimiu eo abidaoina eai au dio, arinai se riba baaeaimiu; ia mo edi mauri aniona abo se toro se wasawasaei ia wa matana eai, ia i nonoha wa tau‐maumauri eo tau‐matemate i heduduraidi. Teina matapaana eai ta evanelia se guguiaei tau‐matemate aridi eai hinage, bena tatao bulumadi mamiadi eai nonoidi eai abo se nonoidi, na earuadi eai Eaubada ena nuatu se miawatai.
Ginauri gamagaridi edi huia sigasigana i hanahanaumao; arinai omi bena au miakomakomani, eo uura arinai au silasilawahetete. Teina mo i sae ariri, omibom boeamiu eai emi hai‐gadosisi eai bena au gigibori, paana gadosisi, baaea peina lailaina abo i bubulitawai. Emi numa‐alo au soeauridi, esa, esa, au abi‐taumanaidi, tabu emi haitala au nuanuahidi. 10 Tau esa to esa Eaubada ena ainauia ie abi, iaede bena i hepaisoaei ena doga arinai, abo Eaubada ena ainauia udoi udoi omi doha tauhepaisoaina lolodi: 11 esau i ribahasahasa, taba i riba doha Eaubada ena sanapu saesaedi i ribaribaedi; esau ena i heayai, taba i abi doha ia adidirina Eaubada i moseyao; bena ginauri gamagaridi eai Eaubada abaaihelahuina namanamarina ede, Iesu Keriso debana eai, ia arinai hedebasaena, eo awa‐tanuaga gigiborina, i lau e nige nosina. Amen.
12 Egu nuanuai e, lauita alaalasina i lauitaimiu ta, tabu au heunaboisahaei, doha ginauri hekahekauna boeamiu eai ie tubu. 13 Na au kode mo, paana Keriso ena amamna tupona omi au hearo, sora ia namanamarina huia hemasarahana eai, omi abo nuamiu se amna, eo au kode ariariri. 14 Ena se riba‐baaeaimiu, taiede au kode; paana namanamari earuana potamiu eai ie taru ede, eo Eaubada earuana. 15 Na tabu omi esau se hegirumiu si ene ia doha tauaiunu e tauaiyahari, e taulaulaubaaea, e tau‐modegaibu hari tatao adi paisoa eai; 16 taiede ena tau esau giru i hearo paana ia * Keriso‐tauna, tabu i taumaeamaea, esana eai se hegiru wa arinai taba Eaubada i hedebasaei mo. 17 Huiana hede i lagemao hetala ie tubu ede Eaubada ena numa boeana eai; ena ita arida eai i tubu baguna, isi abo edohadi ena taba Eaubada ena evanelia nige se awaabiei? 18 Eo, “Ena tau‐laulaududurai mauri taba nige i abi gaibui, Eaubada tau‐miamurimuriena eo tau‐laulau‐baaea edi dobila abo edohana?” (Prov. 11.31.) 19 Arinai amamna tauhearo, Eaubada ena nuatu eai, abo se lolo, isi taba earuadi se toredi Eaubada nimana eai, doha mamohoi ia Tauhetubuda miamiatahitahina.
* 4:16 English: Christian.