127
Ginauri lolodi gamagaridi GUIAU arinai se laoma
Ena GUIAU numa wa nige i hetoro,
isi tauhetorona se paisoa asaeai.
Ena GUIAU ia eanua wasawasa nige i silawai,
tau aisilawa i silawa asa.
Nige aniona ena u enotoro heura,
eo u eno boneawa,
paisoa porohena aiaina mo ue ai;
isi i gadosisiedi taba nige saha se deha.
 
U ita, merumeru tatao GUIAU ena ainauia ede,
boga uauana ia ena ainauia.
Doha pidu tauiala nimana eai
hewari huiana nanatunayao doha ede.
Tau wa ie kode
taba ena aba aiusa i monau!
Taba nige se hetaumaeamaea
huiana eai wa ma ana waiunuyao aba hedudurai eai se hailobai.