5
1 Na sunuma eai se heduduraida wa, arinai Eaubada maeda ta loni eda Guiau Iesu Keriso debana eai.
2 Ia arinai hinage ta lage Eaubada nualolona eai, arinai ta totoro, eo ta kode, paana Eaubada ena namanamari boeana eai ita eda tupo ta abi.
3 Meta mo nige’e, eda amamna eai hinage arinai ta kode paana ta nuatui amamna nuapaipai i hetubu,
4 eo nuapaipai tau ena nuaadidiri i hetubu; eo nuaadidiri arinai sunuma i tubuma hinage;
5 eo ena ta sunusunumaei taba nige ta taumaeamaea, paana Eaubada ena gadosisi nuaboeada eai se ini‐hemonauboriboriri, Earua Tabuna debana eai ia ede se leamao.
6 Paana ita ma‐beruberuda, huiana i lagema, Keriso, tatao Eaubada matausina nige se matausi, debadi eai ie mate.
7 Taulaulaududurai mo debana eai taba nige tau esau ie mate; taiede tau lolo ariri debana eai ibai headi abo se mate, e nige’e?
8 Na Eaubada ena gadosisi arida eai i hemasarahayama ede ina, ita ma laulau baabaaeada eai Keriso debada eai ie mate.
9 Arinai ede ia osinana debana eai se heduduraida wa, ia debana eai hinage Eaubada ena ouyalayala eai abo se hemaurida.
10 Ena ita ma‐waiunuda Eaubada arinai ta labini ia Natuna matena eai, na ta labinieiyao wa, abo ta mauri hinage, ena mauri eai.
11 Na meta mo nige’e, Eaubada ta kodei hinage eda Guiau Iesu Keriso debana eai, ia arinai maeda ta labini‐esegaidao.
12 Na doha tau esega arinai baaea ie tubu tanoubu eai ta, eo mate hinage baaea debana eai; arinai hinage tatao gamagamagari mate se hearo, paana tatao gamagamagari edi laulau se baaea.
13 Paana sora laugagaeona nige se hetubu baaea i tubuo tanoubu eai ta; na ena nige laugagaeo taba nige se awa‐laulaubaaeaei.
14 Taiede Adamu ena huia eai i lau e Mose ena huia eai mate i gigibori, isi hinage se hearo isi nige se laulau baaea doha Adamu, ia ede abo i laoma wa tautauna ede.
15 Ainauia ta abinapai wa, baaea i saetawatawai. Ena tau esega ena baaea debana eai tatao gamagamagari se mateo, Eaubada ena ainauia, arinai tau esega, Iesu Keriso, i aiainauia‐napai wa, abo i tadada hinage, tatao gamagamagari enadi.
16 Hinage ainauia wa nige doha baaea wa tau esega i hetubu; paana tau esega debana eai se lauhetala eo se hemaisa, na ainauia dumaduma wa baaea gamagamagari abaheduduraidi ede.
17 Ena tau esega baaeana eai mate i tanuaga, tau esega debana eai, isi ainauia lailai eo laulau dudurai ainauiana nige maisana tauabidi edi mauri eai abo se tanuaga, tau esega mo, Iesu Keriso, debana eai.
18 Arinai doha tau esega ena baaea debana eai tatao gamagamagari se hegirudi, se hemaisadi; hinage tau esega ena laulau dudurai debana eai ainauia dumaduma tatao gamagamagari se abi, i lau e abaheduduraidi ede, eo edi mauri.
19 Doha hinage tau esega ena awayagara debana eai tatao gamagamagari se hemala tatao baabaaeadi, tau esega ena awaabi debana eai hinage tatao gamagamagari abo se hemala tatao laulau‐duduraidi.
20 Laugagaeo i lagema, baaea wa bena i hetadada. Na haedi baaea ena aba‐tadada wa, temetai ainauia abo i hetadada‐lailai.
21 Doha baaea i tanuagaida i laulau e mate eai, hinage ainauia laulau‐dudurai debana eai bena i tanuagaida i laulau e mauri nige nosina ta lobai, eda Guiau Iesu Keriso debana eai.