10
Aneru saesaena eo buka gagirina.
1 Abotai aneru esau ea iita, adiadidirina, galewa eai i dobidobima, eada eai se helui, uruna eai wari, aena doha du alaalasidi.
2 Buka gagirina se alanonohai, nimana eai ie abi. Ae‐tutuna i utudobi gabogabo potana eai, aeseuseurina tanoubu potana eai.
3 Arina lailaina eai ie eaba, doha liona ena so’aso’a; i eaba lautom abo palepalele haligigi‐labui arinadi se dagudagugu.
4 Palepalele haligigi‐labui se dagugu lautom to bena ea uri, na arina esau galewa eai i dobima ea ataiei i ene, “Ginauri palepalele eai se ribaedi, besi u guduyamuidi, tabu u uri‐hemasarahadi.”
5 Na wau aneru ea iita wa, gabogabo eo tanoubu potadi eai i tororo wa, nimatutuna i lau’sini galewa eai,
6 ia wa i miamia i lau e nige nosina wa esana eai i riba‐aigora, galewa tauhetubuna wa, eo ginauri gamagaridi nei eai, eo tanoubu tauhetubuna, eo ginauri gamagaridi nei eai, eo gabogabo tauhetubuna, eo ginauri gamagaridi nei eai, i ene tabu ta bagi, huia sigana ede.
7 Na aneru hehaligigi‐labuina bogigina ena huia iuhina eai, temeta huia ne Eaubada ena nuatuyamuyamui se ohi ede, doha i hemasarahayao ena heaheari tataodi tau‐peroveta aridi eai.
8 Abo arina wa ea ataiei galewa eai i dobima, ea ataieiuioi, i ribalaoma arigu eai i ene, “U lau buka se soe wa u abi, iaede aneru gabogabo eo tanoubu eai i totoro wa nimana eai.”
9 Arinai ea lalau aneru wa arinai, ea aibodai bena buka gagirina wa i leama arigu eai. Na i ribalaoma arigu eai i ene, “U abi, u aiheohi; bogam eai abo i kalapi, awam eai mo abo i amna doha amoamo.”
10 Buka gagirina wa aneru nimana eai ea aabi, to ea aaiheohi, na awagu eai i amna ariri, doha amoamo, i lau e ea aiyao abo bogagu eai i kalapi.
11 Abo se heribaguma si ene, “Abo u riba‐perovetauio hari tatao, hari basileia, hari arina eo hari wasawasa aridi eai.