20
Satani se pai: Eaubada ena basileia huiana.
1 Abo aneru ea iita, galewa boeana eai i dobidobima, nimana eai duha lohaloha‐aririna wa ki‐na, eo mainana poasi, lailaina.
2 Ia abo dragon wa i toai, iaede mota beabeana wa, Diabolo, eo Satani, abo borimai tausani esega ia se pai,
3 se gabadobei duhana eai wa to se gudu, se gabu‐gudui bena tabu basileia i borauioidi i lau e borimai tausani se ohi, abotai abo se iairigabaei huia kuukuuna mo.
4 Abo terona ea itadi, potadi eai tatao se bawa, isi wa hekiraino paisoana se moseyao aridi eai. Abotai isi wa Iesu ribariba‐hemasarahana debana eai urudi se tomtusidi, eo Eaubada ena riba debana eai, earuyaruadi ea itadi, eo isi hinage nige se tabaohu suisui arinai, maena oitau hinage nige’e, ena heiheinoi wa nige debadi eai, e nimadi eai. Ea itadi Keriso maediyao se mauriuio, eo maediyao tanoubu se tanuagaei borimai tausani.
5 Hari tau‐matemate wa isi nige se mauriuio i lau e borimai tausani wa se ohi. Teina torouio bagubagunana ede.
6 Tau‐nuawoiwoinadi isi, eo tabudi, isi wa torouio bagubagunana eai edi tupo taulobai! Isi aridi eai mate helabuina wa nige ena gigibori; isi abo Eaubada ena kohena tataodi, eo Keriso enana, ia maedi abo wasawasa eai se lau, i lau e borimai tausani esega.
7 Borimai tausani wa se ohi, Satani abo se buigabaei, edi aba‐tutuguduina eai,
8 abo i pesama basileia bena i boraidi tanoubu tupo hasi eai, Goga eo Magoga bena i abigogoidi iala hesabana; isi tataodi gamagaridi doha salagomgom geregerena.
9 Tanoubu magagana se taudadai, hetabu tataodi edi aba‐tupagogoma se hetaiiridi, eo eanua lailaina nuanuaiena wa, na oeagi alaalasi galewa eai i tarudobima i gabuheohidi,
10 eo diabolo, tauboraidi wa, se gabalaei oeagi alaalasina eai wa, i alaala i lau e nige nosina, nei eai suisui eo peroveta borabora se gabaedio, abo se heamamnadi asubena to maiona, i lau e nige nosina.
11 Abo terona saesae‐aririna, posiposina, ea ita, eo ia wa potana eai i babawa, matana eai tanoubu eo eada se dagogorigori, nige edi abamia se lobai.
12 Abo taumatemate ea itadi, saesaedi eo gagiridi, terona nuanuana eai se totoro, abo buka se soedi. Buka esau hinage se soe, iaede mauri bukana. Taumatemate wa se heduduraidi, saha eo saha edi buka eai se uridi, eo edi paipaisoa, debadi eai.
13 Gabogabo boeana eai enana taumate abo i buigabaedi, isi hinage abo se heduduraidi, gamagaridi edi paipaisoa debadi eai.
14 Abo Mate eo Hade se gabadobedi gabogabo alaalasina eai. Teina mate helabuina ede, iaede gabogabo alaalasina;
15 na ena esau esana nige se lobai mauri bukana eai, ia abo se gabadobei gabogabo alaalasina eai.