4
1 Na Earua riba ta i ribaei, i ene huia murina eai tatao headi sunumana abo se laugabaei, earua borabora se woeahesuaradi, edi riba abo se ataiedi, eo diabolo edi laulauheata hinage abo se ataiei;
2 abo se ribaborabora, se boraauridi mo; edi nuatu abaheduduraina se gabuyao poasi gigiborina eai.
3 Tawasora se riba nuahi, eo tatao se laulauhesomdi sarai se dabudabu, ginauri Eaubada i hetubudi wa isi tauataiena, eo riba mamohoina tauataiena bena se abidi, ma‐lautoidi.
4 Paana ginauri gamagamagari Eaubada i hetubudi se lolo, eo nige ginauri esau ta otaotaei, ena ta abi, eo ia ta lautoiei.
5 Paana ede Eaubada ena riba, eo uura debadi eai, wau ginauri wa se heloloesegaidio.
6 Ena teina ginauridi ta eda tataoyao nuadi u hesaedi wa, abo Iesu Keriso ena heaheari lolona eai u lau, sunuma ribadi eo laulauheata lolona boeadi eai se suisuim, sibasiba wa arinai u lagelage.
7 Na mumuga piripiridaedi se baaea ribadi u otaotaedi u aipate mo Eaubada ena laulau aridi eai.
8 Ta lubulubui tauda ta headidiridi huia kuukuu mo; Eaubada ena laulau ginauri gamagamagari i helolodi, teina mauri ta i helolo, eo hinage meta mauri wa sora abo i lagema.
9 Teina riba ta riba lolona ede, eo i lolo tatao gamagamagari abo se nuanuatui.
10 Arinai ede ina paisoa ta eo riba talawasi ai hearodi, paana Eaubada maumaurina ai sunusunumaei, ia ede tatao gamagamagari Tauhemauridi, isi taunuatuwataina isi mo enadi.
11 Teina riba ta u lauhesomdi, eo u laulau heataedi.
12 Oa hewari mo tabu tau esau i isugaraem; na taunuatuwataina oa iilam eai abo se lauwataim, riba, eo laulau, eo gadosisi, eo Earua, eo sunuma, eo nuaaa boeadi eai.
13 I lau e ea lagewa, tatao matadi eai u buka hasiri komakomani, eo u ribahepaipaidi, eo u laulauheataedi.
14 Ainauia oa nuaboeam eai tabu u nuagabaei, ia ede se leawao peroveta debana eai, eo tauitaitawata nimadi se saosediwa potam eai.
15 Teina ginauridi ta u nuanuatuidi; oa u mose‐esegaidumadumaim aridi eai; em sibasiba abo i masamasaraha ginauri gamagamagari aridi eai.
16 Oabom u nanabukomakomanim, eo em laulauheata hinage u nuatukomakomani; u mia tahitahi boeadi eai; paana teina laulau ta debana eai oabom abo u hemaurim, eo isi hinage em riba tauataiena abo u hemauridi.