3
Yowaana Omubatiisi alonga engira
(Mari 1:1–8; Luuk 3:1–18; Yowa 1:19–28)
Ne emiaka emiera giamala okuwita, Yowaana Omubatiisi yatanika okulanzia mu ekeewa eya Yudeea na awoola otino, “Mugaluke mureke amawi, aeniki *Owuami owua ku igulu wuri ampi.”+ Yowaana ono nio owa *Omugambi Isaaya yagamba-gambako olwa yawoola otino,
“Omwoyo ogwa omuntu oetana mu ekeewa mbwe,
‘Mulongre Omwami engira,
mumugololre engira ewe enyigolovu.’ ”
Yowaana yawanga na aiwoya enguwo ezia owuvwiri owua engamia, kandi yasiwanga omukanda ogwa iseero mu ensinzi yaae. Okuria kwae kwawanga amadeede no owuuki owua mu isaka.+ Awantu waaema Yerusaleemu, Yudeea, alala ne ewitemo ewiri ampi no oluuzi olwa Yordaani wiona ni wamugiako. Waawoola amawi gaawu owuyanga, nikwo Yowaana yawabatiisa mu oluuzi olwa Yordaani.
No olwa Yowaana yawona *Awafarisaayo na *Awasadukaayo ni wamuuzako aa yabatisanga, yawalaga otino, “Inywe awaana awa enzoka wano! Owasiagiizie mbwe mumizule okuswawukwa no okusu okungi okuuza naanu?+ Muamie ensaafu ezia mu enkola, ezilagana geeza mbwe omuntu agaluuke arekere amawi. Ni mutaaza mwaingirizia mbwe muuza mwamizuka ku okuwoola-uwoola mbwe, ‘Turi geeza aeniki turi awaana awa Abraamu.’ Mbalaga mbwe Katonda aesa okugalusia amawaale gano gawe awaana awa Abraamu!+ 10 Namba nyingeeno, embasa emiire okuteewua ku isina eria omuti; kandi omuti ki omuti oguta-amia ensaafu endootu guuza okutemwao nikwo gurigizwe mu omurro.+
11 “Inze mbabatiisa na amanzi, kiomo ekilago mbwe omuntu agaluuke arekere amawi. Na ario omuntu ooza enyima wange, ori omukaate okunkira, owa inze ngʼasugre namba okuginga ewiraato wiae. Iye aaza okubatiisa awantu no *Omwoyo Omweru ogwa Katonda kandi no omurro.+ 12 Ari ne ekiseeso kiae mu amakono, ekia aaza okuseesra amaemba mu olwanyi lwae. Emere aaza okuta mu ekiagi, na amakunzo aaza okusamba no omurro ogutazima.”
Yesu abatiisrwe na amanzi kandi no Omwoyo Omweru
(Mari 1:9–11; Luuk 3:21–22)
13 Nikuemao, Yesu yaema Galiili agia Yordaani okubatiiswa ni Yowaana. 14 Ni Yowaana yageezaania okumugaania na awoola otino, “Ni iwue osugaane ombatiise inze. Kuwa kutie mbwe onyizako mbwe nkubatiise?” 15 Yesu yamuirania otino, “Reka kuwe kutio nyingeeno, aeniki paka tutuusie okuagala okwa Katonda mu engira ziona.” Nikuemao Yowaana yaganya amubatiisa.+ 16 Ni Yesu yamala okubatiiswa otino, yafuma mu amanzi kandi ku enyinga ezio, igulu riaiguka kandi yawona Omwoyo Omweru ogwa Katonda na aika mu embonekano eya iemba-emba nawuno amugwirrako.+ 17 Kandi omwoyo gwaema ku igulu ogwawoola otino, “Ono no Omuzia wange owa ngonziizie kandi owa nsangaarre nae.”+
+ 3:2 Math 4:17; Luuk 3:3 3:3 Isaa 40:3 + 3:4 2Awaam 1:8; Awal 11:22–23 + 3:7 Math 12:34; 23:33; Awaru 1:18 + 3:9 Yowa 8:33, 39; Awaru 2:28–29; 4:12; 9:7 + 3:10 Math 7:19 + 3:11 Luuk 3:16; Awat 1:8; 2:2–4; Mari 9:49; 1Pet 1:7 + 3:15 Math 6:33; Awaru 9:30–32 + 3:16 Yowa 1:51 + 3:17 Zabu 2:7; Isaa 42:1; Math 12:18; 17:5; 2Pet 1:17–18