7
Okukengera awandi ekiina kuganiziiwue
(Luuk 6:37–42)
“Otakengera owundi ekiina, kugere iwue oona otakengerwa ekiina.+ Aeniki mala kiomo okengera awandi ekiina, oona ooza okukengerwa ekiina, Kandi omurengo ogwa orenga nagwo nigwo oona ooza okurengerwamo.+
“Iwue niki ekigera no owarra akaatu akatono akari mu eriiso eria omwina waao, no oguntu ogunene oguri mu eriiso riao omwene, ngagukunyaasia? Oesa otie okulaga omuda waao mbwe, ‘Reka nkutoorreo akaatu akatono akari mu eriiso riao rino,’ no oguntu ogunene guri mu eriiso riao? Iwue omuntu oisemerezia ono, sooka otooleo oguntu ogunene mu eriiso riao, nikwo owone geeza kandi oese okutoolao akaatu akatono mu eriiso ria omwina waao.
“Mutaaza mwa-aa embwa ewintu ewitengeekrwe Katonda, lwona mutarigizra enguruwe amawaale aga iguzi eria kungulu, aeniki ziiza ziagataza-taza, nikuemao ziwagalukre ziwatandule owutono-tono.
Sawa, aagala kandi kongʼoota ekiriango
(Luuk 11:9–13)
“Sawa, no ooza okueewua; aagala, kugere otuukre; kongʼoota ekiriango, ni ooza okuigurrwao.+ Aeniki omuntu ki omuntu osawire aeewua; oagala atuukra; kandi okukongʼoota, aaza okuigurrwao ekiriango.
“Naanu ku inywe oesa oku-aa omuzia waae iwaale, na amusawire omukaati? 10 Namba oesa ya-aa omuzia waae enzoka, na amusawire emvwa? 11 Ni kuri mbwe kukawa mbwe muri awooni, ni mumanyire oku-aa awaana wiinyu empanwa endootu, katio Soinyu ori ku igulu iye aaza oku-aa awantu awamusawa, empanwa endootu eziagana zitie!+ 12 Kandi korra awandi ewia okaagala mbwe woona wakukorre, aeniki eno nio entuuko eya amangʼana aga Muusa yajoja na amangʼana aga *Awagambi.+
Ekikulo ekinyigu ne ekiiyaagu
(Luuk 13:24)
13 “Ingirra ekikulo ekinyigu. Ekikulo ekiiyaagu ne engira enyiiyaagu ne eziira awantu mu olumbe, kandi awantu awangi wazi-ingirra. 14 Ne ekikulo ekinyigu ne engira enyigu nizio eziira awantu mu owulamu, kandi awatono niwo awazituukra wazilonda.+
Omuti gumanywa ne ensaafu ziagwo
(Luuk 6:43–45)
15 “Muwe amankaga ku awagambi awa owuweeyi, awaaza okuwaazako ni waingiizie enguwo ezia owuvwiri owua amagondi, ni munsi wari mala ensisi eziita.+ 16 Muuza okuwamanya ne enkola ziawu. Kusi awantu waesa okunoga emizabiibu okuema ku emiti agia amawua, namba emikuyu okuema ku eminyenya? 17 Mu engira efwanani, omuti omulootu nigwo oguamia ensaafu endootu, no omuti omuwiiwi guamia ensaafu embiiwi.+ 18 Omuti omulootu ngaguesa okuamia ensaafu embiiwi, kandi omuti omuwiiwi ngaguesa okuamia ensaafu endootu.+ 19 Omuti-umuti oguta-amia ensaafu endootu, guuza okutemwao kandi gurigizwe mu omurro.+ 20 Nintio muuza okuwamanya ni muwona ensaafu ziawu.
21 “Ngʼana awantu woona awanyeta mbwe, ‘Omwami, Omwami,’ waaza okuingira mu *Owuami owua ku igulu yaaya, ni mala awakola okuagala okwa Soifu ori ku igulu wengʼene.+ 22 Awantu awangi warindaga owuire owua Katonda arikengra awantu ekiina mbwe, ‘Omwami, Omwami, kane ngatwafumia owugambi ne eriina riao? Ngatwafumia *ewikeeno ku eriina riao, kandi tukola amankono amangi ku eriina riao?’ 23 Ni inze ndiriwalaga owuyanga otino, ‘Ngʼanyakawamanya namba wutono. Mugie ale ni inze, inywe awooni wano!’+
Omuomboki omumaya no omuomboki omuganga
(Luuk 6:47–49)
24 “Kutio omuntu-umuntu owurra amangʼana gano kandi yakola nago, iye afwanana no omuomboki omuganga owaomboka enyumba yaae ku olutare. 25 Emvula yaaza, emigera giika, kandi emiyaga giwuuta enyumba eyo. Kukawa kutio, enyumba ngekagwa ansi, aeniki yawanga no owulusa owukalangufu owua-aawua ku olutare. 26 No omuntu-umuntu owurra amangʼana gange gano, ni yareka okukola nago, iye afwanana no omuomboki omumaya owaomboka enyumba yaae ku omusenye. 27 Emvula yaaza, emigera giika, kandi emiyaga giwuuta enyumba eyo. Nikuemao, enyumba yagemuka egwa ansi boo!”
Yesu yagereranga ki omuntu ori na amaani
(Mari 1:22; Luuk 4:32)
28 Olwa Yesu yamala okuwoola amangʼana gano, omurima omukaate ogwa awantu waaluguula engerera yaae ino, 29 aeniki yagereranga geeza kandi na amaani, ni ngʼani ki *awagerezi awa endagirra.+
+ 7:1 Awaru 14:4, 13; 1Kori 4:5; Yako 4:11–12 + 7:2 Mari 4:24; Awaru 2:1; 14:10–12 + 7:7 Yere 29:13–14; Math 18:19; 21:22; Yowa 15:16; Yako 1:5 + 7:11 Yako 1:17 + 7:12 Awaru 13:8–10; Gala 5:14 + 7:14 Luuk 13:24 + 7:15 Owuiz 13:1–3; Yere 14:13–15; Math 24:11, 24; Awat 20:29; 2Kori 11:13–15; 2Pet 2:1; 1Yow 4:1 + 7:17 Gala 5:19–23 + 7:18 Math 12:33 + 7:19 Math 3:10; Luuk 3:9; Yowa 15:2, 6 + 7:21 Math 21:28–31; 25:11; Awaru 2:13; Yako 1:22–25; 2:14–26 + 7:23 Math 25:12; 2Timo 2:19 + 7:29 Mari 1:22