Ebaruwa esookere eya
PETRO
Amangʼana ku owuimpi
Ebaruwa eno yajojwa no *Omutumwa Petro omwaka ogwa 65, andi ni yawanga ku omugizi ogwa Rooma, aa yaitwa no Omwami Niiro emiaka emitono egialondako. Amangʼana gandi amakalu aga Olugiriiki agari mu ebaruwa eno galagana mbwe andi Siila yatunzia Petro okugijoja, na agandi gafwana na amangʼana aga Paulo owa Siila yakola nae ku emiaka emiera. No olugambo olurimo lulagana amaingirizio aga Omuibrania agafwanana na agari mu ebuuki eya Yakoobo, nikulondokana ni kiomo *Omuyaudi Omukristo yaingirizianga.
Petro yajojeranga Awakristo awaawanga mu ekialo ekia *Eesia Ekitono kiona awaanyaasiwuanga, ni ino-ino yagamba-gambranga Awayaudi Awakristo awaawanga ni warumuuke wareka emigizi giawu. Waatuukra eminyako-nyaako emilulu okuema ku awandi awataganyire ku Yesu ni kandi waazanga okuwona eminyako-nyaako okukira ao. Kutio, Petro awajojera na awakalangusia kandi na awa-ambia amaani mbwe watareka okuganya kwawu ku *Kristo Yesu kukawa mbwe wageezaniwua okukola otio. Aa okukola otio, ni wasugaane wasangaale ni wawita mu enyinga enkalu ezia okugeezaniwua aeniki kino kiiza okukalangusia okuganya kwawu kandi okuwareeta owunene owuire owua Yesu ari-iranamo. Petro akola ne eminyako-nyaako egia Yesu yatuukra ki omufwano na awoola mbwe okugeezaniwua ne ekintu ekilala ekia Omukristo paka awone mu owulamu wuae. Awakristo woona wari *awoozia awa okuganya, kandi okuwurra kwawu kuuza okuwareetra ekisangaalo.
1
Amakeezio
Ebaruwa eno eema ku inze Petro, *omutumwa owa Yesu *Kristo. Ku inywe awalowole awa Katonda awari awageni ku ekialo kuno, awatanyiike mu ewialo ewia Pontuusi, ni Galatia, Kapadookia, *Eesia ni Bitiinia.+ Katonda Soifu yawalowola kiomo yamala okutaao kale, kandi awatengeka okuwa aweeru ni kuwitra ku *Omwoyo Omweru, kugere muwurre Yesu Kristo kandi mueruyiwue na amasaai gaae agaasulula.
Owusiza no owuolu wuwe ni inywe kuwungi.+
Okurindirra okuwa no owulamu owutawua
Katonda kandi Swawu *Omwami iifu Yesu Kristo atondowolwe! Ku owusiza wuae owunene, amiire okutu-aa owulamu owuyia ni kuwitra ku okuziuka okwa Yesu Kristo okuema ku awafu. Kuno kugera ni tuwa no okurindirra okulamu+ kandi kutio turindira okutuukra ensereki enyingi ezia Katonda awiikiire awantu waae ku igulu, aa ngawiiza okuwola, okuoneka namba okukiiriya. Ku okuganya okwa muri nakwo, Katonda aaza okuwarinda na amaani gaae amangi nawuno mutuukre owuinunuzi owuri ampi okusasulwa mu enyinga ezia owutuuko. Musugaane muwe awasangaavu ku ingʼana rino, kukawa mbwe ku enyinga zino kuuza okuwanigirizia okuwona eminyako-nyaako egigawuke-gawuuke. Muuza okuwona eminyako-nyaako gino, kugere okuganya kwinyu okuri okukaate okukira edhaabu eoneka kukawa mbwe e-eruyiwua no omurro, kumanyike mbwe kuri kuwuene kandi kuwareetre okutondowolwa, okueewua owunene no okueewua owuti owuire owua Yesu Kristo ari-irana++ Kukawa mbwe mukiari okumuwona, mumugonziizie; lwona kukawa mbwe ngamumuwona ku enyinga zino, mumuganyireko kandi muizuziiwue no owusangaavu owunene owutawoolwa,+ aeniki mutuukra owuinunuzi owua owulamu wuinyu, owuri ensimbiiro eya okuganya kwinyu.
10 *Awagambi awaagamba-gamba ku owusiza owuazanga okuwaazra, waagarizia na amaani gaawu goona okumanya amangi ku owuinunuzi wuno. 11 Waagalanga okumanya enyinga ne ewintu ewiazanga okuikola, ewia Omwoyo ogwa Kristo owawawangamo yalagananga olwa yagamba mbwe Kristo yaazanga okuinyaasia kandi mbwe wurio owunene owuazanga okulondako.+ 12 Katonda yagera wamanya mbwe ngawakawanga ni wakola emirimo egia okuwatunzia iwo aweene yaaya, ni ni inywe awa waakorra emirimo egio. Ni nyingeeno mumiire okulagwa ewintu wino na awantu awamiire okuwalanzizia *injiili na amaani aga Omwoyo Omweru otumirwe okuema ku igulu. Namba *enyankoi woona warindirra okuwona ewintu wino ni wiikola!+
Owulamu owueru
13 Kutio, mugangamuke kandi muirinde mu enkola ziinyu. Mute okuganya kwinyu kuona ku owusiza owua muuza okueewua olwa Yesu Kristo ari-inana. 14 Kiomo muri awaana awari no owuti, mutalondokana no okuagala okuwiiwi okwa mwawanga nakwo olwa mwawanga ni mumenyere mu okutamanya.+ 15 Ni kiomo Katonda owawaeta ari omweru, inywe mwona muwe aweeru ku ewintu wiona ewia mukola. 16 Aeniki kujojerwe otino, “Muwe aweeru mala kiomo noona ndi omweru.”
17 Aeniki mueta Katonda mbwe Soinyu, iye otatiire amiiso aga omuntu enyinga ezia awarra emirimo egia omuntu ki omuntu, mumu-ee owuti owungi ni mukiari mu owulamu owuimpi owua ku ekialo kuno.+ 18 Mumanyire mbwe omurengo ogwa Katonda yawaoloorra okuwata owuyanga okuema ku enkola ezia owusa ezia mwatuukra ku waaguukwa wiinyu, ngagukawanga ogwa ewintu ewiwua wiateeka kiomo efeedha nakuwa edhaabu.+ 19 Ni yakola otio na amasaai ameeru aga Kristo, Ekimaatwa ekiwula ne embala nakuwa itone.+ 20 Kristo yaloworrwa emirimo gino namba ekialo ni kiawanga ni kikiari okulukwa, ni kugere muwone owulootu, ngakaaza nawuno mu amiire aga owutuuko gano.+ 21 Ni kuwitra ku Kristo, muganya ku Katonda owamuziusia okuema ku awafu kandi amuta mu owunene, kandi kutio muri no okuganya no owuene mbwe muriwa no owulamu owutariwua ku Katonda.
22 Nyingeeno kiomo mumiire okuieruyia ku okulonda owuene, muri no olugonzi oluri kuwuene ku waamwinyu. Mugonzanie omuntu no omwina waae no olugonzi olwa munsi.+ 23 Mumiire okuiwulwa okuiwulwa okuyia, ngʼani kuema ku emwo efwa yaaya, ni ni kuema ku emwo etaesa okufwa, ni kuwitra ku amangʼana amalamu agatariwua aga Katonda.+ 24 Kiomo endagano ewoola mbwe,
“Awantu woona wari ki owusuwi,
kandi owulootu wuawu wufwanana no owua amauwa.
Owusuwi wukala kandi amauwa gagondeera gaadodoka ansi,
25 na Amangʼana aga Omwami gario amiire goona agawula ne entuuko.”*
Kandi amangʼana amalootu aga mwalanziziwua, nigo amangʼana ago.+
+ 1:1 Yako 1:1; 1Pet 2:11 + 1:2 Awaib 12:24; 1Pet 2:9 + 1:3 2Kori 1:3; Tiit 3:5; 1Pet 1:23 + 1:7 2Kori 4:17; Yako 1:2–3 + 1:7 Zabu 66:10; Emfu 17:3; Isaa 48:10; 1Thes 2:19; 1Pet 4:13 + 1:8 Yowa 20:29; 2Kori 5:7 + 1:11 2Pet 1:19–21 + 1:12 Luuk 24:49; Awat 1:5, 8 + 1:14 Awaru 12:2; Efee 4:17–19 1:16 Awal 11:44, 45; 19:2; 20:7 + 1:17 Math 6:9; Awaru 8:15; 2:6, 11; 1Pet 2:11 + 1:18 Math 20:28; 1Kori 6:20; Mari 7:6–9 + 1:19 Yowa 1:29; 1Kori 5:7; Awaib 9:12 + 1:20 Awat 2:23; Efee 1:4–5 + 1:22 Awaib 13:1; 1Pet 2:17; 3:8; 4:8; 2Pet 1:7 + 1:23 Awaib 4:12; Yako 1:18; 1Pet 1:3 * 1:25 Isaa 40:6–8 (okuema ku endagano eya Olugiriiki). + 1:25 Yako 1:10–11