4
1 Naa, pebundasen ta sug yaga ta di sinulatu kini. Pinenggiꞌ ki gembataꞌ petengedan nu pusakaꞌ nu gamaꞌen. Saꞌ mbataꞌ pa, mesama di gulipen, pia iin siai gapuꞌ nug launan pimetang sampay lupaꞌ.
2 Su saanan kaikaꞌayen, duuni getaw metenduꞌ megingat diniin mukaꞌ duun dademai getaw metenduꞌ megbayaꞌ dig launan gimunen sampay di gendaw tenduꞌen nu gamaꞌen iin pemusekaꞌan.
3 Naa ita, maꞌniin daita dema, puꞌ begudiin, su ndaꞌ ta pa mesabut su metuud, saꞌitada, maꞌniin ita gembataꞌ pa di kesabut ta tu metuud, gulipen ita nu nga ndiꞌ maitaꞌ meguit di nga kilawan.
4 Laak dagid, benaꞌ minateng nai gendaw daan na tinduꞌ nu Megbebayaꞌ, sinuguꞌ nu Megbebayaꞌ sug Bataꞌen lumusad dinig lumbang. Kig Bataꞌen, benaꞌ midini, pigbataꞌ nu ginaꞌen kilawan, mukaꞌ mibagel dig dialem gengkeman nu Palinta nu nga getaw Judea.
5 Miginetaw Judea iin, puꞌ adun lekatenen su nga pigbiaꞌan nu Palinta, adun mbaal ita bataꞌ nu Megbebayaꞌ, launan ta.
6 Mukaꞌ kig Balakat nug Bataꞌen, sinuguꞌ dadema iin nu Megbebayaꞌ megbenwa dig delendeman ta, puꞌ adun pepentekenen dig delendeman niu puꞌ binataꞌ amu nu Megbebayaꞌ, kig Balakaten miktaluꞌ tu Megbebayaꞌ, “Amaꞌ, Gamaꞌ nami.”
7 Maꞌantu diadia, kanaꞌa na gulipen, puꞌ bataꞌa niin. Mukaꞌ pa padun, kagina bataꞌa niin, begayan ka pa nu Megbebayaꞌ launan daan na pingandamen begayen tu ngag bataꞌen.
Su Kektagikul ni Pablo di nga Getaw Galacia
8 Naa yamu, begudiin ndaꞌ niu pa sembatay su Megbebayaꞌ mukaꞌ ndaꞌ niu iin pegbesaay, kaas gulipen pamu nu nga sagya diwata.
9 Laak dagid nemun, suminambat namu tu Megbebayaꞌ. Mukaꞌ labi pa, puꞌ suminambat su Megbebayaꞌ diniu! Naa asal maꞌantu, mauma dema luminingay amu puliꞌ ditu nga ndiꞌ maitaꞌ meguit tug dibabaw lumbang, su ndaꞌig balakaten mukaꞌ pegbayaꞌen? Mauma dema mauyaꞌan niu mengulipen ilan diniu puliꞌ?
10 Pegbesaan niui nga gendaw. Sug duma gendaw, pegbesaan niu bulanbulan, sug duma saꞌ su masanen, sug duma tauntaun!
11 Mipatiꞌu melibuleng diniu. Metuud ba ndaꞌi gatagen su tibaꞌan pinggulaulau gabang diniu?
12 Uu Mingumpated, penengiin ku diniu, penunggilingay na niau. Ndiꞌ namu mekpebalud ditu Palinta. Ndiꞌ ba metuud mingmaꞌniin dau dema diniu, puꞌ kanaꞌ na Palintai megbayaꞌ dinaan? Metuud lai. Naa begudiin, ndaꞌ niau pelaatay, segaga tinagikul niau gupia.
13 Medelendem niu puꞌ sug bekna, iini mikelakayu dun megukitu diniu Gempia Petenday puꞌ sabaꞌ migladuu sinegayu dia niu.
14 Pia milegenan amu dun sug leduun ku, ndaꞌ niau peksudiꞌay, ndaꞌ niau pemilasay. Sinangkaliꞌ pa tanan, pinembaꞌ niau, maꞌniin nu kenembaꞌ niu sia di sesuguꞌen nu Megbebayaꞌ getaw langit, maꞌniin nu kenembaꞌ niu sia dini Kristu Isus.
15 Naa begudiin, liliag amu gupia. Taꞌ ma, mauma dema kanaꞌ namu leliagen? Taluꞌu diniu, saꞌ sia misuꞌat, pia su nga mata niu, pisuk niu sia adun bigayan niau dun sia, sabaꞌ nug lelaat niu dinaan begudiin.
16 Mendadi nemun, pemilangen ba niau pelum kuntra niu puꞌ sabaꞌ pinluksadu teluꞌay diniu su metuud?
17 Naa su ngag duma getaw kia mekpalin di Gempia Petenday, tagikulen amu nilan gupia, dagid su ketagikul nilan dun diniu, melaat. Iini tantu mauyaꞌan nilan, teliudan niau, adun tagikulen niu ilan, mesama di ketagikul nilan diniu.
18 Melengas da mekpetagikuli getaw di ngag dumanen saꞌ laak gempia dai mekpetagikul dun, ndiꞌ ba? Metuud da gusay, kaas tagikulen ku amu, pia ndaꞌu dia niu.
19 Yamu ngag lepeng bataꞌu petailen ku gupia, milegenan nau puliꞌ, maꞌniin da nug libun pegbataꞌ saananen mesaitan gupia. Taluꞌu diniu melegenan pau gusay sampay di gendaw mengganget dig delendeman niu sug delendeman ni Kristu.
20 Mauyaꞌan ku gupia dia nau niu sia nandaw, adun pesuun ku diniu di tingegu gupia puꞌ gempia dai ginau diniu, kaliꞌ buus laung niu dun melaati ginau diniu, sabaꞌ nu pinluksadu teluꞌay diniu kini. Melibulengu diniu gupia.
Penenggiꞌan si Agar mukaꞌ si Sara
21 Naa, yamu nga mauyaꞌanen pegbiaꞌan ditu Palinta adun mekalap amu sia ketubuꞌ, duuni saaken ku diniu. Ndaꞌ ba niu pektalentenay su misulat di Palinta?
22 Misulat dia puꞌ si Abraham, duunig duaꞌ tawan bataꞌen, lumbus laki. Su sala, ginaꞌen su gulipen nu tunayan ni Abraham, si Agar. Ki sala pelum, ginaꞌen su tunayan, kanaꞌ gulipen, si Sara.
23 Naa sug bataꞌ nu gulipen, kegigetawen, maaꞌ da nu kegigetaw nu nga kilawan. Dagid ki kegigetaw nug bataꞌ nu kanaꞌ gulipen, iini mipenggulaula dun, puꞌ minuud su pinasad nu Megbebayaꞌ di nga mekegulangen.
24 Naa ki ngag libun kini, malap ta dia penenggiꞌan dig duaꞌ buuk sabut nu Megbebayaꞌ. Ki sala sabut, damikian dun si Agar, puꞌ pinalinta nu Megbebayaꞌ ditu ni Moises diag bentud Sinai. Su ngag bataꞌ ni Agar, su kegigetaw nilan, daan nailan gulipen, mesama di ngag launan getaw pegbiaꞌan nu Palinta.
25 Si Agar, damikian dadema dig bentud kiin Sinai diag benwa Arabia tandaꞌ pinalintaan nu Megbebayaꞌ su getaw. Damikian pa padun di syudad Jerusalem nemun, puꞌ miulipeni syudad kia sampay su nga kelaun getaw dun, miulipen nu Palinta.
26 Dagid su Jerusalem ndiꞌ maitaꞌ puꞌ gasalen genat tu gekbus langit, damikian dun si Sara, puꞌ kanaꞌ gulipen, kaas iini ginaꞌ nug launan ta nga suminalig dini Kristu. Saꞌitada sug bekna sabut, su pinasad nu Megbebayaꞌ dini Abraham, damikian dun si Sara.
27 Ndiꞌ ba sinulat di Misulat Taluꞌ nu Megbebayaꞌ maꞌniniꞌ?
“Yaꞌa libun ndaꞌa mainsan mapet bataꞌ mu, pegleliaga gupia!
Yaꞌa pa libun ndaꞌ mu mainsan mbianay megbatik tian ka,
sesakay mu gupia sug leliag mu!
Iini meksasaka dun, puꞌ yaꞌa sug bileng nu sawa mu,
melaun pa dunig bataꞌ mu batul nug libun ndaꞌ belengay nu sawanen.”
28 Naa, yamu kepetedan ku, bataꞌ namu nu Megbebayaꞌ miksekat tu pinasaden maaꞌ dadema ni Isaac. Puꞌ iin, miksekat su kegigetawen di pinasad nu Megbebayaꞌ ditu gamaꞌen si Abraham.
29 Dengantu, kig bataꞌ ni Abraham miksekat tug Balakat nu Megbebayaꞌ su kegigetawen, ndaꞌ ba peglegetay nu sala bataꞌ ni Abraham, kinilawan laaki kegigetawen? Naa, mesama da nemun, ita, peglegetan naita dema nu nga gulipen nu Palinta.
30 Sinangkaliꞌ pa tanan, ndaꞌ ba mesulat di Misulat Taluꞌ maꞌniniꞌ? “Kig libun kiin gulipen, pengutiday mu ilan nug bataꞌen, puꞌ kig bataꞌen kiin, ndiꞌ mpeduma pusekaꞌay nug bataꞌ nug libun kanaꞌ gulipen.”
31 Kaas, yamu kepetedan ku, kanaꞌ ita nug bataꞌ nug libun gulipen nu kedunut tu Palinta, segaga bataꞌ ita nug libun kanaꞌ gulipen.