8
Si Isusi Tampusan Metaas Belian ta
1 Naa, iini maꞌanan nu pigyaga ta kini, duun nai Tampusan Metaas Belian ta, maꞌniai kebetangen. Iin, nandaw pegingkud dia dapit lintu nu gingkudan nu Tampusan Megbebayaꞌ ditu gekbus langit.
2 Mektamuy ditu tantu Pengedapan tu Megbebayaꞌ, sug binaal nu Kaunutan, kanaꞌ nu getaw.
3 Naa, adini tampusan metaas belian dinig lumbang, mitenduꞌ memegay tu Megbebayaꞌ mukaꞌ mekanu dadema. Maꞌantu si Isus, ki Tampusan Metaas Belian ta, subay duunig begayen.
4 Saꞌ upama dini pa lumbang, kanaꞌ da belian, puꞌ duun paig belian dini memegay tu Megbebayaꞌ munut tu pinalintanen ditu nga getaw Israel kanugdiin.
5 Kig baalen nu ngag belian kia, lingu laak, puꞌ mpenunggilingan laak nilan su kektamuy ditu tantu Pengedapan tu Megbebayaꞌ diag langit. Misuunan ta ia puꞌ su sungu kepaindeg ni Moises tug lepintaw binaal luna, tinituluꞌ nu Megbebayaꞌ si Moises. Kaliꞌ pektaluꞌ su Megbebayaꞌ, “Subay dunutan mu gusay sug lendasan pinitaꞌu diniꞌa ditug bentud.”
6 Su kektamuy mitenduꞌ dini Isus, melengas pa dig danilan ngag belian kia. Maꞌantu dademai nga sabut. Melengas pa dig daan sabut su pisabut ni Isus tu Megbebayaꞌ ilan nu nga sakupen, puꞌ miksekat tu pasad melengas pa di pinasad nu Megbebayaꞌ dini nga Moises begudiin.
7 Saꞌ upama mikpalas daig bekna sabut meglegawen dinita, ndiꞌ na kambat suklian di keduaꞌen.
8 Laak dagid laung nu Megbebayaꞌ puꞌ kulang su pigbetad nu getaw duminunut tug bekna sabut, kaliꞌ pektaluꞌ,
“Ditug binayaꞌ gebii buꞌ gendaw duuni gendaw mateng, laung nu Kaunutan,
meksabutu puliꞌ di nga getaw Israel mukaꞌ di nga getaw Juda, tug begu pasad gabang dinilan.
9 Mukaꞌ kanaꞌ maaꞌ nug daan sabut, su sinabutu di nga ginepuꞌay nilan
su gendaw inagaku ilan, adun uiten ku ilan megawaꞌ ditug benwa Ehipto.
Ndaꞌ nilan penemalay dunutay sug daan sabut kiin,
kaas pituyangu ilan.
10 Naa, iin nai pasadu di nga getaw Israel,
saꞌ mateng nai gendaw kiin ditug binayaꞌ gebii buꞌ gendaw, laung nu Kaunutan,
betangen ku su nga pinalintau di ginaa nu piglegetawan ku,
mukaꞌ pepenggengeten ku dig delendeman nilan.
Kaas mekpetuud ilan dinaan, puꞌ naani Megbebayaꞌ,
mukaꞌ duaten ku ilan nga piglegetawan ku.
11 Danilan, diadia ndiꞌen na kambat tituluꞌen su nga samatawen, saꞌ sug betaꞌanen, mekatag dinaan.
Ndiꞌen na kambat teluꞌan sug dumanen,
‘Aa lai, sambat amu tu Kaunutan.’
Ndiꞌen na kambat teluꞌan maꞌnia, puꞌ sumambat dinaan su tibaꞌan nilan,
su nga metaas sampay su nga gembabaꞌ.
12 Lelaatan ku ilan ditu ngag dupangan nilan.
Ndiꞌu na pegdelendemeni nga salaꞌ nilan.”
13 Naa kumalenged duuni tinaluꞌ nu Megbebayaꞌ mekatag dig begu pasad, pimilangen sug bekna sabut, daan na. Mukaꞌ adini mekpapas na, mesuunan ta, sungu na mbeleng gupia.