15
হজরত মুছার (আ:) শুকুরানা গজল
1 আল্লার কুদরতে নীল দরিয়া পারইয়া আইয়া হারলে, হজরত মুছা আর তামাম বনি ইসরাইলে মাবুদর নামে অউ শুকুরানা গজল গাইলা:
“আমি মাবুদর নামে গজল গাইমু,
হকলর ছামনে তান কুদরতি মহিমা বাড়িছে,
ঘোড়-ছওয়ার সুদ্ধা ঘোড়াইনরে তাইনউ দরিয়ার পানিত ফালাইছইন।
2 মাবুদউ তো আমার বল, তাইনউ আমার গজল,
আমারে বাচানির কল-কবজা তান আতো আছে।
অউ মাবুদউ আমার আল্লা, আমার বাফ-দাদার আল্লা,
আমি তান হামদ গাইমু, তান লিলা-খেলা বয়ান করমু।
3 মাবুদ অইলা পয়লোয়ান সিপাই, তান নামউ মাবুদ।
4 ফেরাউনর ঘোড়ার গাড়িরে আর সিপাইরে তাইন পানিত ফালাইলা,
তার নামকরা ছুবেদার অকল নীল দরিয়াত বুড়িয়া মরলা।
5 গইন পানিয়ে তারারে গিলিল্লো,
আর ভারি পাথরর লাখান তারা দরিয়ার তলে গেলাগি।
6 ও মাবুদ, তুমার ডাইন আতখান কুদরতি লিলায় ভরা,
তুমার আতে নিচ্চয় দুশমনরে চুরমার করছে।
7 তুমার বিরুদ্ধে যেতায় লাগছিলা, কুদরতি বলে তারারে গইন গাতো ফালাইলায়।
তুমার পাঠাইল গজবি আগুইনে, হুকনা খের-নেরার লাখান তারারে জালাইলিলো।
8 তুমার নাকর দমে হকল পানি দলা অইগেল,
পানির ফুত অকল জাগাত উবাই রইলো,
দরিয়ার গইন পানি চাক্কা বনিগেল।
9 দুশমনে কইছিল, ‘আমি ইতারে খেদাইয়া নিমু,
দৌড়াইয়া নিয়া ধরমু, তারার হকলতা কাড়িয়া আনিয়া বাটিমু।
তারার মালদি আমি মালদার অইমু, ইতাদি আমার মনর খাইশ পুরাইমু।
আমার তলোয়ারদি মারিয়া তারার নাম মিটাইলিমু।’
10 অইলে তুমি ফু দিয়া বাতাস দিলায়,
আর দরিয়ায় তারারে গুরিলিলো,
তারা সীসার লাখান গইন পানিত তলাইগেল।
11 ও মাবুদ, কুন দেব-দেবী তুমার হমান?
কে তুমার লাখান অতো পবিত্র মহান,
আর তুমার মতো ভয়ংকর কুদরতি মহিমা কার আছে?
12 তুমার বলআলা ডাইন আতখান বাড়াইলায়,
আর দুনিয়ায় তারারে গিলিলিলো।
13 তুমার খাছ মায়ায় যেরারে বাচাইছো,
তারারে তো তুমিউ চালাইরায়,
তুমার আপন কুদরতি বলে তুমার পবিত্র বসত খানাত নিরায়।
14 ইতা হুনিয়া হক্কল জাতিয়ে কাপিরা,
ফিলিস্তিনী বে-দীন অকলর মন ছটপট করের।
15 ইদোমর সর্দার অকল ডরাইয়া বেদিশা লাগিগেলা,
মোয়াবর নেতা অকলে থর-থরাইয়া কাপিলা,
কেনানী অকল ডরাইয়া হরি গেলা।
16 তারার ভিতরে ডর-খফ আইয়া হামাইছে,
তুমার আতর ঠেলায় পাথরর লাখান নিরাই অইগেছে।
ও মাবুদ, তুমার প্রজা অকল, তুমার খরিদা গুলাম অকল,
পুরাপুর পার না অওয়া পর্যন্ত তুমি অউলা রাখছো।
17 তুমি এরারে নিয়া গাছর চেরার লাখান,
তুমার নিজর পাড়ো রুইবায়।
ও মাবুদ, হখানউ তুমার বসত খানা,
তুমার আপন আতর গড়া হেরেম শরিফ।
18 ও মাবুদ, যুগ যুগ ধরি তুমিউ খালি বাদশাই করবায়।”
19 ফেরাউনর ঘোড়াইন, তার ঘোড়ার গাড়িন আর ঘোড়-ছওয়ার অকল যেবলা দরিয়ার মাজে হামাইগেল, মাবুদে তারার উপরে দরিয়ার পানি ফিরাই আনলা, অইলে বনি ইসরাইল হকল তো হুকনা পথে দরিয়ার মাজেদি আগে আটিয়া গেছলাগি।
20 হারুনর বইন হজরত মরিয়মও নবী আছলা, তাইন ডুগি আতো লইয়া বাজাইলা, আর বাকি হকল বেটিন্তেও তান খরেদি ডুগি লইয়া নাচি-নাচি বারই আইলা।
21 আর মরিয়মেও মানষর ছামনে অউলা গাইলা:
“তুমরা মাবুদর নামে গজল গাও,
হকলর ছামনে তান কুদরতি মহিমা বাড়িছে,
ঘোড়-ছওয়ার সুদ্ধা ঘোড়াইনরে তাইনউ দরিয়ার পানিত ফালাইছইন।”
মরুভুমিত বনি ইসরাইলর সফর (১৫:২২-১৮:২৭)
হজরত মুছায় তিত্বা পানিরে মিঠা বানাইলা
22 মুছায় বনি ইসরাইলরে নীল দরিয়া থাকি ছামনেদি লইয়া রওয়ানা অইলা, আর শুর নামর মরুভুমিত গেলা। তারার যাওয়ার পথো তিন দিন ধরি কুনু পানি পাইলা না।
23 বাদে তারা মারুয়া নামর এক জাগাত আইলা, অইলে হিনর পানিও খাইতা পারলা না, হিনর পানি খুব তিত্বা। এরলাগি অউ জাগার নাম লাগলো মারুয়া [মানি, তিত্বা]।
24 আর মানষে মুছার বিরুদ্ধে কানা-কানি করি কইলা, “আমরা অখন পানি খাইতাম কিলা?”
25 মুছায় মাবুদর গেছে ফরিয়াদ করলা, মাবুদে তানরে এগু গাছ দেখাই দিলা, তাইন হউ গাছরে নিয়া পানিত ফালাইলা, আর পানি মিঠা অইগেল।
মাবুদে হউ জাগাত বনি ইসরাইলর পরিক্ষা লইলা, আর তারার লাগি নিয়ম-কানুন বাতাই দিলা।
26 তাইন কইলা, “তুমরা যুদি খিয়াল করিয়া তুমরার আল্লা মাবুদর কালাম হুনো আর অউ লাখান আমল করো, আমি যেতা পছন্দ করি অতা করো, আমার হুকুম মানো, তে আমি মাবুদে মিসরি অকলরে যেতা বেমার-আজার দিছি, ইতা কুনু বেমার তুমরার উপরে দিতাম নায়; জানো তো, আমি মাবুদ তুমরার শিফা করনেআলা।”
27 হেশে তারা এলীমো গিয়া পৌছলা, হিনো বারোগু পানির ইন্দারা আর সত্তইরগু খেজুর গাছ আছিল। তারা অউ পানির কান্দাত তাম্বু গাড়িলা।