6
1 মাবুদে মুছারে কইলা, “ফেরাউনর কিতা দশা অয় তুমি দেখিও, আমার আতর জুর দেখলেউ হে মানষরে ছাড়ি দিবো। জুরআলা আতর কুদরত দেখলেউ হে তার দেশ থাকি এরারে খেদাই দিবো।”
বনি ইসরাইলর লগর ওয়াদা আল্লার ইয়াদ আছে
2 আল্লায় মুছার লগে বাতচিত করি কইলা, “আমি ‘মাবুদ যেইন আছইন’।
3 আমি ইব্রাহিম, ইসহাক আর ইয়াকুবর গেছে সর্ব-শক্তিমান আল্লা নামে দিদার দিতাম, ‘মাবুদ যেইন আছইন’ নামে তারারে দিদার দিতাম না।
4 আমি তারার লগে অউ ওয়াদা করছলাম, আমি তুমরারে কেনান দেশ দিমু, যে দেশো তুমরা মুছাফির অইয়া রও, অউ দেশউ আমি তুমরারে দিমু।
5 খাছ করি মিসরি অকলে বনি ইসরাইলরে গুলামি করানির লাগি এরার কান্দন হুনিয়া, আমার হউ ওয়াদা ইয়াদ করলাম।
6 অখন তুমি গিয়া বনি ইসরাইলরে কও, মাবুদে কইছইন, আমি মাবুদ, আমি তুমরারে মিসরি অকলর তল থাকি বার করিয়া আনমু, তারার গুলামি থাকি আজাদ করমু। তারারে দেখার মত সাজা দিয়া, আমার কুদরতি আতদি তুমরারে খালাছ করমু।
7 হেশে তুমরারে আমার নিজর বন্দা বানাইমু, আমি নিজে তুমরার আল্লা অইমু। তেউ তুমরা বুজবায়, আমি আল্লাউ তুমরার মাবুদ, আর মিসরি অকলর ভারর তল থাকি আমিউ তুমরারে বাচাইছি।
8 আমি ইব্রাহিম, ইসহাক, ইয়াকুবর লগে যে দেশর কথা ওয়াদা করছি, হউ দেশো তুমরারে লইয়া যাইমু, তুমরা হউ দেশর মালিক অইবায়। আমিউ মাবুদ।”
9 মুছায় গিয়া ইতা হকলতা তারারে জানাইলা, অইলে হি বেথায়া জুলুম-তকলিফ আর গুলামি করতে করতে মন-মরা অইযাওয়ায়, তারা আর মুছার মাতে কান দিলা না।
10 অউ মাবুদে মুছারে কইলা,
11 “তুমি গিয়া মিসরর বাদশা ফেরাউনরে কও, হে যানু তার দেশ থাকি এরারে যাইতে দেয়।”
12 মুছায় জুয়াপ দিলা, “বনি ইসরাইলেউ যেবলা আমার মাত হুনের না, তে ফেরাউনে কিলা হুনবো? আর আমার তো মাততে মুখো লাগি যায়।”
13 তেউ মাবুদে মুছা আর হারুনরে কইলা, “তুমরা বনি ইসরাইল আর মিসরর রাজা ফেরাউনরে কও, মাবুদে আমরারে হুকুম দিছইন, বনি ইসরাইলরে মিসর থাকি বার করি নেওয়ার লাগি।”
হজরত মুছা আর হারুনর (আ:) বাফ-দাদাইন্তর পরিচয়
14 মুছা নবীর নিজর জাতি বনি ইসরাইলর পরধান মুরব্বি অইলা হজরত ইয়াকুব, আল্লায় অউ ইয়াকুবর নয়া নাম দিছলা ইসরাইল। ইসরাইলর পুয়াইন অইলা রুবেন, শিমিয়ন, লেবি সহ মোট বারোজন, অউ লেবি অইলা মুছা আর হারুন খান্দানর মুল মুরব্বি।
ইসরাইলর বড় পুয়া রুবেনর পুয়াইন অইলা হনোক, ফালু, হাছির আর কর্মি, এরা রুবেন খান্দানর মুল মুরব্বি।
15 শিমিয়নর পুয়াইন অইলা যিমুয়েল, যামীন, ওহদ, যাখীন, সোহর আর তার কেনানী বউর তরফা পুয়া শৌল, এরা শিমিয়ন খান্দানর মুল মুরব্বি।
16 খান্দান তালিকা হিসাবে লেবির পুয়াইন অইলা জারছুন, কাহাত আর মারারি। লেবি একশো সাড়তিশ বরছ বাচিছলা।
17 যারযির গুষ্টির পরধান হিসাবে জারছুনর পুয়াইন অইলা লিবনি আর শাম্মি।
18 কাহাতর পুয়াইন অইলা ইমরান, ইজহার, হেবরন আর উজ্জল। কাহাত একশো তেত্রিশ বরছ বাচিছলা।
19 মারারির পুয়াইন অইলা, মহলি আর মুশি।
এরাউ অইলা লেবির খান্দানর মুল মুরব্বি।
20 ইমরানর পুয়াইন অইলা মুছা আর হারুন। ইমরানে তান ফুফু ইউখাবেজরে বিয়া করছলা, তান পেটো এরার জনম অইছিল। ইমরান একশো সাড়তিশ বরছ বাচিছলা।
21 ইজহারর পুয়াইন অইলা কুরাহ, নেফগ, জিখরি।
22 উজ্জলর পুয়াইন মিশায়েল, ইলিজাফন আর যিতরি।
23 আর হারুনে আমিনাদাবর পুড়ি নাহিশর বইন ইলিশেবারে বিয়া করায়, তান হুরুতা অইলা নাদাব, আবিহু, আলি-আজর আর ইছামার।
24 কুরাহর পুয়াইন অইলা অসীর, ইলকানা, অবিয়াসফ। এরা কুরাহী অকলর মুল মুরব্বি।
25 আলি-আজরর পুয়া অইলা পীনহস। হারুনর পুয়া আলি-আজরে পুটিয়েলর পুড়িরে বিয়া করায় তাইর পেটো পীনহসর জনম অইছিল।
গুষ্টি হিসাবে এরা অইলা লেবি খান্দানর মুল মুরব্বি।
26 অউ হারুন আর মুছারে মাবুদে হুকুম করছলা, তুমরা বনি ইসরাইলরে সিপাই দলর লাখান মিসর থাকি বার করো।
27 মুছা আর হারুনেউ বনি ইসরাইলরে মিসর থাকি বার করি আনার কথা মিসরর বাদশা ফেরাউনর লগে মাতিছলা।
মাবুদে হজরত মুছা আর হারুনরে (আ:) হুকুম দিলা
28 মাবুদে মুছার লগে যেদিন মিসর দেশো বাতচিত করলা,
29 হউ দিন তাইন কইলা, “আমি মাবুদ। তে তুমারে অখন যেতা যেতা কইমু, ইতা হকলতা তুমি মিসরর বাদশা ফেরাউনরে কইও।”
30 মুছায় মাবুদর দরবারো আরজ করলা, “দেখউক্কা, আমার তো মাততে মুখো লাগি যায়, ফেরাউনে কুনু আমার মাত হুনবো নি?”