12
Azadi Id adae ḳorar hukum
1 Bade ou Mishor deshor bitre Mabude Musa ar Harunre ḳoila,
2 “I sandḳan bosoror foela sand oibo, tumra i sandre bosoror foela sand gonio.
3 Tumitain tamam Boni Israilre dola ḳori zanai deo, ou sandor dosh tariḳo tumrar hoḳol foribaror murobbie, zarzir foribaror lagi egu ḳori meṛa ba sagolor baichcha nibae.
4 Oile kunu foribaro er gust ḳaoar manush ḳom oile, laga goror manshor loge milia, duio foribare zotoḳan ḳaita faroin, hou onumane meṛa ba sagolor baichcha nibae.
5 I baichcha oibo nikut, eḳ boros boeoshor faṭa baichcha oite oibo; tumra meṛa ba sagolor baichcha nitae farbae.
6 Ar ou sandor souddo tariḳ forzonto iṭar zoton ḳorbae, bade tamam Boni Israil eḳloge milia, tara hainja bala zarzir foribare ou baichchain zobo ḳorba.
7 Zobo ḳorar bade tara er kisu lou nia zoto goro er gust ḳaiba, oto goror duaror soukaṭor duio galat ar uforor soukaṭo ou lou lagaiba.
8 Hou raitu tara i gust aguindi sekia ḳamir saṛa ruṭi ar titta hagor loge milaia ḳaiba.
9 I gust tumra ḳasa, ba fanidi randia ḳaio na. Ḳali aguindi sekia ḳaio, er ṭeng, ḳolla shudda bitoror hokkolta eḳano sekio, bade ḳaio.
10 Rait fuanir age ḳani shesh ḳorio, bian forzonto kuntau baki toio na. Zudi kunta baki roizae, te aguindi zalailio.
11 I ḳani ḳaoar bala tumrar ḳomoror ḳafoṛ mozbut ḳori findio, faot zuta lagaio, ator laṭi loio. Zoldi ḳori ḳani ḳaio. Iṭa oilo Mabudor namor Azadi Id.
12 Hou raitu ami Mishor deshor mazdi zaimu, deshor hokkol manshor boṛo fuare ar foshur foela meda baichchareo marilimu. Mishoror hoḳol deb-debir bisar ḳoria shaza dimu; amiu Mabud.
13 Oile tumrar duaror soukaṭo lefa lou deḳle ami buzmu i goro tumra ro. Erlagi ami Mishor desho gozob ḍalibar shomoe, lou lefa ou gor bad dia samnedi zaimu. Moutor gozob tone tumra rehai faibae.
14 Ou dinre tumra iad rakio ar ami Mabudor name idor din manio. I idre tumra amar hukum mono ḳoria hor-hamesha oarishor for oarish dori mania zaio.”
Ḳamir saṛa ruṭi ḳaoar hukum
15 Mabude ḳoila, “Tumra shat din forzonto ḳamir saṛa ruṭi ḳaibae. Foela dinu zarzir gor taki hoḳol ḳamir falai dibae. I shato dinor maze zegue ḳamirala ruṭi ḳaibo, tare Boni Israil tone fusia falail oibo.
16 Foela din ar shat nombor din tumra fobitro milon-mahfil adae ḳorbae, i dui din ḳali zoruri ḳaoa-daoa saṛa dusra kunu ḳam-ḳaz ḳorbae na.
17 Ou laḳan tumra ḳamir saṛa ruṭir i id adae ḳorio, amar hukum mono ḳoria oarishor for oarish dori hor-hamesha i id adae ḳorio. Ou dinu ami tumrare sifai dolor laḳan ḳori Mishor desh taki bar ḳori anmu.
18 Tumra foela sandor souddo tariḳor hainja taki shuru ḳoria, eḳoish tariḳor hainja forzonto ḳamir saṛa ruṭi ḳaio.
19 Ou shat din zate tumrar goro ḳamiror kunu nam-nishana na taḳe, ou shomoe ḳeu zudi ḳamirala ḳani ḳae, te he tumrar nizor zatir ouk ba bin zatir ouk, tare Boni Israilor shomaz taki fusia falail oibo.
20 I shat din tumra zenou ro na ḳene ḳamirala kuntau ḳaio na; ḳali ḳamir saṛa ruṭi ḳaio.”
21 Musae Boni Israilor hoḳol moe-murobbire dola ḳoria ḳoila, “Afnara zaukka, gia zarzir foribaror lagi Azadi Idor meṛar baichcha ania zobo ḳoroukka.
22 Ar ‘esub’ gasor eḳ aṭi ḍeṭa loia, fatilo toa lout buṛaia duaror soukaṭor duio galat ar ufre lagaio. Shabdan! Shuruz uṭar age ḳeu goror bare baroio na.
23 Mishori oḳolre marar lagi Mabude zebla Mishor deshor mazdi toshrif niba, ou shomoe tumrar soukaṭor ufre ar duio galat lou deḳle, tain i gor bad dia samnedi aguaiba. Azrail firistare tumrar goro hamaia marte dita nae.
24 “Amar batail hukum mono ḳoria tumra ar tumrar aolad oḳole i idre adae ḳorio.
25 Ami amar nizor oada mafik tumrare ze desh dimu, hou desho gia harleo tumra i id adae ḳorio.
26 Tumrar huruttainte zebla tumrare zikaiba, i idor ḳaron kita? Iṭa kila aise?
27 Te tumra zuaf dio, iṭa Mabudor name Azadi Idor kurbani. Mishori oḳolre marbar bala tain Mishor desho Boni Israilor gor bad dia samnedi aguai gia, amrare azad ḳorsla.” Ikan hunia hoḳol manshe Mabudre shoizda ḳorla.
28 Musa ar Harunre Mabude zela batai disla, Boni Israil oḳol tarar goro gia ou laḳan ḳam ḳorla.
Dosh nombor ba aḳeri gozob, boṛo fuar mout
29 Heshe maz raite ou laḳan goṭlo, Mabude godit boa Feraunor fua tone zel ḳanar bondir fua forzonto hokkolre marilila. Mishor deshor hokkol foribaror boṛo fuain ar foshuintor foela meda baichchareo tain marilila.
30 Teu Feraun ar tar uzir-nazir oḳol, Mishoror hoḳol manush hozag oia uṭla, asta Mishor desho betaea ḳandonor ruil foṛlo; ḳaron ola kunu gor roisil na, ze goro ḳeu na ḳeu morse na.
Mishor desh taki Boni Israilor hizrot
31 Hou raitu Feraune Musa ar Harunre anaia ḳoilo, “Tumra zoldi zao, Boni Israilre loia amar prozar ges tone horo. Tumra zela ḳoiso, oula gia Mabudor ebadot ḳoro.
32 Tumrar zoban motou tumrar goru-meṛar fal neogi. Tumra amareo nek dua deo.”
33 Mishori oḳole kub ḍoraila, tara mono ḳorla tarao moriziba. Erlagi tara tagda dita lagla, Boni Israil hokkol zoldi ḳori bidae oita.
34 Boni Israile tarar moedar ḳair maze ḳamir furaibar ageu, ḳai shoho gamlain ḳafoṛdi gaiṭ bandia ḳando loila.
35 Hoḳol Boni Israile Musar foramish moto, Mishori oḳolor shuna-rufar goena-gaṭi ar ḳafoṛ-sufoṛ ḳuzia nila.
36 Mabude ag toneu Mishori oḳolor dilor maze eḳ doya-maea foeda ḳorsla, zate Boni Israile zeta ḳuziba, otau zanu tarare dein. Ou laḳan ḳori tara Mishori oḳolor bout don-douloto ḳobza ḳorla.
37 Ota nia Boni Israil oḳol Ramashesh elaḳa taki Shukkotor muka roana oila. Tarar maze onuman soe lak shobol beṭain aṭia gela. Erar loge beṭin ar huruttaino asla.
38 Boni Israil badeo tarar loge rora aro bout manush, goru-meṛar fal hoḳolta milia bout boṛo dol bandia roana dila.
39 Bade tara Mishor taki ana hou moedar ḳai dia ḳamir saṛa ruṭi banaila. Mishor taki tarare zoldi ḳori bidae deoae i ḳait ḳamir maḳaibar shomoeu faisla na, ar fotor lagi kunu mosao nita farsla na.
40 Boni Israil oḳol Mishoro hoḳoltae sair-sho tish boros boshot ḳorsla.
41 Ṭik ou sair-sho tish boros fura oibar dino Mabudor hokkol bonda, sifai dolor laḳan hazia Mishor desh taki baroila.
42 Ou rait Mabude afon kudroti saeae fahara dia tarare Mishor desh taki bar ḳoria anae, i raitḳan ebadotir rait. Hokkol Boni Israilor lagi oarishor for oarish dori, Mabudor name uzagori ḳorar ek kas rait.
Azadi Id adae ḳorar niom-ḳanun
43 Mabude Musa ar Harunre ḳoila, “Azadi Idor kurbanir niom-ḳanun ami tumrare hikai diar. Huno, oinno kunu zatir manshore er gust ḳaite dibae na.
44 Oile ḳorida gulame mosolmani ḳoranir bade ita ḳaito farbo.
45 Oinno zekunu zatir musafir ba betondari ḳamlareo ita ḳaoaio na.
46 Tumra zar baṛit foshu zobo ḳorbae hou baṛitu er gust ḳaite oibo; baṛir bare kuntau nibae na, foshur kunu aḍḍi bangibae na.
47 Tamam Boni Israile ou id adae ḳorbae.
48 Tumrar loge rora kunu abadire zudi Mabudor namor i id manto sae, te foela tar foribaror hoḳol beṭaintor mosolmani ḳorani lagbo. Bade he Boni Israilor laḳan id adae ḳorto farbo. Oile mosolmani ḳorani saṛa ḳeu i gust ḳaito farto nae.
49 Boni Israilor lagi ar abadir lagio eḳ homan ain zari oilo.”
50 Mabude Musa ar Harunre zela hukum disla, Boni Israile hasaror oulau amol ḳorla.
51 Mabude hou dinu sifai dolor laḳan ḳori, Boni Israil oḳolre Mishor desh taki bar ḳori anla.