14
Feraune Boni Israilre dorat ailo
1 Mabude Musare ḳoila,
2 “Tumi Boni Israilre ḳo, tara guria aia Fama-Hirut namor zagar ḳandat Migdul ar doriar mazamazi, Bal-Safon elaḳar samne doriar soro tambu gaṛita.
3 Ita deḳle Feraune mono ḳorbo, Boni Israile kunubae fot na faia guraguri ḳorte ḳorte morubumit aṭki gesoin.
4 Ami Feraunor dilre fashan banaimu, he tumrar ḳore ḳore ḳedanit aibo. Teu Feraun ar tar sifai oḳoloredi amar nam uzila oibo; ita dekia Mishori oḳoleo buziliba, amiu Mabud.” Mabudor hukum mafik Boni Israile oula ḳorla.
5 Hasau Mishoror bashsha Feraune zebla ḳobor failo, Boni Israil oḳol bagi gesoin, huniau Feraun ar tar uzir-naziror dil firigelo. Tara ḳoila, “Hae, hae! Amra ita kita ḳorsi? Itare amrar gulami taki ḳene saṛlam?”
6 Oḳan ḳoiau Feraune tar zuddor rot hazanir hukum dia, tar sifai oḳolre zuit ḳorailo.
7 He tar ḳas shoktiman soe-sho rot, Mishoror hokkol rotain ar erar saloḳdar sifaireo loge loilo.
8 Mabude Mishoror bashsha Feraunor dilre fashan ḳorilla, he Boni Israilor ḳore ḳore ḳedanit ailo. Era zebla himmot ḳori aṭia zaira, ou shomoe he erare dorat ailo.
9 He Mishor deshor hoḳol guṛ soar sifai, rotala sifai shoho asta armi dol loia erare dorar lagi erar ḳandat aillo. Ou shomoe Boni Israil oḳol doriar faro Bal-Safonor samne Fama-Hirutor ḳandat asla.
10 Tara ḳandat ateu Boni Israile saia deḳla, tarar ḳore oia Mishori sifai aira; dekiau zanor ḍore Mabudor dorbaro ḳandon lagaila.
11 Tara Musare ḳoila, “Mishoro ḳoebor dibar zaga nai dekia, amrare martae ḳori ou morubumit loia aiso ni? Tumi ita kita ḳorlae? Ḳene amrare Mishor taki bar ḳorlae?
12 Mishoror bitre amra tumare ḳoisi na ni, amrare ono roite deo, amra Mishorintor gulami ḳori? I morubumit morar saite Mishorintor gulami ḳorau to amrar lagi bala asil.”
13 Musae tarare ḳoila, “Tumra ḍoraio na. Hoḳole nirai oia deḳo, Mabude aiz kila basain. Ou zeta Mishorintore oḳon deḳrae, itare ar kunudinu deḳtae nae.
14 Tumra oḳon shanti o, deḳo, Mabudeu tumrar fokko oia zuddo ḳorba.”
Allar kudrote Nil doria hukai gelo
15 Bade Mabude Musare ḳoila, “Tumi ḳene amar gese ḳandirae? Boni Israilre ḳo na samnedi aguaita.
16 Ar tumar ator laṭire baṛaia doriar ufre usa ḳori doro, doriare dui bag ḳorilao. Teu tamam Boni Israil hukna bae aṭia doria far oiba.
17 Kial rakio, ami Mishori oḳolor dil ola fashan banaimu, tara erare dorar niote doriat hamaiba. Erbade Feraun, tar sifai, tar rotain, tar guṛ soar oḳolor mazdi amar zalal-shan zair oibo.
18 Feraunor hal-hokikot dekia baki Mishori oḳoleo buziliba, amiu Mabud.”
19 Ermaze Allar ze firista Boni Israilor age oia zaoat asla, ein zaga bodlaia Boni Israilor ḳore gelagi. En loge oia kudroti hou megor saḳao samne taki horia ḳore aillo.
20 Ḳore aia Mishori ar Israili duio dolor mazḳano ubailo. Erlagi ou megor saḳar andaire Mishori oḳol andairt foṛigela, tara raitor bala Boni Israilor ḳanda loita farla na. Oile Boni Israilor samne raitor balao megor saḳar forsha roilo.
21 Bade Musae doriar ufre tan at baṛaila, ar Mabude hara rait kub zure fubali haoa dia doriar fani horaia dui baṭ ḳorilla, doria hukaia mazedi hukna fot baroilo.
22 Boni Israil oḳole hukna fae doriar mazdi roana dila, doriar fani tarar ḍaine-baue oalor laḳan ubai roilo.
23 Ita dekia Mishori oḳole tarare ḳedaia doriar hou hukna fotedi gela. Feraunor hokkol rot, guṛa, ar guṛ-soar oḳol ḳedai ḳedai doriar hou foto gia hamaila.
24 Ar fotabala Mabude hou kudroti aguin ar megor saḳa taki Mishori sifair bae lannoti nozore saila, teu tara bedisha lagigela.
25 Tain erar rotor sakka nosṭo ḳori dila, erlagi tarar kub ḳosṭo oile rot salanit roilo; ermaze tara eḳe-oinnore ḳoilo, “Oise, ar bad deo, amra Boni Israilor ḳor tone hori zai. Mabude nize tarar fokko oia, amrar loge zuddo ḳorra.”
26 Ou shomoe Mabude Musare ḳoila, “Tumi doriar ufre hirbar at baṛao. Tumar at baṛaile fani hirbar Mishorintor ufre, tarar rot ar guṛ soaror ufre aibbo.”
27 Musae doriar ufre at baṛaila, ar bian oar ageu doriar fani hirbar homan oigelo; Mishorinte ḍaine-baue douṛa-douṛi lagaila, oile Mabude tarare doriar fanidi baoai dila.
28 Fani hirbar zagat aillo, tarar rotain, sifain, ar guṛ soar oḳol, mani Boni Israilor ḳore oia ḳedanit aora hokkolta fanie buṛi gelo, eguo zita roila na.
29 Oile Boni Israil oḳole hukna fote doriar mazdi gela, tarar ḍaine-baue fani oalor laḳan ubai roilo.
30 Ou nomunae Mabude hi din Mishori oḳolor at taki Boni Israilre basaila, tara nizor souḳe deḳla, Mishorintor mora lash doriar soro bashi roise.
31 Mishorintor ufre Mabudor kudroti lila-ḳela dekia, Boni Israileo Mabudre ḍoraigela. Tara Mabudor ufre ar tan gulam Hozrot Musar ufre furafur iman anla.