20
Allar siroḳalin ḳas dosh hukum
1 Bade Mabude formaila,
2 “O Boni Israil oḳol, ami Allau tumrar Mabud. Mishor deshor gulami taki amiu tumrare bar ḳori anchi.
3 “Amar bodola tumra dusra kunu devta manio na.
4 “Tumra fuza ḳorar niote kunu devta banaio na. Asmanor kuntar laḳan, zominor kuntar laḳan ba fanir mazor kuntar laḳan kunu devta banaio na.
5 Mono rakio, ḳali ami Allau tumrar Mabud. Amar faona ebadot ami sai. Erlagi tumra itar fuza ḳorio na, kezmoto ḳorio na. Huno, zera amar birudde guna ḳore, ami tarar gunar fol tarar tin sair ḳandan forzonto bortai.
6 Oile zera amar ashik bonia amar hukum-ahkam amol ḳore, ami tarar azar azar oarish forzonto amar obiram maea-mohobbot deḳaimu.
7 “Beḳama kunu ḳarone tumrar Alla Mabudor nam muḳo loio na. Ḳeu zudi ḳamoḳa Mabudor nam loe, te kunumonteu amar shaza taki rehai faito nae.
8 “Iad ḳoria Zummabarre fobitro din manio.
9 Tumra haftat soe din ḳam ḳorio, zarzir hoḳol ḳam adae ḳorio,
10 oile shat nombor din oilo Zummabar, tumar Alla Mabudor name ziraibar din. I din tumi, tumar fua-fuṛin, tumar gulam-bandin, tumar goru-gadain, tumar gaut ba ṭauno rora musafir ba bin-deshi, ḳeu kunu zator ḳam-ḳaz ḳorio na.
11 Zano to, Mabude soe dine asman-zomin, doria ar erar mazor hoḳolta foeda ḳorsoin, bade shat nombor din ziraisoin, kunu ḳam ḳorsoin na. Ou dinre Mabude rohomot dia pakdin ḳorsoin.
12 “Tumrar ma-bafore ijjot ḳorio. Teu tumrar Alla Mabude ze desh diba, hou desho tumrar haeati baṛibo.
13 “Kun ḳorio na.
14 “Zina ḳorio na.
15 “Suri ḳorio na.
16 “Ḳeuror birudde misa shakki dio na.
17 “Oinno manshor gor-duaror bae lalos ḳorio na, tarar bou, gulam-bandi, goru-gada, ba kunu kichchur bae llalos ḳorio a.”
18 Boni Israile zebla faṛ taki megor ḍaḳ, zilkani, shingar aoaz, ar duma baronit deḳla, dekia tara duroi takiu ḍoraia ḳafa dorla.
19 Tara Musare ḳoila, “Afneu amrar loge matoukka, amra hunmu; oile Allae amrar loge batchit ḳorle to amra morizimu.”
20 Musae tarare ḳoila, “Tumra ḍoraio na. Allae tumrare forikkat falaisoin, zate tumrar zano Allar ḍor hamae, ḍoraia tumra guna taki basia ro. Erlagiu tain nize didar disoin.”
21 Hoḳol manush duroi ubai roila, ar Musa Allai hou megor ḳalnir andarir maze hamaila.
Allar loge milonor usillar shorto
(1) Kurbani ḳana banani
22 Mabude Musare ḳoila, “Tumi Boni Israilre ḳo, tumra nizeu to deḳlae, ami Mabude asman taki tumrar loge batchit ḳorlam.
23 Erlagi ebadot ḳorar niote, amar bodola dusra kunuzat devta banaio na. Tumra shuna ba rufadio nizor kunu deb-debi banaio na.
24 “Amar lagi ḳali maṭi dia kurbani ḳana banaio. Er ufre tumrar Zalail Kurbani ar Salamoti Kurbanir goru-sagol ania kurbani dio. Zeta zagainto ami amar nam iad ḳorai dimu, hou zagainto ami nize azir oia tumrare dua dimu.
25 Tumra amar lagi fattordi kunu kurbani ḳana bananit lagle, hi fattorguin ḳaṭio na. Er ufre atiar salaile tumra itare nafaḳ banailibae.
26 Amar kurbani ḳana oula ḳori banaio, zate er ufre uṭte kunu moi ba siṛi na lage. Ḳaron siṛi bae uṭat gele kiba tumrar lemṭa deḳa zaibo.”