7
Allai imam Malki-Siddikor forisoe
1 I Malki-Siddik oila Allatalar imam, Shalemor bashsha. Ibrahime bashsha oḳolre zuddot araia hari firia aoar bala ou Malki-Siddikor loge tan mulaḳat oile, Malki-Siddike Ibrahimre dua ḳorsla.
2 Ibrahime tan hokkoltar dosh baṭor eḳ baṭ enre dilaila. Malki-Siddik namor mani oilo, forezgaror bashsha. Tain Shalem ṭaunoro bashsha, mani shantir bashsha.
3 Malki-Siddikor ma nai, bafo nai, tan kunu ḳandan namao nai, tan haeatir shuru ba shesh nai. Te buza zae, tain Allar ḳas maear futor laḳan, hor-hameshakur imam.
4 Te sinta ḳori deḳoukka, ein ḳoto mohan, zenre amrar ḳandanor mul baba Ibrahimeo tan gonimotor malor dosh baṭor eḳ baṭ dan ḳori disoin.
5 Ar Lebi gusṭir maze zera imamoti ḳam ḳoroin, tara shoriotor hukum mafik tarar baiain, mani Boni Israilor ges taki dosh baṭor eḳ baṭ adae ḳorar eḳtiar faisoin. Ou Boni Israilo to Ibrahimor ḳandanor maze zonmisoin.
6 Oile hou ze Malki-Siddik Ibrahimor ḳandanor na oileo, Ibrahimor ges taki dosh baṭor eḳ baṭ nisla, ar Ibrahimre duao disla, zen loge Allae nize oada ḳorsoin.
7 Huru oḳole boṛo oḳolor ges taki dua faia taḳoin, ermaze to shondoe nai.
8 Eḳbaedi ze imamor mout oe, ou Lebi gusṭir imam oḳole dosh baṭor eḳ baṭ adae ḳoroin, ar aroḳbae Malki-Siddik, kitabe ḳoe tain hor-hamesha zinda asoin, taino dosh baṭor eḳ baṭ adae ḳorsoin.
9 Hirbar ikano ḳoa zae, Lebi gusṭir ze imame dosh baṭor eḳ baṭ adae ḳorsoin, taino Ibrahimor mazdi Malki-Siddikre dosh baṭor eḳ baṭ disoin,
10 ḳaron Malki-Siddike zebla Ibrahimor loge mulaḳat ḳorla, Lebi to ou shomoe Ibrahimor naṛor bitre asla.
Hozrot Isa Malki-Siddikor silsilar imam
11 Lebi gusṭir imam sab oḳolor ḳam-ḳazor ufre nirbor ḳoria Allae Boni Israilre shoriot disla, i imamor mazdi zudi kamil oa zaito, te Lebi gusṭir foela imam Harunor bodla Malki-Siddikor nomunar aroḳ imam aoar kunu goroz asil ni?
12 Imamor silsila bodlail oile to shoriotreo bodlani lage.
13 I hoḳol boean zan niote ḳorram, ein to Lebi gusṭir nae, aroḳ gusṭir, hi gusṭir ḳeu kurbani ḳanar ḳadim asla na.
14 Amrar munib to Ehuda gusṭir maze foeda oisoin, i gusṭir ḳeu imam oiba ḳoria Musae kunta ḳoisoin na.
15 Malki-Siddikor nomunae zebla aroḳzon imame toshrif anoin, i shomoe to amrar boean aro saf oigese.
16 Isa to roḳto-mangshor kunu niome imam oisoin na, ḳali tan hor-hameshakur kudroti zindegir boleu oisoin.
17 Tan befare pak kalame ḳoe,
Malki-Siddikor nomunae
tumiu hor-hameshakur imam.
18 Te deḳoukka, eḳbae agor imamotir hukum-ahkam oḳol ḳomzur ar beḳama oizaoae itare horai deoa oise,
19 Musar shoriote to kuntareu kamil banaito farse na. Ar aroḳbae oula eḳ mohan noea oada zari ḳora oise, i oadar zoriae amra Allar aro ḳasat aitam farmu.
20 Ar agor imam oḳolor befare to kunu ḳosom ḳora oise na, oile Isar imamotir befare Allae ḳosom ḳorsoin.
21 Tain ḳosom ḳoria enre boail ḳorsoin, ar ḳoisoin,
Mabude ḳosom ḳaia ḳoira, tumiu hor-hameshakur imam,
tumar befare tan munsha bodlaita nae.
22 Te amra buzram zen, Isa Allar loge manshor milonor aro mohan eḳ usillar zamindar oisoin.
23 Ar Lebir gusṭi taki bout manshe imamoti ḳorsoin, mout oizae ḳori era kunu zonu hamesha imamoti ḳorta farsoin na.
24 Oile Isa to hor-hamesha zinda asoin, erlagi tan imamoti kunudino furaito nae.
25 Erlagiu zera tan usilla loia Allar ḳasat ae, Allae tarare furafur nazat dan ḳoroin, ḳaron tarar fokke sufarish ḳorar lagi tain hamesha zinda asoin.
26 Ashole amrar lagi oula eḳzon fordan imamor zoruro asil, zein pak-forezgar, be-guna, gunagar oḳol tone alog, ar Allae zenre asman oḳolor ufre tulchoin.
27 Baki hokkol fordan imame foela tan nizor lagi, bade tan ḳoumor gunar lagi forteḳ din kurbani adae ḳora lagto. Oile ou imamor lagi itar zorur asil na, ḳaron tain tan nizore kurbani dia eḳoi bare i ḳam adae ḳorilisoin.
28 Shoriote zoto fordan imam oḳolre boail ḳorse era hoḳolu ḳomzur, oile shoriotor bade Allar ḳosom mafik zenre boail ḳora oise, einu ḳas maear fut, hor-hameshakur imamotir lagi enre kamil banail oise.