5
Doni oḳolre hushiari
1 O doni oḳol, huno, tumrar ufre ze mosibot ar, itar lagi tumra ḳando ar ahazari ḳoro.
2 Tumrar don-shompod binash oigese, tumrar ḳafoṛ-sufoṛ undure ḳaṭilise.
3 Tumrar shuna-rufat zongare dorilise, i zongare tumrar bifokke shakki dibo, ar agunir laḳan tumrar gust ḳaibo. Ita to kiamotor lagi tumra dola ḳori toiso.
4 Huno, tumrar dan daora ḳamlar ze beton aṭḳaiso, ou betone oḳon sillaia ahazari ḳorer. I ḳamlaintor ahazari Alla Rabbul Alaminor ḳano gia azise.
5 Duniar bukut bilashita ar rong-tamshar maze tumra din ḳaṭaiso, duzoḳor kuraḳ bonar lagi nizore kub fulfula banaiso.
6 Tumra ni-oforadire dushi shaibosto ḳoria kun ḳorso, oile era kunu protibad ḳorse na.
Mosiboto sobor ḳora
7 Gotike O amar maear bai oḳol, amrar malike toshrif anar ag forzonto tumra ḳoshṭo ḳoria tuṛa sobor ḳoro. Tumra to deḳso, giroste bala foshol faoar lagi megor ashae kila sobor ḳori boi roe.
8 Tumrao ola sobor ḳoro, ostir oio na, ḳaron malike kub zoldiu toshrif anra.
9 O bai oḳol, tumra zate Allar nozoro dushi na bono, erlagi tumra ḳali eḳzone aroḳzonor kut tukanit roio na. Huno, bisar ḳorar lagi to Alla Pak amrar samne aia ubai roisoin.
10 O maear bai oḳol, ze nobi-rosul oḳole Mabudor name toblig korsla, tarar ḳoshṭo ar soboror ḳota sinta ḳori deḳo.
11 Tara to ḳoshṭo faiao tir roisoin, erlagi amra tarar gunogan gai. Tumra to Aiub nobir soboror ḳota bala ḳori zano, ar eoḳan zano, Allae bade tanre kila rohom ḳorsla. Alla to doya-maear shagor.
12 O amar bai oḳol, amar ashol ḳota oilo, tumra kunuzat ḳosom ḳorio na. Asmanor nameo na, zominor nameo na, ola kunu nameu ḳosom ḳorio na. Er bodla tumrar oe ḳan oe, ar na ḳan na ouk, zate tumra bisaror daṛo na foṛo.
Munazat ar hedaeot ḳora
13 Tumrar maze ḳeu mosiboto taḳle he dua ḳorouk. Ḳeu shuke taḳle hamd-ḳaoali gauk.
14 Ḳeuror bemar oile he zomator murobbi oḳolre daot deuk, tara aia Allar nam loia tar matat tel dia dua ḳoroukka.
15 Teu imanor sate dua ḳorar ḳatire Allae i bemarire shifa ḳorba. He zudi gunao ḳoria taḳe, te tar guna maf ḳora oibo.
16 Erlagi tumra eḳzone aroḳzonor gese zarzir guna shikar ḳoro, ar eḳe-oinnor lagi dua ḳoro, zate bala oitae faro. Forezgar oḳolor munazat asanoḳ bolala.
17 Ilias nobi amrar laḳanu eḳzon roḳtoe-mangshoe manush asla. Tain dile-zane dua ḳorla meg na oar lagi, hasau shaṛe tin boros kunu meg oilo na.
18 Bade tain megor lagi dua ḳorla, teu meg oilo, ar zomino foshol folilo.
19 O amar bai oḳol, tumrar maze ḳeu zudi be-foti oizae, ar ḳeu tare firaia ane,
20 te zanio, ze manshe kunu gunagarre be-fot tone firaia ane, he ou gunagaror zan basae ar tar guna beshi oileo mafi fae.