12
Matar suldi fao fusa
Azadi Idor soedin age, Hozrot Isa hou Lasaror gau Baet-Aniat aila, ze Lasarre tain mora taki zinda ḳorsla. Ino tara Hozrot Isar lagi ḳanir mezbani zuit ḳorla. Isar loge ḳaoat zera boisil, erar loge Lasaro asla ar Bibi Martae ḳadimdari ḳorla. Ou shomoe Lasaror boin Moriome ada sher kub dami ḳaṭi ator loia aila, aia ou ator Isar fao-o ḍalia nizor matar suldi fao fusia dila. Atoror kushboye asta gor borigelo.
Ihuda Iskariat name Isar eḳ sahabi, zein tanre dushmonor ato dorai diba, ein ḳoila, “Ish, i ator fuṭin besile to tin-sho dinar faia gorib oḳolre bilai deoa gelo one.” Ashole Ihudae gorib oḳolor ḳota sinta ḳoria ikan ḳoise na. He asil sur. Ṭeḳar toli tar gese taḳto, ar zoma ṭeḳa taki he suri ḳorto, erlagi ola ḳoise. Isae ḳoila, “Tumra i beṭigur mono duk dio na. Amar dafon-ḳafonor lagi tain i fuṭain toisla. Gorib oḳol to hameshau tumrar maze asoin, oile amare hamesha faitae nae.”
Hozrot Isa Baet-Aniat aisoin hunia, Ihudi zatir bout manush ono aila. Tara ḳali Isar lagi nae, hou ze Lasarre Isae mora taki zinda ḳorsla, tareo deḳat aila. 10 Ou shomoe boṛo imam oḳole niot ḳorla Lasarreo marilita. 11 Ḳaron Lasaror lagi bout Ihudi manshe neta oḳolor log saṛia, Isar ufre iman anchila.
Hozrot Isa Zeruzalemo aila
12 Idor niote dole dole zoto manush aisoin, tara bador din hunla, Hozrot Isae Zeruzalemo toshrif anra. 13 Ou tara kezuror kesma ḍal loia tanre aguaia anat gela ar misil dia ḳoila,
 
“Marhaba! Mabudor name zein toshrif anra,
tan tarif ouk,
tainu Israilor bashsha!”
 
14 Allar kalamor aeat mafik Hozrot Isae eḳṭa gada dekia tar ufre soar oila. Kitabo leḳa ase, 15 “O Sion-ḳoina Zeruzalem, ḍoraio na. Saia deḳo, gadar baichcha soṛia tumar bashsha aira.”
16 Sahabi oḳole foela itar kunu mani buzla na. Bade Hozrot Isar kudroti mohima zair oia harle, pak kitabor ḳota tarar mono oilo, ou aeato tan befareu leḳa asil, ar manshe tan lagiu otota ḳorse. 17 Ḳoebor taki Lasarre ḍakia zinda ḳori tular shomoe zeta manush Isar loge asla, tarao ou befare hamesha mat-ḳota matita. 18 Erlagi manshe tan ou keramoti ḳamor ḳobor hunia tanre aguaia anat gesla. 19 Ita dekia Forishi oḳole eḳe-oinne ḳoilo, “Amrar to kunu lab or na. Deḳrae ni, asta duniau tar ḳore gesegi.”
Nizor moutor agam ḳobor
20 Azadi Ido zera ebadot ḳorat aisla, tarar maze ḳoezon Iunani manusho asla. 21 Tara Galil zilar Baet-Soeda gaur Filifre aia minot ḳorla, “Sab, amra huzur Isare deḳtam sai.” 22 Filife ikan Andriasre ḳoila. Bade Andrias ar Filife gia Isare zanaila.
23 Isae tarare ḳoila, “Ami Bin-Adomor mohima zair oar shomoe aichche. 24 Ami tumrare hasau ḳoiram, danor bis maṭit foṛia zudi na more, te eḳṭau taḳe, ar maṭit morle bout foshol fole. 25 Ola ze zone nizor zanre beshi maea ḳore, he tar ashol zindegi kuailae, oile ze zone i duniat nizor zanre tuchcho mono ḳore, he tar ashol zindegi, mani aḳerator lagi zan basae. 26 Ḳeu zudi amar ḳezmot ḳorto sae, te amar fote solouk. Teu ami zeḳano roimu amar ḳezmotḳario ono roibo. Ze zone amar ḳezmot ḳore, amar gaibi bafe tare ijjot diba.
27 “Amar mon oḳon fereshan oigese. Te ami oḳan ḳoitam ni, baba, ze shomoe aia azise, ou shomoeor at taki amare basao? Oile otar lagiu to ami ou shomoe forzonto aisi. 28 Baba, tumi tumar mohima zair ḳoro.” Ou shomoe asman taki gaibi aoaz ailo, “Ami amar mohima zair ḳorsi ar hirbar zair ḳormu.” 29 I aoaz hunia hino zoto manush asla, tara ḳoila, “Ita to megor ḍaḳ.” Ḳeu ḳeu ḳoilo, “Kunu firistae tan loge batchit ḳorsoin.” 30 Ikan hunia Isae ḳoila, “I aoaz to amar lagi aise na, afnarar lagiu aise. 31 I zogotor manshor bisaror shomoe aichche, duniar munib Iblisor at taki oḳon ḳemota ḳaṛia neoa oibo. 32 Amare zebla zomin taki ufre tula oibo, ou shomoe ami hoḳolre amar gese ṭania tulmu.” 33 Tan kilaḳan mout oibo, oḳan buzanir lagi tain ita ḳoila.
34 Ou shomoe manshe Isare ḳoila, “Amra pak kitab taki hunchi al-Mosi siroḳal roiba. Te afne kila ḳoira, Bin-Adomre usat tula oibo? Taile i Bin-Adom ḳe?” 35 Tain zuaf dila, “Ar kisu shomoe nur afnarar loge ase, nur taḳte taḳteu aṭa doroukka, zela andaire aia afnaintore na bere. Ze zon andair fote aṭe, he zane na he kuai zar. 36 Nur afnarar loge taḳte taḳteu nuror ufre iman anoukka, zate afnarao ou nuror manush oita faroin.” Erbade Isa in tone horia gia, erar souk taki nizore lukailila.
Manshor dil fashan
37 Hozrot Isae manshor samne oto beshi keramoti nishana deḳanir badeo tara tan ufre iman anlo na. 38 Ita hokkolta goṭisil zate agor zomanar nobi Ishaear ḳota fura oe, tain bataisla,
 
Mabud go, amrar tobligor ufre ḳe ekin ḳorse?
Tumar kudroti at ḳar geseu ba zair oise?
 
39 Erlagiu to ita manshe iman anche na, ḳaron Ishaea nobie eoḳan ḳoisla,
 
40 Allae tarar souk anda banailisoin,
tarar dil fashan banailisoin,
zate soukdi na deḳe, ar dildi na buze.
Arnae kizanu tara touba ḳorilain,
Allar bae firizain,
ar ami tarare shifa ḳorilai.
 
41 Ishaea nobie Isar mohima deḳsla gotike, tan befare ou ḳota ḳoisla. 42 Tebou Ihudi neta oḳolor maz taki boute tan ufre iman anla, oile Forishi oḳole tarare shomaz taki bar ḳori dilaibo, oḳan ḍoraia tara shikar ḳorla na. 43 Tara Allar tarif taki manshor tarif faite beshi fosond ḳorta.
Hozrot Isau toraneala
44 Bade Isae zure zure ḳoila, “Ze zone amar ufre iman ane, he ḳali amar ufre nae, zein amare faṭaisoin tan ufreo iman ane. 45 Ze zone amare deḳe, he ashole tanreu deḳe, zein amare faṭaisoin. 46 Ami i duniat nur hishabe aisi, zate amar ufre ze iman ane, he ar andarit na roe. 47 Ḳeu zudi amar ḳota hunia, ou mafik amol na ḳore, te ami nize tar bisar ḳori na, ḳaron ami manshore dushi shaibosto ḳorat aisi na, borong manshore toranit aisi. 48 Ze zone amare mane na ar amar ḳota hune na, tar bisaror lagi to eḳzon asoin. Ami tare ze ḳota ḳoisi, ou ḳotaeu kiamotor din tare dushi shaibosto ḳorbo. 49 Ami to nize taki kunta ḳoisi na, ḳali amar ze gaibi bafe amare bezisoin, tain nizeu hukum disoin, ami kita kita ḳoitam. 50 Ami zani, tan hukum manau oilo aḳeri zindegi. Erlagi ami zeta ḳoi, ita amar gaibi bafor hukumeu ḳoi.”