4
Allai donor ḳazanchi oia ḳezmot ḳoro
1 Al-Mosie nizor shorilo ḳoshṭo shoijjo ḳorsoin ḳori, tumrar dilor babreo olaḳan ḳoro. Shorilo zar ḳoshṭo oise, he to gunar zalo bondi roise na.
2 Erlagi he zotodin duniat ase, otodin bod ḳaishe na solia ḳali Allai munshae zindegi ḳaṭae.
3 Allare zera sine na, tarar laḳan tumrao age zina-bodmaishi, mouz-furti, matlami, hoi-hulla ar zogoinno murtifuza ḳoria din ḳaṭaitae.
4 Oile oḳon tumra tarar loge oia olaḳan beshamal naformani ḳorrae na dekia, tara taijjub bonia tumrar ninda gaira.
5 Ta-o zein zinda ar murda oḳolor bisaror lagi zuit asoin, tara tan geseu hishab-nikash dite oibo.
6 Erlagiu murda oḳolor geseo kush-ḳobri toblig kora oisil, zate manush hishabe tarar shorili bisar oileo, ruhani zogoto tara Allar laḳan zinda roin.
7 Oḳon to hokkoltar hesh shomoe aichche. Erlagi tumrar monre ṭik koro, nizore shamlaia raḳo, zate munazato kamiab o.
8 Ashol ḳota oilo, tumra eḳe-oinnore dil taki mohobbot ḳoro, ḳaron maea-mohobbote bout guna guria raḳe.
9 Kunuzat bitishna na deḳaia, tumra eḳe-oinnor memandari ḳoro.
10 Allar ges taki zein zelaḳan niamot faiso, ou donor ḳaṭi ḳazanchi hishabe itare eḳe-oinnor ḳezmoto lagao.
11 Ḳeu zudi toblig koroin, te ou laḳan ḳoroukka zate buza zae, ita Allai buli. Ar zein ḳezmot ḳoroin, ein Allar deoa bol-shoktie ḳezmot ḳoroukka, zate hokkoltatu al-Mosir usillae Allar tarif oe. Tarif ar kudroti ḳemota hor-hamesha tanu. Amin.
Isaei imandar hishabe ḳoshṭobug
12 Bai oḳol, tumra oḳon zibon-moron forikkat foṛia taijjub oio na, mono ḳorio na ita asanok kunta goṭer.
13 Borong tumra zen al-Mosir ḳoshṭor bagi oirae ḳori kushi ḳoro, zate tan mohima zair oar shomoeo tumra amud-furtie kushi-bashi ḳortae faro.
14 Al-Mosir namor lagi tumra zudi beijjot o, te tumra nek-kofali. Ḳaron Allar mohima-ala Pak Ruh tumrar ufre ase.
15 Tumrar mazor ḳeu zanu suri, kun, ba kunuzat oforadi hishabe, emonki foror ḳame nak golaia ḳoshṭo na ḳorouk.
16 Oile ḳeu zudi Isaei imandar hishabe duk-koshṭo ḳore, te he shorminda na ouk, borong Isaei forisoer lagi Allar tarif ḳorouk.
17 Bisaror shomoe aichche, ar Allar fosond ḳora bonda oḳolrediu bisar shuru oibo. Ita zudi amrar maz takiu shuru oe, te zera Allar kush-ḳobri manche na, tarar dosha kilan oibo?
18 Allar kalamo ase,
Allaraia manshor zanor sodma oile,
gunagar ar be-dine muk lukaibo kuai?
19 Oile Allar morzie zera duk-koshṭo ḳorer, tara nek kam ḳori ḳori nizor zanre hou hok-halal foeda ḳorrar ato shofi deuk.