Fobitro Injil Shorif 18 nombor sifara
al-Filimon
Forisiti
Alla Pakor hukume Hozrot Isa al-Mosir ḳas sahabi Hozrot Pauluse (ra:) ou sifara leḳsoin. Hozrot Isae behesto toshrif neoar onuman 27 bosor bade ikan siṭir aḳare leḳa oise.
Hozrot Filimon asla Isa al-Mosir eḳzon namḳora ummot. Tain Kolosi ṭaunor Isaei zomator eḳ zon. Onisim name tan ek ḳorida gulam asil. Hozrot Paulus (ra:) zebla zelo bondi asla, ou shomoe Onisim tar munib Filimonor ges taki bagia kunu surote Paulusor gese aisil. Hozrot Paulusor mazdia-u Onisim Isaei imandar hishabe Paulusor eḳzon bishesh ḳadim oisoin. Tara duiozone foramish ḳorla, Onisim tan munib Filimonor gese firia zaiba, ar tan agor bul shikar ḳoria maf saiba. Hozrot Pauluse Filimonor gese onurud ḳori leḳla, tain zanu tan agor gulamre firot nein ar oḳon ḳali gulam hishabe nae, eḳzon Isaei bai hishabe-o shomzia nein.
Ou sifarat deḳa zae, gulam ar munibor maze kunu bedabed nai, Hozrot Isar ummot oar bade hoḳolu eḳ shoman. Ar zomator murobbi neta Hozrot Pauluse shadaron mumin oḳolor ufre netagiri, hukumdari na ḳoria borong nizore nisa ḳoria zomat oḳol salaira. Tan maze kunu beṭagiri ba boṛai-bahaduri nai.
Ermaze ase,
(1) Hozrot Paulusor salam 1:1–3 aeat
(2) Hozrot Pauluse Filimonor tarif ḳorla 1:4–7
(3) Onisimre firot neoar lagi onurud 1:8–21
(4) Hozrot Paulusor shesh ḳota 1:22–25
1
Hozrot Paulusor salam
1 Ami Paulus, Isa al-Mosir lagi bondi asi. Ami ar amrar bai Timotie, amrar logor toblig korra maear dust Filimonor gese leḳram.
2 Boin Afia, amrar loge imanor zudda Arkipas ar tumar baṛir zomator hoḳolre salam zanairam.
3 Amrar gaibi baf Alla Pake ar Hozrot Isa al-Mosie tumrar ufre rohomot ar shanti nazil ḳoroukka.
Hozrot Pauluse Filimonor tarif ḳorla
4 Ami hamesha munazator shomoe tumar ḳota iad ḳoria Allar shukria adae ḳori.
5 Ḳaron Hozrot Isa al-Mosir ufre tumar iman ar pak bonda oḳolor bae tumar mohobbotor ḳota ami hunchi.
6 Ami dua ḳori, mumin oḳolor loge tumar ḳatir-shomporko aro baṛouk. Tumi to zano, al-Mosir ḳatire Allae amrare ḳoto bala bala niamot bilai disoin.
7 Bai, tumar mohobbot dekia ami kub kushi oisi ar utshaho faisi, tumi to Allar pak bonda oḳolor dilo aram diso.
Onisimre firot neoar lagi onurud
8 Tumar i bab dekia ami tumare eḳan ḳota ḳoitam sairam. Ami to al-Mosir name tumare hukum ditam farlam one, tumar ḳam fura ḳorar lagi.
9 Oile mohobbotor ḳatire hukum na dia tumare minot ḳoriar. Ami Paulus ou murobbi boeosho al-Mosir lagi bondi halote tumar gese i minoti ḳorram.
10 Amar aolad Onisimor lagi arzi zanairam, ami zelo bondi taḳa halote he iman ania amar aolad bonigese.
11 Eḳ shomoe tumar gese he beḳama asil, oile oḳon amar ar tumar gese he bout ḳamaora bonigese.
12 Zai ouk, amar zanor taki beshi maear ou manshore ami tumar gese firot faṭairam.
13 Ami tare amar gese raḳtam saislam, zate kush-ḳobrir dae bondi halote tumar oia he amar ḳezmot ḳorto fare.
14 Oile tumar izazot saṛa ami kunta ḳorlam na, zate zur ḳoria tumar bala ḳam adae ḳora na lage. Ami sairam, tumi niz takiu ou ḳam ḳoro.
15 Tumi zate siroḳalor lagi tare firia fao, oito fare ou ḳaroneu he tumar ges taki tuṛa dinor lagi horia asil.
16 Oile tumi oḳon tare ar gulam hishabe faitae nae borong gulam taki boṛo, mani maear bai hishabe faibae. Ḳas ḳori he amar kub maear manush, oḳon tumar geseo he aro maear, ḳali roḳto-mangshe nae, imandar bai hishabe maear.
17 Erdae tumi zudi amare ekoi imanor bagi zano, te amare zela ḳobul ḳorar ḳota, tare-o ola ḳobul ḳorio.
18 He zudi tumar kunu ḳeti ḳoria taḳe ar tar gese tumar kunu faona taḳe, te mono ḳorio, i faona tumi amar gese fao.
19 Ami Pauluse nizor ate lekia zanairam, tumar faona ami dilaimu. Ashole ami ḳoitam sairam na ze, tumar nizor zanor lagi-u tumi amar gese rini aso.
20 Bai Filimon, Allar oaste eḳan ḳam ḳoro, eḳzon imandar bai hishabe amar zano aram deo.
21 Tumi amar ḳota raḳbae zania-u, tumar gese ou siṭikan leḳlam. Ami mono ḳori, ami zeta ḳorar lagi ḳoiram, er taki beshi tumi ḳorbae.
Hozrot Paulusor shesh ḳota
22 Huno, aro eḳan ḳota ḳoiram, tumi amar lagi memanor kuṭa ṭik koria rakio. Ḳaron ami asha ḳorram, tumrar duar usillae amare tumrar gese firot deoa oibo.
23 Abu-Farase tumare salam disoin, tain Isa al-Mosir lagi amar loge oia bondi asoin.
24 Ar amar logor tobligkari Markus, Aristakus, Dimas ar Luke-o tumare salam zanaira.
25 Amrar Hozrot Isa al-Mosir rohomot tumrar dilo ḳaim rouk. Amin.