Allar fobitro toḳtor doroshon (4:1–5:14)
4
Allar toḳtor samne ebadot
1 Erbade ami doroshon deḳlam, behestor eḳan duar kula ase. Ar ami tan golar aoaz hunlam, shingar aoazor laḳan zein age matisla, tain amare ḍaḳ dila, ḳoila, “Tumi ono uṭia ao. Ami oḳon tumare deḳaimu, erbade kita kita nichchit goṭibo.”
2 Ḍaḳ hunar loge logeu ami Pak Ruhe kamil oilam, ar deḳlam, behestor maze eḳan toḳt ase, ou toḳtor ufre eḳzon boat asoin.
3 En surot oilo, dami hira ar lal monir laḳan. I toḳtor sairo galabae asil rongdenu, ita deḳte ekkere ḳosua fanna monir laḳan.
4 Ou toḳtor sairo ḳandabae aro sobbishḳan toḳt asil, hou toḳto boat asla sobbishzon murobbi neta. Erar lebas asil dola soḳsoḳa ar matat asil shunar taz.
5 Mazḳanor toḳt taki megor zilkani, guṛ-guṛi ḍaḳ ar bezuita ṭaṭari shobdo baronit asil. Er samne shatṭa mushal zalail asil, i mushal oilo Allar shat nomunar ruh.
6 Toḳtor samne foṭikor golashor laḳan forishkar ḳasor eḳ doria asil. Ar ou mazor toḳtor sairo galat sairzon zandar asil, erar samne-fise duiobae souk oḳole bora.
7 Foela zandarṭa deḳte shinghor laḳan, dusraṭa bisalor laḳan, tin nomborṭa manshor laḳan ar sair nomborṭa uṛal deora silor laḳan.
8 Ou sairo zandaror forteḳor soeṭa ḳori ḍaḳna asil, ar bare-bitre sairobae souk asil. Tara din-rait hamesha ou zikir ḳorra,
“Kuddusun, kuddusun, kuddusun, Rabbu-ilahul-kadir,
kana wa-hu kainus-saiyatin,
Fobitro, fobitro, fobitro Alla Mabud shorbo-shoktiman.
Zein asla, zein asoin, ar zein hamesha roiba.”
9 Zein siroḳalin zinda, zein toḳto boat asoin, ou zandar oḳole zeblau tan tarif, shomman ar shukria zanain,
10 ou shomoe zein toḳto boat asoin, zein siroḳalin zinda, en samne hou sobbishzon murobbi neta noto oia soizda ḳoroin. I neta oḳole zarzir matar taz shinghashonor samne kulia toia ḳoin,
11 “O amrar Mabud Alla,
tumi to ijjot, tarif ar kudroti ḳemotar zoiggo.
Tumiu to hoḳolta foeda ḳorso,
tumar morzie hoḳolta foeda oise ar ṭikia ase.”