3
Zomator saloḳdar ar ḳadim
1 Huno, ashol hok kota oilo, ḳeu zudi zomator saloḳdar oita sain, te tain to nek kam ḳorar kiali oisoin.
2 Zomator saloḳdar manshor sokut nikut oite oibo. Tan ḳali eḳ bou oibo. Tain nizore shamlaia raḳba, tan bala aḳol-buddi roibo, shobab oibo bodro, ar memandari ḳorte bala faiba. Manshore talim deoar ḳemota taḳte oibo.
3 Tain zanu modkur ar bod-mizazi na oin, borong tan shobab oibo norom, tain zanu mair-danga ḳorra ba ṭeḳa-foeshar lalchi na oin.
4 Tain zanu shoṭik babe tan nizor foribaror hokkolta salain, tan huruttain oiba baiddo ar adob-ḳaeda manra.
5 Ze manshe tar nizor gor shamlaito fare na, he Allar zomatre kila deḳa-huna ḳorbo?
6 Kunu noea imandar bai zomator saloḳdar oa ṭik nae, ila oile tain hoeto boṛai-beṭagirie bahaduri ḳorba, ar Iblisor lagi ṭik kora shazar bagi oiba.
7 Zomator bairor manshor gese tan shunam taḳa dorḳar, zate aḳta kunu bodnamor bagi na oin ar Iblisor fando na foṛoin.
8 Oula zomator ḳadim oḳolo ijjoti ar ek kotar manush oa zoruri. Era zate modkur ar haram lub-lalchi na oin.
9 Tara zanu hok bibeḳe Isaei imanor batuni befarre mozbut ḳori dilo raḳoin.
10 Erlagi foela tarare zasai ḳori deḳa zorur, zasait zudi tara nikut oin, te zomator ḳadim oita farba.
11 Ṭik olaḳan beṭi manusho zanu ijjoti oin. Era manshor bodnam na gain, nizore shamlaia raḳoin, ar hoḳol befare bishashi oin.
12 Ḳadim sab ḳali eḳ bouala manush oiba. Tain zanu balamonte tan bou fua-fuṛin ar shongsharor deḳa-huna ḳoroin.
13 Ze ḳadime balamonte ḳezmot ḳoroin, ein shunam fain, ar Hozrot Isa al-Mosir ufre iman taḳae tan dil shaoshe bora roe.
Isaei imanor batuni befar
14 O Timoti, ami asha ḳorram kub zoldiu tumar gese aitam. Oḳan mono ḳoria tumare ita leḳram.
15 Zudi kunu ḳarone amar aite deri oizae, te i leḳa foṛle tumi buzbae, Allar foribaror manshor sal-cholon kila oito. I foribar to zinda Allar zomat, Allai hokikotor bit ar ian kuṭi.
16 Isaei imanor marifoti ḳoto mohan, ita to oshikar ḳora zae na. Ou marifoti oula zair oilo,
Tain manush surote zair oila,
Pak Ruhe forman oila be-ḳosur,
firista oḳole tan doroshon faila.
Tan befare hokkol zatir gese toblig kora oilo,
asta duniar manshe tan ufre iman anla,
gourob-mohimae tanre ufre tuli neoa oilo.