8
ꠎꠝꠣꠔꠞ ꠃꠙꠞꠦ ꠎꠥꠟꠥꠝ
1 ꠢꠤꠖꠤꠘ ꠕꠣꠇꠤ ꠎꠦꠞꠥꠎꠣꠟꠦꠝꠞ ꠎꠝꠣꠔꠞ ꠃꠙꠞꠦ ꠈꠥꠛ ꠎꠥꠟꠥꠝ-ꠝꠍꠤꠛꠔ ꠈꠣꠠꠣ ꠅꠁꠟ, ꠄꠞꠟꠣꠉꠤ ꠈꠣꠟꠤ ꠍꠣꠢꠣꠛꠤ ꠅꠇꠟ ꠛꠣꠖꠦ ꠀꠞ ꠢꠇꠟꠦꠃ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣꠞ ꠎꠣꠉꠣꠄ ꠎꠣꠉꠣꠄ ꠍꠤꠔ꠆ꠞꠤ ꠉꠦꠟꠣ।
2 ꠇꠄꠎꠘꠦ ꠝꠤꠟꠤꠀ ꠀꠟ꠆ꠟꠣꠞꠣꠁꠀ ꠝꠣꠘꠥꠡ ꠡ꠆ꠔꠤꠚꠣꠘꠞꠦ ꠖꠣꠚꠘ ꠇꠞꠟꠣ ꠀꠞ ꠔꠣꠘ ꠟꠣꠉꠤ ꠛꠃꠔ ꠀꠢꠣꠎꠣꠞꠤ ꠇꠞꠟꠣ।
3 ꠅꠁꠟꠦ ꠡꠃꠟꠦ ꠎꠝꠣꠔꠞꠦ ꠛꠤꠘꠣꠡ ꠇꠞꠣꠞ ꠘꠤꠅꠔꠦ, ꠊꠞꠅ ꠊꠞꠅ ꠢꠣꠝꠣꠁꠀ ꠁꠝꠣꠘꠖꠣꠞ ꠛꠦꠐꠣꠁꠘ-ꠛꠦꠐꠤꠘꠞꠦ ꠛꠘ꠆ꠖꠤ ꠇꠞꠤ ꠐꠣꠘꠤꠀ ꠍꠦꠌꠠꠣꠁꠀ ꠎꠦꠟ ꠈꠣꠘꠣꠔ ꠢꠣꠞꠣꠘꠤꠔ ꠟꠣꠉꠟꠣ।
ꠡꠝꠞꠤꠀꠔ ꠢꠎꠞꠔ ꠚꠤꠟꠤꠚꠞ ꠔꠛꠟꠤꠉ
4 ꠔꠦꠃ ꠎꠦꠞꠣ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠉꠦꠍꠤꠟ, ꠔꠣꠞꠣ ꠢꠇ꠆ꠇꠟ ꠎꠣꠉꠣꠔ ꠊꠥꠞꠤ ꠊꠥꠞꠤ ꠁꠘ꠆ꠎꠤꠟꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
5 ꠀꠞ ꠚꠤꠟꠤꠚ ꠡꠝꠞꠤꠀꠞ ꠄꠇ ꠡꠢꠞꠅ ꠉꠤꠀ ꠀꠟ-ꠝꠍꠤꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠟꠣ।
6 ꠝꠣꠘꠡꠦ ꠚꠤꠟꠤꠚꠞ ꠛꠄꠀꠘ ꠢꠥꠘꠤꠀ ꠀꠞ ꠔꠣꠘ ꠇꠦꠞꠣꠝꠔꠤ ꠇꠣꠝ ꠅꠇꠟ ꠖꠦꠈꠤꠀ, ꠗꠤꠀꠘ ꠗꠞꠤ ꠄꠇ ꠖꠤꠟꠦ ꠔꠣꠘ ꠘꠍꠤꠅꠔ ꠢꠥꠘꠟꠣ।
7 ꠇꠣꠞꠘ ꠛꠃꠔꠞ ꠉꠦꠍ ꠕꠣꠇꠤ ꠜꠥꠔ ꠅꠇꠟ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠍꠣꠠꠤꠀ ꠉꠦꠟ, ꠀꠞ ꠛꠃꠔ ꠅꠞ꠆ꠖꠋ ꠛꠦꠝꠣꠞꠤ ꠀꠞ ꠟꠦꠋꠠꠣ ꠅꠇꠟ ꠜꠣꠟꠣ ꠅꠁꠟꠣ।
8 ꠁꠔꠣ ꠖꠦꠈꠤꠀ ꠢꠤ ꠡꠢꠞꠞ ꠝꠣꠘꠥꠡ ꠈꠥꠛ ꠈꠥꠡꠤ ꠅꠁꠟꠣ।
9 ꠅꠁꠟꠦ ꠢꠤꠈꠣꠘꠅ ꠍꠣꠁꠝꠘ ꠘꠣꠝꠞ ꠄꠇꠎꠘ ꠝꠣꠘꠡꠦ ꠛꠃꠔ ꠖꠤꠘ ꠗꠞꠤ ꠎꠣꠖꠥ-ꠐꠥꠘꠣꠞ ꠇꠣꠝ ꠇꠞꠔ, ꠡꠝꠞꠤꠀꠞ ꠝꠣꠘꠡꠞꠦ ꠗꠣꠘ꠆ꠖꠣ ꠟꠣꠉꠣꠁꠀ ꠢꠦ ꠘꠤꠎꠞꠦ ꠄꠇꠎꠘ ꠇꠣꠝꠤꠟ ꠙꠤꠞ ꠇꠁꠀ ꠖꠣꠛꠤ ꠇꠞꠔ।
10 ꠀꠞ ꠢꠥꠞꠥ-ꠛꠠ ꠢꠇꠟꠦ ꠔꠣꠞ ꠇꠕꠣꠞ ꠖꠣꠝ ꠖꠤꠔ, ꠝꠣꠘꠡꠦ ꠇꠁꠔ, ꠀꠟ꠆ꠟꠣꠞ ꠎꠦ ꠇꠥꠖꠞꠔꠞꠦ ꠈꠣꠍ ꠇꠥꠖꠞꠔ ꠇꠂꠘ, ꠁ ꠛꠦꠐꠣ ꠅꠁꠟ ꠢꠃ ꠈꠣꠍ ꠇꠥꠖꠞꠔꠤ ꠛꠦꠐꠣ।
11 ꠝꠣꠘꠡꠦꠅ ꠔꠣꠞ ꠇꠕꠣꠝꠔ ꠌꠟꠔ ꠇꠣꠞꠘ ꠛꠃꠔ ꠖꠤꠘ ꠗꠞꠤ ꠢꠦ ꠔꠣꠞ ꠎꠣꠖꠥ-ꠐꠥꠘꠣ ꠖꠦꠈꠣꠁꠀ ꠔꠣꠞꠣꠞꠦ ꠔꠣꠁꠎ꠆ꠎꠥꠛ ꠛꠣꠘꠣꠁꠍꠤꠟ।
12 ꠅꠁꠟꠦ ꠚꠤꠟꠤꠚꠦ ꠎꠦꠛꠟꠣ ꠀꠟ꠆ꠟꠣꠞ ꠛꠣꠖꠡꠣꠁ ꠀꠞ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ, ꠀꠞ ꠝꠣꠘꠡꠦ ꠔꠣꠘ ꠔꠛꠟꠤꠉꠦ ꠁꠝꠣꠘ ꠀꠘꠟꠣ, ꠁ ꠡꠝꠄ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠀꠁꠀ ꠔꠃꠛꠣꠞ ꠉꠥꠍꠟ ꠇꠞꠟꠣ।
13 ꠢꠃ ꠍꠣꠁꠝꠘꠅ ꠁꠝꠣꠘ ꠀꠘꠤꠀ ꠔꠃꠛꠣꠞ ꠉꠥꠍꠟ ꠇꠞꠤꠀ ꠚꠤꠟꠤꠚꠞ ꠈꠞꠦ ꠈꠞꠦ ꠞꠁꠟꠣ, ꠛꠃꠔ ꠇꠦꠞꠣꠝꠔꠤ ꠀꠞ ꠛꠠ ꠛꠠ ꠇꠥꠖꠞꠔꠤ ꠇꠣꠝ ꠢꠣꠍꠤꠟ ꠅꠞ ꠖꠦꠈꠤꠀ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।
14 ꠎꠦꠞꠥꠎꠣꠟꠦꠝꠞ ꠍꠣꠢꠣꠛꠤ ꠅꠇꠟꠦ ꠎꠦꠛꠟꠣ ꠢꠥꠘꠟꠣ, ꠡꠝꠞꠤꠀꠞ ꠝꠣꠘꠥꠡ ꠅꠇꠟꠦ ꠀꠟ꠆ꠟꠣꠞ ꠇꠣꠟꠣꠝꠞ ꠃꠙꠞꠦ ꠁꠝꠣꠘ ꠀꠘꠍꠂꠘ, ꠔꠦꠃ ꠔꠣꠞꠣ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠄꠞꠣꠞ ꠉꠦꠍꠦ ꠙꠣꠑꠣꠁꠟꠣ।
15 ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠀꠁꠀ ꠔꠣꠞꠣꠞ ꠟꠣꠉꠤ ꠖꠥꠀ ꠇꠞꠟꠣ, ꠎꠣꠔꠦ ꠔꠣꠞꠣ ꠙꠣꠇ ꠞꠥꠢꠥ ꠙꠣꠁꠘ।
16 ꠇꠣꠞꠘ ꠅꠈꠘꠅ ꠔꠣꠞꠣꠞ ꠃꠙꠞꠦ ꠙꠣꠇ ꠞꠥꠢꠥ ꠘꠣꠎꠤꠟ ꠅꠁꠍꠦ ꠘꠣ, ꠔꠣꠞꠣ ꠈꠣꠟꠤ ꠢꠎꠞꠔ ꠁꠍꠣꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍꠂꠘ।
17 ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠔꠣꠞꠣꠞ ꠃꠙꠞꠦ ꠀꠔ ꠞꠣꠈꠟꠣ, ꠔꠦꠃ ꠔꠣꠞꠣ ꠙꠣꠇ ꠞꠥꠢꠥ ꠙꠣꠁꠟꠣ।
18 ꠀꠞ ꠍꠣꠁꠝꠘꠦ ꠎꠦꠛꠟꠣ ꠖꠦꠈꠟꠣ, ꠍꠣꠢꠣꠛꠤ ꠅꠇꠟꠞ ꠀꠔ ꠞꠣꠈꠣꠞ ꠇꠣꠞꠘꠦ ꠙꠣꠇ ꠞꠥꠢꠥ ꠝꠤꠟꠦꠞ, ꠅꠃ ꠔꠣꠁꠘ ꠐꠦꠇꠣ ꠀꠘꠤꠀ ꠄꠞꠣꠞ ꠉꠦꠍꠦ ꠖꠤꠀ ꠇꠁꠟꠣ,
19 “ꠀꠝꠣꠞꠦꠅ ꠅꠃ ꠈꠦꠝꠔꠣ ꠖꠦꠃꠇ꠆ꠇꠣ, ꠎꠣꠔꠦ ꠀꠝꠤ ꠇꠦꠃꠞꠞ ꠃꠙꠞꠦ ꠀꠔ ꠞꠣꠈꠟꠦ ꠢꠦ-ꠅ ꠅꠃ ꠙꠣꠇ ꠞꠥꠢꠥ ꠙꠣꠄ।”
20 ꠙꠤꠔꠞꠦ ꠔꠣꠞꠦ ꠇꠁꠟꠣ, “ꠔꠥꠝꠣꠞ ꠞꠥꠙꠣ ꠔꠥꠝꠣꠞ ꠟꠉꠦꠃ ꠛꠤꠘꠣꠡ ꠅꠃꠇ, ꠔꠥꠝꠤ ꠝꠘꠅ ꠇꠞꠍ ꠀꠟ꠆ꠟꠣꠞ ꠖꠣꠘ ꠐꠦꠇꠣꠖꠤ ꠈꠞꠤꠖ ꠇꠞꠣ ꠎꠣꠄ।
21 ꠀꠝꠞꠣꠞ ꠁ ꠇꠣꠝꠅ ꠔꠥꠝꠣꠞ ꠇꠥꠘꠥ ꠜꠣꠉ ꠘꠣꠁ, ꠇꠣꠞꠘ ꠀꠟ꠆ꠟꠣꠞ ꠘꠎꠞꠅ ꠔꠥꠝꠣꠞ ꠖꠤꠟ ꠡꠞꠟ ꠘꠣꠄ।
22 ꠄꠞꠟꠣꠉꠤ ꠁ ꠘꠣꠎꠣꠁꠎ ꠇꠣꠝ ꠕꠣꠇꠤ ꠔꠥꠝꠣꠞ ꠖꠤꠟ ꠚꠤꠞꠣꠅ। ꠀꠞ ꠀꠟ꠆ꠟꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠅ, ꠇꠤꠛꠣ ꠔꠥꠝꠣꠞ ꠖꠤꠟꠞ ꠁ ꠘꠣꠎꠣꠁꠎ ꠈꠤꠀꠟ ꠔꠣꠁꠘ ꠝꠣꠚ ꠇꠞꠤꠟꠤꠔꠣ ꠙꠣꠞꠂꠘ।
23 ꠀꠝꠤ ꠖꠦꠈꠞꠣꠝ, ꠔꠥꠝꠣꠞ ꠖꠤꠟ ꠟꠤꠙꠡꠣꠄ ꠜꠞꠣ ꠀꠞ ꠔꠥꠝꠤ ꠉꠥꠘꠣꠞ ꠝꠣꠎꠦ ꠛꠘ꠆ꠖꠤ ꠅꠁꠞꠂꠍ।”
24 ꠔꠦꠃ ꠍꠣꠁꠝꠘꠦ ꠇꠁꠟꠣ, “ꠀꠙꠘꠣꠞꠣ ꠀꠟ꠆ꠟꠣꠞ ꠉꠦꠍꠦ ꠀꠝꠣꠞ ꠟꠣꠉꠤ ꠖꠥꠀ ꠇꠞꠃꠇ꠆ꠇꠣ, ꠎꠣꠔꠦ ꠀꠙꠘꠣꠞꠣ ꠎꠦꠔꠣ ꠎꠦꠔꠣ ꠇꠁꠍꠂꠘ ꠁꠔꠣ ꠎꠣꠘꠥ ꠀꠝꠣꠞ ꠃꠙꠞꠦ ꠘꠣ ꠀꠄ।”
25 ꠛꠣꠖꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠝꠣꠟꠤꠇꠞ ꠇꠣꠟꠣꠝ ꠔꠛꠟꠤꠉ ꠇꠞꠤꠀ ꠎꠦꠞꠥꠎꠣꠟꠦꠝꠅ ꠚꠤꠞꠔ ꠎꠣꠅꠀꠞ ꠙꠕꠅ, ꠡꠝꠞꠤꠀꠞ ꠛꠃꠔ ꠉꠣꠃꠔ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ ꠇꠞꠤ ꠉꠦꠟꠣ।
ꠢꠎꠞꠔ ꠚꠤꠟꠤꠚ ꠀꠞ ꠞꠣꠎ ꠈꠣꠎꠣꠘ꠆ꠌꠤ
26 ꠄꠇꠖꠤꠘ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠢꠎꠞꠔ ꠚꠤꠟꠤꠚꠞꠦ ꠇꠁꠟꠣ, “ꠃꠑꠅ, ꠖꠃꠇꠘꠞ ꠎꠦ ꠙꠕ ꠎꠦꠞꠥꠎꠣꠟꠦꠝ ꠕꠣꠇꠤ ꠉꠣꠎꠣ ꠐꠣꠃꠘꠞ ꠛꠣꠄ ꠉꠦꠍꠦ ꠢꠃ ꠙꠕꠦ ꠞꠅꠀꠘꠣ ꠖꠦꠅ।” ꠁ ꠙꠕ ꠀꠍꠤꠟ ꠝꠞꠥꠜꠥꠝꠤꠔ।
27 ꠔꠦꠃ ꠚꠤꠟꠤꠚ ꠃꠑꠤꠀ ꠢꠛꠣꠄ ꠞꠅꠀꠘꠣ ꠖꠤꠟꠣ, ꠎꠣꠁꠔꠦ ꠎꠣꠁꠔꠦ ꠙꠕꠅ ꠁꠕꠤꠅꠙꠤꠀ ꠖꠦꠡꠞ ꠇꠣꠘ꠆ꠖꠣꠇꠤ ꠞꠣꠘꠤꠞ ꠄꠇꠎꠘ ꠛꠠ ꠞꠣꠎ ꠈꠣꠎꠣꠘ꠆ꠌꠤꠞ ꠟꠉꠦ ꠔꠣꠘ ꠝꠥꠟꠣꠇꠣꠔ ꠅꠁꠟ, ꠢꠤ ꠈꠣꠎꠣꠘ꠆ꠌꠤ ꠀꠍꠟꠣ ꠘꠣ-ꠝꠞ꠆ꠖ, ꠀꠞ ꠞꠣꠘꠤꠞ ꠢꠇ꠆ꠇꠟ ꠗꠘ-ꠞꠔꠘꠞ ꠎꠤꠝ꠆ꠝꠣꠖꠣꠞ। ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠄꠁꠘ ꠎꠦꠞꠥꠎꠣꠟꠦꠝꠅ ꠀꠁꠍꠟꠣ।
28 ꠛꠣꠖꠦ ꠛꠣꠠꠤꠔ ꠎꠣꠅꠀꠞ ꠛꠣꠟꠣ ꠙꠕꠅ ꠔꠣꠘ ꠘꠤꠎꠞ ꠊꠥꠠꠣꠞ ꠉꠣꠠꠤꠔ ꠛꠁꠀ ꠁꠡꠣꠄꠀ ꠘꠛꠤꠞ ꠇꠤꠔꠣꠛ ꠔꠤꠟꠣꠅꠔ ꠇꠞꠣꠔ ꠀꠍꠟꠣ।
29 ꠅꠃ ꠡꠝꠄ ꠙꠣꠇ ꠞꠥꠢꠦ ꠚꠤꠟꠤꠚꠞꠦ ꠇꠁꠟꠣ, “ꠅꠃ ꠉꠣꠠꠤꠞ ꠇꠣꠘ꠆ꠖꠣꠔ ꠎꠣꠅ, ꠀꠞ ꠄꠘ ꠟꠉꠦ ꠟꠉ ꠗꠞꠅ।”
30 ꠔꠦꠃ ꠚꠤꠟꠤꠚꠦ ꠖꠃꠠꠤꠀ ꠅꠃ ꠉꠣꠠꠤꠞ ꠇꠣꠘ꠆ꠖꠣꠔ ꠉꠤꠀ ꠢꠥꠘꠟꠣ, ꠄꠁꠘ ꠁꠡꠣꠄꠀ ꠘꠛꠤꠞ ꠇꠤꠔꠣꠛ ꠔꠤꠟꠣꠅꠔ ꠇꠞꠞꠣ; ꠚꠤꠟꠤꠚꠦ ꠔꠣꠘꠞꠦ ꠎꠤꠇꠣꠁꠟꠣ, “ꠀꠙꠘꠦ ꠎꠦꠔꠣ ꠔꠤꠟꠣꠅꠔ ꠇꠞꠞꠣ ꠁꠔꠣꠞ ꠝꠣꠘꠤ ꠛꠥꠎꠞꠣ ꠘꠤ?”
31 ꠢꠦꠁꠘ ꠇꠁꠟꠣ, “ꠇꠦꠃ ꠛꠥꠎꠣꠁꠀ ꠘꠣ ꠖꠤꠟꠦ ꠀꠝꠤ ꠇꠦꠝꠘꠦ ꠛꠥꠎꠝꠥ?” ꠅꠃ ꠔꠣꠁꠘ ꠚꠤꠟꠤꠚꠞꠦ ꠉꠣꠠꠤꠔ ꠃꠑꠤꠀ ꠔꠣꠘ ꠇꠣꠘ꠆ꠖꠣꠔ ꠛꠅꠀꠞ ꠟꠣꠉꠤ ꠝꠤꠘꠔ ꠇꠞꠟꠣ।
32 ꠢꠦꠁꠘ ꠇꠤꠔꠣꠛꠞ ꠎꠦ ꠀꠄꠀꠔ ꠔꠤꠟꠣꠅꠔ ꠇꠞꠣꠔ ꠀꠍꠟꠣ, ꠁꠔꠣ ꠅꠁꠟ,
ꠎꠛ ꠇꠞꠣꠞ ꠟꠣꠉꠤ ꠝꠦꠠꠣꠞꠦ ꠎꠦꠟꠣ ꠘꠦꠁꠘ,
ꠝꠣꠞꠣꠞ ꠘꠤꠅꠔꠦ ꠔꠣꠘꠞꠦ ꠅꠃꠟꠣ ꠘꠦꠅꠀ ꠅꠁꠟ,
ꠞꠥꠝꠣ ꠇꠣꠐꠞꠣꠞ ꠍꠣꠝꠘꠦ ꠝꠦꠠꠣ-ꠛꠣꠁꠌ꠆ꠌꠣ ꠎꠦꠟꠣ ꠘꠤꠞꠣꠁ ꠞꠄ,
ꠅꠃꠟꠣ ꠔꠣꠁꠘꠅ ꠎꠛꠣꠘ ꠈꠥꠟꠟꠣ ꠘꠣ।
33 ꠔꠣꠁꠘ ꠛꠦꠁꠎ꠆ꠎꠔ ꠅꠁꠟꠣ,
ꠔꠣꠘꠞꠦ ꠛꠦ-ꠁꠘꠍꠣꠚ ꠇꠞꠣ ꠅꠁꠟ।
ꠔꠣꠘ ꠅꠀꠞꠤꠡꠞ ꠇꠕꠣ ꠇꠦꠉꠤꠄ ꠇꠁꠔ ꠙꠣꠞꠛ?
ꠔꠣꠘ ꠎꠣꠘꠞꠦ ꠖꠥꠘꠤꠀ ꠕꠣꠇꠤ ꠇꠣꠠꠤꠀ ꠘꠦꠅꠀ ꠅꠁꠍꠤꠟ।
34 ꠢꠃ ꠈꠣꠎꠣꠘ꠆ꠌꠤꠄ ꠚꠤꠟꠤꠚꠞꠦ ꠇꠁꠟꠣ, “ꠇꠃꠇ꠆ꠇꠣ ꠌꠣꠁꠘ, ꠘꠛꠤꠄ ꠇꠣꠞ ꠛꠦꠙꠣꠞꠦ ꠁꠔꠣ ꠇꠁꠍꠂꠘ? ꠘꠤꠎꠞ ꠛꠦꠙꠣꠞꠦ ꠘꠣ ꠀꠞ ꠇꠦꠃꠞꠞ?”
35 ꠚꠤꠟꠤꠚꠦ ꠎꠛꠣꠘ ꠈꠥꠟꠤꠀ ꠙꠣꠇ ꠇꠣꠟꠣꠝꠞ ꠅꠃ ꠀꠄꠀꠔ ꠕꠣꠇꠤ ꠟꠁꠀ ꠁꠍꠣꠞ ꠈꠥꠡ-ꠈꠛꠞꠤ ꠙꠞ꠆ꠎꠘ꠆ꠔ ꠔꠣꠘ ꠉꠦꠍꠦ ꠔꠛꠟꠤꠉ ꠇꠞꠟꠣ।
36-37 ꠙꠕꠅ ꠎꠣꠁꠔꠦ ꠎꠣꠁꠔꠦ ꠔꠣꠞꠣ ꠙꠣꠘꠤꠀꠟꠣ ꠄꠇ ꠎꠣꠉꠣꠔ ꠀꠁꠀ ꠙꠃꠍꠟꠣ, ꠔꠦꠃ ꠢꠤ ꠈꠣꠎꠣꠘ꠆ꠌꠤꠄ ꠇꠁꠟꠣ, “ꠅꠃ ꠖꠦꠈꠃꠇ꠆ꠇꠣ ꠅꠘꠅ ꠙꠣꠘꠤ ꠀꠍꠦ, ꠔꠦ ꠀꠝꠤ ꠔꠃꠛꠣꠞ ꠉꠥꠍꠟ ꠇꠞꠔꠦ ꠇꠥꠘꠥ ꠛꠣꠗꠣ ꠀꠍꠦ ꠘꠤ?”
38 ꠇꠁꠀ ꠔꠣꠁꠘ ꠊꠥꠠꠣꠞ ꠉꠣꠠꠤ ꠃꠛꠣ ꠇꠞꠣꠞ ꠢꠥꠇꠥꠝ ꠖꠤꠟꠣ, ꠚꠤꠟꠤꠚ ꠀꠞ ꠢꠃ ꠘꠣ-ꠝꠞ꠆ꠖ ꠈꠣꠎꠣꠘ꠆ꠌꠤ ꠖꠥꠁꠅ ꠎꠘ ꠙꠣꠘꠤꠔ ꠟꠣꠝꠟꠣ, ꠀꠞ ꠚꠤꠟꠤꠚꠦ ꠔꠣꠘꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣ।
39 ꠔꠣꠞꠣ ꠎꠦꠛꠟꠣ ꠙꠣꠘꠤ ꠕꠣꠇꠤ ꠃꠑꠤꠀ ꠀꠁꠟꠣ, ꠅꠃ ꠡꠝꠄ ꠝꠣꠛꠥꠖꠞ ꠞꠥꠢꠦ ꠀꠈꠔꠣꠃ ꠚꠤꠟꠤꠚꠞꠦ ꠀꠅꠠꠦ ꠘꠤꠟꠣꠉꠤ। ꠢꠤ ꠘꠣ-ꠝꠞ꠆ꠖꠦ ꠀꠞ ꠚꠤꠟꠤꠚꠞꠦ ꠖꠦꠈꠟꠣ ꠘꠣ, ꠔꠦꠃ ꠔꠣꠁꠘ ꠚꠥꠞ꠆ꠔꠤ ꠇꠞꠤ ꠇꠞꠤ ꠔꠣꠘ ꠘꠤꠎꠞ ꠙꠕꠦ ꠉꠦꠟꠣꠉꠤ।
40 ꠅꠁꠟꠦ ꠚꠤꠟꠤꠚꠞꠦ ꠀꠡꠖꠥꠖ ꠐꠣꠃꠘꠅ ꠖꠦꠈꠣ ꠝꠤꠟꠟ; ꠔꠣꠁꠘ ꠉꠣꠃꠄ ꠉꠣꠃꠄ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ ꠇꠞꠤ ꠢꠦꠡꠦ ꠇꠂꠍꠞꠤꠀ ꠐꠣꠃꠘꠅ ꠉꠦꠟꠣ।