ꠛꠤꠖꠣꠄꠁ ꠙꠞꠣꠝꠤꠡ ꠀꠞ ꠖꠥꠀ (১৬:১-২৪)
16
ꠞꠤꠟꠤꠚ ꠌꠣꠘ꠆ꠖꠣ ꠔꠥꠟꠣꠞ ꠛꠦꠙꠣꠞꠦ
1 ꠅ ꠜꠣꠁ ꠅꠇꠟ, ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞꠦ ꠡꠣꠁꠎ꠆ꠎꠞ ꠟꠣꠉꠤ ꠌꠣꠘ꠆ꠖꠣ ꠔꠥꠟꠣꠞ ꠛꠦꠙꠣꠞꠦ ꠀꠝꠤ ꠅꠈꠘ ꠇꠁꠞꠣꠝ। ꠉꠣꠟꠣꠔꠤꠀ ꠖꠦꠡꠞ ꠁꠍꠣꠄꠁ ꠎꠝꠣꠔ ꠅꠇꠟꠞꠦ ꠀꠝꠤ ꠎꠦꠟꠣ ꠢꠥꠇꠥꠝ ꠖꠤꠍꠤ, ꠔꠥꠝꠞꠣꠅ ꠅꠃꠟꠣ ꠇꠞꠅ।
2 ꠔꠥꠝꠞꠣ ꠙꠞꠔꠦꠇ ꠎꠘꠦ ꠎꠣꠞꠎꠤꠞ ꠔꠚꠤꠇ ꠅꠘꠥꠎꠣꠄꠁ ꠢꠣꠙ꠆ꠔꠣꠞ ꠙꠄꠟꠣ ꠖꠤꠘ ꠇꠤꠍꠥ ꠐꠦꠇꠣ-ꠙꠄꠡꠣ ꠖꠟꠣ ꠇꠞꠅ, ꠎꠣꠔꠦ ꠀꠝꠤ ꠎꠦꠛꠟꠣ ꠀꠁꠝꠥ, ꠅꠃ ꠡꠝꠄ ꠇꠥꠘꠥ ꠌꠣꠘ꠆ꠖꠣ ꠔꠥꠟꠣ ꠘꠣ ꠟꠣꠉꠦ।
3 ꠀꠝꠤ ꠀꠁꠀ ꠢꠣꠞꠟꠦ ꠔꠥꠝꠞꠣꠞ ꠖꠟꠣ ꠇꠞꠣ ꠅꠃ ꠖꠣꠘ-ꠈꠄꠞꠣꠔ ꠎꠦꠞꠥꠎꠣꠟꠦꠝꠅ ꠟꠁꠀ ꠎꠣꠅꠀꠞ ꠟꠣꠉꠤ, ꠔꠥꠝꠞꠣ ꠎꠦꠞꠣꠞꠦ ꠙꠍꠘ꠆ꠖ ꠇꠞꠛꠣꠄ, ꠀꠝꠤ ꠌꠤꠑꠤ ꠖꠤꠀ ꠔꠣꠞꠣꠞꠦ ꠙꠣꠑꠣꠁꠝꠥ।
4 ꠀꠞ ꠔꠥꠝꠞꠣ ꠎꠥꠖꠤ ꠝꠘꠅ ꠇꠞꠅ ꠀꠝꠤꠅ ꠎꠣꠅꠀ ꠎꠞꠥꠞ, ꠔꠦ ꠔꠣꠞꠣ ꠀꠝꠣꠞ ꠟꠉꠦ ꠅꠁꠀ ꠎꠣꠁꠛꠣ।
ꠢꠎꠞꠔ ꠙꠣꠃꠟꠥꠍꠦ ꠇꠞꠤꠘ꠆ꠔ ꠍꠚꠞꠞ ꠘꠤꠅꠔ
5 ꠀꠝꠣꠞ ꠈꠤꠀꠟ ꠅꠁꠟ ꠝꠣꠇꠤꠖꠘꠤꠀ ꠅꠁꠀ ꠀꠁꠔꠣꠝ, ꠄꠞꠟꠣꠉꠤ ꠀꠝꠤ ꠝꠣꠇꠤꠖꠘꠤꠀ ꠖꠦꠡꠞ ꠜꠤꠔꠞꠦꠖꠤ ꠔꠥꠝꠞꠣꠞ ꠉꠦꠍꠦ ꠀꠁꠝꠥ।
6 ꠀꠁꠀ ꠢꠄꠔ ꠕꠥꠠꠣ ꠇꠄꠖꠤꠘ ꠔꠥꠝꠞꠣꠞ ꠉꠦꠍꠦ ꠞꠁꠝꠥ ꠛꠣ ꠀꠡ꠆ꠔꠣ ꠡꠤꠔꠇꠣꠟ ꠔꠥꠝꠞꠣꠞ ꠉꠦꠍꠦꠃ ꠇꠣꠐꠣꠁꠝꠥ, ꠎꠣꠔꠦ ꠀꠝꠤ ꠎꠦꠘꠅꠃ ꠎꠣꠁ ꠘꠣ ꠇꠦꠘꠦ ꠔꠥꠝꠞꠣꠃ ꠀꠝꠣꠞꠦ ꠅꠃ ꠍꠚꠞꠞ ꠟꠣꠉꠤ ꠢꠇꠟꠔꠣ ꠎꠥꠁꠔ-ꠎꠣꠁꠔ ꠇꠞꠤꠀ ꠖꠤꠛꠣꠄ।
7 ꠙꠕꠞ ꠇꠥꠐꠝꠞ ꠟꠣꠈꠣꠘ ꠀꠝꠤ ꠈꠣꠟꠤ ꠙꠕꠦꠖꠤ ꠎꠣꠅꠀꠞ ꠇꠣꠟꠅ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣꠝ ꠌꠣꠁ ꠘꠣ, ꠀꠝꠤ ꠌꠣꠁꠞꠣꠝ, ꠀꠟ꠆ꠟꠣꠞ ꠝꠞ꠆ꠎꠤ ꠅꠁꠟꠦ ꠛꠣꠇ꠆ꠇꠣ ꠇꠄꠖꠤꠘ ꠔꠥꠝꠞꠣꠞ ꠟꠉꠦ ꠕꠣꠇꠝꠥ।
8 ꠅꠁꠟꠦ ꠙꠘ꠆ꠌꠣꠁꠡꠣ ꠁꠖ ꠙꠞ꠆ꠎꠘ꠆ꠔ ꠀꠝꠤ ꠅꠃ ꠁꠚꠤꠍ ꠐꠣꠃꠘꠅꠃ ꠞꠁꠝꠥ,
9 ꠇꠣꠞꠘ ꠀꠝꠣꠞ ꠍꠣꠝꠘꠦ ꠅꠃꠟꠣ ꠛꠠ ꠄꠇꠐꠣ ꠡꠥꠎꠥꠉ ꠀꠍꠦ, ꠁ ꠡꠥꠎꠥꠉꠦ ꠛꠠ ꠜꠣꠟꠣ ꠚꠟ ꠝꠤꠟꠦ। ꠔꠣ-ꠅ ꠛꠃꠔ ꠝꠣꠘꠡꠦ ꠁꠔꠣꠞ ꠛꠤꠞꠥꠗꠤꠔꠣ ꠇꠞꠞꠣ।
10 ꠈꠤꠀꠟ ꠞꠣꠈꠤꠅ, ꠔꠤꠝꠕꠤ ꠜꠣꠁ ꠔꠥꠝꠞꠣꠞ ꠅꠘꠅ ꠀꠁꠟꠦ ꠔꠣꠁꠘ ꠎꠣꠘꠥ ꠡꠣꠘ꠆ꠔꠤꠄ-ꠘꠤꠞꠜꠄꠄ ꠞꠁꠔꠣ ꠙꠣꠞꠂꠘ। ꠎꠣꠘ ꠔ, ꠀꠝꠤ ꠎꠦꠟꠣ ꠝꠣꠟꠤꠇꠞ ꠈꠦꠎꠝꠔ ꠇꠞꠤꠀꠞ, ꠔꠣꠁꠘꠅ ꠑꠤꠇ ꠅꠃꠟꠣ ꠇꠞꠞꠣ।
11 ꠄꠞꠟꠣꠉꠤ ꠇꠦꠃ ꠎꠣꠘꠥ ꠔꠣꠘꠞꠦ ꠄꠟꠣꠝꠤ ꠘꠣ ꠇꠞꠦ। ꠛꠣꠖꠦ ꠔꠣꠁꠘ ꠎꠦꠟꠣ ꠀꠝꠣꠞ ꠉꠦꠍꠦ ꠀꠁꠔꠣ ꠙꠣꠞꠂꠘ, ꠅꠃꠟꠣ ꠡꠣꠘ꠆ꠔꠤ ꠝꠔ ꠔꠣꠘꠞꠦ ꠀꠉꠥꠀꠁꠀ ꠖꠤꠅ। ꠀꠝꠤ ꠔ ꠔꠣꠘ ꠟꠣꠉꠤ ꠛꠣꠞ ꠌꠣꠁꠀꠞ, ꠀꠡꠣ ꠇꠞꠤ ꠜꠣꠁꠀꠁꠘ꠆ꠔꠞ ꠟꠉꠦ ꠔꠣꠁꠘꠅ ꠀꠁꠛꠣ।
12 ꠀꠞ ꠀꠙꠟ꠆ꠟꠍ ꠜꠣꠁꠞ ꠛꠦꠙꠣꠞꠦ ꠇꠁꠞꠣꠝ, ꠔꠣꠘꠞꠦ ꠛꠃꠔ ꠝꠤꠘꠔ ꠇꠞꠍꠟꠣꠝ, ꠜꠣꠁꠀꠁꠘ꠆ꠔꠞ ꠟꠉꠦ ꠅꠁꠀ ꠅꠈꠘ ꠔꠥꠝꠞꠣꠞ ꠉꠦꠍꠦ ꠎꠣꠁꠔꠣ, ꠔꠣ-ꠅ ꠇꠥꠘꠥꠝꠘ꠆ꠔꠦꠃ ꠞꠣꠎꠤ ꠅꠁꠟꠣ ꠘꠣ। ꠔꠦ ꠡꠝꠄ-ꠡꠥꠎꠥꠉ ꠅꠁꠟꠦ ꠛꠣꠖꠦ ꠎꠣꠁꠛꠣꠘꠦ।
ꠛꠤꠖꠣꠄꠁ ꠍꠣꠟꠣꠝ
13 ꠜꠣꠁꠀꠁꠘꠞꠦ, ꠔꠥꠝꠞꠣ ꠢꠇꠟ ꠢꠥꠡꠤꠀꠞ ꠅꠅ, ꠁꠝꠣꠘꠦ ꠝꠎꠛꠥꠔ ꠅꠅ, ꠡꠣꠅꠡꠤ ꠜꠣꠛ ꠖꠦꠈꠣꠅ ꠀꠞ ꠛꠟꠛꠣꠘ ꠅꠅ।
14 ꠔꠥꠝꠞꠣ ꠎꠔꠔꠣꠃ ꠇꠞ, ꠝꠢꠛ꠆ꠛꠔꠞ ꠡꠢꠤꠔ ꠇꠞꠤꠅ।
15 ꠀꠞ ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ, ꠀꠡ꠆ꠔꠣ ꠉ꠆ꠞꠤꠍ ꠖꠦꠡꠞ ꠝꠣꠎꠦ ꠀꠡ꠆ꠔꠤꠚꠣꠘ ꠜꠣꠁꠞ ꠙꠞꠤꠛꠣꠞꠃ ꠅꠁꠟꠣ ꠙꠄꠟꠣ ꠁꠝꠣꠘꠖꠣꠞ। ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠈꠦꠎꠝꠔꠞ ꠟꠣꠉꠤ ꠔꠣꠞꠣ ꠘꠤꠎꠞꠦ ꠡꠙꠤ ꠖꠤꠍꠂꠘ।
16 ꠄꠞꠟꠣꠉꠤ ꠝꠤꠘꠔ ꠇꠞꠤꠀꠞ, ꠁꠟꠣꠈꠣꠘ ꠝꠣꠘꠡꠞꠦ ꠔꠥꠝꠞꠣ ꠁꠎ꠆ꠎꠔꠞ ꠡꠢꠤꠔ ꠜꠎꠤꠅ, ꠀꠞꠅ ꠎꠔ ꠎꠘꠦ ꠅꠟꠣ ꠈꠦꠎꠝꠔ ꠇꠞꠂꠘ, ꠀꠟ꠆ꠟꠣꠞ ꠘꠣꠝꠦ ꠝꠦꠘꠔ ꠇꠞꠂꠘ, ꠔꠣꠞꠣꠞꠦꠅ ꠅꠟꠣ ꠜꠎꠤꠅ।
17 ꠅꠃ ꠀꠡ꠆ꠔꠤꠚꠣꠘ ꠜꠣꠁ, ꠚꠣꠔꠥꠘꠣꠔ ꠜꠣꠁ ꠀꠞ ꠀꠇꠤꠇ ꠜꠣꠁ ꠀꠁꠍꠂꠘ ꠖꠦꠈꠤꠀ ꠀꠝꠤ ꠈꠥꠛ ꠈꠥꠡꠤ ꠅꠁꠍꠤ, ꠄꠞꠣ ꠀꠅꠀꠄ ꠔꠥꠝꠞꠣꠞ ꠅꠜꠣꠛ ꠙꠥꠞꠘ ꠅꠁꠍꠦ।
18 ꠄꠞꠣ ꠀꠝꠣꠞ ꠀꠞ ꠔꠥꠝꠞꠣꠞ ꠖꠤꠟꠅ ꠀꠞꠣꠝ ꠖꠤꠍꠂꠘ। ꠔꠥꠝꠞꠣ ꠅꠃ ꠟꠣꠈꠣꠘ ꠝꠣꠘꠡꠞꠦ ꠈꠣꠍ ꠁꠎ꠆ꠎꠔ ꠇꠞꠤꠅ।
19 ꠔꠥꠞꠡ꠆ꠇꠞ ꠀꠍꠤꠀ ꠖꠦꠡꠞ ꠎꠝꠣꠔꠞ ꠝꠣꠘꠡꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠀꠇꠤꠟ ꠀꠞ ꠚꠤꠍꠇꠤꠟꠣ, ꠀꠞ ꠔꠣꠞꠣꠞ ꠊꠞꠞ ꠎꠝꠣꠔꠞ ꠝꠣꠘꠡꠦ ꠝꠣꠟꠤꠇꠞ ꠝꠢꠛ꠆ꠛꠔꠞ ꠡꠢꠤꠔ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ।
20 ꠢꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠔꠥꠝꠞꠣꠞꠦ ꠍꠣꠟꠣꠝ ꠎꠣꠘꠣꠁꠞꠣ। ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠙꠛꠤꠔ꠆ꠞ ꠉꠟꠣꠉꠟꠤ ꠇꠞꠤꠅ।
21 ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠅꠃ ꠍꠣꠟꠣꠝꠞ ꠇꠕꠣ ꠟꠦꠈꠟꠣꠝ।
22 ꠝꠣꠟꠤꠇ ꠁꠍꠣꠞꠦ ꠎꠥꠖꠤ ꠇꠦꠃ ꠝꠢꠛ꠆ꠛꠔ ꠘꠣ ꠇꠞꠦ, ꠔꠦ ꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ। ꠝꠣꠞꠣꠘꠣ ꠕꠣ! ꠝꠣꠘꠤ, ꠅ ꠀꠝꠞꠣꠞ ꠝꠣꠟꠤꠇ, ꠔꠡꠞꠤꠚ ꠀꠘꠃꠇ꠆ꠇꠣ!
23 ꠝꠣꠟꠤꠇ ꠁꠍꠣꠞ ꠞꠢꠝꠔ ꠔꠥꠝꠞꠣꠞ ꠃꠙꠞꠦ ꠎꠣꠞꠤ ꠞꠃꠇ।
24 ꠔꠥꠝꠞꠣ ꠢꠇꠟꠞ ꠟꠣꠉꠤ ꠀꠝꠣꠞ ꠁꠍꠣꠄꠁ ꠝꠢꠛ꠆ꠛꠔ ꠞꠁꠟ। ꠀꠝꠤꠘ॥