ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ৯ ꠘꠝ꠆ꠛꠞ ꠍꠤꠙꠣꠞꠣ
ꠉꠣꠟꠣꠔꠤꠀ
ꠙꠞꠤꠌꠤꠔꠤ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠦ (ꠞꠣ꠩) ꠌꠤꠑꠤꠞ ꠀꠇꠣꠞꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ। ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ১৬ ꠛꠍꠞ ꠛꠣꠖꠦ ꠁꠈꠣꠘ ꠟꠦꠈꠣ ꠅꠁꠍꠦ। ꠢꠎꠞꠔ ꠙꠣꠃꠟꠥꠍ ꠛꠞ꠆ꠔꠝꠣꠘ ꠔꠥꠞꠡ꠆ꠇ ꠖꠦꠡꠞ ꠉꠣꠟꠣꠔꠤꠀ ꠄꠟꠣꠇꠣꠔ ꠉꠤꠀ ꠔꠛꠟꠤꠉ ꠇꠞꠟꠣ, ꠈꠣꠟꠤ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠘꠣꠎꠣꠔ ꠝꠤꠟꠦ। ꠅꠁꠟꠦ ꠔꠣꠁꠘ ꠢꠘ ꠕꠣꠇꠤ ꠎꠣꠅꠀꠞ ꠛꠣꠖꠦ ꠇꠄꠎꠘ ꠁꠢꠥꠖꠤ ꠝꠃꠟꠣꠘꠣ ꠀꠁꠀ ꠇꠁꠟꠣ, ꠈꠣꠟꠤ ꠁꠝꠣꠘ ꠀꠘꠟꠦꠃ ꠘꠣꠎꠣꠔ ꠝꠤꠟꠦ ꠘꠣ, ꠄꠞꠟꠉꠦ ꠁꠢꠥꠖꠤ ꠗꠞ꠆ꠝ ꠝꠣꠚꠤꠇ ꠝꠥꠍꠣ ꠘꠛꠤꠞ ꠡꠞꠤꠅꠔꠅ ꠝꠣꠘꠔꠦ ꠅꠁꠛ। ꠔꠣꠞꠣꠞ ꠅꠃ ꠜꠘ꠆ꠒꠣꠝꠤ ꠔꠣꠟꠤꠝ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠔꠣꠁꠘ ꠅꠃ ꠙꠄꠉꠣꠝ ꠟꠦꠈꠟꠣ।
ꠔꠣꠁꠘ ꠛꠥꠎꠣꠁꠞꠣ, ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠘꠣꠎꠣꠔ ꠙꠣꠅꠀ ꠎꠣꠄ, ꠘꠣꠎꠣꠔꠞ ꠟꠣꠉꠤ ꠝꠥꠍꠣꠞ ꠡꠞꠤꠅꠔ ꠀꠝꠟ ꠇꠞꠣꠞ ꠎꠞꠥꠞ ꠘꠣꠄ। ꠅꠁꠟꠦ ꠘꠣꠎꠣꠔꠞ ꠚꠟ ꠅꠁꠟ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠚꠤꠇ ꠌꠟꠣ।
ꠅꠃ ꠎꠝꠣꠘꠣꠞ ꠁꠢꠥꠖꠤ ꠀꠞ ꠅꠁꠘ꠆ꠘ ꠎꠣꠔꠤꠞ ꠝꠣꠎꠦ ꠇꠥꠘꠥ ꠛꠘꠤ-ꠛꠘꠣ ꠀꠍꠤꠟ ꠘꠣ। ꠁꠢꠥꠖꠤ ꠅꠇꠟꠦ ꠝꠘꠦ ꠇꠞꠔꠣ ꠈꠣꠟꠤ ꠔꠣꠞꠣꠃ ꠀꠟ꠆ꠟꠣꠞ ꠝꠣꠄꠀꠞ ꠎꠣꠔꠤ, ꠔꠣꠞꠣ ꠍꠣꠠꠣ ꠛꠣꠖ-ꠛꠣꠇꠤ ꠢꠇꠟ ꠝꠣꠘꠥꠡꠃ ꠛꠦ-ꠖꠤꠘ ꠀꠞ ꠘꠣꠚꠞꠝꠣꠘ। ꠅꠁꠟꠦ ꠢꠎꠞꠔ ꠙꠣꠃꠟꠥꠍꠦ ꠇꠁꠞꠣ, ꠘꠣ, ꠁꠢꠥꠖꠤ ꠛꠣ ꠅꠁꠘ꠆ꠘ ꠎꠣꠔꠤ ꠄꠞꠣ ꠢꠇꠟꠃ ꠘꠣꠚꠞꠝꠣꠘ, ꠇꠥꠘꠥ ꠝꠣꠘꠡꠞꠃ ꠔꠣꠇ꠆ꠇꠔ ꠘꠣꠁ ꠡꠥꠟ꠆ꠟꠀꠘꠣ ꠡꠞꠤꠅꠔ ꠀꠝꠟ ꠇꠞꠣ, ꠄꠞꠟꠣꠉꠤ ꠢꠇꠟꠃ ꠟꠣꠘ꠆ꠘꠔꠤ ꠛꠘꠤꠉꠦꠍꠦ। ꠔꠦ ꠁꠍꠣ ꠀꠟ-ꠝꠍꠤ ꠍꠣꠠꠣ ꠛꠣꠌꠣꠞ ꠇꠥꠘꠥ ꠙꠕ ꠘꠣꠁ।
ꠄꠞꠝꠣꠎꠦ ꠀꠍꠦ,
(ꠇ) ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠈꠣꠟꠤ ꠄꠇꠐꠣꠃ ১:১-১০ ꠀꠄꠀꠔ
(ꠈ) ꠢꠎꠞꠔ ꠙꠣꠃꠟꠥꠍ ꠇꠤꠟꠣ ꠍꠣꠢꠣꠛꠤ ꠅꠁꠟꠣ ১:১১—২:২১
(ꠉ) ꠡꠞꠤꠅꠔ ꠘꠣ ꠞꠢꠝꠔ? ৩—৪ ꠞꠥꠇꠥ
(ꠊ) ꠝꠥꠝꠤꠘ ꠅꠇꠟꠞ ꠡ꠆ꠛꠣꠗꠤꠘꠔꠣ ৫ ꠞꠥꠇꠥ
(ꠌ) ꠄꠇꠦ-ꠅꠁꠘ꠆ꠘꠞ ꠀꠍꠣꠘ ꠇꠞꠅ ৬ ꠞꠥꠇꠥ
1
ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠈꠣꠟꠤ ꠄꠇꠐꠣꠃ
1 ꠀꠝꠤ ꠙꠣꠃꠟꠥꠍ, ꠁꠍꠣ ꠀꠟ-ꠝꠍꠤꠞ ꠄꠇꠎꠘ ꠍꠣꠢꠣꠛꠤ। ꠀꠝꠤ ꠇꠥꠘꠥ ꠝꠣꠘꠡꠞ ꠢꠥꠇꠥꠝ-ꠙꠞꠣꠝꠤꠡꠦ ꠛꠣ ꠇꠥꠘꠥ ꠝꠣꠘꠡꠞ ꠃꠍꠤꠟ꠆ꠟꠣꠄ ꠍꠣꠢꠣꠛꠤ ꠅꠁꠍꠤ ꠘꠣ। ꠈꠣꠟꠤ ꠁꠍꠣ ꠀꠟ-ꠝꠍꠤ ꠀꠞ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ, ꠎꠦꠁꠘ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠍꠂꠘ, ꠄꠞꠣꠞ ꠉꠦꠍ ꠕꠣꠇꠤꠃ ꠈꠦꠟꠣꠚꠔꠤ ꠙꠣꠁꠍꠤ।
2 ꠀꠝꠤ ꠀꠞ ꠀꠝꠣꠞ ꠟꠉꠞ ꠢꠇꠟ ꠝꠥꠝꠤꠘ ꠜꠣꠁꠀꠁꠘ꠆ꠔꠦ ꠝꠤꠟꠤꠀ, ꠉꠣꠟꠣꠔꠤꠀ ꠖꠦꠡꠞ ꠁꠍꠣꠄꠁ ꠎꠝꠣꠔ ꠅꠇꠟꠞ ꠉꠦꠍꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ।
3 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠦ ꠀꠞ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
4 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠥꠘꠡꠣꠄ, ꠢꠃ ꠁꠍꠣꠄ ꠀꠝꠞꠣꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠘꠤꠎꠞ ꠙꠛꠤꠔ꠆ꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ, ꠎꠣꠔꠦ ꠅꠃ ꠈꠣꠞꠣꠙ ꠎꠝꠣꠘꠣꠞ ꠀꠔ ꠕꠣꠇꠤ ꠀꠝꠞꠣꠞꠦ ꠛꠣꠌꠣꠁꠔꠣ ꠙꠣꠞꠂꠘ।
5 ꠀꠟ꠆ꠟꠣ ꠙꠣꠇꠞ ꠔꠣꠞꠤꠚ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠃꠇ। ꠀꠝꠤꠘ।
6 ꠀꠝꠤ ꠛꠠ ꠔꠣꠁꠎ꠆ꠎꠥꠛ ꠅꠁꠉꠦꠍꠤ, ꠀꠟ-ꠝꠍꠤꠞ ꠞꠢꠝꠦ ꠎꠦꠁꠘ ꠒꠣꠇꠤꠀ ꠀꠘꠤꠀ ꠔꠥꠝꠞꠣꠞꠦ ꠘꠤꠎꠞ ꠛꠘ꠆ꠖꠣ ꠛꠣꠘꠣꠁꠍꠂꠘ, ꠔꠣꠘꠦ ꠍꠣꠠꠤꠀ ꠔꠥꠝꠞꠣ ꠇꠤꠟꠣ ꠅꠔ ꠎꠟꠖꠤ ꠀꠞꠇ ꠘꠝꠥꠘꠣꠞ ꠈꠥꠡ-ꠈꠛꠞꠤꠞ ꠛꠣꠄ ꠚꠤꠞꠤꠉꠦꠟꠣꠄ।
7 ꠀꠍꠟꠦ ꠔ ꠁꠐꠣ ꠇꠥꠘꠥ ꠈꠥꠡ-ꠈꠛꠞꠤꠃ ꠘꠣꠄ। ꠅꠁꠟꠦ ꠇꠄꠎꠘ ꠝꠣꠘꠥꠡ ꠀꠍꠦ, ꠎꠦꠔꠣꠄ ꠔꠥꠝꠞꠣꠞ ꠁꠝꠣꠘ ꠟꠁꠀ ꠈꠦꠁꠠ ꠈꠦꠟꠣꠁꠞꠣ, ꠔꠣꠞꠣ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞꠦ ꠃꠟ꠆ꠐꠣ-ꠙꠣꠟ꠆ꠐꠣ ꠇꠞꠤꠟꠔꠣ ꠌꠣꠁꠞꠣ।
8 ꠢꠥꠘꠅ, ꠀꠝꠞꠣ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠍꠤ, ꠅꠃ ꠈꠥꠡ-ꠈꠛꠞꠤ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠣ ꠅꠄ, ꠁꠔꠣ ꠎꠥꠖꠤ ꠀꠝꠞꠣ ꠘꠤꠎꠦꠃ ꠇꠞꠤ, ꠛꠣ ꠀꠍꠝꠣꠘꠤ ꠇꠥꠘꠥ ꠚꠤꠞꠤꠡ꠆ꠔꠣꠄ ꠀꠁꠀ ꠇꠞꠂꠘ, ꠔꠦ ꠅꠉꠥꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।
9 ꠀꠝꠤ ꠀꠉꠦ ꠎꠦꠝꠘꠦ ꠇꠁꠍꠤ, ꠅꠈꠘ ꠢꠤꠞꠛꠣꠞ ꠅꠃꠟꠣ ꠇꠁꠞꠣꠝ, ꠀꠉꠞ ꠎꠦ ꠈꠥꠡ-ꠈꠛꠞꠤ ꠔꠥꠝꠞꠣ ꠝꠣꠘꠍ, ꠁꠔꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠈꠥꠡ-ꠈꠛꠞꠤ ꠇꠦꠃ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠟꠦ, ꠅꠉꠥꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।
10 ꠁꠔꠣ ꠇꠞꠤꠀ ꠀꠝꠤ ꠇꠣꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣꠝ ꠌꠣꠁꠀꠞ, ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠘꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ? ꠀꠝꠤ ꠇꠥꠘꠥ ꠝꠣꠘꠡꠞꠦ ꠈꠥꠡ ꠇꠞꠣꠞ ꠌꠦꠡ꠆ꠐꠣ ꠇꠞꠤꠀꠞ ꠘꠤ? ꠀꠝꠤ ꠎꠥꠖꠤ ꠅꠈꠘꠅ ꠝꠣꠘꠡꠞꠦ ꠈꠥꠡ ꠇꠞꠣꠞ ꠌꠦꠡ꠆ꠐꠣ ꠇꠞꠔꠣꠝ, ꠔꠦ ꠀꠝꠤ ꠀꠟ-ꠝꠍꠤꠞ ꠈꠣꠖꠤꠝ ꠅꠁꠟꠣꠝ ꠘꠣ ꠅꠘꠦ।
ꠢꠎꠞꠔ ꠙꠣꠃꠟꠥꠍ ꠇꠤꠟꠣ ꠍꠣꠢꠣꠛꠤ ꠅꠁꠟꠣ
11 ꠅ ꠜꠣꠁꠍꠣꠛ ꠅꠇꠟ, ꠀꠙꠘꠣꠞꠣ ꠎꠣꠘꠤꠀ ꠞꠣꠈꠃꠇ꠆ꠇꠣ, ꠀꠝꠤ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠤ, ꠁꠔꠣ ꠔ ꠇꠥꠘꠥ ꠝꠣꠘꠡꠞ ꠛꠣꠘꠣꠁꠟ ꠝꠔꠛꠣꠖ ꠘꠣꠄ।
12 ꠀꠝꠤ ꠁꠔꠣ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠙꠣꠁꠍꠤ ꠘꠣ, ꠇꠦꠃ ꠀꠝꠣꠞꠦ ꠁꠔꠣ ꠢꠤꠇꠣꠁꠍꠦꠅ ꠘꠣ। ꠈꠣꠟꠤ ꠁꠍꠣ ꠀꠟ-ꠝꠍꠤꠄ ꠘꠤꠎꠦ ꠀꠝꠣꠞ ꠉꠦꠍꠦ ꠁꠔꠣ ꠎꠣꠁꠞ ꠇꠞꠍꠂꠘ।
13 ꠀꠝꠤ ꠀꠉꠦ ꠎꠦꠛꠟꠣ ꠁꠢꠥꠖꠤ ꠗꠞ꠆ꠝ ꠝꠣꠘꠔꠣꠝ, ꠢꠃ ꠡꠝꠄ ꠀꠝꠣꠞ ꠌꠣꠟ-ꠌꠟꠘ ꠇꠤꠟꠣ ꠀꠍꠤꠟ ꠁꠔꠣ ꠔ ꠔꠥꠝꠞꠣ ꠢꠥꠘꠍ। ꠀꠝꠤ ꠀꠟ꠆ꠟꠣꠞ ꠎꠝꠣꠔ ꠅꠇꠟꠞꠦ ꠇꠔ ꠛꠦꠡꠤ ꠎꠥꠟꠥꠝ ꠇꠞꠔꠣꠝ, ꠀꠞ ꠁꠔꠣꠞꠦ ꠛꠤꠘꠣꠡ ꠇꠞꠣꠞ ꠌꠦꠡ꠆ꠐꠣꠔ ꠀꠍꠟꠣꠝ, ꠄꠅꠔꠣ ꠔꠥꠝꠞꠣ ꠎꠣꠘ।
14 ꠀꠝꠣꠞ ꠛꠣꠚ-ꠖꠣꠖꠣꠞ ꠉꠦꠍ ꠕꠣꠇꠤ ꠙꠣꠅꠀ ꠡꠞꠣ-ꠞꠍꠥꠝꠔ ꠝꠣꠘꠣꠔꠅ ꠀꠝꠤ ꠈꠥꠛ ꠈꠤꠀꠟꠤ ꠀꠍꠟꠣꠝ। ꠄꠞꠖꠣꠄ ꠀꠝꠣꠞ ꠛꠄꠅꠡꠤ ꠁꠢꠥꠖꠤ ꠅꠇꠟꠞ ꠝꠣꠎꠦ ꠀꠟ꠆ꠟꠣ-ꠛꠤꠟ꠆ꠟꠣ ꠇꠞꠣꠔ ꠀꠝꠤ ꠛꠃꠔ ꠀꠉꠥꠀꠁꠟ ꠀꠍꠟꠣꠝ।
15 ꠅꠁꠟꠦ ꠀꠟ꠆ꠟꠣꠄ ꠔ ꠀꠝꠣꠞ ꠝꠣʼꠞ ꠙꠦꠐꠅ ꠕꠣꠇꠔꠦꠃ ꠀꠝꠣꠞꠦ ꠙꠍꠘ꠆ꠖ ꠇꠞꠍꠂꠘ, ꠔꠣꠁꠘꠃ ꠘꠤꠎꠞ ꠞꠢꠝꠔꠦ ꠀꠝꠣꠞꠦ ꠖꠣꠅꠔ ꠖꠤꠍꠂꠘ। ꠔꠣꠘ ꠝꠥꠘꠡꠣ ꠀꠍꠤꠟ,
16 ꠀꠝꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞ ꠖꠤꠖꠣꠞ ꠙꠣꠁꠀ, ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ। ꠔꠦ ꠅꠃ ꠖꠤꠖꠣꠞ ꠙꠣꠁꠀꠅ ꠀꠝꠤ ꠇꠥꠘꠥ ꠀꠖꠝ ꠎꠣꠔꠞ ꠟꠉꠦ ꠙꠞꠣꠝꠤꠡ ꠇꠞꠍꠤ ꠘꠣ।
17 ꠀꠞ ꠀꠝꠣꠞ ꠀꠉꠞ ꠇꠥꠘꠥ ꠍꠣꠢꠣꠛꠤꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠟꠣꠉꠤ ꠀꠝꠤ ꠎꠦꠞꠥꠎꠣꠟꠦꠝ ꠐꠣꠃꠘ ꠈꠣꠘꠅ-ꠅ ꠉꠦꠍꠤ ꠘꠣ। ꠛꠞꠋ ꠀꠝꠤ ꠀꠞꠛ ꠖꠦꠡꠅ ꠉꠦꠍꠟꠣꠝꠉꠤ, ꠉꠤꠀ ꠊꠥꠞꠤ-ꠚꠤꠞꠤ ꠢꠤꠞꠛꠣꠞ ꠖꠣꠝꠦꠡ꠆ꠇ ꠐꠣꠃꠘꠅ ꠀꠁꠍꠤ।
18 ꠄꠞ ꠔꠤꠘ ꠛꠞꠍ ꠛꠣꠖꠦ ꠍꠣꠢꠣꠛꠤ ꠙꠤꠔꠞꠞ ꠟꠉꠦ ꠝꠥꠟꠣꠇꠣꠔ ꠇꠞꠣꠞ ꠘꠤꠅꠔꠦ ꠎꠦꠞꠥꠎꠣꠟꠦꠝ ꠉꠦꠍꠟꠣꠝ, ꠉꠤꠀ ꠔꠣꠘ ꠅꠘꠅ ꠙꠘꠞ ꠖꠤꠘ ꠀꠍꠟꠣꠝ।
19 ꠅꠃ ꠡꠝꠄ ꠢꠎꠞꠔ ꠁꠍꠣꠞ ꠜꠣꠁ ꠍꠣꠢꠣꠛꠤ ꠁꠀꠇꠥꠛ ꠍꠣꠠꠣ, ꠖꠥꠍꠞꠣ ꠇꠥꠘꠥ ꠍꠣꠢꠣꠛꠤꠞ ꠟꠉꠦ ꠀꠝꠣꠞ ꠖꠦꠈꠣ ꠅꠁꠍꠦ ꠘꠣ।
20 ꠄꠇ ꠀꠟ꠆ꠟꠣ ꠡꠣꠇ꠆ꠇꠤ ꠀꠍꠂꠘ, ꠀꠝꠤ ꠅꠃ ꠎꠦꠔꠣ ꠟꠦꠈꠟꠣꠝ, ꠄꠞ ꠄꠇꠐꠣ ꠢꠞꠚꠅ ꠝꠤꠍꠣ ꠘꠣꠄ। ꠝꠘꠅ ꠞꠣꠈꠛꠣ, ꠅꠃ ꠈꠥꠡ-ꠈꠛꠞꠤ ꠔ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠙꠣꠁꠍꠤ ꠘꠣ, ꠈꠣꠟꠤ ꠁꠍꠣ ꠀꠟ-ꠝꠍꠤꠄ ꠘꠤꠎꠦ ꠀꠝꠣꠞ ꠉꠦꠍꠦ ꠎꠣꠁꠞ ꠇꠞꠍꠂꠘ।
21 ꠛꠣꠖꠦ ꠀꠝꠤ ꠡꠤꠞꠤꠀ ꠀꠞ ꠇꠤꠟꠤꠇꠤꠀ ꠖꠦꠡꠞ ꠛꠃꠔ ꠎꠣꠉꠣꠔ ꠉꠦꠍꠟꠣꠝ।
22 ꠅꠃ ꠡꠝꠄ ꠄꠢꠥꠖꠤꠀ ꠎꠤꠟꠣꠞ ꠁꠍꠣꠄꠁ ꠎꠝꠣꠔ ꠅꠇꠟꠦꠅ ꠀꠝꠣꠞꠦ ꠌꠤꠘꠔꠣ ꠘꠣ।
23 ꠔꠣꠞꠣ ꠈꠣꠟꠤ ꠅꠃ ꠈꠛꠞ ꠢꠥꠘꠍꠤꠟꠣ, “ꠀꠉꠦ ꠎꠦ ꠛꠦꠐꠣꠄ ꠀꠝꠞꠣꠞ ꠃꠙꠞꠦ ꠎꠥꠟꠥꠝ ꠇꠞꠔ, ꠀꠞ ꠁꠍꠣꠞ ꠘꠣꠝꠞꠦ ꠖꠥꠘꠤꠀ ꠕꠣꠇꠤ ꠔꠥꠠꠤꠟꠤꠔ ꠌꠣꠁꠍꠤꠟ, ꠅꠈꠘ ꠢꠃ ꠛꠦꠐꠣꠄ ꠀꠟ-ꠝꠍꠤꠞ ꠁꠝꠣꠘꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠦꠞ।”
24 ꠀꠝꠤ ꠁꠝꠣꠘ ꠀꠘꠤꠀ ꠛꠖꠟꠤ ꠎꠣꠅꠀꠄ, ꠔꠣꠞꠣ ꠀꠟ꠆ꠟꠣꠞ ꠡꠥꠇꠥꠞ-ꠔꠣꠞꠤꠚ ꠇꠞꠔꠣ।