15
ꠀꠞꠣꠁꠟ ꠝꠦꠠꠣꠞ ꠇꠤꠌ꠆ꠍꠣ
1 ꠢꠎꠞꠔ ꠁꠍꠣꠞ ꠛꠄꠀꠘ ꠢꠥꠘꠣꠞ ꠟꠣꠉꠤ ꠛꠃꠔ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠛꠦ-ꠡꠞꠤꠅꠔꠤ ꠀꠝ ꠝꠣꠘꠥꠡ ꠔꠣꠘ ꠉꠦꠍꠦ ꠖꠟꠣ ꠅꠁꠟꠣ।
2 ꠁꠔꠣ ꠖꠦꠈꠤꠀ ꠚꠞꠤꠡꠤ ꠖꠟꠞ ꠝꠣꠘꠡꠦ ꠀꠞ ꠝꠃꠟꠣꠘꠣ ꠅꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠁ ꠝꠣꠘꠥꠡꠉꠥ ꠈꠣꠟꠤ ꠘꠣꠚꠞꠝꠣꠘ ꠅꠇꠟꠞ ꠟꠉꠦ ꠃꠑꠣ-ꠛꠅꠀ ꠀꠞ ꠈꠣꠘꠣ-ꠙꠤꠘꠣ ꠈꠣꠄ।”
3 ꠔꠦꠃ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣꠁꠘ ꠢꠥꠘꠣꠁꠟꠣ। ꠔꠣꠁꠘ ꠇꠁꠟꠣ,
4 “ꠝꠘꠅ ꠇꠞꠃꠇ꠆ꠇꠣ, ꠀꠙꠘꠣꠞꠣ ꠇꠥꠘꠥ ꠄꠇꠎꠘꠞ ꠄꠇ-ꠡꠐꠣ ꠝꠦꠠꠣ ꠀꠍꠦ। ꠄꠞꠝꠣꠎꠞ ꠄꠉꠥ ꠝꠦꠠꠣ ꠀꠞꠣꠁ ꠉꠦꠟꠦ, ꠢꠦ ꠛꠣꠇꠤ ꠘꠤꠞꠣꠘ꠆ꠘꠛ꠆ꠛꠁꠐꠣ ꠛꠘ꠆ꠖꠅ ꠕꠁꠀ ꠢꠃ ꠀꠞꠣꠁꠟ ꠅꠉꠥ ꠔꠥꠇꠣꠘꠤꠔ ꠎꠣꠄ ꠘꠣ ꠘꠤ?
5 ꠉꠤꠀ ꠅꠉꠥ ꠔꠥꠇꠣꠁꠀ ꠙꠣꠁꠟꠦ, ꠈꠥꠡꠤꠄ ꠁꠐꠣꠞꠦ ꠇꠣꠘ꠆ꠖꠅ ꠇꠞꠤ ꠀꠘꠦ।
6 ꠛꠣꠖꠦ ꠛꠣꠠꠤꠔ ꠉꠤꠀ ꠛꠘ꠆ꠖꠥ-ꠛꠣꠘ꠆ꠖꠛ ꠀꠞ ꠀꠞꠤ-ꠚꠞꠤꠞꠦ ꠇꠄ, ‘ꠀꠅ, ꠀꠝꠣꠞ ꠟꠉꠦ ꠚꠥꠞ꠆ꠔꠤ ꠇꠞꠅ। ꠀꠝꠣꠞ ꠀꠞꠣꠁꠟ ꠝꠦꠠꠣꠉꠥ ꠔꠥꠇꠣꠁꠀ ꠙꠣꠁꠟꠤꠍꠤ।’
7 ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ, ꠎꠣꠞꠣ ꠉꠥꠘꠣ ꠕꠣꠇꠤ ꠔꠃꠛꠣ ꠇꠞꠣꠞ ꠎꠞꠥꠞ ꠝꠘꠅ ꠇꠞꠦ ꠘꠣ, ꠁꠟꠣ ꠘꠤꠞꠣꠘ꠆ꠘꠛ꠆ꠛꠁ ꠎꠘ ꠙꠞꠦꠎꠉꠣꠞ ꠕꠣꠇꠤ ꠄꠇꠎꠘ ꠉꠥꠘꠣꠉꠣꠞꠦ ꠝꠘ ꠛꠖꠟꠣꠁꠀ ꠔꠃꠛꠣ ꠇꠞꠟꠦ, ꠛꠦꠢꠦꠡ꠆ꠔꠅ ꠀꠞꠅ ꠛꠦꠡꠤ ꠈꠥꠡꠤ-ꠛꠣꠡꠤ ꠅꠄ।
ꠀꠞꠣꠁꠟ ꠐꠦꠇꠣꠞ ꠇꠤꠌ꠆ꠍꠣ
8 “ꠛꠣ ꠗꠞꠃꠇ꠆ꠇꠣ, ꠇꠥꠘꠥ ꠄꠇ ꠛꠦꠐꠤꠞ ꠉꠦꠍꠦ ꠞꠥꠙꠣꠞ ꠖꠡꠐꠣ ꠐꠦꠇꠣ ꠀꠍꠤꠟ। ꠄꠞ ꠕꠣꠇꠤ ꠄꠉꠥ ꠐꠦꠇꠣ ꠎꠥꠖꠤ ꠀꠞꠣꠁꠎꠣꠄ, ꠔꠦ ꠛꠦꠐꠤꠄ ꠢꠤ ꠐꠦꠇꠣꠞ ꠟꠣꠉꠤ ꠟꠦꠝ ꠎꠣꠟꠣꠁꠀ ꠢꠥꠞꠥꠁꠘꠖꠤ ꠢꠥꠞꠤꠀ ꠀꠡ꠆ꠔꠣ ꠊꠞ ꠔꠥꠇꠣꠄ ꠘꠣ ꠘꠤ?
9 ꠛꠣꠖꠦ ꠔꠥꠇꠣꠁꠀ ꠙꠣꠁꠟꠤꠟꠦ ꠛꠘ꠆ꠖꠥ-ꠛꠣꠘ꠆ꠖꠛ ꠀꠞ ꠀꠞꠤ-ꠚꠞꠤꠞꠦ ꠒꠣꠇꠤꠀ ꠇꠄ, ‘ꠀꠅ ꠘꠣ, ꠀꠝꠣꠞ ꠟꠉꠦ ꠈꠥꠡꠤꠔ ꠡꠣꠝꠤꠟ ꠅꠅ। ꠀꠝꠣꠞ ꠀꠞꠣꠁꠟ ꠐꠦꠇꠣꠉꠥ ꠔꠥꠇꠣꠁꠀ ꠙꠣꠁꠟꠤꠍꠤ।’
10 ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ, ꠄꠇꠎꠘ ꠉꠥꠘꠣꠉꠣꠞ ꠝꠣꠘꠡꠦ ꠝꠘ ꠛꠖꠟꠣꠁꠀ ꠔꠃꠛꠣ ꠇꠞꠟꠦ, ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟꠦ ꠅꠃꠟꠣ ꠈꠥꠡꠤ ꠇꠞꠂꠘ।”
ꠀꠞꠣꠁꠟ ꠙꠥꠀꠞ ꠇꠤꠌ꠆ꠍꠣ
11 ꠛꠣꠖꠦ ꠁꠍꠣꠄ ꠇꠁꠟꠣ, “ꠄꠇ ꠉꠤꠞꠡ꠆ꠔꠞ ꠖꠥꠁ ꠙꠥꠀ ꠀꠍꠤꠟ।
12 ꠄꠇꠖꠤꠘ ꠢꠥꠞꠥ ꠙꠥꠀꠄ ꠔꠣꠞ ꠛꠣꠚꠞꠦ ꠇꠁꠟ, ꠛꠣꠛꠣ, ꠀꠝꠤ ꠛꠣꠛꠣꠁꠔꠤ ꠎꠝꠤ-ꠎꠝꠣ ꠀꠞ ꠗꠘ-ꠍꠣꠝꠣꠘꠣ ꠎꠦꠔꠣ ꠙꠣꠁꠔꠣꠝ, ꠀꠝꠣꠞ ꠅꠃ ꠛꠣꠐꠈꠣꠘ ꠅꠈꠘꠃ ꠀꠟꠉꠣꠁꠀ ꠖꠤꠟꠣꠃꠇ꠆ꠇꠣ। ꠅꠃ ꠛꠣꠚꠦ ꠔꠣꠘ ꠍꠣꠝꠣꠘꠣ ꠖꠥꠁꠅ ꠙꠥꠀꠞ ꠘꠣꠝꠦ ꠛꠣꠐꠤꠀ ꠖꠤꠟꠣꠁꠟꠣ।
13 ꠄꠞ ꠇꠄꠖꠤꠘ ꠛꠣꠖꠦ ꠢꠥꠞꠥ ꠙꠥꠀꠄ ꠔꠣꠞ ꠢꠇ꠆ꠇꠟ ꠍꠣꠝꠣꠘꠣ ꠛꠦꠌꠤꠀ ꠛꠤꠖꠦꠡ ꠉꠦꠟꠉꠤ। ꠛꠤꠖꠦꠡ ꠉꠤꠀ ꠛꠣꠖ ꠙꠕꠦ ꠌꠟꠤꠀ ꠔꠣꠞ ꠐꠦꠇꠣ-ꠙꠄꠡꠣ ꠢꠇ꠆ꠇꠟꠔꠣ ꠈꠥꠀꠁꠟꠤꠟ।
14 ꠢꠇꠟꠔꠣ ꠈꠥꠀꠁꠀ ꠢꠣꠞꠟꠦ ꠢꠃ ꠖꠦꠡꠞ ꠢꠇꠟ ꠎꠣꠉꠣꠔ ꠈꠥꠛ ꠘꠤꠖꠣꠘ ꠖꠦꠈꠣ ꠖꠤꠟ ꠄꠞꠖꠣꠄ ꠢꠦ ꠈꠥꠛ ꠇꠡ꠆ꠐꠔ ꠙꠠꠟ।
15 ꠢꠦ ꠢꠃ ꠖꠦꠡꠞ ꠄꠇ ꠉꠤꠞꠡ꠆ꠔꠞ ꠛꠣꠠꠤꠔ ꠉꠤꠀ ꠌꠣꠇꠞꠤ ꠌꠣꠁꠟ। ꠝꠣꠟꠤꠇꠦ ꠔꠣꠞꠦ ꠌꠣꠇꠞꠤ ꠖꠤꠀ ꠡꠥꠅꠞꠞ ꠙꠣꠟ ꠞꠣꠈꠣꠞ ꠟꠣꠉꠤ ꠛꠘ꠆ꠖꠅ ꠙꠣꠑꠣꠁꠟ।
16 ꠛꠘ꠆ꠖꠅ ꠉꠤꠀ ꠡꠥꠅꠞꠦ ꠎꠦꠔꠣ ꠈꠣꠄ, ꠢꠦ-ꠅ ꠅꠔꠣ ꠈꠣꠁꠀ ꠙꠦꠐꠞ ꠜꠥꠇ ꠝꠤꠐꠣꠁꠔ ꠌꠣꠁꠟ, ꠅꠁꠟꠦ ꠅꠔꠣꠅ ꠇꠦꠃ ꠔꠣꠞꠦ ꠖꠤꠔ ꠘꠣ।
17 “ꠛꠣꠖꠦ ꠀꠈꠔꠣ ꠄꠇꠖꠤꠘ ꠔꠣꠞ ꠢꠥꠡ ꠅꠁꠟ। ꠢꠦ ꠝꠘꠦ ꠝꠘꠦ ꠇꠁꠟ, ꠀꠝꠣꠞ ꠛꠣꠛꠣꠞ ꠛꠣꠠꠤꠔ ꠔ ꠛꠃꠔ ꠌꠣꠇꠞ-ꠛꠣꠇꠞꠦ ꠙꠦꠐ ꠜꠞꠤ ꠜꠣꠔ ꠈꠣꠁꠞꠣ। ꠔꠦ ꠀꠝꠤ ꠅꠘꠅ ꠃꠙꠣꠡꠦ ꠝꠞꠞꠣꠝ ꠇꠦꠘꠦ?
18 ꠀꠝꠤ ꠉꠤꠀ ꠀꠝꠣꠞ ꠛꠣꠛꠣꠞꠦ ꠇꠁꠝꠥ, ꠛꠣꠛꠣ, ꠀꠝꠤ ꠔ ꠀꠟ꠆ꠟꠣꠞ ꠉꠦꠍꠦ ꠀꠞ ꠔꠥꠝꠣꠞ ꠉꠦꠍꠦꠅ ꠘꠣꠚꠞꠝꠣꠘ ꠛꠘꠤꠉꠦꠍꠤ।
19 ꠔꠥꠝꠣꠞ ꠙꠥꠀ ꠇꠁꠀ ꠀꠝꠤ ꠀꠞ ꠙꠞꠤꠌꠄ ꠖꠤꠛꠣꠞ ꠟꠣꠈ ꠘꠣꠄ। ꠈꠣꠟꠤ ꠔꠥꠝꠣꠞ ꠌꠣꠇꠞꠞ ꠟꠣꠈꠣꠘ ꠀꠝꠣꠞꠦ ꠄꠇꠎꠞꠣ ꠀꠡꠞꠄ ꠖꠦꠅ।
20 ꠅꠈꠣꠘ ꠇꠁꠀ ꠢꠦ ꠔꠣꠞ ꠛꠣꠠꠤꠔ ꠞꠅꠀꠘꠣ ꠖꠤꠟꠣꠁꠟ। ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠔꠦꠃ ꠔꠣꠞ ꠛꠣꠚꠦ ꠔꠣꠞꠦ ꠖꠦꠈꠤꠟꠤꠟꠣ। ꠖꠦꠈꠤꠀ ꠔꠣꠘ ꠖꠤꠟ ꠉꠟꠤ ꠉꠦꠟ। ꠔꠣꠁꠘ ꠖꠃꠠꠤꠀ ꠉꠤꠀ ꠔꠣꠞꠦ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠢꠥꠋꠉꠣ ꠖꠤꠟꠣ।
21 ꠔꠦꠃ ꠙꠥꠀꠄ ꠇꠁꠟ, ‘ꠛꠣꠛꠣ, ꠀꠝꠤ ꠔ ꠔꠥꠝꠣꠞ ꠙꠥꠀ ꠇꠁꠀ ꠙꠞꠤꠌꠄ ꠖꠤꠛꠣꠞ ꠟꠣꠈ ꠞꠁꠍꠤ ꠘꠣ। ꠀꠝꠤ ꠀꠟ꠆ꠟꠣꠞ ꠉꠦꠍꠦ ꠀꠞ ꠔꠥꠝꠣꠞ ꠉꠦꠍꠦꠅ ꠘꠣꠚꠞꠝꠣꠘ ꠛꠘꠤꠉꠦꠍꠤ।’
22 ꠅꠁꠟꠦ ꠛꠣꠚꠦ ꠟꠉꠦ ꠟꠉꠦ ꠇꠣꠝꠟꠣꠁꠘ꠆ꠔꠞꠦ ꠇꠁꠟꠣ, ‘ꠢꠂ, ꠎꠟꠖꠤ ꠇꠞꠤ ꠊꠞ ꠕꠣꠇꠤ ꠜꠣꠟꠣ ꠎꠥꠛ꠆ꠛꠣꠐꠣ ꠀꠘꠤꠀ ꠀꠝꠣꠞ ꠙꠥꠀꠉꠥꠞꠦ ꠚꠤꠘ꠆ꠖꠣꠅ। ꠔꠣꠞ ꠀꠔꠅ ꠀꠋꠐꠤ ꠀꠞ ꠙꠣꠅꠔ ꠎꠥꠔꠣ ꠚꠤꠘ꠆ꠖꠣꠁ ꠖꠦꠅ।
23 ꠀꠞ ꠢꠥꠘꠅ, ꠙꠣꠟꠅ ꠕꠣꠇꠤ ꠔꠣꠎꠣ ꠒꠦꠇꠣ-ꠛꠣꠍꠥꠞꠉꠥ ꠀꠘꠤꠀ ꠎꠛ ꠇꠞꠅ। ꠀꠅ, ꠀꠝꠞꠣ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤ ꠇꠞꠤ ꠈꠣꠘꠣ ꠈꠣꠁ।
24 ꠀꠝꠣꠞ ꠁ ꠙꠥꠀꠉꠥ ꠔ ꠝꠞꠤꠉꠦꠍꠤꠟ, ꠅꠈꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠦ। ꠅꠉꠥ ꠘꠣꠁ ꠅꠁꠉꠦꠍꠤꠟ, ꠅꠈꠘ ꠚꠤꠞꠔ ꠙꠣꠁꠍꠤ।’ ꠔꠦꠃ ꠢꠇꠟꠦ ꠝꠤꠟꠤꠀ ꠈꠥꠡꠤ-ꠛꠣꠡꠤꠔ ꠟꠣꠉꠟꠣ।
25 “ꠅꠃ ꠡꠝꠄ ꠛꠦꠐꠣꠞ ꠛꠠ ꠙꠥꠀ ꠛꠘ꠆ꠖꠅ ꠀꠍꠤꠟ। ꠢꠦ ꠛꠣꠠꠤꠞ ꠇꠣꠘ꠆ꠖꠣꠔ ꠀꠁꠀ ꠘꠣꠌ-ꠉꠣꠘ ꠀꠞ ꠒꠥꠟ-ꠒꠙꠇꠤꠞ ꠀꠅꠀꠎ ꠢꠥꠘꠤꠀ,
26 ꠔꠣꠞꠣꠞ ꠄꠇ ꠌꠣꠇꠞꠞꠦ ꠎꠤꠇꠣꠁꠟ, ‘ꠇꠤꠔꠣꠞꠦ, ꠁꠔꠣ ꠇꠤꠔꠣ ꠅꠞ?’
27 ꠌꠣꠇꠞꠦ ꠇꠁꠟ, ‘ꠍꠣꠛ, ꠀꠙꠘꠣꠞ ꠢꠥꠞꠥ ꠜꠣꠁ ꠛꠣꠠꠤꠔ ꠀꠁꠍꠂꠘ। ꠀꠙꠘꠣꠞ ꠀꠛ꠆ꠛꠣꠄ ꠔꠣꠘꠞꠦ ꠍꠢꠤ-ꠍꠣꠟꠣꠝꠔꠦ ꠙꠣꠁꠀ, ꠔꠣꠎꠣ ꠅꠃ ꠒꠦꠇꠣ-ꠛꠣꠍꠥꠞ ꠎꠛ ꠇꠞꠍꠂꠘ।’
28 ꠁꠈꠣꠘ ꠢꠥꠘꠤꠀ ꠛꠠ ꠙꠥꠀꠄ ꠉꠥꠍꠣ ꠇꠞꠤꠀ ꠛꠣꠠꠤꠞ ꠜꠤꠔꠞꠦ ꠀꠁꠔ ꠌꠣꠁꠟ ꠘꠣ। ꠔꠦꠃ ꠔꠣꠞ ꠛꠣꠚ ꠛꠣꠞ ꠅꠁꠀ ꠀꠁꠀ ꠔꠣꠞꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠟꠣ।
29 ꠢꠦ ꠔꠣꠞ ꠛꠣꠚꠞꠦ ꠇꠁꠟ, ‘ꠖꠦꠈꠃꠇ꠆ꠇꠣ, ꠀꠝꠤ ꠅꠔ ꠖꠤꠘ ꠗꠞꠤꠀ ꠀꠙꠘꠣꠞ ꠈꠦꠎꠝꠔ ꠇꠞꠞꠣꠝ, ꠇꠥꠘꠥꠖꠤꠘꠃ ꠀꠙꠘꠣꠞ ꠢꠥꠇꠥꠝ ꠃꠟ꠆ꠐꠣꠁꠍꠤ ꠘꠣ। ꠅꠁꠟꠦ ꠀꠝꠣꠞ ꠛꠘ꠆ꠖꠥ-ꠛꠣꠘ꠆ꠖꠛ ꠟꠁꠀ ꠈꠥꠡꠤ ꠇꠞꠣꠞ ꠟꠣꠉꠤ ꠄꠉꠥ ꠛꠇꠞꠤꠞ ꠛꠣꠁꠌ꠆ꠌꠣꠅ ꠇꠥꠘꠥꠖꠤꠘ ꠖꠤꠍꠂꠘ ꠘꠣ।
30 ꠀꠞ ꠀꠙꠘꠣꠞ ꠎꠦ ꠙꠥꠀꠄ ꠘꠐꠤ ꠛꠦꠐꠤꠘ꠆ꠔꠞ ꠔꠟꠦ ꠢꠇꠟ ꠍꠣꠝꠣꠘꠣ ꠈꠥꠀꠁꠍꠦ, ꠢꠦ ꠀꠁꠔꠦꠃ ꠔꠣꠎꠣ ꠒꠦꠇꠣ-ꠛꠣꠍꠥꠞꠉꠥ ꠀꠘꠤꠀ ꠎꠛ ꠇꠞꠤꠟꠣꠁꠟꠣ!’
31 ꠛꠣꠚꠦ ꠇꠁꠟꠣ, ‘ꠙꠥꠔꠞꠦ, ꠔꠥꠝꠤ ꠔ ꠢꠣꠝꠦꠡꠣꠃ ꠀꠝꠣꠞ ꠟꠉꠦ ꠀꠍ। ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠞꠁꠍꠦ, ꠁꠔꠣ ꠢꠇ꠆ꠇꠟꠔꠣꠃ ꠔ ꠔꠥꠝꠣꠞ।
32 ꠅꠈꠘ ꠀꠝꠞꠣ ꠢꠇꠟꠦ ꠖꠤꠟ ꠍꠣꠚ ꠇꠞꠤꠀ ꠈꠥꠡꠤ-ꠛꠣꠡꠤ ꠇꠞꠣ ꠎꠞꠥꠞ। ꠔꠥꠝꠣꠞ ꠁ ꠜꠣꠁ ꠔ ꠝꠞꠤꠃ ꠉꠦꠍꠤꠟ, ꠅꠈꠘ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠍꠦ। ꠅꠉꠥ ꠄꠇ꠆ꠇꠦꠞꠦ ꠘꠣꠁ ꠅꠁꠉꠦꠍꠤꠟ, ꠅꠈꠘ ꠚꠤꠞꠔ ꠙꠣꠁꠍꠤ।’ ”