10
ꠔꠣꠟꠣꠇꠞ ꠝꠥꠍꠟꠣ
1 ꠇꠚꠞꠘꠣꠃꠝ ꠕꠣꠇꠤ ꠢꠎꠞꠔ ꠁꠍꠣ ꠄꠢꠥꠖꠤꠀ ꠎꠤꠟꠣꠔ ꠀꠁꠟꠣ, ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠉꠦꠟꠣ। ꠅꠘꠅ ꠀꠁꠟꠦ ꠢꠤꠞꠛꠣꠞ ꠛꠃꠔ ꠝꠣꠘꠥꠡ ꠀꠁꠀ ꠔꠣꠘ ꠉꠦꠍꠦ ꠖꠟꠣ ꠅꠁꠟꠣ। ꠔꠣꠁꠘꠅ ꠔꠣꠘ ꠞꠦꠅꠀꠎ ꠝꠣꠚꠤꠇ ꠄꠞꠣꠞꠦ ꠔꠣꠟꠤꠝ ꠖꠤꠟꠣ।
2 ꠅꠃ ꠡꠝꠄ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ ꠚꠞꠤꠡꠤ ꠝꠎꠛꠞ ꠇꠄꠎꠘꠦ ꠀꠁꠀ ꠎꠤꠇꠣꠁꠟ, “ꠍꠣꠛ, ꠇꠃꠇ꠆ꠇꠣ ꠌꠣꠁꠘ, ꠛꠃꠞꠦ ꠔꠣꠟꠣꠇ ꠖꠦꠅꠀ ꠎꠣꠁꠎ ꠀꠍꠦ ꠘꠤ?”
3 ꠔꠣꠁꠘ ꠎꠥꠀꠙ ꠖꠤꠟꠣ, “ꠢꠎꠞꠔ ꠝꠥꠍꠣꠄ ꠀꠙꠘꠣꠁꠘ꠆ꠔꠞꠦ ꠇꠤꠔꠣ ꠛꠣꠔꠣꠁꠍꠂꠘ?”
4 ꠔꠣꠞꠣ ꠇꠁꠟꠣ, “ꠔꠣꠁꠘ ꠇꠁꠍꠂꠘ, ꠔꠣꠟꠣꠇ ꠘꠣꠝꠣ ꠟꠦꠈꠤꠀ ꠢꠣꠞꠤ ꠛꠃ ꠔꠣꠟꠣꠇ ꠖꠦꠅꠀ ꠎꠣꠁꠎ ꠀꠍꠦ।”
5 ꠁꠍꠣꠄ ꠇꠁꠟꠣ, “ꠔꠥꠝꠞꠣꠞ ꠖꠤꠟ ꠙꠣꠡꠣꠘ, ꠄꠞꠟꠣꠉꠤꠃ ꠝꠥꠍꠣ ꠘꠛꠤꠄ ꠁ ꠝꠥꠍꠟꠣ ꠟꠦꠈꠍꠂꠘ।
6 ꠅꠁꠟꠦ ꠄꠅꠈꠣꠘ ꠔ ꠟꠦꠈꠣ ꠀꠍꠦ, ꠀꠟ꠆ꠟꠣꠄ ꠙꠄꠟꠣ ꠀꠖꠝ ꠀꠞ ꠢꠣꠅꠀꠞꠦ ꠝꠞ꠆ꠖ ꠀꠞ ꠀꠅꠞꠔ ꠛꠣꠘꠣꠁ ꠙꠄꠖꠣ ꠇꠞꠍꠂꠘ।
7 ꠄꠞꠖꠣꠄ ꠝꠣꠘꠡꠦꠅ ꠔꠣꠞꠣꠞ ꠝꠣ-ꠛꠣꠚꠞꠦ ꠕꠁꠀ ꠛꠃꠞ ꠟꠉꠦ ꠀꠡꠤꠇ ꠅꠁꠛꠣ।
8 ꠎꠣꠝꠣꠁ ꠀꠞ ꠛꠃ ꠄꠇ ꠇꠣꠄꠀ ꠅꠁꠛꠣ। ꠔꠣꠞꠣ ꠖꠥꠁ ꠞꠁꠔꠣ ꠘꠣꠄ, ꠄꠇ ꠅꠁꠛꠣ।
9 ꠔꠦ ꠀꠟ꠆ꠟꠣꠄ ꠎꠦꠔꠣ ꠎꠥꠠꠣ ꠟꠣꠉꠣꠁꠍꠂꠘ, ꠝꠣꠘꠡꠦ ꠁꠔꠣꠞꠦ ꠀꠟꠉ ꠘꠣ ꠇꠞꠃꠇ।”
10 ꠛꠣꠖꠦ ꠍꠣꠢꠣꠛꠤ ꠅꠇꠟꠦ ꠊꠞꠅ ꠢꠣꠝꠣꠁꠀ, ꠢꠤꠞꠛꠣꠞ ꠔꠣꠘꠞꠦ ꠅꠃ ꠝꠥꠍꠟꠣ ꠎꠤꠇꠣꠁꠟꠣ।
11 ꠔꠦꠃ ꠁꠍꠣꠄ ꠇꠁꠟꠣ, “ꠎꠦ ꠝꠣꠘꠡꠦ ꠔꠣꠞ ꠛꠃꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠤꠞꠦ ꠘꠤꠇꠣ ꠇꠞꠦ, ꠢꠦ ꠔ ꠅꠃ ꠛꠃꠞ ꠟꠉꠦ ꠎꠤꠘꠣ ꠇꠞꠦ।
12 ꠅꠃꠟꠣ ꠛꠃꠄꠅ ꠎꠥꠖꠤ ꠘꠤꠎꠞ ꠎꠣꠝꠣꠁꠞꠦ ꠔꠣꠟꠣꠇ ꠖꠤꠀ ꠀꠞꠇ ꠛꠦꠐꠣꠞ ꠉꠦꠍꠦ ꠘꠤꠇꠣ ꠛꠄ, ꠔꠦ ꠔꠣꠁꠅ ꠎꠤꠘꠣ ꠇꠞꠦ।”
ꠢꠥꠞꠥ ꠢꠥꠞꠥꠔ꠆ꠔꠣꠁꠘ꠆ꠔꠞ ꠛꠦꠙꠣꠞꠦ ꠔꠣꠟꠤꠝ
13 ꠛꠣꠖꠦ ꠝꠣꠘꠡꠦ ꠢꠥꠞꠥ ꠢꠥꠞꠥ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ ꠔꠣꠞꠣꠞꠦ ꠀꠔꠣꠁ ꠖꠤꠛꠣꠞ ꠟꠣꠉꠤ। ꠅꠁꠟꠦ ꠍꠣꠢꠣꠛꠤ ꠅꠇꠟꠦ ꠄꠞꠣꠞꠦ ꠛꠇꠣ-ꠎꠇꠣ ꠇꠞꠟꠣ।
14 ꠁꠔꠣ ꠖꠦꠈꠤꠀ ꠁꠍꠣ ꠘꠣꠞꠣꠎ ꠅꠁꠀ ꠔꠣꠞꠣꠞꠦ ꠇꠁꠟꠣ, “ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠀꠝꠣꠞ ꠉꠦꠍꠦ ꠀꠁꠔꠦ ꠝꠣꠘꠣ ꠇꠞꠤꠅ ꠘꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠄꠞꠣꠞ ꠟꠣꠈꠣꠘ ꠝꠣꠘꠡꠞ ꠟꠣꠉꠤꠃ।
15 ꠀꠝꠤ ꠢꠇ ꠇꠕꠣ ꠇꠁꠞꠣꠝ, ꠢꠥꠞꠥ ꠢꠥꠞꠥꠔ꠆ꠔꠣꠁꠘ꠆ꠔꠦ ꠎꠦꠟꠣ ꠛꠠꠞ ꠡꠣꠡꠘ ꠝꠣꠘꠂꠘ, ꠀꠟ꠆ꠟꠣꠞ ꠡꠣꠡꠘꠞꠦ ꠅꠃ ꠟꠣꠈꠣꠘ ꠘꠣ ꠝꠣꠘꠟꠦ, ꠝꠣꠘꠥꠡ ꠇꠥꠘꠥꠝꠘ꠆ꠔꠦꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠔ ꠘꠣꠄ।”
16 ꠛꠣꠖꠦ ꠔꠣꠁꠘ ꠔꠣꠞꠣꠞꠦ ꠇꠥꠟꠅ ꠟꠁꠀ ꠔꠣꠞꠣꠞ ꠝꠣꠕꠣꠔ ꠀꠔ ꠞꠣꠈꠤꠀ ꠖꠥꠀ ꠇꠞꠟꠣ।
ꠉꠞꠤꠛ ꠀꠞ ꠗꠘꠤꠞ ꠛꠦꠢꠦꠡ꠆ꠔ
17 ꠢꠎꠞꠔ ꠁꠍꠣ ꠎꠦꠛꠟꠣ ꠛꠣꠞ ꠅꠁꠀ ꠞꠅꠀꠘꠣ ꠅꠁꠟꠣ, ꠅꠃ ꠡꠝꠄ ꠄꠇ ꠛꠦꠐꠣ ꠖꠃꠠꠣꠁꠀ ꠀꠁꠀ ꠀꠐꠥ ꠉꠣꠠꠤꠀ ꠔꠣꠘ ꠍꠣꠝꠘꠦ ꠛꠁꠀ ꠇꠁꠟ, “ꠃꠡ꠆ꠔꠣꠖ, ꠀꠙꠘꠦ ꠔ ꠝꠦꠢꠦꠞꠛꠣꠘ। ꠔꠦ ꠀꠝꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠀꠈꠦꠞ ꠙꠣꠅꠀꠞ ꠟꠣꠉꠤ ꠀꠝꠤ ꠇꠤꠔꠣ ꠇꠞꠔꠣꠝ?”
18 ꠔꠣꠁꠘ ꠇꠁꠟꠣ, “ꠀꠝꠣꠞꠦ ꠇꠦꠘꠦ ꠝꠦꠢꠦꠞꠛꠣꠘ ꠇꠁꠞꠣꠄ? ꠄꠇ ꠀꠟ꠆ꠟꠣ ꠍꠣꠠꠣ ꠀꠞ ꠇꠦꠃ ꠝꠦꠢꠦꠞꠛꠣꠘ ꠘꠣꠄ।
19 ꠔꠥꠝꠤ ꠔ ꠔꠃꠞꠣꠔ ꠇꠤꠔꠣꠛꠞ ꠢꠥꠇꠥꠝ ꠎꠣꠘ। ꠈꠥꠘ ꠇꠞꠤꠅ ꠘꠣ, ꠎꠤꠘꠣ ꠇꠞꠤꠅ ꠘꠣ, ꠌꠥꠞꠤ ꠇꠞꠤꠅ ꠘꠣ, ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ, ꠐꠉꠣ-ꠐꠉꠤ ꠇꠞꠤꠅ ꠘꠣ, ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।”
20 ꠛꠦꠐꠣꠄ ꠇꠁꠟ, “ꠍꠣꠛ, ꠀꠝꠤ ꠔ ꠢꠥꠞꠥꠝꠣꠘ ꠕꠘꠦꠃ ꠁꠔꠣ ꠀꠝꠟ ꠇꠞꠤꠀꠞ।”
21 ꠔꠦꠃ ꠁꠍꠣꠄ ꠝꠣꠄꠀꠞ ꠘꠎꠞꠦ ꠔꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠈꠣꠟꠤ ꠄꠇꠈꠣꠘ ꠎꠤꠘꠤꠡ ꠔꠥꠝꠣꠞ ꠛꠣꠇꠤ ꠞꠁꠍꠦ। ꠔꠥꠝꠤ ꠎꠣꠅ, ꠉꠤꠀ ꠔꠥꠝꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠛꠤꠟꠣꠁ ꠖꠦꠅ। ꠔꠦꠃ ꠔꠥꠝꠤ ꠛꠦꠢꠦꠡ꠆ꠔꠅ ꠔꠥꠝꠣꠞ ꠍꠣꠝꠣꠘꠣ ꠇꠣꠝꠣꠁꠛꠣꠄ। ꠛꠣꠖꠦ ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠁꠅ।”
22 ꠁꠈꠣꠘ ꠢꠥꠘꠤꠀ ꠛꠦꠐꠣꠞ ꠝꠥꠈ ꠇꠣꠟꠣ ꠅꠁꠉꠦꠟ। ꠔꠣꠞ ꠛꠃꠔ ꠗꠘ-ꠍꠣꠝꠣꠘꠣ ꠀꠍꠤꠟ ꠇꠞꠤ ꠝꠘꠅ ꠖꠥꠈ ꠟꠁꠀ ꠉꠦꠟꠉꠤ।
23 ꠔꠦꠃ ꠁꠍꠣꠄ ꠌꠣꠁꠞꠅꠛꠣꠄ ꠌꠣꠁꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠛꠠ ꠝꠡꠇꠤꠟ।”
24 ꠁꠈꠣꠘ ꠢꠥꠘꠤꠀ ꠄꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠁꠍꠣꠄ ꠢꠤꠞꠛꠣꠞ ꠇꠁꠟꠣ, “ꠛꠣꠛꠣ ꠅꠇꠟ, ꠖꠦꠈꠞꠣꠄ ꠘꠤ, ꠖꠥꠘꠤꠀꠛꠤ ꠗꠘ-ꠍꠣꠝꠣꠘꠣꠞ ꠃꠙꠞꠦ ꠎꠦꠞꠣ ꠜꠞꠡꠣ ꠇꠞꠦ, ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠔꠣꠞꠣꠞ ꠟꠣꠉꠤ ꠛꠃꠔ ꠝꠡꠇꠤꠟ।
25 ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤꠞ ꠌꠣꠁꠔꠦ, ꠍꠥꠁꠞ ꠚꠥꠠꠦꠖꠤ ꠃꠐ ꠢꠣꠝꠣꠘꠤ ꠀꠞꠅ ꠡꠥꠎꠣ।”
26 ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟ ꠀꠞꠅ ꠔꠣꠁꠎ꠆ꠎꠥꠛ ꠅꠁꠀ ꠄꠇꠦ-ꠅꠁꠘ꠆ꠘꠦ ꠇꠁꠟꠣ, “ꠔꠦ ꠇꠥꠘ ꠝꠣꠘꠡꠦ ꠘꠣꠎꠣꠔ ꠢꠣꠍꠤꠟ ꠇꠞꠛ, ꠇꠦ ꠞꠦꠢꠣꠁ ꠙꠣꠁꠛ?”
27 ꠁꠍꠣꠄ ꠄꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, “ꠝꠣꠘꠡꠞ ꠟꠣꠉꠤ ꠅꠡꠝ꠆ꠛꠛ ꠅꠁꠔ ꠙꠣꠞꠦ, ꠅꠁꠟꠦ ꠀꠟ꠆ꠟꠣꠞ ꠘꠎꠞꠅ ꠁꠔꠣ ꠔ ꠝꠣꠝꠥꠟꠤ। ꠔꠣꠁꠘ ꠢꠇꠟꠔꠣꠃ ꠙꠣꠞꠂꠘ।”
28 ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠢꠇꠟꠔꠣ ꠚꠣꠟꠣꠁ ꠕꠁꠀ ꠀꠙꠘꠣꠞ ꠈꠞꠦ ꠀꠁꠍꠤ।”
29 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ, ꠎꠦ ꠝꠣꠘꠡꠦ ꠀꠝꠣꠞ ꠟꠣꠉꠤ ꠀꠞ ꠀꠟ꠆ꠟꠣꠞ ꠛꠣꠔꠣꠁꠟ ꠈꠥꠡ-ꠈꠛꠞꠤꠞ ꠟꠣꠉꠤ ꠘꠤꠎꠞ ꠛꠣꠠꠤ-ꠊꠞ, ꠝꠣ-ꠛꠣꠚ, ꠜꠣꠁ-ꠛꠁꠘ, ꠙꠥꠀ-ꠙꠥꠠꠤ, ꠎꠝꠤ-ꠝꠤꠞꠣꠡ ꠍꠣꠠꠤ ꠖꠤꠍꠦ,
30 ꠢꠦ ꠅꠃ ꠖꠥꠘꠤꠀꠔ ꠁꠔꠣꠞ ꠄꠇ-ꠡ ꠉꠥꠘ ꠛꠦꠡꠤ ꠛꠣꠠꠤ-ꠊꠞ, ꠝꠣ-ꠛꠣꠚ, ꠜꠣꠁ-ꠛꠁꠘ, ꠙꠥꠀ-ꠙꠥꠠꠤ, ꠎꠝꠤ-ꠝꠤꠞꠣꠡ ꠙꠣꠁꠛ। ꠁꠔꠣꠞ ꠟꠉꠦ ꠢꠦ ꠎꠥꠟꠥꠝ-ꠔꠇꠟꠤꠚꠅ ꠙꠣꠁꠛ। ꠛꠣꠖꠞ ꠎꠤꠘ꠆ꠖꠦꠉꠤꠔ ꠢꠦ ꠀꠈꠦꠞꠅ ꠙꠣꠁꠛ।
31 ꠅꠁꠟꠦ ꠎꠦꠞꠣ ꠙꠄꠟꠣ ꠇꠣꠔꠣꠞꠅ ꠀꠍꠂꠘ, ꠄꠞꠣꠞ ꠝꠣꠎꠦ ꠛꠃꠔ ꠎꠘ ꠈꠞꠦ ꠙꠠꠤꠎꠤꠛꠣ, ꠀꠞ ꠎꠦꠞꠣ ꠈꠞꠞ ꠇꠣꠔꠣꠞꠅ ꠀꠍꠂꠘ, ꠔꠣꠞꠣꠞ ꠛꠃꠔ ꠎꠘ ꠙꠄꠟꠣ ꠇꠣꠔꠣꠞꠅ ꠀꠁꠛꠣ।”
ꠔꠤꠍꠞꠣ ꠛꠣꠞ ꠘꠤꠎꠞ ꠝꠃꠔꠞ ꠀꠉꠣꠝ ꠈꠛꠞ
32 ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠎꠦꠞꠥꠎꠣꠟꠦꠝꠅ ꠎꠣꠁꠞꠣ। ꠔꠣꠁꠘ ꠀꠉꠦ ꠅꠁꠀ ꠀꠐꠤꠞꠣ, ꠀꠞ ꠍꠣꠢꠣꠛꠤ ꠅꠇꠟ ꠒꠞꠣꠁ ꠒꠞꠣꠁ ꠈꠞꠦ ꠈꠞꠦ ꠎꠣꠁꠞꠣ। ꠀꠞꠅ ꠎꠦꠞꠣ ꠔꠣꠘ ꠈꠞꠦ ꠅꠁꠀ ꠎꠣꠁꠞꠣ ꠔꠣꠞꠣꠞ ꠎꠣꠘꠅ-ꠅ ꠒꠞ ꠀꠍꠤꠟ। ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠀꠟꠉꠣ ꠢꠞꠣꠁꠀ ꠘꠤꠀ ꠢꠤꠞꠛꠣꠞ ꠇꠁꠟꠣ, ꠔꠣꠘ ꠇꠥꠘ ꠖꠡꠣ ꠊꠐꠤꠛ।
33 ꠔꠣꠁꠘ ꠇꠁꠟꠣ, “ꠢꠥꠘꠅ, ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝ ꠎꠣꠁꠞꠣꠝ। ꠢꠘꠅ ꠀꠝꠤ ꠛꠤꠘ-ꠀꠖꠝꠞꠦ ꠗꠞꠤꠀ ꠛꠠ ꠁꠝꠣꠝ ꠀꠞ ꠝꠃꠟꠣꠘꠣ ꠅꠇꠟꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ। ꠔꠣꠞꠣ ꠛꠤꠌꠣꠞ ꠇꠞꠤꠀ ꠀꠝꠣꠞꠦ ꠎꠣꠘꠦ ꠝꠣꠞꠣꠞ ꠞꠣꠄ ꠖꠤꠛꠣ। ꠀꠝꠣꠞꠦ ꠛꠤꠗꠞ꠆ꠝꠤ ꠎꠣꠔꠤꠞ ꠀꠔꠅ ꠡꠝꠎꠣꠁ ꠖꠤꠛꠣ।
34 ꠅꠃ ꠛꠤꠗꠞ꠆ꠝꠤ ꠅꠇꠟꠦ ꠑꠣꠐ꠆ꠐꠣ-ꠝꠡꠇꠞꠣ ꠇꠞꠤꠀ, ꠡꠞꠤꠟꠅ ꠍꠦꠚ ꠍꠤꠐꠣꠁꠀ, ꠛꠦꠎꠥꠁꠔꠣ ꠌꠣꠛꠥꠇ ꠝꠣꠞꠛꠣ, ꠀꠞ ꠎꠣꠘꠦ ꠝꠣꠞꠤꠟꠤꠛꠣ। ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
ꠝꠘꠔ꠆ꠞꠤ ꠅꠀꠞ ꠟꠣꠉꠤ ꠅꠘꠥꠞꠥꠗ
35 ꠛꠣꠖꠦ ꠎꠤꠛꠥꠖꠤꠀꠞ ꠖꠥꠁ ꠙꠥꠔ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘ ꠘꠣꠝꠞ ꠖꠥꠁꠅ ꠍꠣꠢꠣꠛꠤ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠄꠇꠈꠣꠘ ꠀꠞꠎꠤ ꠟꠁꠀ ꠀꠁꠍꠤ, ꠝꠘꠅ ꠇꠞꠞꠣꠝ, ꠀꠙꠘꠦ ꠀꠝꠞꠣꠞ ꠀꠞꠎꠤꠈꠣꠘ ꠞꠣꠈꠛꠣ।”
36 ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠔꠣꠝ, ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ?”
37 ꠄꠞꠣ ꠇꠁꠟꠣ, “ꠀꠙꠘꠦ ꠎꠦꠛꠟꠣ ꠙꠥꠞꠣꠙꠥꠞ ꠖꠣꠙꠐꠞ ꠟꠉꠦ ꠞꠣꠎ-ꠉꠖꠤꠔ ꠛꠁꠛꠣ, ꠅꠃ ꠡꠝꠄ ꠀꠝꠞꠣ ꠄꠇꠎꠘꠞꠦ ꠀꠙꠘꠣꠞ ꠒꠣꠁꠘꠞ ꠉꠖꠤ, ꠅꠁꠘ꠆ꠘ ꠎꠘꠞꠦ ꠛꠣꠃꠅꠞ ꠉꠖꠤꠈꠣꠘ ꠖꠤꠛꠣ।”
38 ꠁꠍꠣꠄ ꠇꠁꠟꠣ, “ꠔꠥꠝꠞꠣ ꠔ ꠛꠥꠎꠞꠣꠄ ꠘꠣ ꠔꠥꠝꠞꠣ ꠇꠤꠔꠣ ꠌꠣꠁꠞꠣꠄ। ꠀꠝꠤ ꠎꠦ ꠔꠇꠟꠤꠚꠞ ꠙꠤꠀꠟꠣꠖꠤ ꠈꠣꠁꠝꠥ, ꠁꠔꠣ ꠇꠥꠘꠥ ꠔꠥꠝꠞꠣ ꠈꠣꠁꠔꠣꠄ ꠙꠣꠞꠛꠣꠄ ꠘꠤ? ꠀꠝꠤ ꠎꠦ ꠔꠇꠟꠤꠚꠞ ꠉꠥꠍꠟ ꠇꠞꠝꠥ, ꠔꠥꠝꠞꠣ ꠁꠔꠣ ꠙꠣꠞꠛꠣꠄ ꠘꠤ?”
39 ꠔꠣꠞꠣ ꠇꠁꠟꠣ, “ꠎꠤꠅꠄ ꠙꠣꠞꠝꠥ।” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠦ ꠙꠤꠀꠟꠣꠖꠤ ꠈꠣꠁꠝꠥ, ꠔꠥꠝꠞꠣꠅ ꠅꠉꠥꠖꠤ ꠈꠣꠁꠛꠣꠄ। ꠀꠝꠤ ꠎꠦ ꠉꠥꠍꠟ ꠇꠞꠝꠥ, ꠔꠥꠝꠞꠣꠅ ꠅꠃꠟꠣ ꠇꠞꠛꠣꠄ।
40 ꠅꠁꠟꠦ ꠀꠝꠣꠞ ꠒꠣꠁꠘ ꠛꠣ ꠛꠣꠃ ꠉꠣꠟꠣꠔ ꠛꠅꠀꠘꠤꠞ ꠄꠈꠔꠤꠀꠞ ꠀꠝꠣꠞ ꠀꠔꠅ ꠘꠣꠄ। ꠁ ꠉꠖꠤ ꠅꠇꠟ ꠎꠦꠞꠣꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠍꠦ, ꠈꠣꠟꠤ ꠔꠣꠞꠣꠃ ꠙꠣꠁꠛꠣ।”
41 ꠛꠣꠇꠤ ꠖꠡꠎꠘ ꠍꠣꠢꠣꠛꠤꠄ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞ ꠁ ꠀꠞꠎꠤ ꠢꠥꠘꠤꠀ ꠈꠥꠛ ꠛꠤꠞꠇ꠆ꠔ ꠅꠁꠟꠣ।
42 ꠔꠦꠃ ꠁꠍꠣꠄ ꠄꠞꠣ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠤꠀ ꠇꠁꠟꠣ, “ꠔꠥꠝꠞꠣ ꠔ ꠎꠣꠘ, ꠛꠤꠗꠞ꠆ꠝꠤ ꠎꠣꠔꠤꠞ ꠞꠣꠎꠣ ꠅꠇꠟ ꠔꠣꠞꠣꠞ ꠙ꠆ꠞꠎꠣꠞ ꠝꠥꠘꠤꠛ ꠅꠄ। ꠔꠣꠞꠣꠞ ꠎꠝꠤꠖꠣꠞ ꠅꠇꠟꠦ ꠘꠤꠎꠞ ꠉꠥꠟꠣꠝꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠦ।
43 ꠅꠁꠟꠦ ꠔꠥꠝꠞꠣꠞ ꠝꠣꠎꠦ ꠁꠟꠣ ꠅꠀ ꠑꠤꠇ ꠘꠣꠄ। ꠔꠥꠝꠞꠣꠞ ꠇꠦꠃ ꠖꠣꠝꠤ ꠛꠘꠔꠦ ꠌꠣꠁꠟꠦ, ꠢꠦ ꠔꠥꠝꠞꠣꠞ ꠈꠦꠎꠝꠔ ꠇꠞꠃꠇ।
44 ꠀꠞ ꠇꠦꠃ ꠛꠠ ꠅꠁꠔꠦ ꠌꠣꠁꠟꠦ, ꠢꠦ ꠢꠇꠟꠞ ꠉꠥꠟꠣꠝꠤ ꠇꠞꠃꠇ।
45 ꠝꠘꠅ ꠞꠣꠈꠤꠅ, ꠀꠝꠤ ꠛꠤꠘ-ꠀꠖꠝꠦꠅ ꠈꠦꠎꠝꠔ ꠙꠣꠅꠀꠔ ꠀꠁꠍꠤ ꠘꠣ, ꠀꠁꠍꠤ ꠔ ꠈꠦꠎꠝꠔ ꠇꠞꠣꠔ। ꠀꠞ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠅꠀꠔ ꠀꠁꠍꠤ।”
ꠀꠘ꠆ꠖꠣ ꠛꠦꠐꠣꠞꠦ ꠡꠤꠚꠣ ꠇꠞꠣ
46 ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟ ꠟꠁꠀ ꠎꠤꠞꠤꠢꠅ ꠐꠣꠃꠘꠅ ꠀꠁꠟꠣ। ꠛꠣꠖꠦ ꠄꠞꠣꠞꠦ ꠀꠞ ꠀꠞꠅ ꠛꠃꠔ ꠝꠣꠘꠡꠞꠦ ꠟꠁꠀ ꠐꠣꠃꠘ ꠕꠣꠇꠤ ꠛꠣꠞꠘꠤꠞ ꠛꠣꠟꠣ, ꠔꠤꠝꠄꠅꠞ ꠙꠥꠀ ꠛꠞꠔꠤꠝꠄ ꠘꠣꠝꠞ ꠄꠇ ꠀꠘ꠆ꠖꠣ ꠛꠦꠐꠣꠄ ꠙꠕꠞ ꠗꠣꠞꠅ ꠛꠁꠀ ꠜꠤꠇ ꠇꠞꠣꠔ ꠀꠍꠤꠟ।
47 ꠄꠁꠘꠃ ꠘꠣꠍꠣꠞꠔ ꠉꠣꠃꠞ ꠁꠍꠣ, ꠁꠈꠣꠘ ꠢꠥꠘꠤꠀ ꠛꠦꠐꠣꠄ ꠎꠥꠞꠦ ꠌꠤꠟ꠆ꠟꠣꠁ ꠌꠤꠟ꠆ꠟꠣꠁ ꠇꠁꠟ, “ꠅ ꠁꠍꠣ, ꠢꠎꠞꠔ ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠂꠘ।”
48 ꠌꠤꠟ꠆ꠟꠣꠘꠤ ꠢꠥꠘꠤꠀ ꠛꠃꠔꠦ ꠇꠁꠟꠣ, “ꠌꠥꠙ, ꠌꠤꠟ꠆ꠟꠣꠁꠍ ꠘꠣ।” ꠅꠁꠟꠦ ꠢꠦ ꠀꠞꠅ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠂꠘ।”
49 ꠔꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠁꠍꠣꠄ ꠖꠝ ꠟꠁꠀ ꠇꠁꠟꠣ, “ꠄꠞꠦ ꠅꠘꠅ ꠀꠘꠅ।” ꠝꠣꠘꠡꠦ ꠅꠃ ꠀꠘ꠆ꠖꠣ ꠛꠦꠐꠣꠞꠦ ꠇꠁꠟꠣ, “ꠒꠞꠣꠁꠅ ꠘꠣ, ꠀꠅ। ꠢꠥꠎꠥꠞꠦ ꠔꠥꠝꠣꠞꠦ ꠒꠣꠇꠤꠞꠣ।”
50 ꠔꠦꠃ ꠛꠦꠐꠣꠄ ꠔꠣꠞ ꠡꠞꠤꠟꠞ ꠌꠣꠖ꠆ꠖꠞ ꠈꠥꠟꠤꠀ, ꠚꠣꠟꠖꠤ ꠃꠑꠤꠀ ꠔꠣꠘ ꠇꠣꠘ꠆ꠖꠣꠔ ꠉꠦꠟ।
51 ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠌꠣꠅ ꠛꠣ? ꠀꠝꠤ ꠔꠥꠝꠣꠞꠦ ꠇꠤꠔꠣ ꠇꠞꠔꠣꠝ?” ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠤ ꠌꠃꠈꠦ ꠖꠦꠈꠔꠣꠝ ꠌꠣꠁ।”
52 ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ ꠎꠣꠅ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।” ꠇꠁꠔꠦꠃ ꠔꠣꠞ ꠖꠦꠈꠣꠞ ꠡꠇ꠆ꠔꠤ ꠀꠁꠟ ꠀꠞ ꠁꠍꠣꠞ ꠈꠞꠦ ꠈꠞꠦ ꠞꠅꠀꠘꠣ ꠅꠁꠟ।