ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠙꠄꠟꠣ ꠍꠤꠙꠣꠞꠣ
ꠝꠕꠤ
ꠍꠤꠟꠐꠤ ꠜꠣꠡꠣꠄ ꠔꠞꠎꠝꠣ
ꠙꠞꠤꠌꠤꠔꠤ
ꠝꠕꠤ ꠘꠣꠝꠞ ꠍꠤꠙꠣꠞꠣꠞ ꠝꠥꠟ ꠔꠣꠟꠤꠝ ꠅꠁꠟ, ꠢꠎꠞꠔ ꠁꠍꠣ ꠀꠟ-ꠝꠍꠤ ꠄꠇꠎꠘ ꠛꠣꠖꠡꠣ। ꠀꠟ꠆ꠟꠣ ꠙꠣꠇꠞ ꠛꠅꠀꠁꠟ ꠇꠞꠣ ꠛꠣꠖꠡꠣ। ꠔꠣꠁꠘ ꠁ ꠖꠥꠘꠤꠀꠔ ꠔꠡꠞꠤꠚ ꠀꠘꠤꠀ ꠝꠣꠘꠡꠞꠦ ꠖꠣꠅꠔ ꠖꠤꠟꠣ, ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠞ ꠟꠣꠉꠤ। ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠛꠣ, ꠄꠞꠣ ꠅꠁꠛꠣ ꠀꠟ꠆ꠟꠣꠞ ꠘꠄꠀ ꠎꠣꠔꠤ। ꠄꠞꠣꠞ ꠘꠣꠝ ꠅꠁꠛ, ꠀꠟ꠆ꠟꠣꠞ ꠙ꠆ꠞꠎꠣ ꠛꠣ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠎꠘ, ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠅꠃ ꠛꠣꠖꠡꠣꠁꠞ ꠝꠣꠟꠤꠇ। ꠀꠟ꠆ꠟꠣ ꠙꠣꠇꠦ ꠔꠣꠘꠞꠦ ꠛꠅꠀꠁꠟ ꠇꠞꠟꠣ, ꠎꠣꠔꠦ ꠞꠥꠎ ꠢꠣꠡꠞꠞ ꠖꠤꠘ ꠔꠣꠁꠘ ꠖꠥꠘꠤꠀꠞ ꠢꠇ꠆ꠇꠟ ꠝꠣꠘꠡꠞ ꠛꠤꠌꠣꠞ ꠇꠞꠂꠘ।
ꠅꠃ ꠝꠕꠤ ꠍꠤꠙꠣꠞꠣ ꠔꠤꠟꠣꠅꠔ ꠇꠞꠟꠦ, ꠀꠝꠞꠣ ꠢꠎꠞꠔ ꠁꠍꠣꠞ ꠔꠣꠟꠤꠝꠞ ꠝꠥꠟ꠆ꠟꠛꠣꠘ ꠢꠇꠟ ꠛꠄꠀꠘꠤꠞ ꠛꠤꠡ꠆ꠔꠣꠞꠤꠔ ꠖꠦꠈꠝꠥ। ꠀꠝꠞꠣ ꠖꠦꠈꠝꠥ, ꠢꠎꠞꠔ ꠁꠍꠣꠞ ꠎꠘꠝ ꠇꠤꠟꠣ ꠅꠁꠍꠤꠟ, ꠔꠣꠘ ꠖꠥꠘꠤꠀꠛꠤ ꠛꠣꠛꠣ ꠝꠣꠘꠤ ꠛꠤꠛꠤ ꠝꠞꠤꠅꠝ (ꠀ꠩) ꠅꠞ ꠎꠣꠝꠣꠁ ꠢꠎꠞꠔ ꠁꠃꠍꠥꠚꠞ ꠎꠛꠣꠘꠛꠘ꠆ꠖꠤ ꠙꠣꠁꠝꠥ। ꠅꠃ ꠍꠤꠙꠣꠞꠣꠔ ꠀꠝꠞꠣ ꠙꠣꠁꠝꠥ, ꠢꠎꠞꠔ ꠁꠍꠣꠄ ꠇꠤꠟꠣ ꠇꠣꠝ-ꠇꠣꠎ ꠇꠞꠍꠂꠘ, ꠇꠦꠝꠘꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠂꠘ, ꠔꠣꠁꠘ ꠇꠥꠀꠁ ꠕꠣꠇꠤ ꠛꠟ-ꠡꠇ꠆ꠔꠤ ꠙꠣꠁꠔꠣ। ꠀꠝꠞꠣ ꠀꠞꠅ ꠖꠦꠈꠝꠥ, ꠛꠃꠔ ꠎꠝꠣꠘꠣ ꠀꠉꠦ ꠀꠟ꠆ꠟꠣ ꠙꠣꠇꠦ ꠢꠎꠞꠔ ꠝꠥꠍꠣ (ꠀ꠩) ꠀꠞ ꠢꠎꠞꠔ ꠖꠣꠃꠖ (ꠀ꠩) ꠅꠞ ꠙꠛꠤꠔ꠆ꠞ ꠔꠃꠞꠣꠔ ꠀꠞ ꠎꠛꠥꠞ ꠡꠞꠤꠚꠞ ꠝꠣꠎꠦ, ꠄꠞꠟꠉꠦ ꠛꠣꠖ-ꠛꠣꠇꠤ ꠀꠞꠅ ꠘꠛꠤ-ꠞꠍꠥꠟ ꠅꠇꠟꠞ ꠉꠦꠍꠦ ꠎꠦꠔꠣ ꠎꠦꠔꠣ ꠛꠣꠔꠣꠁꠍꠂꠘ, ꠢꠎꠞꠔ ꠁꠍꠣꠞ ꠎꠝꠣꠘꠣꠔ ꠀꠁꠀ ꠔꠣꠘ ꠀꠔꠅ ꠅꠔꠣ ꠢꠇꠟꠔꠣ ꠚꠟꠤꠍꠦ।
ꠝꠕꠤ ꠍꠤꠙꠣꠞꠣꠞ ৫ ꠞꠥꠇꠥ ১৭, ২০ ꠀꠄꠀꠔꠅ ꠀꠍꠦ, ꠢꠎꠞꠔ ꠁꠍꠣꠄ ꠇꠁꠞꠣ, “ꠔꠥꠝꠞꠣ ꠁꠈꠣꠘ ꠝꠘꠅ ꠇꠞꠤꠅ ꠘꠣ, ꠀꠝꠤ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠍꠢꠤꠚꠣ ꠛꠣꠔꠤꠟ ꠇꠞꠣꠔ ꠀꠁꠍꠤ। ꠀꠝꠤ ꠔ ꠁꠔꠣ ꠛꠣꠔꠤꠟ ꠇꠞꠣꠔ ꠘꠣꠄ, ꠛꠞꠋ ꠙꠥꠞꠣ ꠇꠞꠣꠔ ꠀꠁꠍꠤ। ꠢꠥꠘꠅ, ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠀꠟꠤꠝ-ꠃꠟꠣꠝꠣꠞ ꠀꠝꠟ ꠕꠣꠇꠤꠅ ꠔꠥꠝꠞꠣꠞ ꠀꠝꠟ ꠎꠥꠖꠤ ꠀꠞꠅ ꠜꠣꠟꠣ ꠘꠣ ꠅꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠔꠣꠄ ꠙꠣꠞꠔꠣꠄ ꠘꠣꠄ।”
ꠀꠞ ১১ ꠞꠥꠇꠥ ২৮-৩০ ꠀꠄꠀꠔꠅ ꠀꠍꠦ, ꠢꠎꠞꠔ ꠁꠍꠣꠄ ꠇꠁꠞꠣ, “ꠜꠣꠞ-ꠛꠥꠏꠣ ꠛꠁꠔꠦ ꠛꠁꠔꠦ ꠔꠥꠝꠞꠣ ꠎꠦꠞꠣ ꠢꠦꠞꠣꠘ ꠅꠁꠉꠦꠍ, ꠔꠥꠝꠞꠣ ꠢꠇꠟ ꠀꠝꠣꠞ ꠉꠦꠍꠦ ꠀꠅ, ꠀꠝꠤ ꠔꠥꠝꠞꠣꠞꠦ ꠀꠞꠣꠝ ꠖꠤꠝꠥ। ꠀꠝꠣꠞ ꠎꠥꠀꠟ ꠔꠥꠝꠞꠣꠞ ꠇꠣꠘ꠆ꠖꠅ ꠔꠥꠟꠅ ꠀꠞ ꠀꠝꠣꠞ ꠉꠦꠍ ꠕꠣꠇꠤ ꠔꠣꠟꠤꠝ ꠟꠅ, ꠔꠦꠃ ꠔꠥꠝꠞꠣꠞ ꠀꠞꠣꠝ ꠅꠁꠛ। ꠀꠝꠣꠞ ꠎꠥꠀꠟ ꠛꠁꠀ ꠘꠦꠅꠀ ꠡꠥꠎꠣ, ꠀꠝꠣꠞ ꠖꠦꠅꠀ ꠜꠣꠞ ꠈꠥꠛ ꠙꠣꠔꠟꠣ। ꠀꠝꠣꠞ ꠝꠤꠎꠣꠎ ꠈꠥꠛ ꠘꠞꠝ ꠀꠞ ꠑꠣꠘ꠆ꠒꠣ।”
ꠟꠦꠈꠇ ꠙꠞꠤꠌꠤꠔꠤ ꠀꠞ ꠡꠝꠄ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝ ꠝꠣꠚꠤꠇ ꠅꠃ ꠍꠤꠙꠣꠞꠣ ꠟꠦꠈꠍꠂꠘ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠝꠕꠤ (ꠞꠣ꠩)। ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠣꠞ ꠀꠉꠦ ꠔꠣꠘ ꠙꠦꠡꠣ ꠀꠍꠤꠟ ꠈꠣꠎꠘꠣ ꠀꠖꠣꠄ ꠇꠞꠣ। ꠔꠣꠁꠘ ꠝꠣꠘꠡꠞ ꠉꠦꠍ ꠕꠣꠇꠤ ꠈꠣꠎꠘꠣ ꠔꠥꠟꠤꠀ ꠞꠥꠝꠣꠘ ꠡꠞꠇꠣꠞꠞ ꠀꠔꠅ ꠡꠝꠎꠣꠁ ꠖꠤꠔꠣ। ꠢꠎꠞꠔ ꠁꠍꠣꠄ ꠔꠣꠘꠞꠦ ꠁꠝꠣꠘꠞ ꠖꠣꠅꠔ ꠖꠤꠟꠦ ꠔꠣꠁꠘ ꠁꠝꠣꠘ ꠀꠘꠤꠀ ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠅꠁꠟꠣ। ꠀꠞ ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ২৫-৩৫ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠇꠤꠔꠣꠛ ꠀꠇꠣꠞꠦ ꠔꠣꠁꠘ ꠟꠦꠈꠍꠂꠘ।
ꠄꠞꠝꠣꠎꠦ ꠀꠍꠦ,
(ꠇ) ꠢꠎꠞꠔ ꠁꠍꠣꠞ ꠙꠞꠤꠌꠄ ꠀꠞ ꠙꠄꠟꠣ ꠎꠤꠘ꠆ꠖꠦꠉꠤ ১—২ ꠞꠥꠇꠥ
(ꠈ) ꠢꠎꠞꠔ ꠁꠍꠣꠄ ꠇꠣꠝ ꠡꠥꠞꠥ ꠇꠞꠟꠣ ৩—৪ ꠞꠥꠇꠥ
(ꠉ) ꠙꠣꠠꠞ ꠙꠦꠐꠅ ꠢꠎꠞꠔ ꠁꠍꠣꠞ ꠔꠣꠟꠤꠝ ৫—৭ ꠞꠥꠇꠥ
(ꠊ) ꠢꠎꠞꠔ ꠁꠍꠣꠞ ꠖꠡ ꠇꠦꠞꠣꠝꠔꠤ ৮—৯ ꠞꠥꠇꠥ
(ꠌ) ꠛꠣꠞꠅꠎꠘ ꠍꠣꠢꠣꠛꠤꠞꠦ ꠙꠍꠘ꠆ꠖ ꠀꠞ ꠔꠣꠟꠤꠝ ১০ ꠞꠥꠇꠥ
(ꠍ) ꠢꠎꠞꠔ ꠁꠍꠣꠞꠦ ꠡꠘ꠆ꠖꠄ ꠀꠞ ꠛꠤꠞꠥꠗꠤꠔꠣ ꠇꠞꠣ ১১—১২ ꠞꠥꠇꠥ
(ꠎ) ꠢꠎꠞꠔ ꠁꠍꠣꠞ ꠛꠣꠔꠣꠁꠟ ꠡꠣꠔ ꠇꠤꠌ꠆ꠍꠣ ১৩:১-৫২ ꠀꠄꠀꠔ
(ꠏ) ꠢꠎꠞꠔ ꠁꠍꠣꠄ ꠇꠦꠘꠦ ꠔꠡꠞꠤꠚ ꠀꠘꠍꠂꠘ ১৩:৫৩—১৭:২৭
(ꠐ) ꠃꠝ꠆ꠝꠔꠞ ꠟꠣꠉꠤ ꠢꠎꠞꠔ ꠁꠍꠣꠞ ꠎꠞꠥꠞꠤ ꠔꠣꠟꠤꠝ ১৮ ꠞꠥꠇꠥ
(ꠑ) ꠡꠝꠣꠎꠞ ꠝꠣꠘꠡꠞ ꠟꠣꠉꠤ ꠢꠎꠞꠔ ꠁꠍꠣꠞ ꠔꠣꠟꠤꠝ ১৯—২২ ꠞꠥꠇꠥ
(ꠒ) ꠘꠦꠔꠣ ꠅꠇꠟꠞꠦ ꠢꠎꠞꠔ ꠁꠍꠣꠞ ꠢꠥꠡꠤꠀꠞꠤ ২৩—২৫ ꠞꠥꠇꠥ
(ꠓ) ꠢꠎꠞꠔ ꠁꠍꠣꠞ ꠃꠚꠣꠔ ꠀꠞ ꠎꠤꠘ꠆ꠖꠣ ꠅꠀ ২৬—২৮ ꠞꠥꠇꠥ
ꠢꠎꠞꠔ ꠁꠍꠣꠞ ꠙꠞꠤꠌꠄ ꠀꠞ ꠙꠄꠟꠣ ꠎꠤꠘ꠆ꠖꠦꠉꠤ (১:১-২:২৩)
1
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠈꠣꠘ꠆ꠖꠣꠘ
1 ꠢꠎꠞꠔ ꠁꠍꠣ ꠀꠟ-ꠝꠍꠤ ꠅꠁꠟꠣ ꠖꠣꠃꠖ ꠘꠛꠤꠞ ꠛꠋꠡꠗꠞ, ꠀꠞ ꠖꠣꠃꠖ ꠅꠁꠟꠣ ꠢꠎꠞꠔ ꠁꠛ꠆ꠞꠣꠢꠤꠝꠞ ꠛꠋꠡꠗꠞ। ꠁꠍꠣ ꠀꠟ-ꠝꠍꠤꠞ ꠈꠣꠘ꠆ꠖꠣꠘꠞ ꠙꠞꠤꠌꠄ ꠅꠁꠟ,
2 ꠢꠎꠞꠔ ꠁꠛ꠆ꠞꠣꠢꠤꠝꠞ ꠙꠥꠀ ꠢꠎꠞꠔ ꠁꠍꠢꠣꠇ, ꠁꠍꠢꠣꠇꠞ ꠙꠥꠀ ꠢꠎꠞꠔ ꠁꠀꠇꠥꠛ, ꠁꠀꠇꠥꠛꠞ ꠙꠥꠀ ꠄꠢꠥꠖꠣ ꠀꠞ ꠔꠣꠘ ꠜꠣꠁꠀꠁꠘ,
3 ꠄꠢꠥꠖꠣꠞ ꠙꠥꠀꠂꠘ ꠚꠤꠞꠥꠎ ꠀꠞ ꠎꠣꠞꠣꠢ, ꠄꠞꠣꠞ ꠝꠣʼꠞ ꠘꠣꠝ ꠔꠣꠝꠣꠞ। ꠚꠤꠞꠥꠎꠞ ꠙꠥꠀ ꠢꠣꠍꠤꠞ, ꠢꠣꠍꠤꠞꠞ ꠙꠥꠀ ꠞꠣꠄꠀꠝ,
4 ꠞꠣꠄꠀꠝꠞ ꠙꠥꠀ ꠀꠝꠤꠘꠣꠖꠣꠛ, ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ, ꠘꠣꠢꠤꠡꠞ ꠙꠥꠀ ꠍꠦꠟꠤꠝ,
5 ꠍꠦꠟꠤꠝꠞ ꠙꠥꠀ ꠛꠥꠀꠎ, ꠔꠣꠘ ꠝꠣʼꠞ ꠘꠣꠝ ꠞꠣꠢꠛꠣ। ꠛꠥꠀꠎꠞ ꠙꠥꠀ ꠃꠛꠣꠄꠖ, ꠔꠣꠘ ꠝꠣ ꠅꠁꠟꠣ ꠞꠥꠔ। ꠃꠛꠣꠄꠖꠞ ꠙꠥꠀ ꠁꠀꠍ,
6 ꠁꠀꠍꠞ ꠙꠥꠀ ꠛꠣꠖꠡꠣ ꠖꠣꠃꠖ।
ꠖꠣꠃꠖꠞ ꠙꠥꠀ ꠘꠛꠤ ꠍꠥꠟꠣꠁꠝꠣꠘ, ꠄꠘ ꠝꠣ ꠀꠍꠟꠣ ꠃꠞꠤꠀꠞ ꠠꠣꠠꠤ ꠛꠃ ꠛꠣꠔꠍꠦꠛꠣ।
7 ꠍꠥꠟꠣꠁꠝꠣꠘꠞ ꠙꠥꠀ ꠞꠢꠛꠤꠀꠝ, ꠞꠢꠛꠤꠀꠝꠞ ꠙꠥꠀ ꠀꠛꠤꠀ, ꠀꠛꠤꠀꠞ ꠙꠥꠀ ꠀꠍꠣ,
8 ꠀꠍꠣꠞ ꠙꠥꠀ ꠎꠤꠢꠥꠍꠣꠚꠐ, ꠎꠤꠢꠥꠍꠣꠚꠐꠞ ꠙꠥꠀ ꠃꠞꠣꠝ, ꠃꠞꠣꠝꠞ ꠙꠥꠀ ꠃꠎꠤꠀ,
9 ꠃꠎꠤꠀꠞ ꠙꠥꠀ ꠎꠥꠕꠝ, ꠎꠥꠕꠝꠞ ꠙꠥꠀ ꠀꠢꠣꠎ, ꠀꠢꠣꠎꠞ ꠙꠥꠀ ꠢꠤꠎꠇꠤꠀ,
10 ꠢꠤꠎꠇꠤꠀꠞ ꠙꠥꠀ ꠝꠣꠘꠡꠣ, ꠝꠣꠘꠡꠣꠞ ꠙꠥꠀ ꠀꠝꠘ, ꠀꠝꠘꠞ ꠙꠥꠀ ꠁꠃꠡꠤꠀ,
11 ꠁꠃꠡꠤꠀꠞ ꠙꠥꠀ ꠁꠀꠇꠥꠘꠤꠀ ꠀꠞ ꠔꠣꠞ ꠜꠣꠁꠀꠁꠘ। ꠁꠍꠞꠣꠁꠟ ꠎꠣꠔꠤꠞꠦ ꠛꠣꠛꠤꠟ ꠖꠦꠡꠅ ꠛꠘ꠆ꠖꠤ ꠇꠞꠤ ꠘꠦꠅꠀꠞ ꠛꠣꠟꠣ ꠄꠞꠣꠞ ꠎꠘꠝ ꠅꠁꠍꠤꠟ।
12 ꠁꠍꠞꠣꠁꠟ ꠎꠣꠔꠤꠞꠦ ꠛꠣꠛꠤꠟ ꠖꠦꠡꠅ ꠛꠘ꠆ꠖꠤ ꠇꠞꠤ ꠘꠦꠅꠀꠞ ꠛꠣꠖꠦ ꠁꠀꠇꠥꠘꠤꠀꠞ ꠙꠥꠀ ꠍꠣꠟꠔꠤꠄꠟꠞ ꠎꠘꠝ ꠅꠁꠍꠤꠟ। ꠍꠣꠟꠔꠤꠄꠟꠞ ꠙꠥꠀ ꠎꠦꠞꠛꠣꠛꠤꠟ,
13 ꠎꠦꠞꠛꠣꠛꠤꠟꠞ ꠙꠥꠀ ꠀꠛꠤꠢꠥꠖ, ꠀꠛꠤꠢꠥꠖꠞ ꠙꠥꠀ ꠁꠟꠤꠀꠇꠤꠝ, ꠁꠟꠤꠀꠇꠤꠝꠞ ꠙꠥꠀ ꠀꠎꠞ,
14 ꠀꠎꠞꠞ ꠙꠥꠀ ꠍꠣꠖꠤꠇ, ꠍꠣꠖꠤꠇꠞ ꠙꠥꠀ ꠀꠈꠤꠝ, ꠀꠈꠤꠝꠞ ꠙꠥꠀ ꠄꠟꠤꠢꠥꠖ,
15 ꠄꠟꠤꠢꠥꠖꠞ ꠙꠥꠀ ꠀꠟꠤ-ꠀꠎꠞ, ꠀꠟꠤ-ꠀꠎꠞꠞ ꠙꠥꠀ ꠝꠔꠤꠘ, ꠝꠔꠤꠘꠞ ꠙꠥꠀ ꠁꠀꠇꠥꠛ,
16 ꠁꠀꠇꠥꠛꠞ ꠙꠥꠀ ꠁꠃꠍꠥꠚ, ꠅꠃ ꠁꠃꠍꠥꠚ ꠅꠁꠟꠣ ꠛꠤꠛꠤ ꠝꠞꠤꠅꠝꠞ ꠎꠣꠝꠣꠁ। ꠛꠤꠛꠤ ꠝꠞꠤꠅꠝꠞ ꠙꠦꠐꠅ ꠢꠎꠞꠔ ꠁꠍꠣꠞ ꠎꠘꠝ ꠅꠁꠍꠤꠟ, ꠄꠘꠞꠦ ꠒꠣꠇꠣ ꠅꠄ ꠀꠟ-ꠝꠍꠤ।
17 ꠅꠃ ꠟꠣꠈꠣꠘ ꠢꠎꠞꠔ ꠁꠛ꠆ꠞꠣꠢꠤꠝ ꠕꠣꠇꠤ ꠖꠣꠃꠖ ꠘꠛꠤ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ। ꠖꠣꠃꠖ ꠘꠛꠤ ꠕꠣꠇꠤ ꠛꠣꠛꠤꠟꠅ ꠛꠘ꠆ꠖꠤ ꠇꠞꠤ ꠘꠦꠅꠀ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ। ꠛꠣꠛꠤꠟꠅ ꠛꠘ꠆ꠖꠤ ꠅꠀ ꠕꠣꠇꠤ ꠀꠟ-ꠝꠍꠤ ꠙꠞ꠆ꠎꠘ꠆ꠔ ꠌꠃꠖ꠆ꠖ ꠍꠤꠠꠤ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠎꠘꠝ
18 ꠁꠍꠣ ꠀꠟ-ꠝꠍꠤꠞ ꠎꠘꠝ ꠅꠁꠍꠤꠟ ꠅꠃ ꠟꠣꠈꠣꠘ। ꠁꠃꠍꠥꠚ ꠘꠣꠝꠞ ꠄꠇꠎꠘꠞ ꠟꠉꠦ ꠛꠤꠛꠤ ꠝꠞꠤꠅꠝꠞ ꠡꠣꠖꠤ ꠑꠤꠇ ꠅꠁꠍꠤꠟ, ꠅꠁꠟꠦ ꠔꠣꠞꠣ ꠄꠇꠟꠉꠦ ꠝꠤꠟꠣ-ꠝꠤꠡꠣ ꠇꠞꠣꠞ ꠀꠉꠦꠃ ꠀꠟ꠆ꠟꠣꠞ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦ ꠝꠞꠤꠅꠝꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ।
19 ꠁꠃꠍꠥꠚ ꠀꠍꠟꠣ ꠢꠇ ꠝꠣꠘꠥꠡ, ꠝꠞꠤꠅꠝꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠍꠦ, ꠁ ꠈꠛꠞ ꠢꠥꠘꠤꠀ ꠔꠣꠁꠘ ꠝꠞꠤꠅꠝꠞꠦ ꠝꠣꠘꠡꠞ ꠍꠣꠝꠘꠦ ꠡꠞꠝ ꠖꠤꠔꠣ ꠌꠣꠁꠟꠣ ꠘꠣ, ꠄꠞꠖꠣꠄ ꠝꠘꠦ ꠝꠘꠦ ꠑꠤꠇ ꠇꠞꠟꠣ, ꠟꠥꠇꠣꠁꠀ ꠁ ꠛꠤꠀ ꠜꠣꠋꠉꠤꠟꠤꠔꠣ।
20 ꠔꠣꠁꠘ ꠎꠦꠛꠟꠣ ꠅꠟꠣꠈꠣꠘ ꠌꠤꠘ꠆ꠔꠣ ꠇꠞꠞꠣ, ꠅꠃ ꠡꠝꠄ ꠝꠣꠛꠥꠖꠞ ꠄꠇ ꠚꠤꠞꠤꠡ꠆ꠔꠣꠄ ꠈꠥꠀꠛꠞ ꠝꠣꠎꠦ ꠔꠣꠘꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠅ ꠁꠃꠍꠥꠚ ꠛꠤꠘ ꠖꠣꠃꠖ, ꠔꠥꠝꠤ ꠝꠞꠤꠅꠝꠞꠦ ꠡꠣꠖꠤ ꠇꠞꠔꠦ ꠒꠞꠣꠁꠅ ꠘꠣ। ꠔꠣꠘ ꠙꠦꠐꠅ ꠎꠦ ꠢꠥꠞꠥꠔ꠆ꠔꠣ ꠀꠁꠍꠦ, ꠁꠔꠣ ꠔ ꠙꠣꠇ ꠞꠥꠢꠥꠞ ꠇꠥꠖꠞꠔꠤ ꠛꠟꠦꠃ ꠅꠁꠍꠦ। ꠔꠣꠘ ꠊꠞꠅ ꠄꠇ ꠙꠥꠀꠄ ꠎꠘꠝ ꠟꠁꠛꠣ।
21 ꠔꠥꠝꠤ ꠁ ꠙꠥꠀꠞ ꠘꠣꠝ ꠞꠣꠈꠤꠅ ꠁꠍꠣ। ꠇꠣꠞꠘ ꠁ ꠘꠣꠝꠞ ꠝꠣꠘꠤ ꠔꠞꠣꠘꠦꠀꠟꠣ, ꠄꠁꠘ ꠘꠤꠎꠞ ꠃꠝ꠆ꠝꠔ ꠅꠇꠟꠞꠦ ꠉꠥꠘꠣ ꠕꠣꠇꠤ ꠔꠞꠣꠁꠛꠣ।”
22 ꠀꠉꠞ ꠎꠝꠣꠘꠣꠞ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁꠍꠟꠣ, ꠅꠈꠣꠘ ꠚꠟꠤꠛꠣꠞ ꠟꠣꠉꠤꠃ ꠁꠔꠣ ꠅꠁꠛ।
23 ꠝꠣꠛꠥꠖꠦ ꠛꠣꠔꠣꠁꠍꠟꠣ, “ꠢꠥꠘꠅ, ꠄꠇꠎꠘ ꠀꠛꠤꠀꠔꠤ ꠡꠔꠤ ꠘꠣꠞꠤꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠛ, ꠔꠣꠁꠘ ꠄꠇ ꠙꠥꠀꠞ ꠎꠘꠝ ꠖꠤꠛꠣ, ꠁ ꠙꠥꠀꠞꠦ ꠒꠣꠇꠣ ꠅꠁꠛ ꠁꠝ꠆ꠝꠣꠘꠥꠄꠟ।” ꠁ ꠘꠣꠝꠞ ꠝꠣꠘꠤ ꠅꠁꠟ, ꠀꠟ꠆ꠟꠣ ꠀꠝꠞꠣꠞ ꠟꠉꠦ ꠀꠍꠂꠘ।
24 ꠛꠣꠖꠦ ꠊꠥꠝ ꠕꠣꠇꠤ ꠃꠑꠤꠀ ꠁꠃꠍꠥꠚꠦ ꠚꠤꠞꠤꠡ꠆ꠔꠣꠞ ꠢꠥꠇꠥꠝ ꠝꠣꠚꠤꠇ ꠛꠤꠛꠤ ꠝꠞꠤꠅꠝꠞꠦ ꠡꠣꠖꠤ ꠇꠞꠟꠣ।
25 ꠅꠁꠟꠦ ꠅꠃ ꠙꠥꠀꠞ ꠎꠘꠝꠞ ꠀꠉ ꠙꠞ꠆ꠎꠘ꠆ꠔ ꠔꠣꠁꠘ ꠝꠞꠤꠅꠝꠞ ꠟꠉꠦ ꠇꠥꠘꠥ ꠝꠤꠟꠣ-ꠝꠤꠡꠣ ꠇꠞꠟꠣ ꠘꠣ। ꠡꠝꠄ ꠝꠔ ꠅꠃ ꠙꠥꠀꠞ ꠎꠘꠝ ꠅꠁꠟ, ꠔꠣꠁꠘ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠣ।