ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ১১ ꠘꠝ꠆ꠛꠞ ꠍꠤꠙꠣꠞꠣ
ꠚꠤꠟꠤꠙꠤꠀ
ꠙꠞꠤꠌꠤꠔꠤ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠙꠛꠤꠔ꠆ꠞ ꠀꠍꠝꠣꠘꠤ ꠇꠤꠔꠣꠛꠞ ꠅꠃ ꠍꠤꠙꠣꠞꠣ ꠌꠤꠑꠤꠞ ꠀꠇꠣꠞꠦ ꠟꠦꠈꠍꠂꠘ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠦ (ꠞꠣ꠩)। ꠅꠘꠥꠝꠣꠘ ꠇꠞꠣ ꠅꠄ, ꠢꠎꠞꠔ ꠁꠍꠣ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠛꠣꠖꠦ ৩১-৩৩ ꠛꠍꠞꠞ ꠝꠣꠎꠦ ꠁꠈꠣꠘ ꠟꠦꠈꠣ ꠅꠁꠍꠦ। ꠅꠃ ꠡꠝꠄ ꠢꠎꠞꠔ ꠙꠣꠃꠟꠥꠍ ꠞꠥꠝ ꠐꠣꠃꠘꠅ ꠛꠣꠖꠡꠣ ꠇꠂꠍꠞꠞ ꠞꠣꠎꠛꠣꠠꠤꠞ ꠎꠦꠟ ꠈꠣꠘꠣꠔ ꠛꠘ꠆ꠖꠤ ꠀꠍꠟꠣ।
ꠅꠃ ꠍꠤꠙꠣꠞꠣ ꠟꠦꠈꠣꠞ ꠇꠄ ꠛꠍꠞ ꠀꠉꠦ ꠔꠣꠁꠘ ꠚꠤꠟꠤꠙꠤ ꠐꠣꠃꠘꠅ ꠀꠁꠍꠟꠣ ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ, ꠀꠁꠀ ꠔꠣꠁꠘ ꠎꠝꠣꠔ ꠇꠣꠁꠝ ꠇꠞꠟꠣ, ꠁꠔꠣ ꠅꠁꠟ ꠁꠃꠞꠥꠙ ꠝꠢꠣꠖꠦꠡꠞ ꠢꠇꠟ ꠙꠄꠟꠣ ꠎꠝꠣꠔ (ꠍꠣꠢꠣꠛꠤ ꠘꠣꠝꠣ ১৬ ꠞꠥꠇꠥ ꠖꠦꠈꠃꠇ꠆ꠇꠣ)।
ꠁꠝꠣꠘ ꠀꠘꠣꠞ ꠛꠣꠖꠦ ꠅꠃ ꠚꠤꠟꠤꠙꠤ ꠎꠝꠣꠔꠞ ꠝꠣꠘꠥꠡ ꠈꠥꠛ ꠉꠞꠤꠛ ꠀꠞ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦ ꠞꠁꠟꠦꠅ, ꠔꠣꠞꠣ ꠅꠁꠘ꠆ꠘ ꠝꠥꠝꠤꠘ ꠅꠇꠟꠞꠦ ꠀꠞ ꠢꠎꠞꠔ ꠙꠣꠃꠟꠥꠍꠞꠦ ꠐꠦꠇꠣ-ꠙꠄꠡꠣ ꠖꠤꠀ ꠡꠣꠁꠎ꠆ꠎ ꠇꠞꠣꠄ, ꠔꠣꠁꠘ ꠈꠥꠡꠤ ꠅꠁꠀ ꠄꠞꠣꠞꠦ ꠗꠁꠘ꠆ꠘꠛꠣꠖ ꠎꠣꠘꠣꠁꠍꠂꠘ। ꠔꠣꠞꠣꠞ ꠁꠝꠣꠘꠞ ꠚꠟ ꠖꠦꠈꠤꠀ ꠔꠣꠁꠘ ꠙꠞꠣꠝꠤꠡ ꠖꠤꠞꠣ, ꠔꠣꠞꠣ ꠎꠣꠘꠥ ꠢꠣꠝꠦꠡꠣ ꠀꠟ꠆ꠟꠣꠁ ꠈꠥꠡꠤ-ꠛꠣꠡꠤꠔ ꠞꠁꠀ ꠀꠟ-ꠝꠍꠤꠞ ꠟꠣꠈꠣꠘ ꠔꠤꠀꠉꠤ ꠀꠞ ꠘꠤꠡ꠆ꠛꠣꠞꠕ ꠎꠤꠘ꠆ꠖꠦꠉꠤ ꠇꠣꠐꠣꠁꠘ।
ꠄꠞꠝꠣꠎꠦ ꠀꠍꠦ,
(ꠇ) ꠍꠣꠟꠣꠝ, ꠡꠥꠇꠞꠤꠀ ꠀꠞ ꠈꠥꠡꠤ-ꠛꠣꠡꠤꠞ ꠇꠕꠣ ১:১-১১ ꠀꠄꠀꠔ
(ꠈ) ꠢꠎꠞꠔ ꠙꠣꠃꠟꠥꠍꠞ ꠘꠤꠎꠞ ꠢꠣꠟꠔ ১:১২-২৬
(ꠉ) ꠢꠎꠞꠔ ꠁꠍꠣꠞ ꠔꠤꠀꠉꠞ ꠘꠝꠥꠘꠣ ১:২৭—২:১৮
(ꠊ) ꠖꠥꠁꠎꠘ ꠃꠡ꠆ꠔꠣꠖꠞꠦ ꠙꠣꠑꠣꠘꠤ ২:১৯-৩০
(ꠌ) ꠖꠣꠖꠤꠞ ꠝꠥꠍꠟꠣ ꠛꠣꠖ ꠖꠤꠀ ꠀꠟ꠆ꠟꠣꠞ ꠞꠥꠢꠦ ꠄꠛꠣꠖꠔ ꠇꠞꠅ ৩ ꠞꠥꠇꠥ
(ꠍ) ꠖꠣꠘ-ꠈꠄꠞꠣꠔꠞ ꠟꠣꠉꠤ ꠗꠁꠘ꠆ꠘꠛꠣꠖ ৪ ꠞꠥꠇꠥ
1
1 ꠀꠝꠤ ꠙꠣꠃꠟꠥꠍ ꠀꠞ ꠔꠤꠝꠕꠤ ꠅꠁꠟꠣꠝ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠅꠃ ꠚꠤꠟꠤꠙꠤ ꠐꠣꠃꠘꠅ ꠛꠡꠔ ꠇꠞꠞꠣ, ꠎꠦ ꠙꠣꠇ ꠛꠘ꠆ꠖꠣ ꠅꠇꠟꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍꠂꠘ ꠄꠞꠣꠞꠦ, ꠄꠞꠣꠞ ꠃꠡ꠆ꠔꠣꠖ ꠅꠇꠟꠞꠦ ꠀꠞ ꠈꠣꠖꠤꠝꠖꠣꠞ ꠅꠇꠟꠞ ꠉꠦꠍꠦ ꠟꠦꠈꠞꠣꠝ।
2 ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠞꠢꠝꠔ ꠀꠞ ꠡꠣꠘ꠆ꠔꠤ ꠔꠥꠝꠞꠣꠞ ꠃꠙꠞꠦ ꠘꠣꠎꠤꠟ ꠅꠃꠇ।
ꠚꠤꠟꠤꠙꠤ ꠎꠝꠣꠔꠞ ꠟꠣꠉꠤ ꠝꠥꠘꠣꠎꠣꠔ
3 ꠔꠥꠝꠞꠣꠞ ꠇꠕꠣ ꠎꠔꠛꠣꠞꠃ ꠀꠝꠣꠞ ꠁꠀꠖ ꠅꠄ, ꠅꠔꠛꠣꠞꠃ ꠀꠝꠤ ꠀꠝꠣꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ।
4 ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠣꠉꠤ ꠖꠥꠀ ꠇꠞꠤ, ꠀꠝꠣꠞ ꠝꠘꠅ ꠈꠥꠛ ꠈꠥꠡꠤ ꠟꠁꠀ ꠖꠥꠀ ꠇꠞꠤ।
5 ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠔꠛꠟꠤꠉ ꠇꠣꠝꠞ ꠟꠣꠉꠤ ꠔ ꠔꠥꠝꠞꠣ ꠙꠄꠟꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠀꠝꠣꠞꠦ ꠡꠣꠁꠎ꠆ꠎ ꠇꠞꠞꠣꠄ।
6 ꠀꠝꠤ ꠄꠇꠤꠘ ꠇꠞꠤ, ꠎꠦ ꠀꠟ꠆ꠟꠣꠄ ꠔꠥꠝꠞꠣꠞ ꠖꠤꠟꠞ ꠝꠣꠎꠦ ꠅꠃ ꠘꠦꠇ ꠇꠣꠝ ꠡꠥꠞꠥ ꠇꠞꠍꠂꠘ, ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣ ꠙꠞ꠆ꠎꠘ꠆ꠔ, ꠅꠃ ꠀꠟ꠆ꠟꠣꠄ ꠁ ꠇꠣꠝ ꠙꠥꠞꠣ ꠇꠞꠛꠣ।
7 ꠔꠥꠝꠞꠣ ꠔ ꠀꠝꠣꠞ ꠝꠣꠄꠀꠞ ꠝꠣꠘꠥꠡ, ꠄꠞꠟꠣꠉꠤ ꠔꠥꠝꠞꠣꠞ ꠛꠦꠙꠣꠞꠦ ꠀꠝꠣꠞ ꠝꠘꠞ ꠜꠣꠛ ꠅꠟꠣ ꠅꠀ ꠃꠌꠤꠔ। ꠀꠝꠤ ꠎꠦꠟꠅ ꠛꠘ꠆ꠖꠤ ꠢꠣꠟꠔꠦ ꠛꠣ ꠈꠥꠡ-ꠈꠛꠞꠤꠞ ꠢꠇ ꠇꠕꠣ ꠎꠦꠘꠅꠃ ꠔꠛꠟꠤꠉ ꠇꠞꠤ ꠘꠣ ꠇꠦꠘꠦ, ꠔꠥꠝꠞꠣꠅ ꠀꠝꠣꠞ ꠟꠉꠞ ꠞꠢꠝꠔꠞ ꠜꠣꠉꠤ।
8 ꠄꠇ ꠀꠟ꠆ꠟꠣꠄ ꠎꠣꠘꠂꠘ, ꠀꠟ-ꠝꠍꠤꠞ ꠝꠢꠛ꠆ꠛꠔꠦ ꠀꠝꠤ ꠔꠥꠝꠞꠣꠞ ꠟꠣꠉꠤ ꠇꠔ ꠀꠡꠤꠇ।
9 ꠀꠝꠤ ꠖꠥꠀ ꠇꠞꠤ, ꠔꠥꠝꠞꠣꠞ ꠝꠢꠛ꠆ꠛꠔ ꠎꠣꠘꠥ ꠇꠣꠝꠤꠟ ꠛꠤꠛꠦꠇ ꠀꠞ ꠀꠈꠟꠦ ꠖꠤꠘ ꠖꠤꠘ ꠛꠣꠠꠦ।
10 ꠎꠣꠔꠦ ꠔꠥꠝꠞꠣ ꠀꠈꠟ ꠇꠣꠐꠣꠁꠀ ꠜꠣꠟꠣ ꠜꠣꠟꠣ ꠛꠦꠙꠣꠞ ꠅꠇꠟ ꠌꠤꠘꠛꠣꠄ, ꠀꠞ ꠀꠟ-ꠝꠍꠤꠄ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ,
11 ꠔꠣꠘ ꠛꠟꠦ ꠔꠥꠝꠞꠣ ꠘꠦꠇ ꠇꠣꠝ-ꠇꠣꠎ ꠇꠞꠤꠀ ꠈꠣꠐꠤ ꠙꠕꠦ ꠘꠤꠈꠥꠔ ꠅꠁꠀ ꠞꠁꠛꠣꠄ। ꠔꠦꠃ ꠀꠟ꠆ꠟꠣ ꠙꠣꠇꠞ ꠉꠃꠞꠛ ꠀꠞ ꠔꠣꠞꠤꠚ ꠎꠣꠁꠞ ꠅꠁꠛ।
ꠢꠎꠞꠔ ꠙꠣꠃꠟꠥꠍꠞ ꠘꠤꠎꠞ ꠢꠣꠟꠔ
12 ꠅ ꠀꠝꠣꠞ ꠜꠣꠁ ꠅꠇꠟ, ꠀꠝꠤ ꠌꠣꠁꠞꠣꠝ ꠔꠥꠝꠞꠣꠅ ꠎꠣꠘ, ꠀꠝꠣꠞ ꠃꠙꠞꠦ ꠎꠦꠔꠣ ꠎꠦꠔꠣ ꠊꠐꠤꠍꠦ, ꠁꠔꠣꠞ ꠟꠣꠉꠤ ꠀꠍꠟꠦ ꠈꠥꠡ-ꠈꠛꠞꠤ ꠔꠛꠟꠤꠉꠞ ꠇꠣꠝ ꠀꠞꠅ ꠛꠣꠠꠤꠉꠦꠍꠦ।
13 ꠄꠞꠟꠣꠉꠤ ꠅꠘꠞ ꠞꠣꠎꠛꠣꠠꠤꠞ ꠍꠤꠙꠣꠁ ꠅꠇꠟꠦ ꠀꠞ ꠛꠣꠖ-ꠛꠣꠇꠤ ꠝꠣꠘꠡꠦꠅ ꠎꠣꠘꠤꠟꠤꠍꠂꠘ, ꠀꠝꠤ ꠔ ꠈꠣꠟꠤ ꠀꠟ-ꠝꠍꠤꠞ ꠟꠣꠉꠤꠃ ꠎꠦꠟ ꠈꠣꠐꠤꠀꠞ।
14 ꠀꠞ ꠀꠝꠤ ꠎꠦꠟꠅ ꠢꠣꠝꠣꠘꠤꠄ ꠀꠝꠞꠣꠞ ꠛꠃꠔ ꠜꠣꠁꠀꠁꠘ꠆ꠔꠦ ꠝꠣꠟꠤꠇꠞ ꠃꠙꠞꠦ ꠀꠞꠅ ꠛꠦꠡ ꠇꠞꠤ ꠜꠞꠡꠣ ꠇꠞꠣ ꠢꠤꠇꠍꠂꠘ, ꠔꠣꠞꠣ ꠒꠞ-ꠜꠄ ꠚꠣꠃꠞꠤꠀ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉꠞ ꠟꠣꠉꠤ ꠀꠞꠅ ꠡꠣꠅꠡꠤ ꠅꠁꠍꠂꠘ।
15 ꠄꠞꠣꠞ ꠝꠣꠎꠦ ꠇꠦꠃ ꠇꠦꠃ ꠁꠋꠡꠣ ꠀꠞ ꠖꠟꠣꠖꠟꠤꠞ ꠘꠤꠅꠔꠦ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦꠞ, ꠅꠁꠟꠦ ꠇꠦꠃ ꠇꠦꠃ ꠜꠣꠟꠣ ꠘꠤꠅꠔꠦ ꠇꠞꠦꠞ।
16 ꠄꠞꠣꠞ ꠖꠤꠟꠞ ꠝꠢꠛ꠆ꠛꠔꠦꠃ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦꠞ। ꠔꠣꠞꠣ ꠎꠣꠘꠂꠘ, ꠈꠥꠡ-ꠈꠛꠞꠤꠞ ꠙꠇ꠆ꠇꠦ ꠝꠣꠔꠣꠞ ꠟꠣꠉꠤꠃ ꠀꠝꠣꠞꠦ ꠀꠐꠇ ꠇꠞꠣ ꠅꠁꠍꠦ।
17 ꠅꠁꠟꠦ ꠎꠦꠞꠣ ꠘꠤꠎꠞ ꠚꠣꠄꠖꠣ ꠇꠣꠝꠣꠘꠤꠞ ꠟꠣꠉꠤ ꠀꠟ-ꠝꠍꠤꠞ ꠔꠛꠟꠤꠉ ꠇꠞꠦ, ꠄꠞꠣ ꠔ ꠜꠣꠟꠣ ꠘꠤꠅꠔꠦ ꠇꠣꠝ ꠇꠞꠦ ꠘꠣ। ꠔꠣꠞꠣ ꠌꠣꠄ, ꠀꠝꠤ ꠎꠦꠟꠅ ꠛꠘ꠆ꠖꠤ ꠞꠁ ꠀꠞ ꠀꠝꠣꠞ ꠇꠡ꠆ꠐ ꠛꠣꠠꠃꠇ।
18 ꠅꠁꠟꠦ ꠁꠔꠣꠄ ꠇꠤꠔꠣ ꠀꠄ ꠎꠣꠄ? ꠀꠍꠟ ꠇꠕꠣ ꠅꠁꠟ, ꠎꠦꠝꠘꠦꠃ ꠅꠄ ꠘꠣ ꠇꠦꠘꠦ, ꠀꠟ-ꠝꠍꠤꠞ ꠘꠣꠝ ꠔ ꠔꠛꠟꠤꠉ ꠅꠞ। ꠁꠔꠣ ꠗꠥꠇꠣꠛꠣꠎꠤꠞ ꠘꠤꠅꠔꠦ ꠅꠃꠇ ꠛꠣ ꠍꠢꠤ ꠘꠤꠅꠔꠦꠃ ꠅꠃꠇ। ꠀꠞ ꠅꠔꠣ ꠖꠦꠈꠤꠀꠃ ꠀꠝꠤ ꠈꠥꠡꠤ।
ꠀꠝꠣꠞ ꠁ ꠈꠥꠡꠤ ꠇꠥꠘꠥꠖꠤꠘ ꠚꠥꠠꠣꠁꠔ ꠘꠣꠄ।
19 ꠀꠝꠤ ꠔ ꠎꠣꠘꠤ, ꠀꠝꠣꠞ ꠃꠙꠞꠦ ꠎꠦꠔꠣ ꠊꠐꠤꠍꠦ, ꠁꠔꠣꠞ ꠢꠦꠡ ꠚꠟ ꠅꠁꠟ, ꠀꠝꠤ ꠘꠤꠡ꠆ꠔꠣꠞ ꠙꠣꠁꠝꠥ। ꠔꠥꠝꠞꠣꠞ ꠖꠥꠀ ꠀꠞ ꠁꠍꠣ ꠀꠟ-ꠝꠍꠤꠞ ꠞꠥꠢꠥꠞ ꠛꠟꠦ ꠁꠔꠣ ꠅꠁꠛ।
20 ꠀꠝꠣꠞ ꠈꠥꠛ ꠝꠎꠛꠥꠔ ꠄꠇꠤꠘ ꠀꠍꠦ, ꠀꠝꠤ ꠇꠥꠘꠥꠝꠘ꠆ꠔꠦꠃ ꠡꠞꠝ ꠙꠣꠁꠔꠣꠝ ꠘꠣꠄ। ꠀꠝꠤ ꠙꠥꠞꠣꠙꠥꠞ ꠡꠣꠅꠡ ꠇꠞꠤꠀ ꠀꠉꠦ ꠎꠦꠟꠣ ꠀꠟ-ꠝꠍꠤꠞ ꠉꠃꠞꠛ ꠎꠣꠁꠞ ꠇꠞꠍꠤ, ꠀꠝꠤ ꠝꠞꠤ ꠛꠣ ꠛꠣꠌꠤ ꠅꠈꠘꠅ ꠅꠟꠣ ꠎꠣꠁꠞ ꠅꠁꠛ।
21 ꠇꠣꠞꠘ ꠀꠝꠣꠞ ꠟꠣꠉꠤ ꠎꠤꠘ꠆ꠖꠦꠉꠤ ꠅꠁꠟꠣ ꠀꠟ-ꠝꠍꠤ ꠀꠞ ꠝꠞꠘ ꠅꠁꠟ ꠟꠣꠜ।
22 ꠅꠁꠟꠦ ꠀꠝꠤ ꠎꠥꠖꠤ ꠛꠣꠌꠤꠀ ꠞꠁ, ꠔꠦ ꠀꠝꠣꠞ ꠎꠤꠘ꠆ꠖꠦꠉꠤꠔ ꠈꠥꠛ ꠜꠣꠟꠣ ꠇꠣꠝ ꠇꠞꠣꠞ ꠡꠥꠎꠥꠉ ꠅꠁꠛ। ꠄꠞꠟꠣꠉꠤ ꠀꠝꠤ ꠛꠥꠎꠞꠣꠝ ꠘꠣ, ꠀꠝꠤ ꠇꠥꠘ ꠙꠕ ꠟꠁꠔꠣꠝ।
23 ꠖꠥꠁꠅ ꠙꠕꠦꠃ ꠀꠝꠣꠞꠦ ꠐꠣꠘꠦꠞ। ꠀꠝꠣꠞ ꠁꠌ꠆ꠍꠣ ꠅꠁꠟ, ꠀꠝꠤ ꠝꠞꠤꠀ ꠢꠣꠞꠤ ꠀꠟ-ꠝꠍꠤꠞ ꠟꠉꠦ ꠞꠁꠔꠣꠝ, ꠅꠈꠣꠘꠃ ꠀꠝꠣꠞ ꠟꠣꠉꠤ ꠜꠣꠟꠣ।
24 ꠅꠁꠟꠦ ꠔꠥꠝꠞꠣꠞ ꠟꠣꠉꠤ ꠀꠝꠣꠞ ꠛꠣꠌꠤꠀ ꠞꠅꠀꠈꠣꠘ ꠀꠞꠅ ꠎꠞꠥꠞꠤ।
25 ꠀꠞ ꠅꠃ ꠝꠘꠅꠛꠟꠦ ꠀꠝꠤ ꠜꠣꠟꠣ ꠇꠞꠤ ꠎꠣꠘꠤ, ꠀꠝꠤ ꠛꠣꠌꠝꠥ ꠀꠞ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠎꠣꠔꠦ ꠔꠥꠝꠞꠣꠞ ꠁꠝꠣꠘ ꠀꠞꠅ ꠝꠎꠛꠥꠔ ꠅꠁꠀ ꠔꠥꠝꠞꠣꠞ ꠈꠥꠡꠤ ꠛꠣꠠꠦ।
26 ꠀꠝꠤ ꠔꠥꠝꠞꠣꠞ ꠝꠣꠎꠦ ꠢꠤꠞꠛꠣꠞ ꠀꠁꠀ ꠢꠣꠞꠟꠦ, ꠀꠝꠣꠞꠦ ꠟꠁꠀ ꠔꠥꠝꠞꠣ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠈꠥꠛ ꠈꠥꠡꠤ ꠇꠞꠛꠣꠄ।
ꠁꠍꠣ ꠀꠟ-ꠝꠍꠤꠞ ꠔꠞꠤꠇꠣꠞ ꠎꠤꠘ꠆ꠖꠦꠉꠤ
27 ꠀꠍꠟ ꠛꠦꠙꠣꠞ ꠅꠁꠟ, ꠔꠥꠝꠞꠣ ꠎꠣꠞꠎꠤꠞ ꠎꠤꠘ꠆ꠖꠦꠉꠤꠞꠦ ꠅꠃ ꠘꠝꠥꠘꠣꠄ ꠇꠣꠐꠣꠅ, ꠎꠦ ꠎꠤꠘ꠆ꠖꠦꠉꠤ ꠀꠟ-ꠝꠍꠤꠞ ꠈꠥꠡ-ꠈꠛꠞꠤꠞ ꠟꠣꠈ। ꠔꠦꠃ ꠀꠝꠤ ꠘꠤꠎꠦ ꠀꠁꠀ ꠖꠦꠈꠤ ꠛꠣ ꠖꠥꠞꠁ ꠕꠣꠇꠤ ꠢꠥꠘꠤ, ꠀꠝꠤ ꠛꠥꠎꠝꠥ, ꠔꠥꠝꠞꠣ ꠖꠤꠟꠦ-ꠎꠣꠘꠦ ꠝꠤꠟꠤꠀ ꠝꠎꠛꠥꠔ ꠀꠍ। ꠀꠞ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠎꠦ ꠁꠝꠣꠘ ꠙꠄꠖꠣ ꠅꠄ, ꠅꠃ ꠁꠝꠣꠘꠞ ꠟꠣꠉꠤ ꠢꠇꠟꠦ ꠝꠤꠟꠤꠀ ꠄꠇ ꠖꠤꠟꠦ ꠝꠦꠘꠔ ꠇꠞꠞꠣꠄ।
28 ꠎꠦꠔꠣꠄ ꠔꠥꠝꠞꠣꠞ ꠛꠤꠞꠥꠗꠤꠔꠣ ꠇꠞꠂꠘ, ꠇꠥꠘꠥ ꠛꠦꠙꠣꠞꠦꠃ ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ। ꠔꠦꠃ ꠙꠞꠝꠣꠘ ꠅꠁꠎꠤꠛ, ꠔꠣꠞꠣ ꠛꠤꠘꠣꠡꠞ ꠙꠕꠦ ꠎꠣꠁꠞꠣꠉꠤ ꠀꠞ ꠔꠥꠝꠞꠣ ꠞꠦꠢꠣꠁ ꠙꠣꠁꠞꠣꠄ। ꠁ ꠞꠦꠢꠣꠁ ꠈꠣꠟꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠝꠤꠟꠦ।
29 ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠍ ꠁꠐꠣ ꠎꠦꠟꠣ ꠞꠢꠝꠔ, ꠔꠣꠘ ꠟꠣꠉꠤ ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠣꠞ ꠡꠥꠎꠥꠉ ꠙꠣꠁꠍ ꠁꠐꠣꠅ ꠔꠥꠝꠞꠣꠞ ꠟꠣꠉꠤ ꠞꠢꠝꠔ।
30 ꠔꠥꠝꠞꠣ ꠀꠉꠦ ꠀꠝꠣꠞꠦ ꠎꠦꠟꠣ ꠇꠡ꠆ꠐ ꠇꠞꠣꠔ ꠖꠦꠈꠍ ꠀꠞ ꠅꠈꠘꠅ ꠎꠦꠔꠣ ꠇꠡ꠆ꠐꠞ ꠇꠕꠣ ꠢꠥꠘꠞꠣꠄ, ꠔꠥꠝꠞꠣꠅ ꠔ ꠅꠃ ꠟꠣꠈꠣꠘ ꠇꠡ꠆ꠐꠞ ꠝꠣꠎꠦ ꠙꠠꠤꠉꠦꠍ।