ꠀꠟ-ꠎꠛꠥꠞ ১১৮
1 ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠅ, ꠔꠣꠁꠘ ꠔ ꠜꠣꠟꠣ,
ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
2 ꠛꠘꠤ ꠁꠍꠞꠣꠁꠟꠦ ꠇꠃꠇ,
ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
3 ꠢꠣꠞꠥꠘꠞ ꠍꠤꠟꠍꠤꠟꠣꠄ ꠇꠃꠇ,
ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
4 ꠝꠣꠛꠥꠖꠞ ꠀꠡꠤꠇꠦ ꠇꠃꠇ,
ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ।
5 ꠝꠣꠛꠥꠖꠞꠦ ꠒꠣꠇꠤꠟꠣꠝ ꠀꠝꠤ ꠙꠠꠤꠀ ꠛꠤꠙꠖꠅ,
ꠔꠣꠁꠘ ꠃꠖ꠆ꠖꠣꠞ ꠇꠞꠤ ꠝꠞꠦ ꠘꠤꠟꠣ ꠈꠥꠟꠣ ꠝꠄꠖꠣꠘꠅ।
6 ꠝꠣꠛꠥꠖ ꠔ ꠀꠝꠣꠞ ꠙꠇ꠆ꠇꠦ, ꠀꠝꠤ ꠒꠞꠣꠁꠔꠣꠝ ꠘꠣꠄ,
ꠀꠖꠝꠦ ꠀꠝꠣꠞ ꠇꠤꠔꠣ ꠇꠞꠔ?
7 ꠝꠣꠛꠥꠖ ꠀꠝꠣꠞ ꠙꠇ꠆ꠇꠦ, ꠔꠣꠁꠘꠃ ꠀꠝꠣꠞ ꠡꠢꠣꠄ,
ꠖꠥꠡꠝꠘꠞ ꠛꠦꠢꠣꠟ ꠖꠡꠣ ꠖꠦꠈꠣꠁꠛꠣ ꠀꠟ꠆ꠟꠣꠄ।
8 ꠀꠖꠝꠞ ꠃꠙꠞꠦ ꠜꠞꠡꠣ ꠇꠞꠣ ꠕꠣꠇꠤ,
ꠝꠣꠛꠥꠖꠞ ꠍꠣꠄꠀꠔ ꠀꠡꠞꠄ ꠟꠅꠀ ꠜꠣꠟꠣ।
9 ꠛꠠꠟꠥꠇꠞ ꠃꠙꠞꠦ ꠜꠞꠡꠣ ꠇꠞꠣ ꠕꠣꠇꠤ,
ꠝꠣꠛꠥꠖꠞ ꠍꠣꠄꠀꠔ ꠀꠡꠞꠄ ꠟꠅꠀ ꠜꠣꠟꠣ।
10 ꠢꠇꠟ ꠖꠦꠡꠦ ꠝꠤꠟꠤ ꠛꠦꠞꠤꠟꠤꠍꠤꠟ ꠀꠝꠣꠞꠦ,
ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
11 ꠢꠣꠍꠣꠃ ꠔꠣꠞꠣ ꠝꠞꠦ ꠛꠦꠞꠤꠟꠤꠍꠤꠟ ꠌꠣꠁꠞꠅꠛꠣꠄ,
ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
12 ꠜꠤꠋꠉꠥꠟꠞ ꠙꠣꠟꠞ ꠟꠣꠈꠣꠘ ꠀꠝꠣꠞꠦ ꠛꠦꠞꠤꠍꠤꠟ,
ꠢꠥꠇꠘꠣ ꠛꠘ-ꠎꠋꠟꠣꠞ ꠟꠣꠈꠣꠘ ꠎꠟꠤꠀ ꠃꠑꠍꠤꠟ ꠔꠣꠞꠣ,
ꠝꠣꠛꠥꠖꠞ ꠘꠣꠝꠦ ꠀꠝꠤ ꠡꠦꠡ ꠇꠞꠤꠟꠤꠍꠤ ꠔꠣꠞꠣꠞꠦ।
13 ꠎꠥꠞꠦ ꠎꠥꠞꠦ ꠗꠣꠇ꠆ꠇꠣ ꠝꠣꠞꠍꠤꠟ ꠀꠝꠤ ꠎꠣꠘꠥ ꠙꠠꠤ ꠎꠣꠁ,
ꠅꠁꠟꠦ ꠝꠣꠛꠥꠖꠃ ꠀꠝꠣꠞ ꠡꠢꠣꠄ ꠅꠁꠟꠣ।
14 ꠝꠣꠛꠥꠖꠃ ꠀꠝꠣꠞ ꠛꠟ, ꠀꠝꠣꠞ ꠈꠥꠡꠤꠞ ꠉꠤꠔ,
ꠀꠝꠣꠞꠦ ꠛꠣꠌꠣꠘꠤꠞ ꠃꠙꠣꠄ ꠔꠣꠘ ꠀꠔꠅ ꠘꠤꠌ꠆ꠌꠤꠔ।
15 ꠙꠞꠦꠎꠉꠣꠞꠞ ꠊꠞꠅ ꠊꠞꠅ ꠎꠥꠖ꠆ꠖꠞ ꠎꠄꠅꠞ ꠉꠣꠘ,
ꠝꠣꠛꠥꠖꠞ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠀꠎꠛ ꠇꠣꠝ।
16 ꠝꠣꠛꠥꠖꠞ ꠒꠣꠁꠘ ꠀꠔ ꠃꠙꠞꠦ ꠔꠥꠟꠍꠂꠘ ꠔꠣꠁꠘ,
ꠝꠣꠛꠥꠖꠞ ꠇꠥꠖꠞꠔꠤ ꠀꠔꠦ ꠇꠞꠍꠂꠘ ꠀꠎꠛ ꠇꠣꠝ।
17 ꠀꠝꠤ ꠔ ꠝꠞꠔꠣꠝ ꠘꠣꠄ, ꠎꠤꠘ꠆ꠖꠣ ꠞꠁꠝꠥ,
ꠝꠣꠛꠥꠖꠦ ꠎꠦꠔꠣ ꠇꠞꠍꠂꠘ ꠢꠇꠟꠞꠦ ꠎꠣꠘꠣꠁꠝꠥ।
18 ꠝꠣꠛꠥꠖꠦ ꠀꠝꠣꠞꠦ ꠇꠑꠤꠘ ꠡꠣꠎꠣ ꠖꠤꠍꠂꠘ,
ꠅꠁꠟꠦ ꠝꠞꠘꠞ ꠀꠔꠅ ꠝꠞꠦ ꠘꠣꠢꠤ ꠡꠙꠤꠍꠂꠘ।
19 ꠀꠝꠣꠞ ꠟꠣꠉꠤ ꠈꠥꠟꠤꠀ ꠖꠦꠅ ꠀꠟ꠆ꠟꠣꠞ ꠊꠞꠞ ꠖꠥꠀꠞ,
ꠜꠤꠔꠞꠦ ꠢꠣꠝꠣꠁꠀ ꠡꠥꠇꠞꠤꠀ ꠝꠣꠛꠥꠖꠞ ꠎꠣꠘꠣꠁ।
20 ꠁꠔꠣ ꠔ ꠡ꠆ꠛꠄꠅꠋ ꠝꠣꠛꠥꠖꠞ ꠖꠥꠀꠞ,
ꠈꠣꠟꠤ ꠙꠞꠦꠎꠉꠣꠞ ꠅꠇꠟ ꠅꠘꠅ ꠢꠣꠝꠣꠄ।
21 ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁ ꠀꠝꠣꠞ ꠀꠛꠖꠣꠞ ꠢꠥꠘꠣꠄ,
ꠔꠥꠝꠣꠞ ꠀꠔꠅꠃ ꠘꠤꠌ꠆ꠌꠤꠔ ꠀꠝꠣꠞꠦ ꠛꠣꠌꠣꠘꠤꠞ ꠃꠙꠣꠄ।
22 ꠛꠦꠇꠣꠝꠣ ꠇꠁꠀ ꠚꠣꠟꠣꠁ ꠖꠤꠍꠤꠟ ꠞꠣꠎ ꠝꠦꠡ꠆ꠔꠞꠤꠘ꠆ꠔꠦ ꠎꠦ ꠙꠣꠔ꠆ꠔꠞ,
ꠅꠇꠐꠣ ꠖꠤꠀꠃ ꠁꠀꠘ ꠈꠥꠐꠤ ꠅꠁꠟ ꠔꠣꠘ ꠊꠞꠞ।
23 ꠝꠣꠛꠥꠖ ꠘꠤꠎꠦꠃ ꠁ ꠇꠣꠝ ꠇꠞꠣꠁꠟꠣ,
ꠖꠦꠈꠤꠀ ꠔ ꠀꠝꠞꠣꠞ ꠔꠣꠁꠎ꠆ꠎꠥꠛꠤ ꠟꠣꠉꠦꠞ।
24 ꠁꠐꠣ ꠔ ꠢꠃ ꠖꠤꠘ ꠝꠣꠛꠥꠖꠞ ꠛꠣꠘꠣꠁꠟ ꠖꠤꠘ,
ꠀꠅ ꠈꠥꠡꠤ ꠇꠞꠤ ꠚꠥꠞ꠆ꠔꠤ ꠇꠞꠤ ꠡꠛꠦ ꠅꠃ ꠖꠤꠘ।
25 ꠝꠤꠘꠔꠤ ꠇꠞꠤ ꠉ ꠝꠣꠛꠥꠖ ꠛꠣꠌꠣꠅ ꠀꠝꠞꠣꠞꠦ,
ꠝꠤꠘꠔꠤ ꠇꠞꠤ ꠔꠥꠝꠤ ꠇꠣꠝꠤꠀꠛ ꠇꠞꠅ ꠀꠝꠞꠣꠞꠦ।
26 ꠝꠣꠛꠥꠖꠞ ꠘꠣꠝꠦ ꠎꠦꠁꠘ ꠀꠁꠞꠣ ꠔꠣꠘ ꠔꠣꠞꠤꠚ ꠅꠃꠇ,
ꠝꠣꠛꠥꠖꠞ ꠊꠞꠅ ꠕꠣꠇꠤ ꠇꠁ ꠔꠥꠝꠞꠣꠞ ꠃꠙꠞꠦ ꠛꠞꠇꠔ ꠟꠣꠝꠃꠇ।
27 ꠀꠟ꠆ꠟꠣꠃ ꠔ ꠝꠣꠛꠥꠖ, ꠀꠝꠞꠣꠞꠦ ꠖꠤꠍꠂꠘ ꠘꠥꠞ,
ꠁꠖꠞ ꠇꠥꠞꠛꠣꠘꠤꠞ ꠙꠡꠥ ꠖꠠꠤꠖꠤ ꠛꠣꠘ꠆ꠖꠤꠀ ꠀꠘꠅ,
ꠇꠥꠞꠛꠣꠘꠤ ꠈꠣꠘꠣꠞ ꠢꠤꠋ ꠅꠇꠟꠅ ꠅꠉꠥ ꠛꠣꠘ꠆ꠖꠤꠀ ꠞꠣꠈꠅ।
28 ꠔꠥꠝꠤꠃ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠡꠥꠇꠞꠤꠀ ꠎꠣꠘꠣꠁ,
ꠔꠥꠝꠤꠃ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠉꠥꠘꠉꠣꠘ ꠉꠣꠁ।
29 ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠅ, ꠔꠣꠁꠘꠃ ꠔ ꠜꠣꠟꠣ,
ꠌꠤꠞꠇꠣꠟ ꠎꠣꠞꠤ ꠔꠣꠘ ꠖꠄꠀ-ꠝꠣꠄꠀ॥