ꠀꠟ-ꠎꠛꠥꠞ ১৮
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠝꠣꠛꠥꠖꠞ ꠛꠘ꠆ꠖꠣ ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
ꠝꠣꠛꠥꠖꠦ ꠎꠦꠛꠟꠣ ꠛꠣꠖꠡꠣ ꠔꠣꠟꠥꠔ ꠀꠞ ꠛꠣꠖ-ꠛꠣꠇꠤ ꠢꠇꠟ ꠖꠥꠡꠝꠘꠞ ꠀꠔ ꠕꠣꠇꠤ ꠖꠣꠃꠖꠞꠦ ꠢꠦꠚꠣꠎꠔ ꠇꠞꠟꠣ, ꠅꠃ ꠡꠝꠄ ꠖꠣꠃꠖꠦ ꠝꠣꠛꠥꠖꠞ ꠘꠣꠝꠦ ꠅꠃ ꠝꠤꠎꠝꠞ ꠉꠣꠁꠟꠣ।
1 ꠅ ꠝꠣꠛꠥꠖ, ꠀꠝꠣꠞ ꠛꠟ-ꠡꠇ꠆ꠔꠤ, ꠀꠝꠤ ꠔꠥꠝꠣꠞꠃ ꠀꠡꠤꠇ।
2 ꠀꠟ꠆ꠟꠣꠃ ꠀꠝꠣꠞ ꠘꠤꠞꠣꠙꠖ ꠝꠤꠘꠣꠞ, ꠀꠝꠣꠞ ꠎꠣꠘ ꠛꠣꠌꠣꠘꠤꠞ ꠝꠣꠟꠤꠇ,
ꠀꠝꠣꠞ ꠝꠣꠛꠥꠖ, ꠀꠝꠣꠞ ꠙꠣꠠ, ꠔꠣꠘ ꠍꠣꠄꠀꠔ ꠀꠡꠞꠄ ꠟꠁꠍꠤ।
ꠎꠥꠖ꠆ꠖꠞ ꠝꠄꠖꠣꠘꠅ ꠔꠣꠁꠘꠃ ꠀꠝꠣꠞ ꠓꠣꠟ, ꠎꠣꠘ ꠛꠣꠌꠣꠘꠤꠞ ꠛꠟ-ꠔꠣꠇ꠆ꠇꠔ, ꠀꠝꠣꠞ ꠀꠡꠞꠄ ꠝꠥꠇꠣꠝ।
3 ꠉꠥꠘꠉꠣꠘ ꠙꠣꠅꠀꠞ ꠟꠣꠈ ꠝꠣꠛꠥꠖꠞ ꠘꠣꠝ ꠟꠁꠝꠥ,
ꠔꠦꠃ ꠖꠥꠡꠝꠘꠞ ꠀꠔ ꠕꠣꠇꠤ ꠀꠝꠤ ꠎꠣꠘꠦ ꠛꠣꠌꠤꠝꠥ।
4 ꠝꠞꠘꠞ ꠖꠠꠤꠄ ꠙꠦꠌꠣꠁꠟꠤꠍꠤꠟ ꠀꠝꠣꠞꠦ,
ꠡꠞ꠆ꠛꠘꠣꠡꠣ ꠚꠥꠔꠞ ꠙꠣꠘꠤꠔ ꠒꠥꠛꠣꠁꠟꠤꠍꠤꠟ ꠝꠞꠦ,
5 ꠙꠣꠔꠣꠟꠞ ꠖꠠꠤ ꠖꠤꠀ ꠅꠁꠍꠤꠟ ꠝꠞꠦ ꠛꠣꠘ꠆ꠖꠣ,
ꠀꠝꠣꠞ ꠟꠣꠉꠤ ꠅꠁꠍꠤꠟ ꠇꠄꠛꠞꠞ ꠉꠣꠔ ꠈꠥꠖꠣ।
6 ꠅꠟꠣꠈꠣꠘ ꠛꠤꠙꠖꠅ ꠙꠠꠤꠀ ꠝꠣꠛꠥꠖꠞꠦ ꠒꠣꠇꠤꠟꠣꠝ,
ꠎꠥꠞꠦ ꠎꠥꠞꠦ ꠔꠣꠘ ꠡꠣꠁꠎ꠆ꠎ ꠀꠝꠤ ꠝꠣꠋꠉꠤꠟꠣꠝ,
ꠔꠣꠁꠘ ꠘꠤꠎꠞ ꠀꠞꠡ ꠕꠣꠇꠤ ꠢꠥꠘꠟꠣ ꠀꠝꠣꠞ ꠒꠣꠇ,
ꠔꠣꠘ ꠖꠞꠛꠣꠞꠅ ꠀꠎꠤꠟ ꠀꠝꠣꠞ ꠚꠞꠤꠀꠖ।
7 ꠀꠡ꠆ꠔꠣ ꠖꠥꠘꠤꠀ ꠇꠣꠙꠤꠀ ꠕꠞ-ꠕꠞꠣꠘꠤ ꠗꠞꠟ,
ꠙꠣꠠ-ꠐꠤꠟ꠆ꠟꠣꠞ ꠜꠤꠔ ꠅꠇꠟ ꠟꠠꠣ-ꠌꠠꠣ ꠇꠞꠟ,
ꠉꠥꠍꠣꠞ ꠀꠉꠥꠁꠘꠦ ꠔꠣꠘ ꠁꠔꠣꠄ ꠔ ꠇꠣꠙꠤꠟ।
8 ꠘꠣꠇꠦꠖꠤ ꠛꠣꠞ ꠅꠁꠟ ꠔꠣꠘ ꠉꠥꠍꠣꠞ ꠉꠞꠝ ꠗꠥꠝꠣ,
ꠝꠥꠈ ꠕꠣꠇꠤ ꠀꠁꠟ ꠔꠣꠘ ꠀꠉꠥꠘꠤꠞ ꠟꠥꠇ꠆ꠇꠣ,
ꠀꠞꠅ ꠔ ꠛꠣꠞ ꠅꠁꠀ ꠀꠁꠟ ꠎꠣꠟꠣꠁꠟ ꠀꠋꠞꠣ।
9 ꠀꠍꠝꠣꠘꠞꠦ ꠟꠣꠝꠣꠁꠀ ꠔꠣꠁꠘ ꠔꠟꠦ ꠟꠣꠝꠤꠀ ꠀꠁꠟꠣ,
ꠔꠣꠘ ꠇꠖꠝꠞ ꠔꠟꠦ ꠀꠍꠤꠟ ꠊꠘ ꠇꠣꠟꠣ ꠝꠦꠊꠞ ꠌꠣꠇꠣ।
10 ꠔꠣꠁꠘ ꠇꠣꠞꠥꠛꠤꠞ ꠃꠙꠞꠦ ꠌꠠꠤꠀ ꠃꠠꠣꠟ ꠖꠤꠟꠣ,
ꠛꠣꠔꠣꠡꠞ ꠒꠣꠈꠘꠣꠔ ꠜꠞ ꠖꠤꠀ ꠃꠠꠤꠀ ꠀꠁꠟꠣ।
11 ꠔꠣꠁꠘ ꠀꠘ꠆ꠖꠣꠁꠞꠞ ꠜꠤꠔꠞꠦ ꠘꠤꠎꠞꠦ ꠀꠅꠠ ꠇꠞꠤꠟ꠆ꠟꠣ,
ꠊꠘ ꠝꠦꠊꠞ ꠌꠣꠇꠣꠄ ꠔꠣꠘ ꠙꠛꠤꠔ꠆ꠞ ꠔꠣꠝ꠆ꠛꠥ ꠉꠥꠞꠤꠟ꠆ꠟꠣ।
12 ꠘꠥꠞꠞ ꠎꠤꠟꠇꠤꠄ ꠔꠣꠘ ꠀꠘ꠆ꠖꠣꠁꠞ ꠝꠦꠊ ꠢꠞꠤ ꠉꠦꠟ,
ꠝꠦꠊꠞ ꠢꠤꠟ ꠀꠞ ꠎꠣꠟꠣꠁꠟ ꠀꠋꠞꠣ ꠎꠝꠤꠘꠅ ꠙꠠꠟ।
13 ꠝꠣꠛꠥꠖꠦ ꠀꠍꠝꠣꠘ ꠕꠣꠇꠤ ꠉꠞ꠆ꠎꠤꠀ ꠃꠑꠤꠟꠣ,
ꠀꠟ꠆ꠟꠣꠔꠣꠟꠣꠄ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠣꠁꠟꠣ।
14 ꠔꠣꠘ ꠗꠘꠥꠇꠞ ꠔꠤꠞ ꠝꠣꠞꠤꠀ ꠖꠥꠡꠝꠘꠞꠦ ꠍꠤꠔꠞꠣꠁꠟ꠆ꠟꠣ,
ꠝꠦꠊꠞ ꠎꠤꠟꠇꠣꠘꠤꠄ ꠔꠣꠞꠣꠞꠦ ꠛꠦꠚꠣꠘꠣ ꠛꠣꠘꠣꠁꠟꠣ।
15 ꠔꠥꠝꠣꠞ ꠗꠝꠇꠦ ꠀꠞ ꠘꠣꠇꠞ ꠡ꠆ꠛꠣꠡꠦ, ꠝꠣꠛꠥꠖ ꠉ,
ꠖꠞꠤꠀꠞ ꠝꠥꠞꠞ ꠙꠣꠘꠤꠞ ꠚꠥꠔ ꠅꠇꠟ ꠖꠦꠈꠣ ꠖꠤꠟ,
ꠎꠉꠔꠞ ꠝꠥꠟ ꠜꠤꠔ ꠅꠇꠟꠅ ꠃꠖꠟꠣ ꠅꠁꠉꠦꠟ।
16 ꠃꠙꠞꠦ ꠕꠣꠇꠤ ꠀꠔ ꠛꠣꠠꠣꠁꠀ ꠔꠣꠁꠘ ꠝꠞꠦ ꠗꠞꠟꠣ,
ꠉꠁꠘ ꠙꠣꠘꠤ ꠕꠘꠦ ꠀꠝꠣꠞꠦ ꠐꠣꠘꠤꠀ ꠔꠥꠟꠟꠣ।
17 ꠛꠣꠌꠣꠁꠟꠣ ꠀꠝꠣꠞꠦ ꠔꠣꠁꠘ ꠙꠄꠟꠥꠀꠘ ꠖꠥꠡꠝꠘ ꠕꠣꠇꠤ,
ꠛꠣꠌꠣꠁꠟꠣ ꠖꠥꠡꠝꠘ-ꠞꠤꠙꠥ ꠅꠇꠟꠞ ꠇꠛꠎꠣ ꠕꠣꠇꠤ,
ꠎꠦꠔꠣꠞ ꠛꠟ-ꠔꠣꠇ꠆ꠇꠔ ꠔ ꠀꠝꠣꠞ ꠕꠣꠇꠤꠅ ꠛꠃꠔ ꠛꠦꠡꠤ।
18 ꠀꠝꠣꠞ ꠝꠍꠤꠛꠔꠞ ꠖꠤꠘꠅ-ꠅ ꠔꠣꠞꠣ ꠝꠞꠦ ꠝꠣꠞꠣꠔ ꠀꠁꠟꠣ,
ꠅꠁꠟꠦ ꠝꠣꠛꠥꠖ ꠀꠟ꠆ꠟꠣ ꠔ ꠀꠝꠣꠞ ꠡꠢꠣꠄ ꠅꠁꠟꠣ।
19 ꠈꠥꠟꠣ ꠝꠄꠖꠣꠘꠅ ꠔꠣꠁꠘ ꠀꠝꠣꠞꠦ ꠛꠣꠞ ꠇꠞꠤ ꠀꠘꠟꠣ,
ꠀꠝꠣꠞ ꠃꠙꠞꠦ ꠈꠥꠡ ꠅꠀꠄ ꠀꠝꠣꠞꠦ ꠛꠣꠌꠣꠁꠟꠣ।
20 ꠝꠣꠛꠥꠖꠦ ꠖꠤꠟꠣ ꠀꠝꠣꠞ ꠙꠞꠦꠎꠉꠣꠞꠤꠞ ꠛꠖꠟꠣ,
ꠀꠝꠣꠞ ꠀꠔꠞ ꠘꠦꠇ ꠇꠣꠝꠞ ꠛꠈꠡꠤꠡ ꠔꠣꠁꠘ ꠖꠤꠟꠣ।
21 ꠝꠣꠛꠥꠖꠞ ꠙꠕꠦꠃ ꠌꠟꠍꠤ ꠀꠝꠤ, ꠇꠞꠍꠤ ꠘꠣ ꠘꠣꠚꠞꠝꠣꠘꠤ,
ꠁꠟꠣ ꠇꠣꠝ ꠇꠞꠍꠤ ꠘꠣ ꠎꠦꠔꠣꠄ ꠢꠞꠣꠄ ꠀꠟ꠆ꠟꠣꠞ ꠖꠤꠖꠣꠞ ꠕꠣꠇꠤ।
22 ꠔꠣꠘ ꠔꠣꠝꠣꠝ ꠢꠇ-ꠚꠄꠍꠣꠟꠣ ꠀꠝꠣꠞ ꠌꠈꠥꠞ ꠀꠄꠘꠣ,
ꠀꠝꠤ ꠔ ꠔꠣꠘ ꠢꠥꠇꠥꠝꠞ ꠇꠥꠘꠥ ꠈꠦꠟꠣꠚ ꠇꠞꠍꠤ ꠘꠣ।
23 ꠔꠣꠘ ꠘꠎꠞꠅ ꠀꠝꠤ ꠘꠤꠈꠥꠔ ꠞꠁꠍꠤ ꠢꠞ-ꠢꠣꠝꠦꠡꠣ,
ꠉꠥꠘꠣ-ꠘꠣꠚꠞꠝꠣꠘꠤ ꠕꠣꠇꠤ ꠘꠤꠎꠞꠦ ꠞꠣꠈꠍꠤ ꠢꠞꠣꠁꠀ।
24 ꠄꠞꠖꠣꠄ ꠝꠣꠛꠥꠖꠦ ꠀꠝꠣꠞ ꠙꠞꠦꠎꠉꠣꠞꠤꠞ ꠖꠤꠍꠂꠘ ꠙꠥꠞꠥꠡ꠆ꠇꠣꠞ,
ꠀꠝꠣꠞ ꠘꠦꠇ ꠇꠣꠝ ꠖꠦꠈꠤꠀ ꠔꠣꠁꠘ ꠇꠞꠍꠂꠘ ꠅꠃ ꠛꠤꠌꠣꠞ।
25 ꠖꠄꠀ-ꠝꠣꠄꠀ ꠇꠞꠞꠣꠞꠦ ꠔꠥꠝꠤꠅ ꠖꠄꠀ-ꠝꠣꠄꠀ ꠇꠞ,
ꠈꠣꠐꠤ ꠛꠘ꠆ꠖꠣꠞ ꠟꠉꠦ ꠔꠥꠝꠤꠅ ꠈꠣꠐꠤ ꠞꠅ।
26 ꠘꠤꠞꠜꠦꠎꠣꠟꠤꠞ ꠛꠣꠄ ꠔꠥꠝꠤꠅ ꠘꠤꠞꠜꠦꠎꠣꠟ,
ꠀꠞ ꠇꠝꠤꠘꠞꠦ ꠖꠦꠈꠣꠅ ꠔꠥꠝꠣꠞ ꠙꠦꠌꠞ ꠚꠣꠘ꠆ꠖ।
27 ꠘꠞꠝ ꠖꠤꠟꠞ ꠝꠣꠘꠡꠞꠦ ꠔꠥꠝꠤꠃ ꠛꠣꠌꠣꠅ,
ꠅꠁꠟꠦ ꠛꠠꠣꠁ-ꠉꠞꠤꠝꠣ ꠖꠦꠈꠣꠅꠞꠣꠞꠦ ꠔꠟꠦꠖꠤ ꠟꠣꠝꠣꠅ।
28 ꠈꠣꠟꠤ ꠔꠥꠝꠤ ꠀꠟ꠆ꠟꠣꠄ ꠚꠞ ꠇꠞꠅ ꠀꠝꠣꠞ ꠝꠥꠡꠣꠟꠞꠦ,
ꠀꠝꠣꠞ ꠝꠣꠛꠥꠖꠦ ꠃꠎꠤꠟꠣ ꠇꠞꠂꠘ ꠀꠝꠣꠞ ꠀꠘ꠆ꠖꠣꠁꠞꠞꠦ।
29 ꠔꠥꠝꠣꠞꠦ ꠟꠉꠦ ꠟꠁꠀ ꠖꠥꠡꠝꠘꠞ ꠍꠤꠙꠣꠁ ꠖꠟꠞꠦ ꠀꠞꠣꠁꠝꠥ,
ꠀꠝꠣꠞ ꠝꠣꠛꠥꠖꠞ ꠟꠉꠦ ꠃꠌꠣ ꠖꠦꠅꠀꠟꠅ ꠚꠣꠟꠖꠤ ꠙꠣꠞ ꠅꠁꠝꠥ।
30 ꠔꠣꠁꠘꠃ ꠀꠟ꠆ꠟꠣ, ꠔꠣꠘ ꠙꠕ ꠔ ꠘꠤꠈꠥꠔ,
ꠝꠣꠛꠥꠖꠞ ꠎꠛꠣꠘ ꠅꠇ꠆ꠇꠄ।
ꠔꠣꠘ ꠉꠦꠍꠦ ꠎꠔ ꠎꠘꠦ ꠀꠡꠞꠄ ꠟꠂꠘ,
ꠔꠣꠁꠘꠃ ꠔꠣꠞꠣꠞ ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠅꠁꠘ।
31 ꠈꠣꠟꠤ ꠀꠟ꠆ꠟꠣ ꠍꠣꠠꠣ ꠀꠞ ꠖꠥꠍꠞꠣ ꠇꠥꠘꠥ ꠝꠣꠛꠥꠖ ꠀꠍꠦ ꠘꠤ?
ꠀꠝꠞꠣꠞ ꠀꠟ꠆ꠟꠣ ꠛꠣꠖꠦ ꠖꠥꠍꠞꠣ ꠇꠥꠘꠥ ꠀꠡꠞꠄ ꠙꠣꠠ ꠝꠤꠟꠦ ꠘꠤ?
32 ꠀꠟ꠆ꠟꠣꠄꠃ ꠀꠝꠣꠞ ꠇꠝꠞꠅ ꠛꠟ-ꠡꠇ꠆ꠔꠤ ꠛꠣꠘ꠆ꠖꠤꠀ ꠖꠤꠍꠂꠘ,
ꠔꠣꠁꠘ ꠔ ꠀꠝꠣꠞ ꠌꠟꠣꠞ ꠙꠕ ꠘꠤꠈꠥꠔ ꠇꠞꠍꠂꠘ।
33 ꠔꠣꠁꠘ ꠀꠝꠣꠞ ꠙꠣꠅꠞꠦ ꠖꠤꠍꠂꠘ ꠅꠞꠤꠘꠞ ꠟꠣꠈꠣꠘ ꠢꠦꠇꠝꠔ,
ꠔꠣꠁꠘ ꠀꠝꠣꠞꠦ ꠐꠤꠇꠣꠁ ꠞꠣꠈꠂꠘ ꠙꠣꠠꠤꠀ ꠇꠑꠤꠘ ꠐꠤꠟ꠆ꠟꠣꠔ।
34 ꠔꠣꠁꠘꠃ ꠀꠝꠣꠞ ꠀꠔꠞꠦ ꠟꠣꠠꠣꠁ ꠇꠞꠣꠞ ꠇꠟꠣ-ꠇꠃꠡꠟ ꠢꠤꠇꠣꠁꠘ,
ꠄꠞꠟꠣꠉꠤ ꠀꠝꠣꠞ ꠀꠔꠦ ꠙꠤꠔꠟꠞ ꠔꠤꠞ-ꠗꠘꠥꠇꠞꠦꠅ ꠛꠦꠇꠣ ꠇꠞꠤꠟꠣꠄ।
35 ꠔꠥꠝꠤ ꠀꠝꠣꠞꠦ ꠎꠣꠘ ꠛꠣꠌꠣꠘꠤꠞ ꠀꠔꠤꠀꠞ ꠖꠣꠘ ꠇꠞꠍ,
ꠔꠥꠝꠣꠞ ꠒꠣꠁꠘ ꠀꠔꠖꠤ ꠀꠝꠣꠞꠦ ꠗꠞꠤꠀ ꠞꠣꠈꠍ,
ꠔꠥꠝꠣꠞ ꠖꠦꠅꠀ ꠘꠞꠝ ꠝꠘꠦ ꠀꠝꠤ ꠅꠁꠍꠤ ꠛꠠ।
36 ꠔꠥꠝꠤ ꠀꠝꠣꠞ ꠌꠟꠣꠞ ꠙꠕꠞꠦ ꠇꠞꠍ ꠡꠥꠎꠣ,
ꠄꠞꠟꠣꠉꠤ ꠀꠝꠣꠞ ꠙꠣꠅ ꠔ ꠙꠤꠍꠟꠤꠍꠦ ꠘꠣ।
37 ꠀꠝꠣꠞ ꠖꠥꠡꠝꠘ ꠖꠟꠞ ꠈꠞꠦ ꠖꠃꠠꠣꠁꠀ ꠁꠔꠣꠞꠦ ꠗꠞꠍꠤ,
ꠅꠔꠣꠞ ꠡꠞ꠆ꠛꠘꠣꠡ ꠘꠣ ꠇꠞꠤꠀ ꠀꠝꠤ ꠚꠤꠞꠔ ꠘꠣ ꠀꠁꠍꠤ।
38 ꠌꠥꠞꠝꠣꠞ ꠇꠞꠍꠤ ꠔꠣꠞꠣꠞꠦ, ꠃꠛꠣꠁꠔ ꠀꠞ ꠙꠣꠞꠔ ꠘꠣꠄ,
ꠙꠤꠡꠤꠍꠤ ꠔꠣꠞꠣꠞꠦ ꠀꠝꠣꠞ ꠙꠣꠅꠞ ꠔꠟꠣꠄ।
39 ꠎꠥꠖ꠆ꠖꠞ ꠟꠣꠉꠤ ꠔꠥꠝꠤꠃ ꠀꠝꠣꠞ ꠇꠝꠞꠅ ꠛꠟ-ꠡꠇ꠆ꠔꠤ ꠛꠣꠘ꠆ꠖꠤꠀ ꠖꠤꠍ,
ꠀꠝꠣꠞ ꠛꠤꠞꠥꠗꠤ ꠍꠤꠙꠣꠁꠞꠦ ꠀꠝꠣꠞ ꠙꠣꠅꠔ ꠚꠣꠟꠣꠁꠍ।
40 ꠔꠥꠝꠤ ꠀꠝꠣꠞ ꠖꠥꠡꠝꠘ ꠖꠟꠞꠦ ꠜꠣꠉꠣꠁꠍ ꠍꠣꠝꠘ ꠕꠣꠇꠤ,
ꠀꠝꠣꠞꠦ ꠎꠦꠔꠣꠄ ꠁꠋꠡꠣꠁꠘ ꠀꠝꠤ ꠔꠣꠞꠣꠞ ꠛꠤꠘꠣꠡ ꠇꠞꠍꠤ।
41 ꠛꠣꠌꠣꠞ ꠟꠣꠉꠤ ꠔꠣꠞꠣ ꠌꠤꠟ꠆ꠟꠣꠁꠍꠤꠟ, ꠛꠣꠌꠣꠘꠤꠔ ꠇꠦꠃ ꠀꠁꠍꠤꠟ ꠘꠣ,
ꠝꠣꠛꠥꠖꠞ ꠉꠦꠍꠦ ꠡꠣꠁꠎ꠆ꠎ ꠌꠣꠁꠍꠤꠟ, ꠔꠣꠁꠘꠅ ꠁꠔꠣ ꠢꠥꠘꠟꠣ ꠘꠣ।
42 ꠀꠝꠤ ꠁꠔꠣꠞꠦ ꠝꠣꠞꠤꠀ ꠗꠥꠁꠟ-ꠛꠣꠟꠥꠞ ꠟꠣꠈꠣꠘ ꠛꠣꠔꠣꠡꠅ ꠃꠠꠣꠁꠟꠣꠝ,
ꠙꠕꠞ ꠛꠣꠖꠣ-ꠍꠣꠖꠣꠞ ꠟꠣꠈꠣꠘ ꠁꠔꠣꠞꠦ ꠢꠞꠣꠁꠀ ꠚꠣꠟꠣꠁꠟꠣꠝ।
43 ꠅ ꠝꠣꠛꠥꠖ, ꠝꠣꠘꠡꠞ ꠉꠘ꠆ꠒꠉꠥꠟ ꠕꠣꠇꠤ ꠔꠥꠝꠤꠃ ꠛꠣꠌꠣꠁꠍ ꠀꠝꠣꠞꠦ,
ꠀꠝꠣꠞꠦ ꠌꠣꠟꠇꠖꠣꠞ ꠛꠣꠘꠣꠁꠍ ꠢꠇꠟ ꠎꠣꠔꠤꠞ ꠃꠙꠞꠦ,
ꠅꠈꠘ ꠀꠝꠣꠞ ꠈꠦꠎꠝꠔ ꠇꠞꠦꠞ ꠅꠌꠤꠘꠣ ꠎꠣꠔꠤꠄ।
44 ꠀꠝꠣꠞ ꠘꠣꠝ ꠢꠥꠘꠟꠦꠃ ꠔꠣꠞꠣ ꠀꠁꠅꠁꠘ ꠀꠝꠣꠞ ꠔꠟꠦ,
ꠜꠤꠘ-ꠖꠦꠡꠤ ꠅꠇꠟꠦ ꠀꠝꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠦ।
45 ꠢꠃ ꠜꠤꠘ-ꠖꠦꠡꠤ ꠅꠇꠟ ꠘꠤꠞꠣꠡ ꠅꠁꠀ ꠎꠣꠄ,
ꠔꠣꠞꠣ ꠛꠣꠋꠇꠣꠞ ꠕꠣꠇꠤ ꠛꠣꠞ ꠅꠁꠀ ꠇꠣꠙꠤ ꠇꠣꠙꠤ ꠀꠄ।
46 ꠝꠣꠛꠥꠖ ꠔ ꠎꠤꠘ꠆ꠖꠣ! ꠀꠝꠣꠞ ꠀꠡꠞꠄ ꠙꠣꠠꠞ ꠔꠣꠞꠤꠚ ꠅꠃꠇ!
ꠀꠝꠣꠞꠦ ꠛꠣꠌꠣꠅꠞꠣ ꠀꠟ꠆ꠟꠣꠞ ꠁꠎ꠆ꠎꠔ-ꠔꠣꠎꠤꠝ ꠛꠣꠠꠃꠇ!
47 ꠎꠣꠔꠤ ꠅꠇꠟꠞꠦ ꠎꠦꠁꠘ ꠀꠝꠣꠞ ꠅꠗꠤꠘꠦ ꠀꠘꠂꠘ,
ꠔꠣꠁꠘꠃ ꠀꠟ꠆ꠟꠣ, ꠀꠝꠣꠞ ꠙꠇ꠆ꠇ ꠟꠁꠀ ꠔꠣꠞꠣꠞꠦ ꠛꠖꠟꠣ ꠖꠦꠁꠘ।
48 ꠖꠥꠡꠝꠘꠞ ꠀꠔ ꠕꠣꠇꠤ ꠎꠦꠁꠘ ꠀꠝꠣꠞꠦ ꠛꠣꠌꠣꠁꠘ,
ꠔꠥꠝꠤꠃ ꠀꠟ꠆ꠟꠣ, ꠛꠤꠙꠇ꠆ꠇ ꠅꠇꠟꠞ ꠃꠙꠞꠦ ꠔꠥꠝꠤꠃ ꠀꠝꠣꠞꠦ ꠔꠥꠟꠍ,
ꠁꠋꠡꠣ-ꠉꠘ꠆ꠒꠉꠥꠟ ꠇꠞꠞꠣꠞ ꠀꠔ ꠕꠣꠇꠤ ꠔꠥꠝꠤ ꠀꠝꠣꠞꠦ ꠛꠣꠌꠣꠁꠍ।
49 ꠄꠞꠟꠣꠉꠤ ꠅ ꠝꠣꠛꠥꠖ,
ꠢꠇ꠆ꠇꠟ ꠎꠣꠔꠤꠞ ꠉꠦꠍꠦ ꠀꠝꠤ ꠔꠥꠝꠣꠞ ꠔꠣꠞꠤꠚ ꠇꠞꠝꠥ,
ꠢꠣꠝꠦꠡꠣ ꠔꠥꠝꠣꠞ ꠙꠣꠇ ꠘꠣꠝꠞ ꠉꠥꠘꠉꠣꠘ ꠉꠣꠁꠝꠥ।
50 ꠝꠣꠛꠥꠖꠦ ꠔꠣꠘ ꠛꠣꠖꠡꠣꠞꠦ ꠛꠃꠔ ꠛꠣꠞ ꠝꠢꠣ ꠎꠄꠁ ꠇꠞꠍꠂꠘ,
ꠔꠣꠘ ꠈꠦꠟꠣꠚꠔꠤ ꠙꠣꠅꠀ ꠛꠣꠖꠡꠣ ꠖꠣꠃꠖ ꠀꠞ ꠔꠣꠘ ꠈꠣꠘ꠆ꠖꠣꠘꠞꠦ
ꠢꠞ-ꠢꠣꠝꠦꠡꠣ ꠖꠄꠀ-ꠝꠣꠄꠀꠔ ꠞꠣꠈꠍꠂꠘ॥