ꠀꠟ-ꠎꠛꠥꠞ ২৯
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠅ ꠚꠤꠞꠤꠡ꠆ꠔꠣ ꠅꠇꠟ, ꠎꠣꠘꠣꠅ ꠝꠣꠛꠥꠖꠞ ꠉꠥꠘꠉꠣꠘ,
ꠉꠃꠞꠛ ꠀꠞ ꠛꠟ-ꠡꠇ꠆ꠔꠤꠞ ꠇꠕꠣ ꠎꠣꠘꠣꠅ ꠔꠣꠘ,
2 ꠝꠣꠛꠥꠖꠞ ꠘꠣꠝꠦ ꠔꠣꠘ ꠙꠣꠅꠘꠣ ꠉꠃꠞꠛ ꠎꠣꠘꠣꠅ,
ꠙꠛꠤꠔ꠆ꠞꠔꠣꠞ ꠢꠣꠎꠦ ꠢꠣꠎꠤꠀ ꠍꠁꠎꠖꠣꠔ ꠙꠠꠤ ꠎꠣꠅ।
3 ꠝꠣꠛꠥꠖꠞ ꠉꠟꠣꠞ ꠀꠅꠀꠎ ꠖꠞꠤꠀꠞ ꠃꠙꠞꠦ ꠎꠣꠞꠤ ꠀꠍꠦ,
ꠛꠠꠣꠁ-ꠡꠣꠘꠞ ꠀꠟ꠆ꠟꠣꠞ ꠉꠞ꠆ꠎꠘ ꠛꠣꠎ ꠙꠠꠣꠞ ꠟꠣꠈꠣꠘ ꠒꠣꠇꠦ,
ꠀꠟ꠆ꠟꠣꠞ ꠢꠥꠋꠇꠣꠞ ꠎꠣꠞꠤ ꠀꠍꠦ ꠉꠁꠘ ꠖꠞꠤꠀꠞ ꠃꠙꠞꠦ।
4 ꠝꠣꠛꠥꠖꠞ ꠉꠟꠣꠞ ꠀꠅꠀꠎ ꠛꠃꠔ ꠛꠟꠛꠣꠘ,
ꠔꠣꠘ ꠉꠟꠣꠞ ꠀꠅꠀꠎ ꠅꠔꠤ ꠝꠢꠣꠘ।
5 ꠝꠣꠛꠥꠖꠞ ꠉꠟꠣꠞ ꠡꠥꠞꠦ ꠖꠦꠛꠖꠣꠞꠥ ꠉꠣꠍ ꠜꠣꠋꠉꠤꠎꠣꠄ,
ꠟꠦꠛꠣꠘꠘꠞ ꠖꠦꠛꠖꠣꠞꠥ ꠉꠣꠍꠅ ꠜꠣꠋꠉꠤꠀ ꠙꠠꠤꠎꠣꠄ।
6 ꠔꠣꠘ ꠡꠥꠞꠦ ꠛꠣꠍꠥꠞꠞ ꠟꠣꠈꠣꠘ ꠘꠣꠌꠦ ꠟꠦꠛꠣꠘꠘ,
ꠎꠋꠟꠤ ꠛꠄꠞꠣꠞ ꠛꠣꠁꠌ꠆ꠌꠣꠞ ꠟꠣꠈꠣꠘ ꠚꠣꠟꠣꠄ ꠍꠤꠞꠤꠅꠘ।
7 ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠤꠀ,
ꠀꠍꠝꠣꠘ ꠃꠑꠦ ꠎꠤꠟꠇꠣꠁꠀ।
8 ꠝꠣꠛꠥꠖꠞ ꠉꠟꠣꠞ ꠡꠥꠞꠦ ꠝꠞꠥꠜꠥꠝꠤ ꠇꠣꠙꠤꠀ ꠃꠑꠦ,
ꠇꠣꠖꠦꠡ ꠖꠦꠡꠞ ꠝꠞꠥꠜꠥꠝꠤ ꠇꠣꠙꠣꠁꠘ ꠝꠣꠛꠥꠖꠦ।
9 ꠄꠟꠘ ꠉꠣꠍꠅ ꠀꠟꠤꠎꠣꠄ ꠝꠣꠛꠥꠖꠞ ꠀꠅꠀꠎ ꠢꠥꠘꠤꠀ,
ꠎꠋꠟꠣꠞ ꠙꠣꠔꠣ-ꠍꠣꠔꠣ ꠙꠠꠤ ꠎꠣꠄ ꠍꠤꠠꠤꠀ,
ꠇꠣꠛꠣ ꠊꠞꠞ ꠢꠇꠟꠦ ꠇꠄ, ꠍꠥꠛꠢꠣꠘ ꠀꠟ꠆ꠟꠣ!
10 ꠝꠢꠣ ꠛꠁꠘ꠆ꠘꠣꠞ ꠙꠣꠘꠤ ꠀꠍꠤꠟ ꠝꠣꠛꠥꠖꠞ ꠎꠤꠝ꠆ꠝꠣꠄ,
ꠌꠤꠞꠇꠣꠟꠤꠘ ꠛꠣꠖꠡꠣ ꠔꠣꠁꠘ, ꠛꠁꠍꠂꠘ ꠀꠞꠡ ꠈꠣꠘꠣꠄ।
11 ꠛꠟ-ꠡꠇ꠆ꠔꠤ ꠖꠦꠁꠘ ꠝꠣꠛꠥꠖ ꠔꠣꠘ ꠀꠙꠘ ꠙ꠆ꠞꠎꠣꠞꠦ,
ꠡꠣꠘ꠆ꠔꠤ ꠖꠤꠀ ꠞꠢꠝ ꠇꠞꠂꠘ ꠔꠣꠞꠣ ꠢꠇꠟꠞꠦ॥