ꠀꠟ-ꠎꠛꠥꠞ ৩১
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠀꠡꠞꠄ ꠟꠁꠍꠤ ꠉ ꠝꠣꠛꠥꠖ ꠔꠥꠝꠣꠞ ꠍꠣꠄꠀꠄ,
ꠝꠞꠦ ꠎꠣꠘꠥ ꠘꠣ ꠙꠣꠄ ꠇꠥꠘꠥꠖꠤꠘ ꠡꠞꠝ-ꠟꠎ꠆ꠎꠣꠄ,
ꠔꠥꠝꠣꠞ ꠢꠇ ꠛꠤꠌꠣꠞꠦ ꠞꠦꠢꠣꠁ ꠖꠦꠅ ꠀꠝꠣꠄ।
2 ꠀꠝꠣꠞ ꠝꠤꠘꠔꠤ ꠢꠥꠘꠤꠀ ꠎꠟꠖꠤ ꠛꠣꠌꠣꠅ ꠝꠞꠦ,
ꠙꠣꠠꠞ ꠡꠥꠠꠋ ꠅꠁꠀ ꠔꠥꠝꠤ ꠛꠣꠌꠣꠅ ꠀꠝꠣꠞ ꠎꠣꠘꠞꠦ,
ꠀꠡꠞꠄ ꠛꠣꠋꠇꠣꠞ ꠅꠅ ꠉ ꠔꠥꠝꠤ ꠘꠤꠞꠣꠙꠖꠦ ꠞꠣꠈꠅ ꠝꠞꠦ।
3 ꠔꠥꠝꠤ ꠀꠝꠣꠞ ꠀꠡꠞꠄ-ꠡꠥꠠꠋ, ꠝꠎꠛꠥꠔ ꠛꠣꠋꠇꠣꠞ,
ꠙꠕ ꠖꠦꠈꠣꠁꠀ ꠌꠣꠟꠣꠅ ꠝꠞꠦ ꠖꠥꠀꠁ ꠟꠣꠉꠦ ꠔꠥꠝꠣꠞ।
4 ꠟꠥꠇꠣꠁꠀ ꠙꠣꠔꠣꠁꠟ ꠚꠣꠘ꠆ꠖꠅ ꠕꠣꠇꠤ ꠝꠞꠦ ꠇꠞꠅ ꠃꠖ꠆ꠖꠣꠞ,
ꠔꠥꠝꠤꠃ ꠈꠣꠟꠤ ꠀꠝꠣꠞ ꠀꠡꠞꠄ, ꠀꠝꠣꠞ ꠛꠣꠋꠇꠣꠞ।
5 ꠀꠝꠣꠞ ꠞꠥꠢꠥ ꠔꠥꠝꠣꠞ ꠀꠔꠅ ꠡꠙꠤꠀ ꠖꠤꠟꠣꠁꠟꠣꠝ,
ꠅ ꠝꠣꠛꠥꠖ, ꠢꠇ ꠀꠟ꠆ꠟꠣ, ꠛꠣꠌꠣꠁꠍ ꠔ ꠀꠝꠣꠞ ꠎꠣꠘ।
6 ꠅꠡꠣꠠ ꠝꠥꠞ꠆ꠔꠤꠞ ꠙꠥꠎꠣꠞꠤꠞꠦ ꠊꠤꠘ꠆ꠘꠣꠁ ꠀꠝꠤ,
ꠝꠣꠛꠥꠖꠞ ꠃꠙꠞꠦꠃ ꠀꠝꠤ ꠜꠞꠡꠣ ꠇꠞꠤ ꠈꠣꠟꠤ।
7 ꠀꠝꠣꠞ ꠎꠣꠘꠞ ꠡꠛ ꠝꠍꠤꠛꠔ ꠛꠦꠢꠣꠟ ꠖꠡꠣ ꠖꠦꠈꠍ ꠔꠥꠝꠤ,
ꠔꠥꠝꠣꠞ ꠖꠄꠀ-ꠝꠣꠄꠀ ꠙꠣꠁꠀ ꠈꠥꠡꠤ-ꠚꠥꠞ꠆ꠔꠤ ꠇꠞꠝꠥ ꠀꠝꠤ।
8 ꠖꠥꠡꠝꠘꠞ ꠀꠔꠅ ꠔꠥꠝꠤ ꠖꠤꠍ ꠘꠣ ꠝꠞꠦ ꠔꠥꠟꠤꠀ,
ꠈꠥꠟꠣ-ꠝꠦꠟꠣ ꠝꠣꠑꠅ ꠝꠞꠦ ꠞꠣꠈꠍ ꠃꠛꠣ ꠇꠞꠣꠁꠀ।
9 ꠖꠄꠀ ꠇꠞꠅ ꠅꠉ ꠝꠣꠛꠥꠖ ꠝꠍꠤꠛꠔꠅ ꠀꠍꠤ,
ꠌꠃꠈ ꠀꠞ ꠖꠦꠢ-ꠇꠣꠄꠀꠄ ꠇꠥꠘꠥꠝꠘ꠆ꠔꠦ ꠎꠤꠔꠣ ꠞꠁꠍꠤ।
10 ꠎꠤꠘ꠆ꠖꠦꠉꠤ ꠝꠞ ꠇ꠆ꠇꠄ ꠅꠁꠟ ꠖꠥꠈ-ꠇꠡ꠆ꠐꠄ ꠇꠣꠘ꠆ꠖꠤ ꠇꠣꠘ꠆ꠖꠤ,
ꠉꠥꠘꠣꠞ ꠖꠣꠄ ꠛꠟ ꠇꠝꠤꠀ ꠢꠥꠇꠣꠁ ꠉꠦꠍꠦ ꠝꠞ ꠀꠒ꠆ꠒꠤ।
11 ꠖꠥꠡꠝꠘ ꠅꠇꠟꠦ ꠝꠞꠦ ꠊꠤꠘ꠆ꠘꠣꠄ,
ꠀꠝꠣꠞ ꠀꠞꠤ-ꠚꠞꠤꠄꠅ ꠘꠤꠘ꠆ꠖꠣꠄ,
ꠌꠤꠘꠣ-ꠎꠣꠘꠣ ꠎꠘꠦ ꠖꠦꠈꠟꠦ ꠒꠞꠣꠁꠀ ꠢꠞꠦ,
ꠖꠃꠠꠣꠁꠀ ꠜꠣꠉꠦ ꠝꠣꠘꠡꠦ ꠙꠕꠦ-ꠊꠣꠐꠦ ꠖꠦꠈꠟꠦ ꠝꠞꠦ।
12 ꠝꠥꠞ꠆ꠖꠣ ꠎꠘꠞ ꠟꠣꠈꠣꠘ ꠔ ꠚꠣꠃꠞꠤꠟꠤꠍꠦ ꠝꠞꠦ,
ꠜꠣꠋꠉꠣ-ꠘꠡ꠆ꠐ ꠝꠣꠟꠞ ꠟꠣꠈꠣꠘ ꠝꠘꠅ ꠇꠞꠦ ꠀꠝꠣꠞꠦ।
13 ꠛꠃꠔꠞ ꠇꠣꠘꠣ-ꠇꠣꠘꠤ ꠀꠝꠤ ꠢꠥꠘꠤꠀꠞ,
ꠒꠞ-ꠈꠚꠦ ꠜꠞꠣ ꠌꠣꠁꠞꠅꠛꠣꠄ ꠀꠝꠣꠞ,
ꠀꠝꠣꠞ ꠛꠤꠞꠥꠖ꠆ꠖꠦ ꠔꠣꠞꠣ ꠢꠇꠟ ꠄꠇꠈꠣꠘꠅ ꠅꠁꠍꠦ,
ꠎꠣꠘ ꠇꠣꠠꠤꠀ ꠘꠤꠔꠉꠤ ꠇꠞꠤ ꠚꠘ꠆ꠖꠤ ꠇꠞꠤꠍꠦ।
14 ꠀꠝꠤ ꠔ ꠜꠞꠡꠣ ꠇꠞꠍꠤ ꠝꠣꠛꠥꠖ ꠔꠥꠝꠣꠞ ꠃꠙꠞꠦ,
ꠔꠥꠝꠤꠃ ꠀꠝꠣꠞ ꠝꠣꠛꠥꠖ ꠀꠟ꠆ꠟꠣ ꠎꠣꠘꠣꠁ ꠢꠇꠟꠞꠦ।
15 ꠀꠝꠣꠞ ꠢꠣꠄꠀꠔꠤ ꠔ ꠔꠥꠝꠣꠞꠃ ꠀꠔꠅ,
ꠈꠦꠖꠣꠅꠞꠣ ꠖꠥꠡꠝꠘ ꠕꠣꠇꠤ ꠢꠦꠚꠣꠎꠔ ꠇꠞꠅ।
16 ꠔꠥꠝꠣꠞ ꠘꠥꠞꠞ ꠖꠤꠖꠣꠞ ꠖꠦꠈꠣꠅ ꠀꠝꠤ ꠉꠥꠟꠣꠝꠞꠦ,
ꠔꠥꠝꠣꠞ ꠀꠙꠘ ꠖꠄꠀ-ꠝꠣꠄꠀꠄ ꠛꠣꠌꠣꠅ ꠀꠝꠣꠞꠦ।
17 ꠡꠞꠝ ꠖꠤꠅ ꠘꠣ ꠝꠞꠦ ꠝꠣꠛꠥꠖ ꠎꠣꠘꠣꠁ ꠝꠤꠘꠔꠤ,
ꠘꠣꠚꠞꠝꠣꠘꠦ ꠡꠞꠝ ꠙꠣꠁꠀ ꠞꠡꠣꠔꠟꠦ ꠎꠣꠃꠇꠉꠤ।
18 ꠖꠥꠁꠅ ꠑꠥꠐ ꠛꠘ꠆ꠖ ꠅꠁꠎꠣꠃꠇ ꠛꠦꠁꠝꠣꠘꠤ ꠎꠦ ꠝꠣꠔꠦ,
ꠛꠠꠣꠁ-ꠉꠞꠤꠝꠣ ꠖꠦꠈꠣꠄ ꠎꠣꠞꠣ ꠙꠞꠦꠎꠉꠣꠞꠞ ꠟꠉꠦ।
19 ꠔꠥꠝꠣꠞ ꠀꠡꠤꠇ ꠛꠘ꠆ꠖꠣꠞ ꠟꠣꠉꠤ ꠎꠝꠣ ꠀꠍꠦ ꠇꠔ ꠖꠄꠀ,
ꠀꠡꠞꠄ ꠟꠁꠍꠦ ꠎꠣꠞꠣ ꠔꠥꠝꠣꠞ ꠍꠣꠄꠀꠔ ꠀꠁꠀ,
ꠢꠇꠟꠞ ꠍꠣꠝꠘꠦ ꠔꠣꠞꠣꠞꠦ ꠖꠦꠈꠣꠁꠍ ꠔꠥꠝꠣꠞ ꠅꠔ ꠝꠣꠄꠀ।
20 ꠔꠣꠞꠣꠞꠦ ꠟꠥꠇꠣꠁꠀ ꠞꠣꠈꠅ ꠔꠥꠝꠣꠞꠃ ꠙꠣꠇ ꠖꠤꠖꠣꠞꠅ,
ꠖꠥꠡꠝꠘꠞ ꠎꠤꠚꠞꠣꠞ ꠖꠣꠙꠐ ꠕꠣꠇꠤ ꠞꠣꠈꠅ ꠔꠥꠝꠣꠞ ꠛꠡꠔ ꠊꠞꠅ।
21 ꠝꠣꠛꠥꠖꠃ ꠝꠥꠛꠣꠞꠇ, ꠖꠥꠡꠝꠘꠞ ꠊꠦꠞꠣꠅ ꠇꠞꠣ ꠘꠉꠞꠅ,
ꠀꠌꠣꠘꠇ ꠖꠄꠀ-ꠝꠣꠄꠀꠄ ꠞꠣꠈꠍꠂꠘ ꠝꠞꠦ ꠘꠤꠞꠣꠙꠖꠅ।
22 ꠒꠞꠞ ꠌꠥꠐꠦ ꠇꠁꠍꠟꠣꠝ ꠔ ꠀꠝꠤ,
“ꠢꠞꠤ ꠉꠦꠍꠤ ꠖꠥꠞꠁ ꠔꠥꠝꠣꠞ ꠘꠎꠞ ꠕꠣꠇꠤ,”
ꠀꠝꠤ ꠎꠦꠛꠟꠣ ꠒꠣꠇꠤꠍꠟꠣꠝ ꠡꠣꠁꠎ꠆ꠎꠞ ꠟꠣꠉꠤ,
ꠒꠣꠇꠞ ꠎꠥꠀꠙ ꠖꠤꠟꠣꠄ ꠔꠥꠝꠤ ꠢꠥꠘꠟꠣꠄ ꠝꠤꠘꠔꠤ।
23 ꠝꠣꠛꠥꠖꠞ ꠀꠡꠤꠇ ꠛꠘꠅ ꠅꠞꠦ ꠙꠞꠦꠎꠉꠣꠞ ꠢꠇꠟ ꠛꠘ꠆ꠖꠣ,
ꠢꠇ ꠝꠣꠘꠡꠞꠦ ꠛꠣꠌꠣꠁꠀ ꠔꠣꠁꠘ ꠅꠢꠋꠇꠣꠞꠤꠞꠦ ꠖꠦꠁꠘ ꠇꠑꠤꠘ ꠡꠣꠎꠣ।
24 ꠛꠥꠇꠥꠔ ꠡꠣꠅꠡ ꠞꠣꠈꠅ ꠖꠤꠟꠅ ꠎꠥꠉꠣꠅ ꠛꠟ,
ꠀꠍ ꠎꠔ ꠝꠣꠛꠥꠖꠞ ꠀꠡꠤꠇ ꠛꠘ꠆ꠖꠣ ꠅꠇꠟ॥