ꠀꠟ-ꠎꠛꠥꠞ ৪১
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠢꠃ ꠝꠣꠘꠥꠡ ꠗꠁꠘ꠆ꠘ, ꠖꠥꠈꠤ-ꠇꠣꠋꠉꠣꠟꠞ ꠇꠕꠣ ꠌꠤꠘ꠆ꠔꠣ ꠇꠞꠦ ꠎꠦ,
ꠝꠍꠤꠛꠔꠞ ꠖꠤꠘꠅ ꠝꠣꠛꠥꠖꠦ ꠘꠤꠌ꠆ꠌꠤꠔ ꠃꠖ꠆ꠖꠣꠞ ꠇꠞꠛꠣ ꠔꠣꠞꠦ।
2 ꠝꠣꠛꠥꠖꠦ ꠔꠣꠞꠦ ꠞꠇ꠆ꠇꠣ ꠇꠞꠤꠀ ꠞꠣꠈꠛꠣ ꠛꠣꠌꠣꠁꠀ,
ꠖꠦꠡꠞ ꠝꠣꠘꠡꠦ ꠔꠣꠞꠦ ꠡꠥꠇꠤꠟꠣ ꠝꠣꠘꠥꠡ ꠇꠁꠛꠣ,
ꠖꠥꠡꠝꠘꠞ ꠀꠔꠅ ꠝꠣꠛꠥꠖꠦ ꠔꠣꠞꠦ ꠡꠙꠤꠀ ꠘꠣ ꠖꠤꠛꠣ।
3 ꠛꠦꠝꠣꠞꠦ ꠛꠤꠍꠘꠣꠔ ꠙꠠꠤ ꠉꠦꠟꠦ ꠝꠣꠛꠥꠖꠦ ꠔꠣꠞ ꠀꠍꠣꠘ ꠇꠞꠂꠘ,
ꠡꠤꠚꠣ ꠇꠞꠤꠀ ꠛꠤꠍꠘꠣ ꠕꠣꠇꠤ ꠔꠣꠞꠦ ꠔꠥꠟꠤꠀ ꠀꠘꠂꠘ।
4 ꠀꠝꠤ ꠇꠁꠍꠤ, “ꠀꠝꠤ ꠔ ꠇꠞꠍꠤ ꠔꠥꠝꠣꠞ ꠛꠤꠞꠥꠖ꠆ꠖꠦ ꠉꠥꠘꠣ,
ꠅꠉ ꠝꠣꠛꠥꠖ, ꠖꠄꠀ ꠇꠞꠤꠀ ꠇꠞꠅ ꠝꠞꠦ ꠡꠤꠚꠣ।”
5 ꠀꠝꠣꠞ ꠈꠦꠔꠤ ꠌꠣꠁꠀ ꠖꠥꠡꠝꠘꠦ ꠇꠄ, “ꠅꠉꠥ ꠇꠥꠘ ꠡꠝꠄ ꠝꠞꠛ?
ꠇꠥꠘ ꠡꠝꠄ ꠔꠣꠞ ꠘꠣꠝ-ꠘꠤꠡꠣꠘꠣ ꠎꠝꠤꠘ ꠕꠣꠇꠤ ꠝꠥꠍꠤ ꠎꠤꠛ?”
6 ꠔꠣꠞꠣ ꠝꠞꠦ ꠖꠦꠈꠣꠔ ꠀꠁꠟꠦ ꠜꠣꠅꠔꠣꠛꠣꠎꠤ ꠝꠣꠔꠦ,
ꠔꠣꠞꠣꠞ ꠝꠘꠅ ꠎꠝꠣꠁꠟ ꠛꠖꠘꠣꠝ ꠞꠐꠣꠄ ꠉꠤꠀ ꠛꠣꠞꠦ।
7 ꠀꠝꠣꠞ ꠛꠤꠞꠥꠗꠤ ꠅꠇꠟ ꠝꠤꠟꠤꠀ ꠇꠣꠘꠣ-ꠇꠣꠘꠤ ꠇꠞꠦ,
ꠀꠝꠣꠞ ꠈꠦꠔꠤ ꠇꠞꠔ ꠇꠤꠟꠣ ꠅꠃ ꠗꠣꠘ꠆ꠖꠣꠄ ꠕꠣꠇꠦ।
8 ꠇꠄ ꠔꠣꠞꠣ, “ꠛꠃꠔ ꠛꠠ ꠈꠣꠞꠣꠙꠤꠄ ꠔꠣꠞꠦ ꠎꠣꠔꠤꠀ ꠗꠞꠍꠦ,
ꠃꠑꠤꠔ ꠙꠣꠞꠔ ꠘꠣꠄ ꠀꠞ ꠎꠦꠈꠣꠘꠅ ꠢꠦ ꠢꠥꠔꠣꠁꠟ ꠀꠍꠦ।”
9 ꠄꠇ ꠕꠣꠟꠅ ꠛꠁꠀ ꠎꠦꠉꠤꠄ ꠈꠣꠁꠔ, ꠜꠞꠡꠣ ꠇꠞꠔꠣꠝ ꠎꠣꠞ ꠃꠙꠞꠦ,
ꠅꠈꠘ ꠅꠃ ꠝꠣꠄꠀꠞ ꠖꠥꠡ꠆ꠔꠦꠅ ꠀꠝꠣꠞ ꠛꠤꠞꠥꠖ꠆ꠖꠦ ꠟꠣꠉꠤꠉꠦꠍꠦ।
10 ꠅꠉ ꠝꠣꠛꠥꠖ ꠞꠢꠝ ꠇꠞꠅ ꠔꠥꠝꠤ ꠘꠤꠎꠦ ꠝꠞꠦ,
ꠔꠣꠞꠣꠞ ꠛꠖꠟꠣ ꠘꠤꠛꠣꠞ ꠟꠣꠉꠤ ꠔꠥꠟꠤꠟꠣꠅ ꠀꠝꠣꠞꠦ।
11 ꠀꠝꠣꠞ ꠃꠙꠞꠦ ꠈꠥꠡꠤ ꠔꠥꠝꠤ ꠁꠈꠣꠘ ꠀꠝꠤ ꠎꠣꠘꠤ,
ꠖꠥꠡꠝꠘꠦ ꠔ ꠝꠞ ꠛꠤꠞꠥꠖ꠆ꠖꠦ ꠌꠤꠟ꠆ꠟꠣꠄ ꠘꠣ ꠀꠞ ꠎꠄꠅꠞ ꠌꠤꠟ꠆ꠟꠣꠘꠤ।
12 ꠔꠥꠝꠤ ꠗꠞꠤꠀ ꠞꠣꠈꠍ ꠝꠞꠦ ꠢꠇ-ꠢꠣꠟꠣꠟ ꠖꠦꠈꠤꠀ,
ꠔꠥꠝꠣꠞ ꠖꠤꠖꠣꠞꠅ ꠎꠣꠉꠣ ꠖꠤꠍ ꠌꠤꠞꠇꠣꠟꠞ ꠟꠣꠉꠤꠀ।
13 ꠢꠇ꠆ꠇꠟ ꠙ꠆ꠞꠡꠋꠡꠣ ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠀꠟ꠆ꠟꠣꠞ ꠅꠃꠇ,
ꠡꠥꠞꠥ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠌꠤꠞꠇꠣꠟ ꠎꠣꠞꠤ ꠞꠃꠇ।
ꠀꠝꠤꠘ ꠍꠥꠝ꠆ꠝꠣ-ꠀꠝꠤꠘ॥