ꠀꠟ-ꠎꠛꠥꠞ ৫
ꠄꠛꠣꠖꠔ-ꠛꠘ꠆ꠖꠦꠉꠤ ꠙꠞꠤꠌꠣꠟꠇꠞ ꠟꠣꠉꠤ: ꠛꠣꠡꠤꠞ ꠡꠥꠞꠦ।
ꠢꠎꠞꠔ ꠖꠣꠃꠖꠞ ꠝꠤꠎꠝꠞ।
1 ꠅ ꠝꠣꠛꠥꠖ, ꠀꠝꠣꠞ ꠚꠞꠤꠀꠖ ꠇꠛꠥꠟ ꠇꠞꠅ,
ꠖꠤꠟꠞ ꠇꠣꠘ꠆ꠖꠘ ꠀꠝꠣꠞ ꠔꠥꠝꠣꠞ ꠇꠣꠘꠦ ꠢꠥꠘꠅ।
2 ꠅ ꠀꠝꠣꠞ ꠀꠟ꠆ꠟꠣ, ꠀꠝꠣꠞ ꠛꠣꠖꠡꠣ ꠔꠥꠝꠤ,
ꠀꠝꠣꠞ ꠀꠅꠀꠎ ꠢꠥꠘꠅ ꠔꠥꠝꠤ ꠖꠄꠀ ꠇꠞꠤ,
ꠖꠥꠀ-ꠝꠤꠘꠔꠤ ꠇꠞꠤ ꠔꠥꠝꠣꠞ ꠉꠦꠍꠦꠃ ꠈꠣꠟꠤ।
3 ꠔꠥꠝꠤ ꠙꠞꠔꠤ ꠖꠤꠘ ꠚꠎꠞꠦ ꠀꠝꠣꠞ ꠛꠥꠟꠤ ꠔ ꠢꠥꠘꠅ,
ꠖꠤꠟꠞ ꠢꠇ꠆ꠇꠟꠔꠣ ꠢꠣꠎꠣꠁ ꠞꠣꠈꠤ ꠔꠥꠝꠣꠞ ꠖꠤꠖꠣꠞꠅ।
4 ꠔꠥꠝꠤ ꠔ ꠁꠟꠣ ꠀꠟ꠆ꠟꠣ ꠘꠣꠄ ꠈꠣꠞꠣꠙꠤ ꠎꠣꠞ ꠙꠍꠘ꠆ꠖ,
ꠔꠥꠝꠣꠞ ꠝꠦꠝꠣꠘ ꠅꠁꠔ ꠘꠣꠄ ꠇꠥꠘꠥ ꠙꠣꠙꠤ ꠎꠘ।
5 ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠅꠞꠣꠞ ꠑꠣꠁ ꠘꠣꠁ ꠔꠥꠝꠣꠞ ꠍꠣꠝꠘꠦ,
ꠢꠇꠟ ꠟꠣꠈꠣꠘ ꠘꠣꠚꠞꠝꠣꠘꠤ ꠔꠥꠝꠤ ꠊꠤꠘ꠆ꠘꠣ ꠇꠞꠅ ꠘꠤꠎꠦ।
6 ꠝꠤꠍꠣ ꠇꠕꠣ ꠝꠣꠔꠞꠣꠞꠦ ꠘꠤꠌ꠆ꠌꠄ ꠛꠤꠘꠣꠡ ꠇꠞꠅ ꠔꠥꠝꠤ,
ꠝꠣꠛꠥꠖꠦ ꠔ ꠊꠤꠘ꠆ꠘꠣꠁꠘ ꠛꠦꠡꠤ ꠈꠥꠘ-ꠈꠣꠞꠣꠙꠤ ꠍꠟ-ꠌꠔꠥꠞꠤ।
7 ꠅꠁꠟꠦ ꠔꠥꠝꠣꠞ ꠖꠄꠀ-ꠝꠣꠄꠀꠄ ꠔꠥꠝꠣꠞ ꠊꠞꠅ ꠢꠣꠝꠣꠁꠝꠥ ꠀꠝꠤ,
ꠘꠔ ꠅꠁꠀ ꠍꠁꠎꠖꠣ ꠇꠞꠝꠥ ꠔꠥꠝꠣꠞ ꠙꠛꠤꠔ꠆ꠞ ꠊꠞ ꠝꠥꠈꠤ।
8 ꠅ ꠝꠣꠛꠥꠖ, ꠀꠝꠣꠞ ꠌꠣꠁꠞꠅꠛꠣꠄ ꠔ ꠖꠥꠡꠝꠘꠦ ꠜꠞꠣ,
ꠔꠥꠝꠣꠞ ꠙꠞꠦꠎꠉꠣꠞꠤꠞ ꠙꠕꠦ ꠝꠞꠦ ꠘꠦꠅ ꠌꠣꠟꠣꠁꠀ,
ꠀꠝꠣꠞ ꠍꠣꠝꠘꠦ ꠔꠥꠝꠣꠞ ꠙꠕ ꠇꠞꠅ ꠍꠢꠤ-ꠡꠥꠎꠣ।
9 ꠔꠣꠞꠣꠞ ꠝꠥꠈꠞ ꠇꠥꠘꠥ ꠇꠕꠣꠃ ꠄꠇꠤꠘꠞ ꠎꠥꠇꠣ ꠘꠣꠄ,
ꠔꠣꠞꠣꠞ ꠖꠤꠟ-ꠝꠘ ꠜꠞꠣ ꠈꠣꠟꠤ ꠛꠤꠘꠣꠡꠞ ꠌꠤꠘ꠆ꠔꠣꠄ,
ꠈꠥꠟꠣ ꠇꠄꠛꠞꠞ ꠙꠌꠣ ꠟꠣꠡꠞ ꠟꠣꠈꠣꠘ ꠔꠣꠞꠣꠞ ꠉꠟꠣ,
ꠚꠣꠝ-ꠙꠐ꠆ꠐꠤ ꠝꠣꠞꠣꠞ ꠃꠡ꠆ꠔꠣꠖ ꠔ ꠔꠣꠞꠣꠞ ꠎꠤꠚꠞꠣ।
10 ꠅ ꠀꠟ꠆ꠟꠣ, ꠔꠥꠝꠤ ꠁꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠅ,
ꠔꠣꠞꠣꠞ ꠡꠞ꠆ꠛꠘꠣꠡ ꠅꠃꠇ ꠔꠣꠞꠣꠞ ꠙꠣꠔꠣꠁꠟ ꠚꠣꠘ꠆ꠖꠅ,
ꠡꠤꠝꠣ ꠍꠣꠠꠣ ꠘꠣꠚꠞꠝꠣꠘꠤꠞ ꠖꠣꠄ ꠈꠦꠖꠣꠅ ꠅꠔꠣꠞꠦ,
ꠛꠤꠞꠥꠗꠤꠔꠣ ꠇꠞꠞꠣ ꠔ ꠅꠔꠣꠄ ꠔꠥꠝꠤ ꠀꠟ꠆ꠟꠣꠞ ꠟꠉꠦ।
11 ꠅꠁꠟꠦ ꠔꠥꠝꠣꠞ ꠍꠣꠄꠀꠔ ꠛꠡꠔꠇꠣꠞꠤ ꠈꠥꠡꠦ-ꠛꠣꠡꠦ ꠞꠃꠇ,
ꠢꠞ-ꠢꠣꠝꠦꠡꠣ ꠈꠥꠡꠤꠞ ꠉꠎꠟ ꠔꠣꠞꠣ ꠢꠇꠟꠦ ꠉꠣꠃꠇ।
ꠔꠥꠝꠤ ꠛꠣꠌꠣꠅ ꠔꠣꠞꠣꠞꠦ ꠔꠥꠝꠣꠞ ꠀꠡꠤꠇ ꠎꠣꠞꠣ,
ꠀꠝꠥꠖ-ꠚꠥꠞ꠆ꠔꠤ ꠇꠞꠃꠇ ꠡꠛꠦ ꠔꠥꠝꠣꠞ ꠘꠣꠝꠦ ꠔꠣꠞꠣ।
12 ꠔꠥꠝꠤꠃ ꠝꠣꠛꠥꠖꠦ ꠙꠞꠦꠎꠉꠣꠞꠞꠦ ꠖꠦꠅ ꠞꠢꠝ-ꠛꠞꠇꠔ,
ꠞꠢꠝꠔꠞ ꠛꠦꠠꠣꠖꠤ ꠔꠥꠝꠤ ꠔꠣꠞꠣꠞꠦ ꠞꠣꠈꠅ ꠘꠤꠞꠣꠙꠖ॥