ꠀꠟ-ꠎꠛꠥꠞ ৭
ꠢꠎꠞꠔ ꠖꠣꠃꠖꠞ ꠝꠤꠎꠝꠞ। ꠡꠥꠞ ‘ꠡꠤꠉ꠆ꠉꠣꠁꠅꠘ’। ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠇꠥꠡꠦ ꠔꠣꠘꠞꠦ ꠉꠣꠟꠤ ꠖꠦꠅꠀꠄ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠘ ꠚꠞꠤꠀꠖ।
ꠅꠉ ꠀꠝꠣꠞ ꠝꠣꠛꠥꠖ ꠄꠟꠣꠢꠤ
ꠔꠥꠝꠣꠞ ꠍꠣꠄꠀꠔ ꠀꠡꠞꠄ ꠟꠁꠍꠤ,
ꠈꠞꠦ ꠅꠁꠀ ꠈꠦꠖꠣꠁꠞꠣ ꠎꠣꠞꠣ ꠀꠝꠣꠞꠦ,
ꠔꠣꠞꠣꠞ ꠀꠔ ꠕꠣꠇꠤ ꠛꠣꠌꠣꠅ ꠝꠞꠦ।
ꠘꠣꠁꠟꠦ ꠡꠤꠋꠢꠞ ꠟꠣꠈꠣꠘ ꠐꠥꠇꠞꠣ ꠐꠥꠇꠞꠣ ꠇꠞꠛ ꠝꠞꠦ,
ꠚꠣꠞꠤꠀ-ꠌꠤꠞꠤꠀ ꠝꠣꠞꠛ ꠔ ꠛꠣꠌꠣꠘꠤꠔ ꠇꠦꠃ ꠘꠣ ꠀꠁꠟꠦ।
 
ꠅꠉ ꠀꠝꠣꠞ ꠝꠣꠛꠥꠖ ꠄꠟꠣꠢꠤ, ꠎꠥꠖꠤ ꠇꠞꠤꠀ ꠕꠣꠇꠤ ꠇꠥꠘꠥ ꠈꠣꠞꠣꠙꠤ,
ꠀꠝꠣꠞ ꠀꠔꠅ ꠞꠄ ꠎꠥꠖꠤ ꠇꠥꠘꠥ ꠘꠣꠚꠞꠝꠣꠘꠤ,
ꠝꠞ ꠛꠤꠞꠥꠗꠤ ꠘꠣꠄ ꠔꠦꠛꠥꠅ ꠎꠥꠖꠤ ꠈꠦꠔꠤ ꠇꠞꠤꠀ ꠕꠣꠇꠤ,
—ꠛꠞꠋ ꠛꠤꠘꠣ ꠇꠣꠞꠘꠦ ꠎꠦ ꠖꠥꠡꠝꠘ ꠅꠁꠍꠦ ꠔꠣꠞꠅ ꠃꠙꠇꠣꠞ ꠇꠞꠍꠤ—
ꠔꠦ ꠖꠥꠡꠝꠘꠦ ꠀꠝꠣꠞꠦ ꠗꠞꠤꠟꠣꠃꠇ ꠈꠦꠖꠣꠁꠀ,
ꠝꠣꠐꠤꠔ ꠚꠣꠟꠣꠁꠀ ꠙꠣꠅꠖꠤ ꠙꠣꠠꠣꠁꠀ,
ꠗꠥꠟꠣꠔ ꠝꠤꠡꠣꠁꠟꠣꠃꠇ ꠀꠝꠣꠞ ꠇꠣꠄꠀ।
(ꠍꠦꠟꠣ)
 
ꠝꠣꠛꠥꠖ ꠉ, ꠔꠥꠝꠣꠞ ꠝꠢꠣ ꠉꠥꠍꠣꠄ ꠀꠝꠣꠞ ꠙꠇ꠆ꠇꠦ ꠃꠛꠣꠅ,
ꠎꠣꠞꠣ ꠝꠞꠦ ꠁꠋꠡꠣꠄ ꠅꠔꠣ ꠖꠥꠡꠝꠘꠞ ꠛꠤꠙꠇ꠆ꠇꠦ ꠈꠣꠠꠣ ꠅꠅ,
ꠅ ꠀꠝꠣꠞ ꠀꠟ꠆ꠟꠣ, ꠔꠥꠝꠣꠞ ꠢꠇ ꠛꠤꠌꠣꠞ ꠎꠣꠞꠤ ꠇꠞꠤꠟꠣꠅ।
ꠔꠥꠝꠣꠞ ꠌꠣꠁꠞꠅ ꠉꠣꠟꠣꠔ ꠎꠝꠣ ꠅꠃꠇ ꠖꠥꠘꠤꠀꠞ ꠢꠇꠟ ꠎꠣꠔꠤ,
ꠀꠞꠡꠅ ꠛꠁꠀ ꠖꠦꠈꠅ ꠔꠣꠞꠣꠞ ꠢꠇꠟ ꠇꠥ-ꠇꠤꠞ꠆ꠔꠤ।
ꠝꠣꠛꠥꠖ ꠅꠔꠣ ꠢꠇꠟ ꠎꠣꠔꠤꠞ ꠛꠤꠌꠣꠞꠇ ꠔ ꠔꠥꠝꠤ,
ꠞꠣꠄ ꠖꠤꠅ ꠖꠦꠈꠤꠀ ꠝꠞ ꠙꠞꠦꠎꠉꠣꠞꠤ ꠀꠞ ꠢꠇ-ꠢꠣꠟꠣꠟꠤ।
ꠘꠣꠚꠞꠝꠣꠘꠞ ꠎꠥꠟꠥꠝ ꠛꠘ꠆ꠖ ꠇꠞꠤꠟꠣꠃꠇ꠆ꠇꠣ,
ꠙꠞꠦꠎꠉꠣꠞꠞꠦ ꠝꠎꠛꠥꠔ ꠛꠣꠘꠣꠅ ꠅ ꠢꠇ ꠀꠟ꠆ꠟꠣ,
ꠖꠤꠟ-ꠝꠘꠞ ꠜꠤꠔꠞ ꠔꠥꠝꠤ ꠎꠣꠌꠣꠁ ꠇꠞꠅ ꠢꠇꠟꠔꠣ।
 
10 ꠀꠟ꠆ꠟꠣ ꠙꠣꠇ ꠝꠞ ꠞꠇ꠆ꠇꠣꠇꠣꠞꠤ, ꠎꠣꠘ ꠛꠣꠌꠣꠁꠘ ꠀꠝꠣꠞ,
ꠔꠣꠁꠘꠃ ꠛꠣꠌꠣꠘꠦꠀꠟꠣ ꠡꠞꠟ ꠝꠘꠞ ꠛꠘ꠆ꠖꠣꠞ।
11 ꠀꠟ꠆ꠟꠣ ꠙꠣꠇꠦ ꠇꠞꠂꠘ ꠢꠇ ꠛꠤꠌꠣꠞ,
ꠘꠣꠚꠞꠝꠣꠘꠞ ꠃꠙꠞꠦ ꠉꠥꠍꠣ ꠇꠞꠂꠘ ꠛꠞꠣꠛꠞ,
12 ꠝꠣꠘꠡꠦ ꠔꠃꠛꠣ ꠘꠣ ꠇꠞꠤꠟꠦ ꠔꠣꠘ ꠔꠟꠥꠀꠞ ꠗꠣꠞꠣꠁꠛꠣ,
ꠔꠤꠞ-ꠗꠘꠥꠇ ꠟꠁꠀ ꠔꠣꠁꠘ ꠗꠘꠥꠇꠅ ꠔꠤꠞ ꠟꠣꠉꠣꠁꠛꠣ।
13 ꠎꠣꠘꠦ ꠝꠣꠞꠣꠞ ꠀꠔꠤꠀꠞ ꠔꠣꠁꠘ ꠎꠥꠁꠔ ꠇꠞꠍꠂꠘ,
ꠔꠣꠘ ꠔꠤꠞ ꠅꠇꠟꠞꠦ ꠔꠣꠁꠘ ꠀꠉꠥꠁꠘꠖꠤ ꠢꠣꠎꠣꠁꠍꠂꠘ।
 
14 ꠘꠣꠚꠞꠝꠣꠘꠦ ꠛꠖ ꠇꠣꠝꠞꠦ ꠙꠦꠐꠞ ꠜꠤꠔꠞꠦ ꠞꠣꠈꠦ,
ꠛꠖ ꠇꠣꠝꠦ ꠙꠦꠐ ꠜꠞꠤ ꠉꠦꠟꠦ ꠎꠘꠝ ꠖꠦꠄ ꠝꠤꠍꠣꠞꠦ।
15 ꠝꠣꠐꠤ ꠈꠥꠠꠤꠀ ꠇꠥꠙ ꠈꠥꠖꠦ ꠢꠦ ꠉꠁꠘ ꠇꠞꠤꠀ,
ꠔꠣꠞ ꠛꠣꠘꠣꠁꠟ ꠅꠃ ꠇꠥꠙꠅ ꠘꠤꠎꠦ ꠎꠣꠄ ꠙꠠꠤꠀ।
16 ꠔꠣꠞ ꠘꠣꠚꠞꠝꠣꠘꠤ ꠔ ꠔꠣꠞ ꠝꠣꠕꠣꠔ ꠚꠤꠞꠤꠀ ꠀꠄ,
ꠔꠣꠞ ꠎꠥꠟꠥꠝ ꠀꠁꠀ ꠘꠤꠎꠞ ꠔꠣꠟꠥꠔ ꠙꠠꠤ ꠎꠣꠄ।
 
17 ꠝꠣꠛꠥꠖꠞ ꠢꠇ ꠛꠤꠌꠣꠞꠞ ꠟꠣꠉꠤ ꠡꠥꠇꠥꠞ-ꠉꠥꠎꠣꠞ ꠇꠞꠝꠥ ꠔꠣꠘ,
ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠘꠣꠝꠦ ꠀꠝꠤ ꠇꠞꠝꠥ ꠉꠥꠘꠉꠣꠘ॥