ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ৬ ꠘꠝ꠆ꠛꠞ ꠍꠤꠙꠣꠞꠣ
ꠞꠥꠝꠣꠘ
ꠙꠞꠤꠌꠤꠔꠤ
ꠀꠍꠝꠣꠘꠤ ꠇꠤꠔꠣꠛ ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚꠞ ꠙꠄꠟꠣ ꠢꠤꠡ꠆ꠡꠣ ꠝꠣꠘꠤ, ꠙꠄꠟꠣ ꠙꠣꠌ ꠍꠤꠙꠣꠞꠣꠞ ꠝꠣꠎꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠎꠘꠝ, ꠔꠣꠘ ꠇꠣꠝ-ꠇꠣꠎ, ꠔꠣꠟꠤꠝ, ꠔꠣꠘ ꠝꠃꠔ, ꠝꠃꠔꠞ ꠛꠣꠖꠞ ꠎꠤꠘ꠆ꠖꠦꠉꠤꠞ ꠛꠄꠀꠘꠤ। ꠔꠣꠘ ꠍꠣꠢꠣꠛꠤ ꠅꠇꠟꠞ ꠇꠣꠝ-ꠇꠣꠎ, ꠀꠞ ꠢꠃ ꠎꠝꠣꠘꠣꠞ ꠎꠝꠣꠔ ꠅꠇꠟꠞ ꠇꠤꠍꠥ ꠁꠔꠤꠢꠣꠡ।
ꠀꠞ ꠁꠘ꠆ꠎꠤꠟ ꠡꠞꠤꠚꠞ ꠖꠥꠍꠞꠣ ꠢꠤꠡ꠆ꠡꠣ ꠅꠁꠟ, ꠌꠤꠑꠤꠞ ꠀꠇꠣꠞꠦ ꠟꠦꠈꠣ ꠛꠣꠖꠞ ২১ ꠍꠤꠙꠣꠞꠣ। ꠅꠈꠘꠣꠁꠘ ꠙꠠꠟꠦ ꠀꠝꠞꠣ ꠛꠥꠎꠔꠣꠝ ꠙꠣꠞꠝꠥ, ꠢꠃ ꠀꠝꠟꠞ ꠁꠍꠣꠄꠁ ꠎꠝꠣꠔ ꠅꠇꠟꠞ ꠢꠣꠟ-ꠢꠇꠤꠇꠔ, ꠌꠣꠟ-ꠌꠟꠘ, ꠔꠣꠞꠣꠞ ꠁꠝꠣꠘ ꠀꠞ ꠖꠥꠘꠤꠀꠛꠤ ꠀꠌꠣꠞ-ꠛꠦꠛꠢꠣꠞ ꠇꠤꠟꠣꠈꠣꠘ ꠀꠍꠤꠟ। ꠅꠃ ꠞꠥꠝꠣꠘ ꠘꠣꠝꠞ ꠍꠤꠙꠣꠞꠣ ꠅꠁꠟ, ꠁ ꠢꠤꠡ꠆ꠡꠣꠞ ꠢꠇꠟ ꠙꠄꠟꠣ ꠍꠤꠙꠣꠞꠣ, ꠁꠈꠣꠘ ꠛꠃꠔ ꠝꠥꠟ꠆ꠟꠛꠣꠘ।
ꠅꠃ ꠍꠤꠙꠣꠞꠣꠞ ꠟꠦꠈꠇ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍ (ꠞꠣ꠩)। ꠢꠎꠞꠔ ꠁꠍꠣꠄ ꠖꠥꠘꠤꠀ ꠕꠣꠇꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ২৫ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ। ꠁꠈꠣꠘ ꠟꠦꠈꠣꠞ ꠀꠉꠦ ꠔꠣꠁꠘ ꠇꠥꠘꠥꠖꠤꠘ ꠞꠥꠝ ꠐꠣꠃꠘꠅ ꠉꠦꠍꠂꠘ ꠘꠣ। ꠅꠈꠘ ꠔꠣꠘ ꠈꠤꠀꠟ ꠅꠁꠟ, ꠘꠣꠘꠣꠘ ꠖꠦꠡꠅ ꠔꠛꠟꠤꠉ ꠇꠞꠤ ꠇꠞꠤ, ꠞꠥꠝ ꠐꠣꠃꠘꠅ ꠎꠣꠁꠔꠣ, ꠛꠣꠖꠦ ꠅꠘ ꠕꠣꠇꠤ ꠡ꠆ꠙꠦꠘ ꠖꠦꠡꠅ ꠎꠣꠁꠛꠣ। ꠄꠞꠟꠣꠉꠤ ꠞꠥꠝ ꠐꠣꠃꠘꠞ ꠁꠍꠣꠄꠁ ꠃꠝ꠆ꠝꠔ ꠅꠇꠟꠞꠦ ꠔꠣꠘ ꠍꠚꠞꠞ ꠇꠕꠣ ꠎꠣꠘꠣꠁꠞꠣ। ꠄꠞꠟꠉꠦ ꠛꠃꠔ ꠎꠞꠥꠞꠤ ꠔꠣꠟꠤꠝ ꠀꠞ ꠘꠍꠤꠅꠔ ꠎꠣꠘꠣꠁꠞꠣ।
ꠁ ꠍꠤꠙꠣꠞꠣꠞ ১-৮ ꠞꠥꠇꠥꠞ ꠝꠣꠎꠦ ꠔꠣꠘ ꠔꠣꠟꠤꠝꠞ ꠈꠥꠛ ꠉꠥꠞꠥꠔ꠆ꠔꠙꠥꠞ꠆ꠘ ꠘꠍꠤꠅꠔ ꠀꠍꠦ, ꠈꠣꠍ ꠇꠞꠤ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠦ ꠝꠣꠘꠥꠡ ꠇꠦꠝꠘꠦ ꠀꠟ꠆ꠟꠣꠞ ꠖꠞꠛꠣꠞꠅ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠉꠁꠘ꠆ꠘ ꠅꠄ, ꠀꠞ ꠀꠟ꠆ꠟꠣꠞ ꠖꠦꠅꠀ ꠙꠣꠇ ꠞꠥꠢꠥ ꠙꠣꠁꠀ ꠢꠣꠞꠤ ꠇꠤꠟꠣ ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤ ꠇꠣꠐꠣꠄ, ꠎꠦꠟꠣ ১:১৭ ꠀꠄꠀꠔꠅ ꠟꠦꠈꠣ ꠀꠍꠦ, “ꠁꠝꠣꠘꠞ ꠛꠟꠦꠃ ꠛꠦ-ꠇꠍꠥꠞ ꠈꠣꠟꠣꠍ ꠅꠀ ꠎꠘꠞ ꠎꠣꠘ ꠛꠣꠌꠤꠛ।”
৯-১১ ꠞꠥꠇꠥꠔ ꠟꠦꠈꠣ ꠀꠍꠦ, ꠢꠎꠞꠔ ꠝꠥꠍꠣ (ꠀ꠩) ꠅꠞ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠙꠥꠞꠣꠙꠥꠞ ꠝꠣꠘꠔꠦ ꠅꠙꠣꠞꠉ ꠅꠀꠄ ꠛꠘꠤ ꠁꠍꠞꠣꠁꠟ ꠎꠣꠔꠤ ꠀꠟ꠆ꠟꠣꠞ ꠘꠣꠚꠞꠝꠣꠘ ꠛꠘꠤꠉꠦꠍꠦ, ꠀꠞ ꠅꠃ ꠡꠞꠤꠅꠔꠞ ꠃꠙꠞꠦ ꠜꠞꠡꠣ ꠇꠞꠣꠄ ꠔꠣꠞꠣ ꠢꠎꠞꠔ ꠁꠍꠣꠞ ꠈꠥꠡ-ꠈꠛꠞꠤꠞꠦꠅ ꠄꠟꠣꠝꠤ ꠇꠞꠍꠦ। ꠀꠍꠟꠦ ꠅꠃ ꠈꠥꠡ-ꠈꠛꠞꠤꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠢꠦꠡ-ꠝꠦꠡ ꠔꠣꠞꠣꠞ ꠎꠣꠘ ꠛꠣꠌꠤꠛ।
ꠛꠣꠖꠦ ১২-১৬ ꠞꠥꠇꠥꠔ ꠀꠍꠦ, ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠤꠟꠣ ꠘꠤꠎꠞꠦ ꠡꠙꠤ ꠖꠦꠅꠀ ꠎꠣꠄ, ꠀꠞ ꠎꠝꠣꠔꠞ ꠝꠣꠘꠡꠞ ꠟꠣꠉꠤ ꠛꠣꠡ꠆ꠔꠛ ꠎꠤꠘ꠆ꠖꠦꠉꠤꠞ ꠌꠣꠟ-ꠌꠟꠘꠞ ꠔꠣꠟꠤꠝ, ꠖꠦꠡꠞ ꠞꠣꠎꠣ ꠛꠣ ꠡꠞꠇꠣꠞꠞ ꠟꠉꠦ ꠝꠥꠝꠤꠘ ꠅꠇꠟꠞ ꠡꠝ꠆ꠙꠞ꠆ꠇ ꠇꠤꠟꠣꠈꠣꠘ ꠅꠁꠛ, ꠅꠔꠣ ꠘꠣꠘꠣꠘ ꠛꠦꠙꠣꠞꠦ ꠎꠥꠇ꠆ꠔꠤ-ꠔꠞ꠆ꠇꠞ ꠘꠝꠥꠘꠣꠄ ꠅꠃ ꠍꠤꠙꠣꠞꠣ ꠟꠦꠈꠣ ꠅꠁꠍꠦ।
ꠄꠞꠝꠣꠎꠦ ꠀꠍꠦ,
(ꠇ) ꠀꠟ꠆ꠟꠣꠞ ꠖꠞꠛꠣꠞꠅ ꠝꠣꠘꠥꠡ ꠇꠤꠟꠣ ꠛꠦ-ꠇꠍꠥꠞ ꠈꠣꠟꠣꠍ ꠅꠁꠘ ১—৮ ꠞꠥꠇꠥ
(ꠈ) ꠡꠞꠤꠅꠔꠦ ꠅꠙꠣꠞꠉ ꠅꠁꠟꠦꠅ ꠛꠘꠤ ꠁꠍꠞꠣꠁꠟꠞ ꠢꠦꠡ ꠞꠇ꠆ꠇꠣ ꠁꠝꠣꠘꠦ ৯—১১ ꠞꠥꠇꠥ
(ꠉ) ꠁꠍꠣꠄꠁ ꠝꠥꠝꠤꠘ ꠅꠇꠟꠞ ꠌꠣꠟ-ꠌꠟꠘ ১২—১৬ ꠞꠥꠇꠥ
ꠀꠟ꠆ꠟꠣꠞ ꠖꠞꠛꠣꠞꠅ ꠝꠣꠘꠥꠡ ꠇꠤꠟꠣ ꠛꠦ-ꠇꠍꠥꠞ ꠈꠣꠟꠣꠍ ꠅꠁꠘ (১:১-৮:৩৯)
1
ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠈꠥꠡ-ꠈꠛꠞꠤ
1 ꠀꠝꠤ ꠙꠣꠃꠟꠥꠍ ꠔ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ। ꠞꠥꠝꠣꠘ ꠛꠣꠖꠡꠣꠁꠞ ꠞꠣꠎꠗꠣꠘꠤ ꠞꠥꠝ ꠐꠣꠃꠘꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠅꠃ ꠍꠢꠤꠚꠣꠈꠣꠘ ꠟꠦꠈꠞꠣꠝ। ꠀꠟ꠆ꠟꠣ ꠙꠣꠇꠦ ꠀꠝꠣꠞꠦ ꠙꠍꠘ꠆ꠖ ꠇꠞꠤꠀ ꠀꠘꠍꠂꠘ ꠀꠟ-ꠝꠍꠤꠞ ꠍꠣꠢꠣꠛꠤ ꠅꠀꠞ ꠟꠣꠉꠤ ꠀꠞ ꠔꠣꠘ ꠛꠣꠔꠣꠁꠟ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ।
2 ꠀꠟ꠆ꠟꠣꠄ ꠔꠣꠘ ꠘꠛꠤ ꠅꠇꠟꠞ ꠝꠣꠎꠖꠤ ꠙꠣꠇ ꠇꠤꠔꠣꠛꠞ ꠝꠣꠎꠦ ꠅꠃ ꠈꠥꠡ-ꠈꠛꠞꠤꠞ ꠇꠕꠣ ꠀꠉꠦꠃ ꠅꠀꠖꠣ ꠇꠞꠍꠂꠘ।
3-4 ꠅꠃ ꠈꠥꠡ-ꠈꠛꠞꠤ ꠅꠁꠟ ꠔꠣꠘ ꠈꠣꠍ ꠝꠣꠄꠀꠞ ꠎꠘ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ। ꠔꠣꠁꠘꠃ ꠀꠝꠞꠣꠞ ꠝꠣꠟꠤꠇ। ꠞꠇ꠆ꠔ-ꠝꠣꠋꠡꠞ ꠍꠤꠟꠍꠤꠟꠣꠄ ꠔꠣꠁꠘ ꠅꠁꠟꠣ ꠢꠎꠞꠔ ꠖꠣꠃꠖ ꠘꠛꠤꠞ ꠀꠅꠟꠣꠖ, ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠥꠖꠞꠔꠤꠄ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠁꠛꠘꠥꠟ꠆ꠟꠣ ꠢꠤꠡꠣꠛꠦ ꠎꠣꠁꠞ ꠅꠁꠍꠂꠘ।
5 ꠔꠣꠘ ꠘꠣꠝ ꠃꠎꠤꠟꠣ ꠇꠞꠣꠞ ꠟꠣꠉꠤ, ꠔꠣꠘ ꠝꠣꠎꠖꠤꠃ ꠀꠝꠞꠣ ꠀꠟ꠆ꠟꠣꠞ ꠘꠤꠀꠝꠔ ꠀꠞ ꠍꠣꠢꠣꠛꠤ ꠙꠖ ꠙꠣꠁꠍꠤ, ꠎꠣꠔꠦ ꠢꠇꠟ ꠎꠣꠔꠤꠞ ꠝꠣꠘꠡꠦ ꠁꠝꠣꠘ ꠀꠘꠤꠀ ꠀꠟ꠆ꠟꠣꠞ ꠛꠣꠁꠖ꠆ꠖ ꠅꠁꠀ ꠌꠟꠦ।
6 ꠅꠃ ꠝꠣꠘꠡꠞ ꠝꠣꠎꠦ ꠔꠥꠝꠞꠣꠅ ꠀꠍ। ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠖꠣꠅꠔ ꠇꠞꠤꠀ ꠀꠘꠍꠂꠘ, ꠁꠍꠣ ꠀꠟ-ꠝꠍꠤꠞ ꠀꠙꠘ ꠎꠘ ꠅꠀꠞ ꠟꠣꠉꠤ।
7 ꠔꠦ ꠅꠃ ꠞꠥꠝ ꠐꠣꠃꠘꠅ ꠀꠟ꠆ꠟꠣꠞ ꠎꠔ ꠝꠣꠄꠀꠞ ꠛꠘ꠆ꠖꠣ ꠅꠇꠟ ꠀꠍꠂꠘ, ꠀꠟ꠆ꠟꠣꠄ ꠔꠣꠘ ꠙꠣꠇ ꠛꠘ꠆ꠖꠣ ꠅꠀꠞ ꠟꠣꠉꠤ ꠎꠦꠞꠣꠞꠦ ꠖꠣꠅꠔ ꠇꠞꠤꠀ ꠀꠘꠍꠂꠘ, ꠔꠥꠝꠞꠣ ꠢꠇꠟꠞ ꠉꠦꠍꠦ ꠀꠝꠤ ꠅꠃ ꠌꠤꠑꠤꠈꠣꠘ ꠟꠦꠈꠞꠣꠝ। ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ।
8 ꠀꠝꠤ ꠙꠄꠟꠣꠃ ꠇꠁꠞꠣꠝ, ꠔꠥꠝꠞꠣꠞ ꠝꠎꠛꠥꠔ ꠁꠝꠣꠘꠞ ꠇꠕꠣ ꠀꠡ꠆ꠔꠣ ꠖꠥꠘꠤꠀꠁꠞ ꠝꠣꠎꠦ ꠞꠐꠤꠉꠦꠍꠦ ꠇꠞꠤ, ꠀꠝꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠝꠣꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ।
9 ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ, ꠀꠝꠤ ꠖꠤꠟꠦ-ꠎꠣꠘꠦ ꠀꠟ꠆ꠟꠣꠞ ꠄꠛꠣꠖꠔ ꠇꠞꠞꠣꠝ। ꠄꠇ ꠀꠟ꠆ꠟꠣꠃ ꠡꠣꠇ꠆ꠇꠤ ꠀꠍꠂꠘ, ꠀꠝꠤ ꠙꠞꠔꠦꠇ ꠛꠣꠞ ꠝꠥꠘꠣꠎꠣꠔꠞ ꠡꠝꠄ ꠔꠥꠝꠞꠣꠞ ꠇꠕꠣ ꠁꠀꠖ ꠇꠞꠤ।
10 ꠀꠝꠤ ꠢꠣꠝꠦꠡꠣ ꠅꠃ ꠇꠕꠣ ꠝꠣꠉꠤꠞꠣꠝ, ꠅꠔꠖꠤꠘ ꠛꠣꠖꠦ ꠅꠁꠟꠦꠅ ꠀꠟ꠆ꠟꠣꠞ ꠝꠞ꠆ꠎꠤꠄ ꠎꠦꠇꠥꠘꠥ ꠝꠘ꠆ꠔꠦ ꠀꠝꠤ ꠎꠣꠘꠥ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠙꠣꠞꠤ।
11 ꠀꠝꠤ ꠔꠥꠝꠞꠣꠞ ꠟꠉꠦ ꠖꠦꠈꠣ ꠇꠞꠔꠣꠝ ꠌꠣꠁꠞꠣꠝ, ꠎꠣꠔꠦ ꠞꠥꠢꠣꠘꠤ ꠇꠥꠘꠥ ꠘꠤꠀꠝꠔ ꠖꠤꠀ ꠔꠥꠝꠞꠣꠞꠦ ꠛꠟꠛꠣꠘ ꠇꠞꠔꠣꠝ ꠙꠣꠞꠤ।
12 ꠝꠣꠘꠤ, ꠀꠝꠣꠞ ꠁꠝꠣꠘ ꠖꠦꠈꠤꠀ ꠔꠥꠝꠞꠣ ꠢꠇꠟꠦ ꠀꠞ ꠔꠥꠝꠞꠣꠞ ꠁꠝꠣꠘ ꠖꠦꠈꠤꠀ ꠀꠝꠤ ꠘꠤꠎꠦꠅ ꠃꠔꠡꠣꠢ ꠙꠣꠁ।
13 ꠅ ꠜꠣꠁꠀꠁꠘ ꠢꠥꠘꠅ, ꠀꠝꠤ ꠛꠃꠔ ꠛꠣꠞ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠌꠣꠁꠍꠤ, ꠅꠁꠟꠦ ꠛꠣꠞ ꠛꠣꠞ ꠛꠣꠗꠣ ꠀꠁꠍꠦ। ꠘꠣꠘꠣꠘ ꠎꠣꠉꠣꠔ ꠉꠤꠀ ꠜꠤꠘ ꠎꠣꠔꠤꠞ ꠉꠦꠍꠦ ꠔꠛꠟꠤꠉ ꠇꠞꠤꠀ ꠎꠦꠟꠣ ꠚꠟ ꠙꠣꠁꠍꠤ, ꠔꠥꠝꠞꠣꠞ ꠉꠦꠍꠦꠅ ꠅꠟꠣ ꠚꠟ ꠖꠦꠈꠣꠞ ꠀꠡꠣꠄ ꠀꠁꠔꠣꠝ ꠌꠣꠁꠞꠣꠝ।
14 ꠜꠖ꠆ꠞ ꠁꠃꠘꠣꠘꠤ ꠎꠣꠔꠤ ꠛꠣ ꠅꠜꠖ꠆ꠞ ꠛꠞꠛꠞ ꠎꠣꠔꠤ, ꠡꠤꠇ꠆ꠇꠤꠔ ꠛꠣ ꠅꠡꠤꠇ꠆ꠇꠤꠔ, ꠢꠇꠟꠞ ꠟꠣꠉꠤꠃ ꠔ ꠀꠝꠣꠞ ꠄꠇ ꠢꠝꠣꠘ ꠖꠣꠄ-ꠜꠣꠞ ꠀꠍꠦ।
15 ꠄꠞꠟꠣꠉꠤ ꠔꠥꠝꠞꠣ ꠎꠦꠞꠣ ꠞꠥꠝ ꠐꠣꠃꠘꠅ ꠛꠡꠔ ꠇꠞꠞꠣꠄ, ꠀꠝꠤ ꠀꠝꠣꠞ ꠡꠣꠁꠖ꠆ꠖ ꠝꠣꠚꠤꠇ ꠔꠥꠝꠞꠣꠞ ꠉꠦꠍꠦꠅ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠣꠞ ꠟꠣꠉꠤ ꠈꠤꠀꠟꠤ।
16 ꠇꠣꠞꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠛꠦꠙꠣꠞꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠔꠦ ꠀꠝꠤ ꠇꠥꠘꠥ ꠡꠞꠝ ꠝꠘꠅ ꠇꠞꠤ ꠘꠣ, ꠅꠃ ꠈꠥꠡ-ꠈꠛꠞꠤ ꠢꠥꠘꠤꠀ ꠎꠦꠞꠣ ꠁꠝꠣꠘ ꠀꠘꠦ, ꠔꠣꠞꠣꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠁꠐꠣ ꠅꠁꠟ ꠀꠟ꠆ꠟꠣꠁ ꠛꠟ। ꠙꠄꠟꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠎꠦꠞꠣ ꠄꠇ ꠀꠟ꠆ꠟꠣ ꠝꠣꠘꠂꠘ, ꠛꠣꠖꠦ ꠛꠦ-ꠖꠤꠘ ꠜꠤꠘ ꠎꠣꠔꠤ ꠅꠇꠟꠞ ꠟꠣꠉꠤ।
17 ꠅꠃ ꠈꠥꠡ-ꠈꠛꠞꠤꠞ ꠝꠣꠎꠦꠃ ꠔ ꠛꠣꠔꠣꠁꠟ ꠅꠁꠍꠦ, ꠀꠟ꠆ꠟꠣꠄ ꠇꠤꠟꠣ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠢꠤꠡꠣꠛꠦ ꠇꠛꠥꠟ ꠇꠞꠂꠘ। ꠈꠣꠟꠤ ꠁꠝꠣꠘꠞ ꠝꠣꠎꠖꠤꠃ ꠝꠣꠘꠡꠞꠦ ꠀꠃꠀꠟ ꠕꠣꠇꠤ ꠀꠈꠦꠞ ꠙꠞ꠆ꠎꠘ꠆ꠔ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠄ। ꠎꠦꠟꠣ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠁꠝꠣꠘꠞ ꠛꠟꠦꠃ ꠛꠦ-ꠇꠍꠥꠞ ꠈꠣꠟꠣꠍ ꠅꠀ ꠎꠘꠞ ꠎꠣꠘ ꠛꠣꠌꠤꠛ।”
ꠢꠇꠟ ꠝꠣꠘꠥꠡꠃ ꠘꠣꠚꠞꠝꠣꠘ
18 ꠝꠣꠘꠡꠦ ꠘꠤꠎꠞ ꠘꠣꠚꠞꠝꠣꠘꠤ ꠖꠤꠀ ꠀꠟ꠆ꠟꠣꠁ ꠢꠇꠞꠦ ꠟꠥꠇꠣꠁꠀ ꠞꠣꠈꠦ। ꠔꠣꠞꠣꠞ ꠘꠣꠚꠞꠝꠣꠘꠤ ꠀꠞ ꠀꠟ꠆ꠟꠣꠞ ꠛꠣꠄ ꠒꠞ-ꠈꠚ ꠘꠣ ꠕꠣꠇꠣꠄ ꠀꠍꠝꠣꠘ ꠕꠣꠇꠤ ꠔꠣꠞꠣꠞ ꠃꠙꠞꠦ ꠉꠎꠛ ꠘꠣꠎꠤꠟ ꠅꠄ।
19 ꠀꠟ꠆ꠟꠣꠞ ꠛꠦꠙꠣꠞꠦ ꠎꠔꠈꠣꠘ ꠛꠥꠎꠣꠞ ꠔꠣꠇ꠆ꠇꠔ ꠀꠍꠦ ꠁꠔꠣ ꠝꠣꠘꠡꠞ ꠉꠦꠍꠦ ꠙꠞꠤꠡ꠆ꠇꠣꠞ, ꠀꠟ꠆ꠟꠣꠄ ꠘꠤꠎꠦꠃ ꠔ ꠁꠔꠣ ꠎꠣꠁꠞ ꠇꠞꠍꠂꠘ।
20 ꠔꠣꠘ ꠎꠦꠔꠣ ꠉꠥꠘꠣꠉꠥꠘ ꠝꠣꠘꠡꠞ ꠀ-ꠖꠦꠈꠣ, ꠝꠣꠘꠤ ꠔꠣꠘ ꠌꠤꠞꠇꠣꠟꠤꠘ ꠈꠦꠝꠔꠣ ꠀꠞ ꠀꠟ꠆ꠟꠣꠁ ꠡ꠆ꠛꠜꠣꠛ, ꠁꠔꠣ ꠖꠥꠘꠤꠀ ꠙꠄꠖꠣ ꠅꠀꠞ ꠀꠉ ꠕꠣꠇꠤꠃ ꠙꠞꠤꠡ꠆ꠇꠣꠞ ꠚꠥꠐꠤꠀ ꠃꠑꠍꠦ। ꠔꠣꠘ ꠙꠄꠖꠣ ꠇꠞꠣ ꠎꠤꠘꠤꠡ ꠖꠦꠈꠟꠦꠃ ꠝꠣꠘꠡꠦ ꠁꠔꠣ ꠛꠥꠎꠔ ꠙꠣꠞꠦ। ꠄꠞꠟꠣꠉꠤꠃ ꠔꠣꠘꠞꠦ ꠌꠤꠘꠤ ꠘꠣ ꠇꠁꠀ ꠇꠥꠘꠥ ꠝꠣꠘꠡꠦ ꠜꠣꠘꠣ ꠖꠦꠈꠣꠘꠤꠞ ꠃꠙꠣꠄ ꠘꠣꠁ।
21 ꠀꠟ꠆ꠟꠣꠞ ꠛꠦꠙꠣꠞꠦ ꠅꠔꠔꠣ ꠎꠣꠘꠣꠞ ꠛꠣꠖꠦꠅ ꠝꠣꠘꠡꠦ ꠔꠣꠘꠞꠦ ꠀꠟ꠆ꠟꠣ ꠜꠣꠛꠤꠀ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠀꠞ ꠡꠥꠇꠥꠞ-ꠉꠥꠎꠣꠞꠤ ꠘꠣ ꠇꠞꠣꠄ, ꠔꠣꠞꠣꠞ ꠛꠤꠌꠣꠞ-ꠛꠤꠛꠦꠇ ꠅꠡꠣꠞ ꠅꠁꠉꠦꠍꠦ ꠀꠞ ꠛꠦꠀꠈꠟ ꠝꠘ ꠀꠘ꠆ꠖꠣꠁꠞ ꠅꠁꠉꠦꠍꠦ।
22 ꠎꠥꠖꠤꠅ ꠔꠣꠞꠣ ꠘꠤꠎꠞꠦ ꠀꠈꠟꠖꠣꠞ ꠝꠘꠅ ꠇꠞꠂꠘ, ꠀꠍꠟꠦ ꠔꠣꠞꠣ ꠛꠦꠀꠈꠟ।
23 ꠔꠣꠞꠣ ꠌꠤꠞꠇꠣꠟꠤꠘ ꠎꠤꠘ꠆ꠖꠣ ꠀꠟ꠆ꠟꠣꠞ ꠄꠛꠣꠖꠔ ꠛꠣꠖ ꠖꠤꠀ ꠅꠡ꠆ꠕꠣꠄꠁ ꠝꠣꠘꠥꠡ, ꠙꠡꠥ-ꠙꠣꠈꠤ, ꠀꠞ ꠛꠥꠇꠦ ꠌꠟꠞꠣ ꠎꠣꠘꠖꠣꠞꠞ ꠝꠥꠞ꠆ꠔꠤ ꠛꠣꠘꠣꠁꠀ ꠅꠔꠣꠞ ꠙꠥꠎꠣ ꠇꠞꠍꠦ, ꠀꠟ꠆ꠟꠣꠞ ꠙꠣꠅꠘꠣ ꠉꠃꠞꠛ-ꠝꠢꠤꠝꠣ ꠅꠔꠣꠞꠦ ꠖꠤꠍꠦ।
24 ꠄꠞꠟꠣꠉꠤ ꠀꠟ꠆ꠟꠣ ꠙꠣꠇꠦꠅ ꠔꠣꠞꠣꠞ ꠖꠤꠟꠞ ꠛꠖ ꠈꠣꠁꠡ ꠝꠣꠚꠤꠇ, ꠔꠣꠞꠣꠞꠦ ꠘꠚꠞꠔꠤ ꠇꠣꠝꠞ ꠀꠔꠅ ꠍꠣꠠꠤ ꠖꠤꠍꠂꠘ, ꠅꠔꠣꠞ ꠖꠣꠄ ꠔꠣꠞꠣ ꠄꠇꠦ-ꠅꠁꠘ꠆ꠘꠞ ꠟꠉꠦ ꠛꠖꠝꠣꠁꠡꠤ-ꠛꠦꠁꠎ꠆ꠎꠔꠤ ꠇꠞꠦꠞ।
25 ꠔꠣꠞꠣ ꠀꠟ꠆ꠟꠣꠞ ꠢꠇꠞꠦ ꠛꠣꠖ ꠖꠤꠀ ꠝꠤꠍꠣꠞꠦ ꠙꠍꠘ꠆ꠖ ꠇꠞꠍꠦ। ꠙꠄꠖꠣ ꠇꠞꠞꠣ ꠀꠟ꠆ꠟꠣꠞꠦ ꠛꠣꠖ ꠖꠤꠀ, ꠔꠣꠘ ꠙꠄꠖꠣ ꠇꠞꠣ ꠎꠤꠘꠤꠡꠞ ꠙꠥꠎꠣ ꠇꠞꠍꠦ। ꠅꠁꠟꠦ ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠢꠇꠟ ꠔꠣꠞꠤꠚ ꠄꠇꠝꠣꠔ꠆ꠞ ꠙꠄꠖꠣ ꠇꠞꠞꠣ ꠀꠟ꠆ꠟꠣꠞꠃ। ꠀꠝꠤꠘ।
26 ꠝꠣꠘꠡꠦ ꠅꠟꠣꠈꠣꠘ ꠘꠚꠞꠔꠤ ꠇꠣꠝ ꠇꠞꠦꠞ ꠖꠦꠈꠤꠀ, ꠀꠟ꠆ꠟꠣꠄꠅ ꠔꠣꠞꠣꠞꠦ ꠅꠃ ꠛꠖ ꠈꠣꠁꠡꠞ ꠀꠔꠅ ꠡꠙꠤ ꠖꠤꠍꠂꠘ। ꠅꠔꠣꠞ ꠛꠦꠐꠤꠘ꠆ꠔꠦꠅ ꠎꠣꠝꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠛꠣꠖ ꠖꠤꠀ ꠅꠁꠘ꠆ꠘ ꠛꠦꠐꠤꠘ꠆ꠔꠞ ꠟꠉꠦ ꠈꠛꠤꠍꠤ ꠇꠣꠝ ꠇꠞꠍꠦ।
27 ꠅꠃꠟꠣ ꠛꠦꠐꠣꠁꠘ꠆ꠔꠦꠅ ꠛꠦꠐꠤꠘ꠆ꠔꠞ ꠟꠉꠦ ꠝꠤꠟꠣ-ꠝꠤꠡꠣ ꠛꠣꠖ ꠖꠤꠀ ꠅꠁꠘ꠆ꠘ ꠛꠦꠐꠣꠞ ꠟꠉꠦ ꠝꠤꠟꠣ-ꠝꠤꠡꠣꠞ ꠟꠣꠉꠤ ꠙꠣꠉꠟ ꠅꠁꠉꠦꠍꠦ, ꠛꠦꠐꠣꠁꠘ꠆ꠔꠦ ꠛꠦꠐꠣꠁꠘ꠆ꠔꠞ ꠟꠉꠦ ꠈꠛꠤꠍꠤ ꠇꠣꠝ ꠇꠞꠍꠦ। ꠄꠞꠟꠣꠉꠤ ꠔꠣꠞꠣ ꠙꠞꠔꠦꠇꠞ ꠎꠤꠘ꠆ꠖꠦꠉꠤꠔ ꠎꠣꠞꠎꠤꠞ ꠛꠖ ꠇꠣꠝꠞ ꠡꠣꠎꠣ ꠙꠣꠁꠞꠣ।
28 ꠝꠣꠘꠡꠦ ꠔꠣꠞ ꠖꠤꠟ ꠕꠣꠇꠤ ꠀꠟ꠆ꠟꠣ ꠙꠣꠇꠞꠦ ꠝꠣꠘꠦꠞ ꠘꠣ ꠖꠦꠈꠤꠀ, ꠀꠟ꠆ꠟꠣꠄꠅ ꠔꠣꠞꠣꠞꠦ ꠅꠟꠣ ꠛꠖ ꠈꠣꠁꠡꠞ ꠈꠛꠤꠍꠤ ꠖꠤꠟꠞ ꠀꠔꠅ ꠍꠣꠠꠤ ꠖꠤꠍꠂꠘ, ꠄꠞꠟꠣꠉꠤ ꠔꠣꠞꠣ ꠅꠔꠣ ꠇꠞꠣꠔ ꠞꠄ।
29 ꠔꠣꠞꠣ ꠢꠇꠟ ꠘꠝꠥꠘꠣꠞ ꠘꠣꠚꠞꠝꠣꠘꠤ, ꠛꠖ ꠇꠣꠝ, ꠟꠥꠜ-ꠟꠣꠟꠌ, ꠁꠋꠡꠣ-ꠘꠤꠘ꠆ꠖꠣ, ꠈꠥꠘ-ꠈꠣꠞꠣꠙꠤ, ꠝꠣꠞꠣ-ꠝꠣꠞꠤ, ꠍꠟ-ꠌꠔꠥꠞꠤ ꠀꠞ ꠇꠣꠘꠣ-ꠇꠣꠘꠤ ꠇꠞꠣꠞ ꠟꠣꠉꠤ ꠃꠡ꠆ꠔꠣꠖ।
30 ꠔꠣꠞꠣ ꠝꠣꠘꠡꠞ ꠉꠤꠛꠔ ꠉꠣꠄ, ꠀꠞ ꠀꠟ꠆ꠟꠣꠞꠦ ꠊꠤꠘ꠆ꠘꠣꠄ। ꠔꠣꠞꠣ ꠛꠖ-ꠝꠤꠎꠣꠎꠤ, ꠅꠢꠋꠇꠣꠞꠤ, ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠘꠄꠀ ꠘꠄꠀ ꠘꠣꠚꠞꠝꠣꠘꠤꠞ ꠗꠣꠘ꠆ꠖꠣꠄ ꠕꠣꠇꠦ। ꠔꠣꠞꠣ ꠝꠣ-ꠛꠣꠚꠞꠅ ꠅꠛꠣꠁꠖ꠆ꠖ।
31 ꠘꠦꠇꠤ-ꠛꠖꠤ ꠛꠥꠎꠣꠞ ꠀꠈꠟ ꠘꠣꠁ, ꠅꠀꠖꠣ ꠈꠦꠟꠣꠚꠇꠣꠞꠤ, ꠙꠣꠡꠣꠘ, ꠁꠔꠣꠞ ꠖꠤꠟꠅ ꠇꠥꠘꠥ ꠖꠄꠀ-ꠝꠣꠄꠀ ꠘꠣꠁ।
32 ꠔꠣꠞꠣ ꠔ ꠀꠟ꠆ꠟꠣꠞ ꠁ ꠛꠤꠌꠣꠞꠞ ꠇꠕꠣ ꠜꠣꠟꠣ ꠇꠞꠤꠃ ꠎꠣꠘꠦ, ꠎꠦꠞꠣ ꠁꠟꠣꠈꠣꠘ ꠇꠣꠝ ꠇꠞꠦ, ꠔꠣꠞꠣꠞ ꠡꠣꠎꠣ ꠅꠁꠛ ꠝꠃꠔ। ꠁꠈꠣꠘ ꠎꠣꠘꠤꠀꠅ, ꠔꠣꠞꠣ ꠈꠣꠟꠤ ꠘꠤꠎꠦ ꠁꠔꠣ ꠇꠞꠦ ꠘꠣ, ꠛꠣꠇꠤ ꠎꠦꠞꠣ ꠁꠟꠣ ꠇꠣꠝ ꠇꠞꠦ, ꠔꠣꠞꠣꠞ ꠙꠇ꠆ꠇꠦꠅ ꠡꠣꠄ ꠖꠦꠄ।