पावलसे गलातीयाला विश्वासीगदेदा भ्रिबा चिठी
चु चिठीला बारेरी पाङ्तोःमा
भ्रिबा म्हि: येशूला मुल चेला पावलसे भ्रिबा मुबा (गलाती १:१)।
भ्रिबा ग्ला: एन्टिओखिया शहररी भ्रिबा मुबा।
भ्रिबा साल: ओस्पन ईश्वी संवत् ४८-५७ (विक्रम संवत् १०५-११४) सालला गुङरी भ्रिबा मुबा।
खाल्दा भ्रिबा: गलातीया अञ्चलला ग्ला ग्लारी मुबा मण्डलीगदेदा भ्रिबा मुबा (गलाती १:२)।
येशूला बारेरी थार्बा पिन्बा समाचार थेःना लबारी छ्याइमाहेन्से अर्गु य्हुलला म्हिगदेसे येशूदा विश्वास लजी। ओच्छे ख्रीष्टदा पक्का विश्वास लबा म्हि दोबारी परमेश्वरसे मोशादा पिन्बा ठिम अन्छार भ्रतोःला कि भ्रआतोः भिबा तामगदे थोन्जी। पावलसे मोशादा पिन्बा ठिम अन्छार भ्रआतोः भिसी पाङ्जी, तिग्दा भिसम ख्रीष्टसे पिन्बा जुकजुकधोनाला जुनीला मुल जग चा विश्वास हिन्ना। विश्वासग्यामसेन जम्मान म्हिगदे परमेश्वरदा सेम निबा म्हि दोला। तर एशियारी परब तबा रोम य्हुल्साला गलातीया अञ्चलरी मुबा मण्डलीगदेरी कोइ कोइ म्हिगदे खबा मुबा। पावलसे लोप्बा ताम थाबान थेनीगदेसे मोशादा पिन्बा ठिम अन्छार आभ्रनी भिसम खालैनोन परमेश्वरदा सेम निबा म्हि दोबारी आखम भिसी पाङ्जी।
पावलसे लुसीला तामरी विश्वास लबा गलातीयाला म्हिगदेदा सत्य विश्वासरी दोःसी भबाला लागिरी चु चिठी भ्रिबा मुबा। पावलसे ह्राङ ख्रीष्टला मुल चेला हिन्ना भिबा ताम उन्बाला लागिरी ओच्छे मुल चेलागदेला अधिकारला बारेरी ज्यना लसी घोना लबाला लागिरी चु चिठी भ्रिबा हिन्ना। ओच्छे पावलसे ह्राङदा म्हिसे मुल चेला स्होबा आहिन, तर परमेश्वरसेन मुल चेला स्होबा हिन्ना भिसी पाङ्बा मुला। ओच्छे ह्राङसे थेःना लबा थार्बा पिन्बा समाचार चा अर्गु य्हुलला म्हिगदेला लागिरी हिन्ना भिसी पाङ्बा मुला। थेह्रङ् लसीन विश्वासग्यामसे जे म्हि य्हुल परमेश्वरदा सेम निबा म्हि दोला भिसी पाङ्बा मुला। पावलसे लिच्छापट्टिला अध्यायगदेरी चा य्हाङसे स्य्हान्दोगदेदा माया लजी भिसम विश्वास लबा अन्छारला बानीबेहोर म्राङ्ला, ओच्छे ख्रीष्टदा विश्वास लमाहेन्से स्य्हान्दोदा माया लबारी खम्ला भिसी पाङ्बा मुला।
मुल तामगदे
फ्याफुल्बादेन थार्बा पिन्बा समाचार गिक जे मुला १:१-१०
पावलदा परमेश्वरसेन मुल चेला स्होबा १:११–२:२१
परमेश्वरला दयामायाला समाचार ३:१–४:३१
ख्रीष्टसे पापला तहग्याम फेबादेन ख्रीष्टदा विश्वास लबागदेला बानीबेहोर ५:१–६:१०
चिठीला थुमरी भ्रिबा ताम ६:११-१८
पावलसे गलातीयाला विश्वासीगदेदा भ्रिबा चिठी
1
1 लास्सो ङा पावल खालै म्हिगदेसे धम्सी ओच्छे खालैसे स्होसी मुल चेला दोबा आहिन। तर येशू ख्रीष्टदा सिबाग्याम सोना लबा परमेश्वर आबादेन येशू ख्रीष्टसे ङादा मुल चेला स्होबा हिन्ना।
2 चुरी ङादेन छ्याम मुबा जम्मान ज्योज्यो आलेगदेदेन ङाग्याम गलातिया अञ्चलरी मुबा मण्डलीगदेदा फ्याफुल्ला!
3 एनीगदेदा परमेश्वर आबादेन य्हाङला प्रभु येशू ख्रीष्टग्याम दयामायादेन शान्ति तगै।
4 य्हाङदा चु जम्बुलिङला आज्यबा बानीबेहोरग्याम फेबारी परमेश्वर आबासे म्हन्बा अन्छार प्रभु येशू ख्रीष्ट य्हाङला पापला लागिरी सिजी।
5 थेतबासेलमा परमेश्वरदा सदन मानदेन जयजयकार तगै। आमेन।
थार्बा पिन्बा समाचार चु भन्दा अर्गु आरे
6 एनीगदे म्राङ्सी ङा उदेक तबा मुला, तिग्दा भिसम ख्रीष्टला दयामायाग्याम एनीगदेदा ङ्योइबा परमेश्वरदा एनीगदेसे चुदे योनान म्लेःसी अर्गु समाचार ङ्यान्सी भ्रमुला।
7 च्यागो, थार्बा पिन्बा समाचार चा चु भन्दा अर्गु आरे। तर कोइ कोइ म्हिसे चा एनीगदेदा अलमल तना लसी ख्रीष्टला समाचारदा न्होङ्ना लबारी म्हाइबा मुला।
8 ओच्छे ङन्से एनीगदेदा थेःना लबा थार्बा पिन्बा समाचारदा उल्टो स्होसी लोप्बागदे चा, ङनी तसै स्वर्गदूतनोन तसै थे नाश तगै।
9 एनीगदेसे विश्वास लबा थार्बा पिन्बा समाचारदा उल्टो स्होसी पाङ्बा म्हि चा नाशनोन तला। दान्दे ङाइ पाङ्बा चु ताम एनीगदेदा ङाइ ङाच्छाएनोन पाङ्बा मुला।
10 तिग चुह्रङ् लसी ङाइ म्हिदा ताङ्ना लबारी म्हाइबा हिन्ना? ङाइ मी परमेश्वरदा ताङ्ना लबारी म्हाइबा हिन्ना। तिग ङादा म्हिगदेसे मान लगै भिसी ङाइ म्हन्बा हिन्ना? चुदे ङाइ चुह्रङ् म्हन्बा हिन्सम, ङा ख्रीष्टला गे लबा म्हिनोन आहिन।
परमेश्वरसे पावलदा धम्बा
11 ज्योज्यो आले नाना आङागदे, ङाइ एनीगदेदा थेःना लबा थार्बा पिन्बा समाचार म्हिगदेसे स्होसी पाङ्बा ताम आहिन भिबा एनीगदेसे था याङ्गै भिसी ङाइ म्हन्बा मुला।
12 तिग्दा भिसम ङादा चु खालै म्हिसे उन्बाएनोन आहिन, खालै म्हिसे पिन्बाएनोन आहिन। तर येशू ख्रीष्ट ह्राङसेन ङादा चु उन्बा हिन्ना।
13 ङाच्छा यहूदी धर्म तेन्बा धुइरी ङाला बानीबेहोर खाह्रङ्बा मुबा भिसी एनीगदेदा थानोन मुला। थे धुइरी ङाइ परमेश्वरला मण्डलीदा ल्हानान दुख पिन्सी थेदा नाश लबारी म्हाइजी।
14 थे धुइरी यहूदी धर्म तेन्बा ङा च्योच्योला म्हिगदे न्हङरी जम्मान भन्दा सेबा घोबा ङानोन मुबा। ङाइ आखे म्हेमेला रिमठिम ल्हानान तेन्मुबा।
15 तर ङा न्हबा भन्दा ङाच्छान ङादा दयामाया लसी धम्बा परमेश्वरसेन,
16 ङाइ अर्गु य्हुलला म्हिगदेदा थार्बा पिन्बा समाचार थेःना लबारी खम्गै भिसी थेदा ह्राङलान झा ङादा ङोसेना लबा ज्यबा छोर्जी। थे धुइरी ङाइ खालै म्हिदेन छ्याम ङ्योइबा छार्बा लसी आभ्रनी।
17 ओच्छे ङा यरूशलेम शहररी ङा भन्दा ङाच्छाला मुल चेलागदेदा ह्रुप तबारीनोन आनिनी, बरु तुरुन्तन अरब य्हुल्सारी निजी। जमाहेन्से दमस्कस भिबा ग्लारीन दोःसी खजी।
18 ओच्छे ङा सोम दिङ लिच्छा जे यरूशलेमरी पत्रुसदा ह्रुप तबारी निजी। थेरी ङा थेदेन छ्याम साता न्हीधोना चिजी।
19 ङाइ थेरी प्रभुला आले याकूबदा बाहेक स्य्हान्दो खालै मुल चेलागदेदा आस्याप्नी।
20 ङाइ एनीगदेदा भ्रिबा चु ताम सत्य हिन्ना, ङाइ लुसीला ताम पाङ्बा आरे भिबा परमेश्वरदान था मुला।
21 जमाहेन्से ङा सिरियादेन किलिकिया भिबा ग्लारी निजी।
22 थे धुइधोना ख्रीष्टदा विश्वास लबा यहूदिया अञ्चलरी मुबा म्हिगदेसे ङादा ङोआसेबा,
23 “ङाच्छा य्हाङदा ल्हानान दुख पिन्सी य्हाङसे लबा विश्वासदा नाश लबारी म्हाइबा म्हि ह्राङसेन दान्दे थेनोन विश्वासला बारेरी पाङ्सी भ्रमुला” भिबा ताम जे थेनीगदेसे थेःबा मुबा।
24 ङाइ थेह्रङ्बा गे ख्लासी परमेश्वरदा विश्वास लबासे लमा थेनीगदेसे परमेश्वरला जयजयकार लजी।