2
1 Yawe walanda evi,
“Pa mulandu wa bibalo bitatu bya bantu ba mu Moabu ao bina,
nsikaba kubalekelela pasili kubakanda,
pantu baaziziizie bikuza byakua likolo wa ku Edomu
mpaka bya-aluka nga makese.
2 Naakatuma mulilo pa kyalo kya Moabu
ozo waakazizia byubo bya mu Kerioti.
Moabu waakapona mu nsungu ya bului,
balukale pabakaba basamuna, ni ntandala paikaba yalila.
3 Naakeenoona kateeka wa ku Moabu,
ni kwipaya babiloolo bakue bonse pamo nakue,”
koku i kulanda kwakua Yawe.
4 Yawe walanda evi,
“Pa mulandu wa bibalo bitatu bya bantu ba mu Yudea ao bina,
nsikaba kubalekelela pasili kubakanda,
pantu baakeene kusunga mizilo,
ni kukaana kunakila milao yane,
pa mulandu wa kukonka baleza ba bufi,
baleza baali bapupua na babikolue babo.
5 Naakatuma mulilo mu Yudea,
ozo waakazizia byubo bya mu Yeruzalemu.”
Leza wapingula Baizraeli
6 Yawe walanda nangue
pa mulandu wa bibalo bitatu bya Baizraeli ao bina,
takaba kubalekelela pasili kubakanda,
pantu balibasisia balunghami na mutofue,
ni bapabi na mpe imo ya nkwabilo.
7 Balibanyanta pa mitue ya bapabi,
nga pa lufunko lwa pa kyalo,
ni kukaana kupeela nsambu babiibikiziiziwe.
Se ni mwanae mwalalume balibakumana na mwanakazi umo,
ni pakako, balibatiikaania Liina lyane lizuuke.
8 Baali balaala mumbali ya kubalua kitale,
pa ngubo ipokelue ku bapabi kuti ibe kikwatizi.
Baali baminina bikolani mu nghanda ya baleza babo,
bikolani bibaali basita na nfolanga ya balia bali ni mizia,
9 Yawe walanda nangue, “Anzia nainoonene Ba-amori,
baali baleepele nga bimuti bya mumpelempele,
ni kuya balumine nga bimuti bya mwaloni.
Nainoonene mazabo abo ku misambo ku muulu,
ni kutukuna misila yabo kwinsina.
10 Naamifumiizie mu kyalo kya Misri,
ni kumilombola mu kaseeba myaka 40,
kuti n'mipeele kyalo kya Ba-amori.”
11 “Kabili pa baana benu naasaakwilepo bamo kuba bakabika,
ni pa baana benu balumendo naasakwilepo bamo kuba banaziri.
Ati mwe Baizraeli, te i evio?”
Koku i kulanda kwakua Yawe.
12 “Inzi mwe mwaalengiizie banaziri kubala mu kumina bikolani,
ni kukaania bakabika tekuti babikule.”
13 “Evi ndikumisansa
nga tyakala vi-iliyasansa lu-itweme nghano mu masaaka.
14 Olia aliwakundukisia takapusuka,
wa maka, maka akue aakapua,
ni lukale takeepususia.
15 Kalasa wa buta takeesimpa,
aliwakundukisia takazembuluka,
ni museli wa farasi takeepususia.
16 Pa bobo busiku anzia kine kukabe bipami biine bya ba balukale,
baakabutuka tekuba bavwele kantu,”
koku i kulanda kwakua Yawe.