10
Banakazi Bazima bakaanua na Baizraeli
1 Ezra lu-aali wapepa ni kulapila walimukulila ni kuya waipooza pansi pa ntanzi ya Nghanda yakua Leza, libumba likata lya Baizraeli, balalume ni banakazi pamo ni baana, baamukolongheene. Baba bantu baalilile sana ni bulanda bukata.
2 Ni Sekania mwina Yehieli, umo wa mu bena Elamu, waamwanine Ezra nangue, “Fwefue twakiluvia kuli Leza wetu pantu twakyupa banakazi Bazima, inzi anzia kili evio, maswapi akiliko ku Baizraeli palua ozu mulandu.
3 Kansi evi, tukite kipingo ni Leza wetu kya kukaana banakazi bonse, pamo ni bonse baavyelueko kukonkana ni nsokezi yakua tawelenzi, ni ya balia balibanakila milao yakua Leza wetu, kikitue kukonkana ni mizilo.
4 Kansi buuka pantu ozu ni mwilo obe we bunke, ni fwefue tuli pamo nobe. Ikoselezie sie.”
5 Kupwako, Ezra wabuuka ni kubalapizia bakulu ba babitambua, ni Balawi, ni Baizraeli bonse kuti bakabe kukita kukonkana ni totu twebo, ni bo balapa.
6 Ezra i lu-aabuukile kufuma pa ntanzi ya Nghanda yakua Leza, waingila mu muputule wakua Yohanani mwina Eliasibu, koko kwaaleele pasili kulia kantu ao kumina menda, pantu waali walimukulila pa mulandu wa bibalo bya balia baali bafumine mu buzia.
7 Baapundile mu Yudea ni mu Yeruzalemu ku bantu bonse baabwelele kufuma mu buzia kuti bakolonghane mu Yeruzalemu,
8 kabili onse asikasangua waizile mu ezi nsiku itatu, nga mwaalandiile masiiko ni babiloolo, waakapokua bunonsi bwakue bonse, ni ye mwine waakakumbua mu libumba lya balia baabwelele kufuma mu buzia.
9 Bantu bonse ba mu mukowa wakua Yuda ni wakua Benyamina, baakolongheene mu Yeruzalemu mu ezio nsiku itatu, ozo waali mwezi wa fundi pa nsiku 20 ya mwezi, ni bantu bonse baikeele pa kifuka kya pa musolo wa Nghanda yakua Leza balimukututuma na mwezo wa ezi milandu, kabili pantu kwaali ni nvula ikata.
10 Kitambua Ezra waimeene ni kubaana nangue, “Mwakiluvia pa kuupa banakazi Bazima, ni kulunda bilubo pa bilubo bya Baizraeli.
11 Ni pakako, lapile kuli Yawe Leza wa babikolue benu ni kukita mwatoneene, kabili mwikeke ku Bazima bonse ba mu kyalo, pamo ni ku bakazi Bazima.”
12 Kupwako, libumba lyonse lya-asuka na lizui likata nangue, “Tulikukita nga muwalandila.”
13 Baatwaliliile kulanda nangue, “Inzi bantu bavulile, ni nvula ilimukunoka, kabili tetuvinda kwimana panze, ezi miilo te ya busiku bumo ao nsiku ibili sie, pantu tuli ni bilubo bingi pa ozu mulandu.
14 Kansi evi, banombozi betu bemaniineko libumba lyonse, ni balia bonse ba mu mizi yetu boopile banakazi Bazima, baye baiza kubalua bantu pa musita ubapeelue baseekeziiziwe na masiiko ni bapinguzi ba mu muzi. Kine twakita evio, kikonko kyakua Leza kyakaba kufumiiwa pali fwefue, pa mulandu wa bilubo bitwakikita.”
15 Yonatana sie mwina Asaheli, ni Yazeia mwina Tikwa i basyaitabiile ozu mulandu, pamo ni Mesulamu, ni Sabetai Mulawi.
16 Inzi balia baabwelele kufuma mu buzia baakitile mukyaalandiilue, kitambua Ezra waasaakwile bakulu ba mikowa, kukonkana ni mpendua ya mikowa yabo, ni kubatantika kukonkana ni meena abo, baba bantu baikeele mu busiku bwa mambo bwa mwezi wa lyanondo kuti bakebelezie ozu mulandu.
17 Ni mu busiku bwa mambo bwa mwezi wa mambo, baapwile milandu ya balia bonse baupile banakazi Bazima.
Butantiko bwa meena a balia baupile banakazi Bazima
18 Bantu baupile banakazi Bazima:
Mu luvyalo lwa babitambua mwaali:
Ba mu luvyalo lwakua Yoshua mwina Yozadaki ni ba mu luvyalo lwa ba kwakue mwaali: Maseia, ni Eliezeri, ni Yaribu, ni Gedalia.
19 Baba bantu baalaile nangue bakaba kukaana bakazi babo, kabili pantu baali ni kibalo, baeleele mpanga ya pa kisepe pa mulandu wa kibalo kyabo.
20 Mu luvyalo lwakua Imeri, mwaali Hanani ni Zebadia.
21 Mu luvyalo lwakua Harimu, mwaali Maseia, ni Elia, ni Semaia, ni Yehieli, ni Uzia.
22 Mu luvyalo lwakua Pashuri, mwaali Elioenai, ni Maseia, ni Isimaeli, ni Netaneli, ni Yozabadi, ni Elasa.
Mu Balawi mwaali:
23 Yozabadi, ni Simei, ni Kelaia aliwakuutua Kelita, ni Petahia, ni Yuda, ni Eliezeri.
Mu bakemba mwaali:
24 Eliasibu.
Mu bakalinda ba pa milyango mwaali:
Salumu, ni Telemu, pamo ni Uri.
Mu Baizraeli bange:
25 Ba mu luvyalo lwakua Parosi mwaali: Ramia, ni Izia, ni Malkia, ni Miaminu, ni Eleazari, ni Malkia pamo ni Benaya.
26 Mu luvyalo lwakua Elamu, mwaali Matania, ni Zakaria, ni Yehieli, ni Abudi, ni Yeremoti, ni Elia.
27 Mu luvyalo lwakua Zatu, mwaali Elioenai, ni Eliasibu, ni Matania, ni Yeremoti, ni Zabadi, ni Aziza.
28 Mu luvyalo lwakua Bebai, mwaali Yohanani, ni Hanania, ni Zabai, ni Atilai.
29 Mu luvyalo lwakua Bani, mwaali Mesulamu, ni Maluku, ni Adaia, ni Yasubu, ni Seali, ni Yeremoti.
30 Mu luvyalo lwakua Pahati-Moabu, mwaali Adina, ni Kelali, ni Benaya, ni Maaseia, ni Matania, ni Besaleli, ni Binui, pamo ni Manase.
31 Mu luvyalo lwakua Harimu, mwaali Eliezeri, ni Isia, ni Malkia, ni Semaia, pamo ni Simeoni,
32 ni Benyamina, ni Maluku, ni Semaria.
33 Mu luvyalo lwakua Hasumu, mwaali Matenai, ni Matata, ni Zabadi, ni Elifeleti, ni Yeremai, ni Manase, pamo ni Simei.
34 Mu luvyalo lwakua Bani, mwaali Madai, ni Amramu, ni Ueli,
35 ni Benaya, ni Bedia, ni Keluhi,
36 ni Wania, ni Meremoti, ni Eliasibu,
37 ni Matania, ni Matenai, pamo ni Yasu.
38 Mu luvyalo lwakua Binui mwaali Simei,
39 ni Selemia, ni Natana, ni Adaia,
40 ni Makinadebai, ni Sasai, ni Sarai,
41 ni Azaraeli, ni Selenia, ni Semaria,
42 ni Salumu, ni Amaria, ni Yusufu.
43 Mu luvyalo lwakua Nebo mwaali Yeieli, ni Matitia, ni Zabadi, ni Zebina, ni Yadai, ni Yoeli, ni Benaya.
44 Baba bonse i baupile banakazi Bazima, ni bange pakati kabo baali ni banakazi baali basyabavyaliile ni baana. Babo banakazi baakumbilue pamo ni baana babo.